ཨ་རིའི་གྲོས་ཚོགས་གོང་མའི་གསང་བའི་ཚོགས་ཆུང་གིས་ཨ་རིའི་སྲིད་འཛིན་བྷོ་ཤིའི་སྐབས་འཇིགས་སྐུལ་རིང་ལུགས་པ་ཚོར་མནར་གཅོད་གཏོང་སྟངས་སྐོར་གྱི་སྙན་ཐོ་ཞིག་བསྒྲག་རྒྱུ་ཡིན་པའི་གསལ་བསྒྲགས་བྱས་འདུག
དེ་རིང་ཨ་རིའི་གྲོས་ཚོགས་གོང་མའི་གསང་བའི་ཚོགས་ཆུང་གིས་གནས་ཚུལ་ཕྱི་བསྒྲགས་བྱས་པའི་ནང་། ༢༠༠༡ ལོའི་ཟླ་ ༩ ཚེས་ ༡༡ ཉིན་ཨོ་ས་མ་བྷིན་ལ་ཌིན་(Osama Bin ladin)གྱི་མགོ་ཁྲིད་འོག་ཁ་ཆེ་འཇིགས་སྐུལ་ཚོགས་པ་ (Al-Qaida) ཡིས་ནེའུ་ཡོག་གྲོང་ཁྱེར་ནང་གི་འཛམ་གླིང་ཚོང་ལས་ལྟེ་གནས་ཁང་བརྩེགས་གཉིས་གཏོར་བཤིག་བཏང་རྗེས། སྐབས་དེའི་ཨ་རིའི་སྲིད་འཛིན་བྷོ་ཤིའི་གཞུང་གི་ཨ་རིའི་གསང་བའི་ལས་ཁུངས་ (CIA)ཀྱིས་འཇིགས་སྐུལ་རིང་ལུགས་པ་དང་དོགས་ཡོད་ཉེས་ཅན་མང་པོ་འཛིན་བཟུང་བྱས་ཏེ། གསང་བའི་གནས་ཚུལ་བསྡུ་རུབ་ཆེད་ཐབས་ལམ་འདྲ་མིན་ཐོག་འདྲི་རྩད་མནར་གཅོད་བཏང་བའི་ཤོག་ངོས་ ༢༨༠ ཅན་གྱི་སྙན་ཐོ་ཞིག་ཁྱབ་བསྒྲགས་བྱ་རྒྱུའི་ཐག་གཅོད་བྱས་ཡོད་འདུག
སྲིད་འཛིན་བྷོ་ཤི་ཡིས་ཨ་རིའི་གཞུང་ལོ་བརྒྱད་ལ་བཟུང་བའི་རིང་། ཨ་རིའི་གསང་བའི་ལས་ཁུངས་ཀྱིས་འཇིགས་སྐུལ་པ་དང་དོགས་ཡོད་ཚོར་མནར་གཅོད་བྱེད་སྟངས་སྐོར་ལ་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་དང་ རྒྱལ་སྤྱིའི་ཉེས་ཡངས་ཚོགས་པ། འགྲོ་བ་མིའི་ཐོབ་ཐང་རྟོག་ཞིབ་ཚོགས་པ་བཅས་ཀྱིས་སྐྱོན་བརྗོད་ཆེན་པོ་བྱེད་བཞིན་ཡོད་སྟབས། སྲིད་འཛིན་ཨོ་བྷ་མའི་སྐབས་ནས་ཨ་རིའི་གྲོས་ཚོགས་གོང་མའི་གསང་བའི་ཚོགས་ཆུང་གིས་གནས་ཚུལ་དེའི་ཐོག་ཞིབ་འཇུག་མགོ་འཛུགས་བྱས་པ་ཞིག་ཡིན་འདུག
ད་ལྟའི་ཆར་ཨ་རིའི་གསང་བའི་ལས་ཁུངས་དང་རྒྱལ་དོན་ལས་ཁུངས་ཀྱིས་སྙན་ཐོ་དེ་ཕྱིར་བསྒྲགས་བྱེད་པར་དགག་པ་རྒྱག་གི་ཡོད་པ་དང་། ཨ་རིའི་ཁྲིམས་དོན་ལས་ཁུངས་དང་ཕོ་བྲང་དཀར་པོ། གྲོས་ཚོགས་གོང་མའི་གསང་བའི་ཚོགས་ཆུང་བཅས་ཀྱིས། ཨ་རིའི་མི་མང་དང་འཛམ་གླིང་མི་མང་ལ་ཨ་རིའི་གསང་བའི་ལས་ཁུངས་ཀྱིས་འཇིགས་སྐུལ་རིང་ལུགས་པ་ཚོར་མནར་གཅོད་གང་འདྲ་གཏོང་གི་ཡོད་མེད་ཕྱི་གསལ་ནང་གསལ་ཡོང་ཆེད་སྙན་ཐོ་དེ་ཕྱིར་བསྒྲགས་བྱེད་དགོས་ཚུལ་རྗོད་ཀྱིན་ཡོད་འདུག
