དྲག་སྤྱོད་པ་ ༥༠༠ སྲོག་ཐོག་གཏོང་རྒྱུ་ཡིན་ཟེར།

ཁ་སང་པ་ཀི་སི་གཞུང་གིས་མ་འོངས་པའི་བདུན་ཕྲག་གཉིས་གསུམ་ནང་ད་ལྟ་འཛིན་བཟུང་འོག་ཡོད་པའི་ཏ་ལི་བྷན་དྲག་སྤྱོད་པ་ ༥༠༠ ཙམ་སྲོག་ཐོག་གཏོང་རྒྱུའི་ཐག་གཅོད་བྱས་འདུག

ཁ་སང་པ་ཀི་སི་ཐན་གྱི་སྲིད་བློན་ནཱ་ཝ་སེ་ཤཱ་རེབ་ཀྱིས་སྲིད་བློན་ལས་ཁུངས་ནང་ཆུ་ཚོད་བཞིའི་རིང་ཏ་ལི་བྷན་དྲག་སྤྱོད་ཤོག་ཁག་སྐོར་ལ་ཚོགས་འདུ་ཞིག་ཚོགས་ཏེ། སྔོན་པ་ཀི་སི་ཐན་སྲིད་གཞུང་གིས་ཉེས་ཅན་པར་ལོ་དྲུག་རིང་སྲོག་ཐོག་གཏོང་རྒྱུ་མིན་པའི་སྲིད་ཇུས་ལག་བསྟར་བྱེད་བཞིན་ཡོད་པ་དེར་འགྱུར་བ་བཏང་སྟེ། པ་ཀི་སི་ཐན་གཞུང་གིས་འཇུ་བཟུང་བྱས་ཡོད་པའི་ཏ་ལི་བྷན་གྱི་དྲག་སྤྱོད་པ་ ༥༠༠ ཙམ་སྲོག་ཐོག་གཏོང་རྒྱུའི་ཐག་གཅོད་བྱས་ཡོད་འདུག

འདིའི་ཐད་པ་ཀི་སི་ཐན་གྱི་སྲིད་བློན་ནཱ་ཝ་སེ་ཤཱ་རེབ་ཀྱིས་བྷི་བྷི་སི་གསར་འགོད་པ། “པ་ཀི་སི་ཐན་གཞུང་གིས་འཇིགས་སྐུལ་རིང་ལུགས་པ་དང་ཁོ་ཚོར་མཐུན་རྐྱེན་སྦྱོར་མཁན་དག་གཅིག་མཚུངས་ཡིན་པར་ངོས་འཛིན་བྱེད་བཞིན་ཡོད་སྟབས་ང་ཚོས་ཐར་པར་གཏོང་གི་མ་རེད། ང་ཚོའི་རྒྱལ་ཁབ་ནང་འཇིགས་སྐུལ་རིང་ལུགས་པ་དང་ཆོས་ལུགས་ཕྱོགས་རིས་ནི་སྐྲན་ནད་ལྟར་ཆགས་ཡོད་པར་བརྟེན། ད་ལྟ་ང་ཚོས་དེ་ཚོ་རྩ་མེད་བཟོ་རྒྱུའི་དུས་ལ་བབ་ཡོད་སྟབས། ཧཱ་ཛཱ་ར་གྲོང་རྡལ་དང་པེ་ཤཱ་ཝ་ (Peshawar) གྲོང་ཁྱེར་གཙོས་པ་ཀི་སི་ཐན་གྱི་ས་ཁུལ་དང་གྲོང་ཁྱེར་ཁག་ལ་གཏོར་རྒོལ་གཏོང་མཁན་གྱི་དྲག་སྤྱོད་པར་དམག་དྲངས་ནས་གཏོར་ཕམ་གཏོང་རྒྱུ་ཡིན”ཞེས་བརྗོད་འདུག

པ་ཀི་སི་ཐན་གྱི་ནང་སྲིད་བློན་ཆེན་ཎི་སཱར་ཨ་ལི་ཁང་ (Nisar Ali Khan)གིས་ཧྥ་རན་སིའི་གསར་ལམ་(AFP) ཞེས་པའི་ཐོག་བརྗོད་དོན། “ཉེ་ཆར་པ་ཀི་སི་ཐན་སྲིད་འཛིན་གྱིས་པ་ཀི་སི་ཐན་དམག་མིས་འཇུ་བཟུང་བྱས་པའི་འཇིགས་སྐུལ་རིང་ལུགས་པ་དག་ལ་སྲོག་ཁྲིམས་གཅོད་མི་དགོས་པའི་སྲོག་སྐྱོབ་སྙན་ཞུར་(mercy petition) མིང་རྟགས་བཀོད་མེད་སྟབས། ང་ཚོས་ཡོང་རྒྱུ་བསྡད་པའི་བདུན་ཕྲག་གཉིས་གསུམ་ནང་དྲག་སྤྱོད་པ་༥༠༠ ཙམ་སྲོག་ཐོག་གཏོང་རྒྱུ་ཡིན”ཞེས་བརྗོད་འདུག

