༧གོང་ས་མཆོག་གིས་ད་ལྟའི་དུས་ཚོད་འདིའི་ནང་ཆོས་སྤྱི་དང་ལྷག་པར་དཔལ་ནཱ་ལེན་ཊའི་མཁས་པ་ཚོས་མཛད་པའི་གཞུང་དེ་དག་ལ་འགྲེལ་བཤད་ཅིག་རྒྱག་དགོས་ན་བོད་ཡིག་ལས་ལྷག་ཅིག་གཅིག་ཀྱང་མེད་སྟབས། ད་ལྟ་ཀླུ་སྒྲུབ་ཡབ་སྲས་དང་ཕྱོགས་གླང་ཆོས་གྲགས། ཐོགས་མེད་སོགས་ཕེབས་ན་བོད་པར་ལག་ཁྱེར་ཨང་དང་པོ་སྤྲོད་ངེས་ཡིན་གསུངས།
དེ་རིང་སྔ་དྲོའི་ཆུ་ཚོད་ ༩།༠༠ ཐོག་རྒྱུད་སྟོད་གྲྭ་ཚང་གི་ཚོགས་ཁང་དུ། རྗེ་ཙོང་ཁ་པ་ཆེན་པོས་དཔལ་གསང་བ་འདུས་པ་འགྲེལ་པ་བཞི་སྦྲགས་ལྗགས་རྩོམ་མཛད་དེ་ལོ་ ༦༠༠ འཁོར་བའི་རྗེས་དྲན་དང་འབྲེལ། སྔགས་ཀྱི་མཁས་པའི་བགྲོ་གླེང་ཞིག་ཚོགས་ཡོད་ཅིང་། ཚོགས་མགོན་དུ་༧གོང་ས་མཆོག་གཙོས་པའི་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་གི་ཆོས་རྗེ་རྣམ་གཉིས། གདན་ས་ཁག་དང་། རྒྱུད་གྲྭ་སྟོད་སྨད། སྲད་རྒྱུད་གྲྭ་ཚང་གི་མཁན་པོ་ལས་ཟུར་རྣམ་པ་དང་། སྲིད་ཚབ་ཆོས་རིག་བཀའ་བློན་གྱི་དབུས་པའི་བཀའ་བློན་རྣམ་པ། སྤྱི་འཐུས་ཚོགས་གཙོ་གཞོན་གཙོས་པའི་རྒྱུན་ལས་རྣམ་པ། བོད་མིའི་སྒྲིག་འཛུགས་རང་དབང་ཅན་གྱི་སྡེ་ཚན་གྱི་འགན་འཛིན་རྣམ་པ། དྷ་སའི་ཉེ་འཁོར་གྱི་གཞུང་འབྲེལ་མིན་པའི་ཚོགས་པ་དང་སློབ་གྲྭ་ཁག་གི་འགན་འཛིན་རྣམ་པ་གཙོས། ཕྱོགས་མཐའ་ཁག་ནས་ཕེབས་པའི་སྐྱ་སེར་མི་མང་བཅས་ཁྱོན་མི་ ༢༥༠༠ ཡས་མས་འདུ་འཛོམས་གནང་སོང་།
རྗེས་དྲན་མཛད་སྒོའི་ཐོག་མར་རྒྱུད་སྟོད་གྲྭ་ཚང་གི་དགེ་འདུན་པ་ཁག་ཅིག་གིས་དུང་རྒྱ་གླིང་དཀྲོལ་ནས་༧གོང་ས་མཆོག་གཙུག་ལག་ཁང་དུ་གདན་ཞུ་དང་འབྲེལ་རྟེན་གཙོ་ཁག་གི་མདུན་དུ་སྣང་གསལ་ཞལ་འབྱེད་དང་། བཞུགས་ཁྲིར་འཁོད་མཚམས་མཎྡལ་རྟེན་གསུམ་འདེགས་འབུལ་དང་འབྲེལ། སྲད་རྒྱུད་གྲྭ་ཚང་དང་རྒྱུད་གྲྭ་སྟོད་སྨད་གཉིས་ཀྱི་དགེ་འདུན་པ་ཚོས་རྒྱུད་ཀྱི་ཤིས་ཚིག་གསུང་འདོན་གནང་རྗེས། མ་འོངས་པར་རྒྱུད་ཀྱི་འཆད་ཉན་དར་རྒྱས་ཡུན་གནས་ཡོང་བའི་རྟེན་འབྲེལ་མཚོན་ཆེད་༧གོང་ས་མཆོག་ནས་རྒྱུད་པ་གྲྭ་ཚང་གསུམ་གྱི་མཁན་པོ་རྣམས་ལ་འགྲེལ་དབང་དང་བཅས་འགྲེལ་བ་བཞི་སྦྲགས་ཀྱི་གླེགས་བམ་གསོལ་སྩལ་བསྒྲུབས་མཚམས། རྒྱུད་སྟོད་མཁན་པོ་བྱ་རྡོ་རིན་པོ་ཆེ་མཆོག་གིས་རྗེས་དྲན་དུས་སྟོན་གྱི་ངོ་སྤྲོད་གསུང་བཤད་གནང་དོན། འདི་ལོ་༧གོང་ས་མཆོག་ལ་བཀའ་དྲིན་རྗེས་དྲན་ཞུ་རྒྱུའི་ལོར་སྲུང་བརྩི་ཞུ་བཞིན་ཡོད་པ་དང་བསྟུན་ཏེ། རྗེ་རིན་པོ་ཆེས་དཔལ་གསང་བ་འདུས་པའི་འགྲེལ་པ་བཞི་སྦྲགས་མཛད་ནས་ལོ་ ༦༠༠ འཁོར་བའི་སྐབས་འདིར་བཀའ་དྲིན་རྗེས་དྲན་དང་། བསྟན་འགྲོའི་དོན་དུ་ཞབས་པད་བསྐལ་བརྒྱར་བརྟན་པའི་ཆེད་དུ་དཔལ་གསང་བ་འདུས་པའི་ཆོ་ག་དང་འབྲེལ་བའི་འབུམ་ཚོགས་ཤིག་ཞབས་སྒྲུབ་ཞུ་འཆར་དང་། གཙོ་ཆེར་གྲྭ་ཚང་འདིའི་ལས་གནས་འདུས་མང་ནས་བསྟན་པའི་གཞི་མ་ཚུལ་ཁྲིམས་དང་སྒྲིག་སྡོམ་རང་ཁྲིམས་ཐེག་པ་འཁུར་ལེན་གྱིས་རྗེ་རྒྱལ་བ་གཉིས་པའི་བཀའ་གསུང་མདོ་སྔགས་བཤད་སྒྲུབ་ཆེད་གཉེར་དང་། ཆོ་ག་ཕྱག་ལེན་ཕྱི་ནང་ཤེས་ཡོན་བཅས་ལ་འབད་བརྩོན་ལྷོད་མེད་ཞུ་བ་དང་། ལམ་སྟོན་བཀའ་སློབ་བཞིན་གྲྭ་ཚང་འདིའི་སྒྲིག་ཁུངས་སུ་གཏོགས་པ་སུ་ཡིན་རུང་སྤྱིར་སྐྱབས་འགྲོའི་བསླབ་བྱའི་དགོངས་དོན་དང་། སྒོས་སུ་འཇམ་མགོན་བླ་མ་ཙོང་ཁ་པ་ཆེན་པོའི་སྐྱེས་བུ་གསུམ་གྱི་འགྲོས་དང་མཐུན་པའི་ཡི་དམ་ཆོས་སྲུང་གཏན་ལ་ཕབ་པ་ལྟར། འཇིག་རྟེན་དྲེགས་པ་གཙོ་བཞེས་ཅན་དོལ་རྒྱལ་ལམ་ཤུགས་ལྡན་བསྟེན་སྲོལ་གྱི་དྲི་མ་ཙམ་ཡང་མེད་པར། སྔར་གྱི་རྒྱུད་ཆེན་གོང་མ་རིམ་བྱོན་གྱི་ཕྱག་ལེན་གཙང་མ་རྒྱུན་འཁྱོངས་ཆོད་སེམས་བརྟན་པོ་རྫོགས་མེད་སྙིང་བཅངས་ཀྱི་སྒོ་ནས་བཀའ་དྲིན་རྗེས་དྲན་ཞུ་བཞིན་ཡོད། ཅེས་སོགས་གསུངས་སོང་།