འདིའི་ཐད་ཁ་སང་ཨ་རིའི་ཕོ་བྲང་དཀར་པོའི་མགྲིན་ཚབ་པ་ཨུར་ནེ་སི་ཊི་ (Josh Earnest) ཡིས་གསར་འགོད་གསལ་བསྒྲགས་སྤེལ་ཏེ། ཨ་རིའི་གཞུང་གིས་འཇིགས་སྐུལ་རིང་ལུགས་པར་དམག་འཁྲུག་བརྒྱབ་པའི་རིང་། ཨ་རིའི་གསང་བའི་ལས་ཁུངས་ཀྱིས་འཇིགས་སྐུལ་པ་དང་དོགས་ཡོད་ཚོ་འཛིན་བཟུང་བྱས་ཏེ། ཁོ་ཚོའི་གསང་བའི་འཆར་གཞི་དང་མི་སྣ་འཚོལ་ཞིབ་ཆེད་མནར་གཅོད་སྣ་ཚོགས་བཏང་སྟེ། འདྲི་རྩད་བྱས་པའི་སྐོར་ལ་སྙན་ཐོ་འདོན་རྒྱུར་ཨ་རིའི་གཞུང་གིས་ཟླ་བ་མང་པོའི་རིང་གྲ་སྒྲིག་ཐག་གཅོད་བྱས་པ་ཞིག་ཡིན་པ་དང་། ཕོ་བྲང་དཀར་པོའི་ལས་ཁུངས་ཀྱིས་སྙན་ཐོ་དེ་ཕྱིར་བསྒྲགས་བྱས་ན་ཨ་རིའི་རྒྱལ་སྲུང་བདེ་འཇགས་ལ་ཉེན་ཁ་ཡོད་པར་མཐོང་གི་ཡོད་ཀྱང་། དེ་ལས་གལ་ཆེ་བ་ནི་གསང་བའི་ལས་ཁུངས་ཀྱི་གསང་བའི་ཡིག་ཆར་མཇུག་བསྡོམས་བརྒྱབ་པའི་སྙན་ཐོ་གལ་ཆེར་མཐོང་སྟེ་ཕྱིར་བསྒྲགས་བྱ་རྒྱུའི་ཐག་གཅོད་བྱས་པ་ཞིག་ཡིན་པ་དང་། དེར་སྲིད་འཛིན་ཨོ་བྷ་མས་ཀྱང་ཨ་རིའི་མང་ཚོགས་ཀྱིས་དོན་དངོས་ཇི་བྱུང་གི་གནས་ཚུལ་ཤེས་རྟོགས་བྱེད་རྒྱུ་གལ་ཆེན་ཡིན་པར་ངོས་འཛིན་གནང་གི་ཡོད་ཚུལ་སོགས་བསྒྲགས་འདུག
ཨ་རིའི་གྲོས་ཚོགས་འོག་མའི་འཐུས་མི་རོབ་ཇིར་སི་ (Mike Rogers) དང་གསང་བའི་ལས་ཁུངས་ཀྱི་འགན་འཛིན་ཟུར་བ་ཧད་ཌིན་ (Michael Hayden)གཉིས་ཀྱིས་གྲོས་ཚོགས་གོང་མའི་གསང་བའི་ཚོགས་ཆུང་གིས་སྙན་ཐོ་དེ་ཕྱིར་བསྒྲགས་བྱས་ཚེ་ཨ་རིའི་རྒྱལ་སྲུང་བདེ་འཇགས་ལ་ཉེན་ཁ་ཡོད་པ་མ་ཟད། ཕྱི་རྒྱལ་ཁག་ནང་ཡོད་པའི་ཨ་རིའི་གཞུང་ཚབ་དང་རིག་གཞུང་བསྟི་གནས་ཁང་། ཚོང་ལས་སྡེ་ཚན་ཁག་བཅས་ལ་འཇབ་རྒོལ་བྱེད་སྲིད་པའི་ཉེན་ཁ་ཡོད་པ་རེད། ཅེས་ཐག་གཅོད་དེར་སྐྱོན་བརྗོད་བྱས་འདུག་ལ། ཨ་རིའི་བདེ་སྲུང་ལས་ཁུངས་ཀྱིས་ཕྱི་རྒྱལ་མཚོ་ཁུལ་ཁག་ཏུ་རྟེན་གཞི་བྱས་པའི་ཨ་རིའི་མཚོ་དམག་གིས་འཛམ་གླིང་གི་ཕྱོགས་གང་སར་ཡོད་པའི་ཨ་རིའི་གཞུང་ཚབ་ཁག་ལ་འཇིགས་སྐུལ་པས་འཇབ་རྒོལ་བྱེད་ཚེ་དུས་ཐོག་གདོང་ལེན་བྱེད་པར་གྲ་སྒྲིག་བྱེད་དགོས་པའི་བཀའ་ཡང་བཏང་ཡོད་འདུག
