ཁ་སང་དགོང་དྲོར་ཨབ་གྷན་རྒྱལ་སར་འབར་གས་དོན་རྐྱེན་བྱུང་སྟེ་དབྱིན་ཡུལ་གཞུང་ཚབ་ཁང་གི་ལས་བྱེད་པ་གཉིས་ཚུད་པའི་མི་ལྔ་བསད་པ་དང་མི་ ༣༠ ཙམ་ལ་རྨས་སྐྱོན་བཟོས་ཡོད་འདུག
ཁ་སང་ཕྱི་དྲོའི་ཆུ་ཚོད་ ༧ སྟེང་ཨབ་གྷ་ནི་སི་ཐན་གྱི་རྒྱལ་ས་ཀཱ་པོལ་ (Kabul) དུ་རྟེན་གཞི་བྱས་པའི་དབྱིན་ཡུལ་གཞུང་ཚབ་ཁང་གི་རླངས་འཁོར་ཞིག་ལ་འཇིགས་སྐུལ་དྲག་སྤྱོད་པ་གཉིས་ཀྱིས་འབར་རྫས་བཞག་སྟེ། གཞུང་ཚབ་ཀྱི་ལས་བྱེད་གཉིས་ཚུད་པའི་མི་ ༥ བསད་པ་དང་། གཞན་མི་ ༣༠ ལ་རྨས་སྐྱོན་ཚབས་ཆེན་པོ་བཟོས་ཡོད་འདུག སྐབས་དེར་ཨབ་གྷན་བདེ་སྲུང་དམག་མི་དང་འཇིགས་སྐུལ་བའི་བར་མེ་མདའ་རྒྱག་རེས་བྱས་མཐར་འཇིགས་སྐུལ་བ་གཉིས་བསད་ཡོད་འདུག གཞན། ཨ་རིའི་རོགས་སྐྱོར་ཚོགས་པ་ཞིག་གི་ར་སྐོར་ནང་ཤུགས་ཚད་མཐོ་བའི་འབར་གས་དོན་རྐྱེན་ཞིག་བྱུང་ཡོད་ཀྱང་། ཁང་པ་དང་རླངས་འཁོར་འགར་གཏོར་བཤིག་ཐེབས་པ་ལས་མི་ལ་ཤི་རྨས་རིགས་བྱུང་མི་འདུག
འདིའི་ཐད་ཨབ་གྷན་བདེ་སྲུང་དམག་དཔུང་ལས་ཁུངས་ཀྱི་དམག་དཔོན་ཤ་ཧིན་གྱིས་གསར་འགོད་པར། ཊ་ལི་སྦིན་འཇིགས་སྐུལ་དྲག་སྤྱོད་པས་ཕྱི་རྒྱལ་ཁག་གི་ཕྱི་འབྲེལ་མི་སྣ་གསོད་ཆེད་རྒྱལ་སའི་ས་གནས་ཁག་གཉིས་ནང་འབར་གས་དོན་རྐྱེན་བཟོས་ཡོད་ཀྱང་། བདེ་སྲུང་མི་སྣས་རྗེས་འདེད་བྱས་ཏེ་དྲག་སྤྱོད་པ་གཉིས་བསད་ཡོད་ཅེས་བརྗོད་འདུག
དབྱིན་ཡུལ་ཕྱི་སྲིད་ལས་ཁུངས་ཀྱི་དྲུང་ཆེ་ཧྥེ་ལེ་པུ་ (Phillip Hammond) ཡིས་ཐེངས་འདིའི་འབར་གས་དོན་རྐྱེན་ཁྲོད་དབྱིན་ཡུལ་གྱི་ལས་བྱེད་གཉིས་ཀྱི་ཚེ་སྲོག་ཤོར་ཡོད་སྟབས། དབྱིན་གཞུང་གིས་ཁོང་གཉིས་ཀྱི་ཤུལ་ལུས་ནང་མི་ཚོར་སེམས་གསོ་དང་གདུང་སེམས་སྐྱེད་བྱེད་ཀྱིན་ཡོད་ལ། འབྱུང་འགྱུར་ཨབ་གྷན་གྱི་བདེ་འཇགས་ལ་འཇིགས་སྐུལ་དྲག་སྤྱོད་པའི་ཉེན་ཁ་ཅི་ཙམ་ཡོད་པ་གསལ་བཤད་བྱས་ཡོད་ཅེས་བརྗོད་འདུག
འབར་གས་དོན་རྐྱེན་ཐད་ཨབ་གྷན་ནང་སྲིད་ལས་ཁུངས་ཀྱིས་གསལ་བསྒྲགས་སྤེལ་བ་ལྟར་ན། ཐེངས་འདིར་རང་སྲོག་གཅོད་མཁན་འཇིགས་སྐུལ་དྲག་པ་ཞིག་གིས་སྦག་སྦག་སྟེང་འབར་རྫས་བཞག་སྟེ་འཇབ་རྒོལ་བྱས་ཡོད་པ་དང་གཞན་དེས་རླངས་འཁོར་ནང་འབར་རྫས་བཞག་ཡོད། འཇིགས་སྐུལ་དྲག་སྤྱོད་པ་ཚོས་ཨབ་གྷན་ནང་ཡོད་པའི་ཕྱི་རྒྱལ་ཁག་གི་གཞུང་ཚབ་མི་སྣ་དང་ལས་བྱེད་གསོད་པའི་དམིགས་ཡུལ་ཙམ་མིན་པར། ཨབ་གྷན་མི་མང་ལའང་ཉེན་ཁ་ཆེན་པོ་ཡོད་སྐོར་བརྗོད་འདུག
ཟླ་འདིའི་ཚེས་ ༢༤ ཉིན་འཇིགས་སྐུལ་པས་རྒྱལ་ས་ཀཱ་པོལ་གྱི་ཉེ་འགྲམ་གཞུང་ལམ་སྟེང་འབར་རྫས་བཞག་སྟེ་ཨ་རིའི་དམག་མི་གཉིས་བསད་ཡོད་འདུག གནད་དོན་དབྱེ་ཞིབ་པ་ཚོས་ནུབ་ཕྱོགས་མཉམ་འབྲེལ་དམག་དཔུང་ཨབ་གྷན་ནས་ཕྱིར་འཐེན་བྱས་ཚེ། ཊ་ལི་སྦིན་འཇིགས་སྐུལ་ཚོགས་པས་ཨབ་གྷན་དང་པ་ཀི་སི་ཐན་གཉིས་ཀྱི་བདེ་འཇགས་ཉེན་ཁ་ཆེན་པོ་ཆགས་རྒྱུ་ཡིན་ཚུལ་བརྗོད།