དེའི་རྗེས་སྲིད་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་གསུང་བཤད་གནང་དོན། དེ་རིང་འཇམ་མགོན་བླ་མ་ཙོང་ཁ་པ་ཆེན་མོ་མཆོག་གིས་སྐུ་གསུང་ཐུགས་དང་མཛད་པ་འཕྲིན་ལས་ཀྱི་བཀའ་དྲིན་རྗེས་དྲན་ཞུ་བཞིན་ཡོད་པ་མ་ཟད། ལོ་ ༦༠༠ སྔོན་དུ་ཙོང་ཁ་པ་ཆེན་པོས་གསུངས་པའི་སྟོན་པའི་ཆོས་དེ་བོད་ནང་དར་ཁྱབ་ཆེན་པོ་ཕྱིན་ཡོད་པ་ལྟར་ད་ལྟ་ཡང་དེ་བཞིན་ཡོད་སྟབས། རྗེ་ཙོང་ཁ་པ་ཆེན་པོ་མཆོག་གིས་དགའ་ལྡན་ཡིད་དགའ་ཆོས་འཛིན་ནས་ཐུགས་བརྩེ་བ་ཆེན་པོས་མར་གཟིགས་ནས་བཞུགས་ཡོད་པ་རེད་བསམ་གྱི་འདུག གང་ཡིན་ཞེ་ན། བོད་གངས་ཅན་ལྗོངས་ཀྱི་མི་མང་ལ་སྡུག་བསྔལ་དང་ཉམས་ཆག་གང་འདྲ་ཞིག་ཕྱིན་པ་ཡིན་ཡང་། བོད་མི་ཚོའི་སེམས་ནང་གཏིང་ཟབ་པོ་ཞིག་ཟུག་ནས་འགྱུར་བ་དང་ཉམས་ཆག་ནམ་ཡང་མེད་པའི་ཐོག་ནས་ནང་ཆོས་ཉམས་ལེན་བྱེད་དང་བྱེད་མུས་ཡིན། ཆོས་དུག་རེད་ཟེར་མཁན་གྱི་རྒྱ་ནག་དམར་པོའི་དབུ་ཁྲིད་ཚོས་ལོ་མང་རིང་བོད་ནང་དར་བའི་ནང་ཆོས་དང་བོད་པའི་ཐུན་མོང་མིན་པའི་རིག་གཞུང་དག་རྩ་མེད་གཏོང་ཐབས་ལ་རིག་གནས་གསར་བརྗེ་གཙོས་པའི་ཇུས་ངན་འདྲ་མིན་བཀོལ་སྤྱོད་བྱས་ཏེ། བོད་ཀྱི་དགོན་སྡེ་མང་ཆེ་བ་གཏོར་བཤིག་བཏང་ཡོད་ཀྱང་། བརྒྱུད་ཅུ་གྱ་གྲངས་རྗེས་བོད་ནང་གི་གཞོན་སྐྱེས་ཚོས་རང་འཁུར་བྱས་ནས་ནང་ཆོས་ལ་དད་ཞེན་ ཆེན་པོས་ཉམས་པ་སླར་གསོ་དང་མི་ཉམས་རྒྱུན་འཛིན་བྱས་ཏེ་སྔར་ལྷག་དར་སྤེལ་བཏང་བ་མ་ཟད། ད་ལྟ་རྒྱ་གར་གཙོས་པའི་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བླ་སྤྲུལ་དགེ་བཤེས་དང་། བོད་རིགས་གཞོན་སྐྱེས་རྣམ་པས་ནང་ཆོས་སྦྱོང་སྤྱོད་སྤེལ་གསུམ་བྱས་ནས་བསྟན་པའི་མངའ་ཐང་རྒྱས་ཏེ། འཛམ་གླིང་གང་སར་དར་སྤེལ་བྱེད་ཐུབ་ཡོད་པ་མ་ཟད། ད་ལྟ་ང་ཚོས་ངོམ་ས་ཞིག་དང་འཛམ་གླིང་མི་མང་གི་ང་ཚོར་འཁོར་ས་ཞིག་ཀྱང་ཆགས་ཡོད། ཅེས་གསུངས་སོང་།
ཁོང་གིས་མུ་མཐུད་མ་འོངས་ལས་དོན་བྱེད་ཕྱོགས་དང་འབྲེལ་བའི་ཐོག་གསུངས་དོན། བོད་མི་རིགས་དང་བསྟན་སྲིད་ཆེད་ད་ལྟ་ཡོད་པའི་ནང་ཆོས་འདི་ཉམས་པ་སླར་གསོ་དང་མི་ཉམས་རྒྱུན་འཛིན་དང་འབྲེལ་འཕེལ་རྒྱས་གཏོང་དགོས་པ་མ་ཟད། བོད་བརྒྱུད་ནང་བསྟན་ཡོད་པའི་སྔར་སྲོལ་བཟང་པོ་དག་གཞི་ལ་བཞག་ནས་བསླབ་པ་སློབ་གཉེར་བྱེད་ཕྱོགས་ལ་བསྒྱུར་བཅོས་དང་བསྐྱར་བཅོས་གཏོང་དགོས་པ་གང་ཡོད་པར་གཟིགས་ཏེ། ༧གོང་ས་མཆོག་གིས་ལམ་སྟོན་ཕེབས་པ་བཞིན་དུས་རབས་ཉེར་གཅིག་པའི་ནང་པ་ཞིག་ཡོང་ཐབས་ལ་འབད་བརྩོན་གནང་རྒྱུ་གལ་ཆེན་པོ་ཆགས་ཡོད། དེ་བཞིན་ཆོས་རིག་ལས་ཁུངས་ངོས་ནས་ ༢༠༡༦ ལོའི་༧གོང་ས་མཆོག་གི་སྐུའི་འཁྲུངས་སྐར་ཉིན་དགེ་བཤེས་མ་ ༢༢ དང་། ༢༠༡༧ ལོའི་སྐུའི་འཁྲུངས་སྐར་ཉིན་གཞུང་ཆེན་རིགས་གཅིག་རྐང་འཛིན་པ་ ༢༡ ཙམ་ཞིག་འཐོན་གྱི་ཡོད་པ་མ་ཟད། ད་ལྟ་ང་ཚོས་དགོན་སྡེ་གྲྭ་ཚང་ཁག་གི་ལས་དོན་དག་ཡར་རྒྱས་དང་གསར་གཏོད་ཡོང་ཐབས་ལ་འབད་བརྩོན་ཞུ་བཞིན་ཡོད། ཅེས་སོགས་གསུངས་སོང་།
དགའ་ལྡན་ཁྲི་རིན་པོ་ཆེ་མཆོག་གིས་གསུངས་དོན། ད་ལྟ་གསང་སྔགས་ཀྱི་རྒྱུད་སྡེ་དག་མ་ཉམས་པ་གནས་ཐུབ་པ་དེ་ནི་གཙོ་བོ་བསྟན་འཛིན་གྱི་སྐྱེས་བུ་དམ་པ་རྣམས་ཀྱིས་མཛད་འཕྲིན་ལ་བརྟེན་ནས་བྱུང་བ་ཞིག་ཆགས་ཡོད་པ་ དང་། རྗེ་རིན་པོ་ཆེ་མ་བྱོན་པའི་སྔོན་ལ་ས་སྐྱ་དང་རྙིང་མ། བཀའ་བརྒྱུད་སོགས་ཀྱིས་བསྟན་པ་དར་བར་བརྟེན་ཏེ་རྗེ་རིན་པོ་ཆེས་བསྟན་པ་དག་ཐེར་མཛད་པར་སྟ་གོན་ལྟ་བུ་ཞིག་ཆགས་ཡོད་པར་བརྟེན། རྗེ་རིན་པོ་ཆེ་བྱོན་རྗེས་བསྟན་པ་ཉམས་པ་སླར་གསོ་དང་མི་ཉམས་སོར་ཆུད་གནང་བ་རེད། ལྷག་པར་དུ་རྗེ་རིན་པོ་ཆེས་དཔལ་གསང་བ་འདུས་པ་ཙམ་མིན་པར་བསྟན་པ་སྤྱི་ལ་གསན་བསམ་བཞེས་ནས་སྒྲུབ་པའི་ཉམས་ལེན་མཛད་ཡོད། མ་འོངས་པར་བསྟན་པ་འདི་གནས་དང་མི་གནས་ནི་ཆོས་བྱེད་མཁན་ཚོའི་བཤད་སྒྲུབ་གཉིས་ལྡན་གྱི་བསྟན་པ་འཛིན་སྐྱོང་གང་འདྲ་བྱེད་མིན་ལ་རག་ལས་ཡོད་པ་མ་ཟད། བསྟན་འཛིན་གྱི་སྐྱེས་ཆེན་དམ་པ་ཚོའི་སྐུ་ཚེ་ཡུན་གནས་ཐུབ་ཐབས་སུ་ང་ཚོས་སྤྱི་དོན་གྱི་བསོད་ནམས་གསོག་རྒྱུ་གལ་ཆེན་པོ་ཆགས་ཡོད། ཅེས་སོགས་གསུངས་སོང་།
དེའི་རྗེས་༧གོང་ས་མཆོག་གིས་བཀའ་སློབ་གནང་དོན། དཔལ་ནཱ་ལེན་ཊའི་ཆོས་བརྒྱུད་འཛིན་མཁན་གྱི་ནང་ཀླུ་སྒྲུབ་ཡབ་སྲས་དང་། ཐོགས་མེད་སྐུ་མཆེད་ལྟ་བུའི་རིག་པའི་ལམ་ནས་ཟབ་པ་དང་རྒྱ་ཆེ་བའི་གཞུང་དོན་གཏན་ ལ་ཕབ་མཁན་ཕལ་ཆེར་བོད་གཅིག་པུ་མ་གཏོགས་མེད་སྟབས། དེང་སང་འཛམ་གླིང་འདིའི་ཐོག་ནང་པ་དུང་ཕྱུར་གཅིག་ཙམ་ཡོད་པའི་ནང་ནས་དཔལ་ནཱ་ལེན་ཊའི་མཁས་པའི་དབང་པོ་དེ་དག་གི་གཞུང་ལ་ཐོས་བསམ་སློབ་གཉེར་གནང་སྟེ། ལོ་ཉི་ཤུ་སུམ་ཅུར་བསྟན་པ་འཛིན་སྐྱོང་སྤེལ་གསུམ་བྱེད་མཁན་དེ་ཡང་ཕལ་ཆེར་བོད་ གཅིག་པུ་མ་གཏོགས་ཡོད་མ་རེད། ང་ཚོ་བོད་མི་ཡ་ས་དྲུག་གིས་ཆོས་ལ་དད་པ་བྱེད་ཀྱི་ཡོད་རེད། ཡིན་ཡང་ཆོས་བྱེད་མཁན་དེས་ཆོས་ལ་སློབ་སྦྱོང་བྱེད་དགོས་པ་རེད་མ་གཏོགས། སོ་སོའི་ཁྱིམ་ཚང་ནང་མཆོད་གཤོམས་དང་ཡོན་ཆབ་ཕུལ་བ་དེ་འདྲ་ཞིག་གི་ཐོག་ནས་ཕྱིན་ཚེ། སངས་རྒྱས་ཀྱི་ཆོས་དེ་ཁྱད་དུ་འཕགས་པ་དང་ཐུན་མོང་མ་ཡིན་པ་ཞིག་ཡིན་པ་ཤེས་རྒྱུ་ཁག་པོ་ཆགས་ཡོད། ཅེས་གསུངས་སོང་།