ཨ་རིའི་རྒྱལ་དོན་དྲུང་ཆེ་ཇོན་ཁད་རེ་ཡིས་ད་ལྟའི་ཆར་འཛམ་གླིང་གི་ཕྱོགས་གང་སར་ཡོད་པའི་འཇིགས་སྐུལ་དྲག་སྤྱོད་པ་ཚོས་ཨ་རིའི་མི་སེར་མང་པོ་གཏའ་མར་ཉར་ཡོད་སྟབས། སྙན་ཐོ་དེ་ཕྱིར་བསྒྲགས་བྱེད་པའི་དུས་ཚོད་ཏག་ཏག་ཅིག་མིན་པས་ཕྱི་འགྱངས་བྱེད་དགོས་པ་དང་། སྙན་ཐོ་དེ་ཕྱིར་བསྒྲགས་བྱས་ཚེ་ཨ་རིའི་རྒྱལ་སྲུང་བདེ་འཇགས་ལ་ཉེན་ཁ་ཡོད་པ་དང་། སྙན་ཐོའི་ནང་སྲིད་འཛིན་ཨོ་བྷ་མའི་གཞུང་སྐབས་ཀྱི་གནས་ཚུལ་ཡང་ཚུད་དགོས་ཞེས་བརྗོད་ཡོད་འདུག
ལྕམ་ཧྥེན་སི་ཊིན་ (Dianne Feinstein) ཡིས་ལོབ་སི་ཨན་ཇེ་ལེ་སི་དུས་བབ་ (Los Angeles Times) གསར་ཁང་གིས་སྙན་ཐོ་སྐོར་ལ་བཅར་འདྲི་བྱེད་སྐབས་ཁོ་མོས་ཨ་རིའི་རྩ་ཁྲིམས་དང་སྤྱི་ཚོགས་ཀྱི་རིན་ཐང་ལ་བརྩི་མཐོང་དང་རྒྱབ་སྐྱོར་བྱེད་ཆེད་སྙན་ཐོ་དེ་ཕྱིར་བསྒྲགས་བྱ་རྒྱུ་གལ་ཆེན་པོ་ཡིན་པ་དང་། འབྱུང་འགྱུར་གསང་བའི་ལས་ཁུངས་ཀྱིས་འདི་ལྟ་བུའི་མནར་གཅོད་རིགས་གཏོང་རྒྱུར་བཀག་འགོག་བྱེད་པར་དགེ་མཚན་ཆེན་པོ་ཡོད་ཚུལ་བརྗོད་འདུག
ཨ་རིའི་ཐག་གཅོད་ཐད་རྒྱལ་སྤྱིའི་ཉེས་ཡངས་ཚོགས་པ་དང་རྒྱལ་སྤྱིའི་འགྲོ་བ་མི་ཐོབ་ཐང་ཚོགས་ཁག་གིས། ཨ་རིའི་གཞུང་གིས་རྒྱལ་སྤྱིའི་རྩ་ཁྲིམས་ལ་འགན་འཁུར་ཡོད་པའི་ཐོག་ནས་འགྲོ་བ་མིའི་ཐོབ་ཐང་དང་རྒྱལ་སྤྱིའི་མནར་གཅོད་རྩ་ཁྲིམས་ལ་བརྩི་མེད་རྡོག་རོལ་གཏོང་གི་ཡོད་པའི་གནས་ཚུལ་མི་མང་ལ་ཕྱི་གསལ་ནང་གསལ་བཟོ་དགོས་པ་ཁ་ཚ་དགོས་གཏུགས་ཆགས་ཡོད་སྐོར་བརྗོད་འདུག
ཟླ་གཅིག་གོང་ཨ་རིའི་གྲོས་ཚོགས་གོང་མའི་ནང་དམངས་གཙོ་ཚོགས་པའི་འཐུས་མི་མང་ཤོས་ཆགས་སྟབས། དམངས་གཙོ་ཚོགས་པའི་འཐུས་མིའི་འགན་འཁུར་འོག་ནས་ལོ་འགའི་རིང་ཨ་རིའི་གསང་བའི་ལས་ཁུངས་ཀྱིས་འཇིགས་སྐུལ་པར་མནར་གཅོད་བྱེད་སྟངས་སྐོར་ལ་སྙན་ཐོ་བཏོན་ཡོད་པ་དང་། ད་ལྟའི་ཆར་ཨ་རིའི་གྲོས་ཚོགས་གོང་འོག་གཉིས་ནང་སྤྱི་མཐུན་ཚོགས་པའི་འཐུས་མི་མང་ཤོས་ཆགས་སྟབས། སྤྱི་མཐུན་ཚོགས་པས་ཀྱང་གང་མགྱོགས་གནད་དོན་དེ་སྐོར་ལ་སྙན་ཐོ་ཞིག་འདོན་འཆར་ཡོད་འདུག
གསར་འགོད་པ། ལྷ་སྐྱབས་རྒྱལ།
