དེ་རིང་རྒྱ་ནག་གི་ལེང་ཧྥང་འབྲིང་རིམ་མི་དམངས་ཁྲིམས་ཁང་གིས་རྒྱ་ནག་གི་མཐོ་རིམ་མགོ་ཁྲིད་ཟུར་པ་ཞིག་ལ་ཚེ་བཙོན་གྱི་ཁྲིམས་ཐག་བཅད་ཡོད་འདུག
དེ་རིང་ཕྱི་ཚེས་ ༡༠ ཉིན་རྒྱ་ནག་ཧི་པའེ་ཞིང་ཆེན་གྱི་ལེང་ཧྥང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་རྒྱ་ནག་དབུས་གཞུང་རྒྱལ་ཡོངས་འཛུགས་སྐྲུན་དང་བསྐྱར་གསོ་ལྷན་ཁང་གི་མགོ་ཁྲིད་གཞོན་པ་དང་རྒྱ་ནག་དབུས་དཔལ་འབྱོར་འཆར་འགོད་ལྷན་ཁང་གི་ཆེས་མཐོའི་ལས་བྱེད་ཟུར་པ་ལིག་ཐའེ་ནན་ (Liu Tienan) གྱིས་དབང་ཆ་སྒེར་གཅོད་ཀྱིས་ཁེ་ལས་མཉམ་སྡེ་ཁག་ལ་ས་ཁང་གསར་རྒྱག་ཆོག་པའི་ཆོག་མཆན་སྤྲད་དེ་ཁོ་དང་ཁོའི་བུ་གཉིས་བརྒྱུད་ནས་ལྐོག་རྔན་འབོར་ཆེན་བླངས་ཡོད་པ་ར་སྤྲོད་བྱུང་སྟེ་ཚེ་བཙོན་གྱི་ཁྲིམས་ཐག་བཅད་ཡོད་འདུག
ལེང་ཧྥང་འབྲིང་རིམ་མི་དམངས་ཁྲིམས་ཁང་གིས་ཧྥ་རན་སིའི་(AFP) གསར་ཁང་གི་གསར་འགོད་པར་ཁོང་གི་ནག་ཉེས་སྐོར་གྱི་ཡིག་ཆ་ཞིག་སྤྲོད་ཞོར་དུ། ལིག་ཐའེ་ནམ་ལ་ཚེ་བཙོན་གྱི་ཁྲིམས་ཐག་བཅད་པ་དེ་ཁོས་མི་གཞན་པའི་ལག་ནས་དངུལ་དང་རྒྱུ་དངོས་སྣ་ཚོགས་བླངས་བའི་ནག་ཉེས་ཀྱི་བདེན་དཔང་ཡིག་ཆ་གཞིར་བཞག་ཐོག་ཐག་གཅོད་བྱས་ཡོད་ཅེས་བརྗོད་འདུག
ཁྲིམས་ར་འཚོགས་སྐབས་རྒྱ་ནག་ནང་རྟེན་གཞི་བྱས་པའི་ཕྱི་རྒྱལ་ཁག་གི་གསར་འགོད་པ་ཚོ་ཁྲིམས་རར་སྐྱོད་པའི་ཆོག་མཆན་སྤྲད་མེད་པ་མ་ཟད། ཉེན་རྟོག་པ་མང་པོ་བརྒྱ་ཕྲག་ལྷག་གིས་ཁྲིམས་ཁང་གི་གཡས་གཡོན་གྱི་ལམ་ཁ་ཁག་བཀག་སྟེ་ལྟ་སྲུང་ནན་མོ་བྱས་ཡོད་འདུག
འདིའི་ཐད་ཧོང་ཀོང་གཙུག་ལག་སློབ་གྲྭའི་དགེ་རྒན་ཝེ་ལེ་ལེམ་ (Willy Lam)ལགས་ཀྱིས་གསར་འགོད་པར། ལུག་ཐའེ་ནན་གྱི་གནད་དོན་རྒྱབ་ལྗོངས་སུ་པེ་ཅིན་གྱི་ཆབ་སྲིད་པའི་ཤུགས་རྐྱེན་ཡོད་ཅིང་། གལ་སྲིད་ཁོ་ལ་དམར་ཤོག་ནང་ཁུལ་དུ་ཤོག་ཁག་བཟོ་ཐུབ་པའི་ནུས་པ་ཡོད་ཚེ་རང་ཉིད་སྲུང་སྐྱོབ་ཐུབ་ངེས་རེད་ཅེས་བརྗོད་ཡོད་འདུག
གནད་དོན་དབྱེ་ཞིབ་པ་ཚོས། ཞི་ཅིན་ཕིན་རྒྱ་ནག་དམར་ཤོག་པའི་མགོ་ཁྲིད་ཆགས་པ་ནས་བཟུང་། དམར་ཤོག་ཚོགས་པས་ལྐོག་ཟ་རུལ་སུངས་ལ་རྒོལ་རྡུང་བྱེད་སྟངས་ས་བསྒྲགས་གནམ་བསྒྲགས་བྱེད་ཀྱིན་ཡོད་ཀྱང་། དོན་དངོས་ཐོག་ལམ་ལུགས་བཅོས་བསྒྱུར་གང་ཡང་མེད་པར་ཕྱི་གསལ་ནང་གསལ་གྱི་ཐོག་ནས་ལྐོག་ཟ་རུལ་སུངས་ཀྱི་ནད་ཡམས་ཚར་གཅོད་པར་དཀའ་ལས་ཁག་པོ་ཡིན་པའི་སྐྱོན་བརྗོད་བྱེད་ཀྱིན་ཡོད་འདུག
ལིག་ཐའེ་ནན་ནི་ད་ལྟ་རང་ལོ་ ༦༠ ཡིན་ཞིང་། ད་ཆར་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ཁྲིམས་བཤེར་བྱེད་བཞིན་པའི་ཀྲུའུ་ཡོང་ཁང་དང་ཅང་ཅེ་མིན་ (Jiang Jiemin) གཉིས་ལ་འབྲེལ་བ་ཡག་པོ་ཡོད་པའི་མི་སྣ་ཞིག་ཆགས་ཡོད་འདུག