༧གོང་ས་མཆོག་གིས་མུ་མཐུད་དུ་གསུང་དོན། ངས་ནང་པའི་ཆོས་དེ་ཆོས་གཞན་དག་ལས་ཡག་གི་རེད་ནམ་ཡང་ཟེར་གྱི་མེད། ཡག་ཉེས་ཟེར་བ་དེ་སོ་སོར་ཕན་ཐོགས་ཡོད་མེད་ལ་བསམ་བློ་གཏོང་དགོས་པ་རེད། སྨན་གཅིག་ཡར་བླངས་ཏེ་དེ་ཡག་ཤོས་རེད་ཅེས་ཟེར་ཤེས་ཀྱི་མ་རེད། ན་ཚ་འགའ་ཤས་ལ་སྨན་དེས་གནོད་སྲིད་པ་ཞིག་ཡིན་སྟབས། ང་ཚོས་ན་ཚ་ལ་བལྟས་ཏེ་སྨན་དེ་ཡག་ཤོས་རེད་ཟེར་དགོས་ཀྱི་ཡོད་པ་ལྟར། ང་རང་ཚོ་སེམས་ཅན་གྱི་ཁམས་དང་མོས་པ་སྣ་ཚོགས་ཡོད་པའི་ནང་། ཁམས་དང་མོས་པར་འཚམ་པའི་ཆོས་དེ་རན་པོ་ཡོད་སྟབས། ནང་པའི་ཆོས་དེ་ཆོས་ཚང་མའི་ནང་ནས་ཡག་ཤོས་རེད་ལབ་ཐུབ་ཀྱི་མེད་ཀྱང་། ལྟ་གྲུབ་ཀྱི་ཐོག་ནས་ནང་པའི་ཆོས་དེ་རྒྱས་ཤོས་དང་ཟབ་ཤོས་རེད་ཅེས་བཤད་ཆོག་པ་ཞིག་ཆགས་ཡོད། རྒྱུ་མཚན་གཅིག་ནས་གཉིས་བགྲང་སྟེ་བཤད་རྒྱུ་ཡོད་པའི་ཆོས་ཤིག་ཆགས་ཡོད། ཅེས་གསུངས་གནང་སོང་།
༧གོང་ས་མཆོག་གིས་བོད་བརྒྱུད་ནང་བསྟན་གྱི་གལ་འགངས་སྐོར་ལ་བཀའ་སློབ་བསྩལ་དོན། ང་རང་ཚོར་མེས་པོ་ཚོས་དཀའ་ལས་བརྒྱབ་ནས་བསྒྱུར་བའི་ཆོས་དེ་འདྲ་ཞིག་ཡོད་པ་རེད། དཔེར་ན། ང་རང་ཚོའི་སྐད་ཀྱི་ནང་དུ་བཀའ་འགྱུར་བསྟན་འགྱུར་པོ་ཏི་ ༣༠༠ ལྷག་ཅིག་ཡོད་པའི་ཁྲོད་ནས་རྒྱ་ནག་ནས་བསྒྱུར་བའི་པོ་ཏི་ ༡༠ ལྷག་ཅིག་མ་གཏོགས་གཞན་མང་ཆེ་བ་རྒྱ་གར་ནས་བསྒྱུར་བ་ཤ་སྟག་རེད། དུས་ཚོད་འདིའི་ནང་ཆོས་སྤྱི་དང་ལྷག་པར་དཔལ་ནཱ་ལེན་ཊའི་མཁས་པ་ཚོས་མཛད་པའི་གཞུང་དེ་དག་ལ་འགྲེལ་བཤད་ཅིག་རྒྱག་དགོས་ན། བོད་ཡིག་ལས་ལྷག་ཅིག་གཅིག་ཀྱང་ཡོད་མ་རེད། ང་ཚོ་བོད་ལ་སངས་རྒྱས་པའི་ཆོས་ཆ་ཚང་བ་ཞིག་ཡོད་རེད། ད་ལྟ་ཀླུ་སྒྲུབ་ཡབ་སྲས་དང་། ཕྱོགས་གླང་ཆོས་གྲགས། ཐོགས་མེད་སྐུ་མཆེད་སོགས་འཛམ་གླིང་འདིའི་ཐོག་ཕེབས་པ་ཡིན་ཚེ། ཕལ་ཆེར་ང་ཚོ་བོད་པ་ཚོར་ལག་ཁྱེར་ཨང་དང་པོ་དེ་གནང་གི་རེད་བསམ་གྱི་འདུག དེར་བརྟེན། ང་རང་ཚོར་ཡོད་པའི་སངས་རྒྱས་ཀྱི་ཆོས་དེ་སྤུས་དག་པོ་ཞེ་དྲག་རེད་འདུག ད་ལྟ་རྗེ་རིན་པོ་ཆེས་མཛད་པའི་འགྲེལ་པ་བཞི་སྦྲགས་དེ་རྒྱུད་གྲྭ་སྟོད་སྨད་གཉིས་ཀྱིས་སྐྱོར་བཞིན་པ་དེ་མ་གཏོགས་གཞན་ཕལ་ཆེར་རྒྱུན་ཆད་ཚར་ཡོད་སྟབས། མ་འོངས་པར་སྐྱ་སེར་ཕོ་མོ་དབྱེ་བ་མེད་པས་ནང་ཆོས་ལ་སློབ་སྦྱོང་བྱས་ཏེ། སངས་རྒྱས་པའི་གཞུང་གི་ནང་བཤད་པའི་སེམས་ཀྱི་རྣམ་གཞག་དེ་དག་ཤེས་ཐབས་བྱས་ཏེ་འགྲོ་བ་མིའི་བཟང་སྤྱོད་དང་ཡ་རབས་སྤྱོད་བཟང་ཐོག་སྦྱངས་པ་བྱ་རྒྱུ་གལ་ཆེན་པོ་ཆགས་ཡོད། ཅེས་སོགས་གསུངས་སོང་།
མཇུག་ཏུ་གསར་འགོད་པས་རྒྱུད་སྨད་གྲྭ་ཚང་གི་ཕྱག་མཛོད་བསྟན་འཛིན་འཕྲིན་ལས་ལགས་སུ་རྗེས་དྲན་ཞུ་ལུགས་ནང་ནས་གལ་ཆེ་ཤོས་དེ་གང་ཆགས་ཡོད་མེད་དྲིས་པར་ཁོང་གིས། སྤྱིར་བཏང་རྗེས་དྲན་ལ་སྐུ་གསུང་ཐུགས་གསུམ་ངོས་ནས་རྗེས་དྲན་ཞུ་སྟངས་འདྲ་མིན་ཡོད་ཀྱང་། དེའི་ནང་ནས་གསུང་གི་རྗེས་དྲན་དེ་གཙོ་བོ་ཞིག་ཆགས་ཀྱི་ཡོད། དེ་ཡང་རྗེ་རིན་པོ་ཆེ་མཆོག་གིས་མཛད་པ་ཀུན་གྱི་ནང་ནས་གསུང་ཀྱི་མཛད་པར་རྗེས་དྲན་ཞུ་རྒྱུ་དེ་གལ་འགངས་ཆེ་ཤོས་ཡིན་གསུངས་ཡོད་སྟབས། ད་རེབ་རྗེ་རིན་པོ་ཆེ་མཆོག་གི་གསུང་གི་མཛད་པ་འགྲེལ་པ་བཞི་སྦྲགས་ལྗགས་རྩོམ་མཛད་ནས་ལོ་ ༦༠༠ འཁོར་བའི་དུས་དྲན་སྲུང་བརྩི་ཞུ་བཞིན་དེ་ཆགས་ཡོད། ཅེས་སོགས་བརྗོད་བྱུང་།
གསར་འགོད་པ། དོན་གྲུབ།