ཟླ་འདིའི་ཚེས་ ༡༦ ཉིན་ཏ་ལི་བྷན་དྲག་སྤྱོད་ཤོག་ཁག་གིས་པེ་ཤཱ་ཝ་གྲོང་ཁྱེར་གྱི་དམག་མིའི་སློབ་གྲྭ་ཞིག་ལ་འཇབ་རྒོལ་བྱས་ཏེ་སློབ་ཕྲུག་ ༡༣༣ དང་ལས་བྱེད་ ༡༠། དམག་མི་ ༣ བཅས་ཁྱོན་མི་ ༡༤༦ དམར་གསོད་དང་། སློབ་ཕྲུག་ ༡༠༠ ལྷག་ལ་རྨས་སྐྱོན་བཏང་ཡོད་པ་མ་ཟད། ཉིན་ཤས་གོང་འཇིགས་སྐུལ་བ་ཚོས་སླར་ཡང་སློབ་གྲྭ་ཁག་ཅིག་ལ་འཇབ་རྒོལ་བྱེད་གྲབས་བྱེད་བཞིན་ཡོད་སྟབས་པ་ཀི་སིན་ཐན་གྱི་ཉེན་རྟོག་པས་ཏ་ལི་བྷན་དྲག་སྤྱོད་པ་དྲུག་དང་བུད་མེད་ཅིག་འཇུ་བཟུང་བྱས་ཡོད་འདུག

པ་ཀི་སི་ཐན་གྱི་མང་ཚོགས་དང་རྒྱལ་སྤྱིའི་ཚོགས་པ་སྒྲིག་འཛུགས་ཁག་གིས་པ་ཀི་སི་ཐན་གཞུང་གིས་ཏ་ལི་བྷན་ཤོག་ཁག་ལ་རྒོལ་ལན་སློག་དགོས་པའི་ངོ་རྒོལ་དང་གནོན་ཤུགས་ཆེན་པོ་སྤྲད་ཡོད་སྟབས། ཟླ་འདིའི་ཚེས་ ༡༩ ཉིན་པ་ཀི་སི་ཐན་གཞུང་གིས་ ༢༠༠༣ ལོར་སྲིད་འཛིན་ཟུར་པ་པར་ཝུ་ཛི་མུ་ཤཱ་རབ་ (Pervez Musharraf) ལྐོག་གསོད་བྱེད་རྩིས་བྱེད་མཁན་དྲག་སྤྱོད་པ་ ༥ དང་། ༢༠༠༩ ལོར་པ་ཀི་སི་ཐན་གྱི་དམག་དཔུང་ལྟེ་གནས་ཁང་ལ་གཏོར་རྒོལ་གཏོང་མཁན་གྱི་དྲག་སྤྱོད་པ་ ༡ བཅས་ཁྱོན་དྲག་སྤྱོད་པ་ ༦ ཙམ་སྲོག་ཐོག་ལ་བཏང་ཡོད་པ་མ་ཟད། པ་ཀི་སི་ཐན་གྱིས་ཨབ་གྷན་གཞུང་དང་མཉམ་ལས་བྱས་ནས་ཏ་ལི་བྷན་དྲག་སྤྱོད་ཤོག་ཁག་གི་མགོ་གཙོ་མུ་ལཱ་ཎཱ་ (Maulana Fazlullah) ཡིབ་སྡོད་བྱེད་ས་ཨབ་གྷན་གྱི་ཀུ་ནར་མངའ་སྡེར་དམག་བརྒྱབ་ནས་དྲག་སྤྱོད་པ་ ༢༡ བསད་ཡོད་འདུག

ཁ་སང་པ་ཀི་སི་ཐན་སྲིད་བློན་གྱིས་དྲག་སྤྱོད་པ་ ༥༠༠ སྲོག་ཐོག་གཏོང་རྒྱུ་དང་། པེ་ཤཱ་ཝ་གྲོང་རྡལ་གྱི་དམག་མིའི་སློབ་གྲྭར་འཇབ་རྒོལ་བྱེད་མཁན་བྱེད་གཏེ་གཙོ་བོ་ཨུ་མར་མན་སུར་ (Umar Mansoor) གཙོས་པ་ཀི་སི་ཐན་གྱི་ས་ཁུལ་དང་གྲོང་ཁྱེར། བྱང་ཝ་ཛེ་རེ་སི་ཐན་བཅས་ནང་ཡོད་པའི་འཇིགས་སྐུལ་པ་ཚོར་དམག་དྲངས་ནས་རྩ་མེད་བཟོ་རྒྱུ་ཡིན་སྐོར་བསྒྲགས་འདུག

ཟླ་འདིའི་ཚེས་ ༡༧ ཉིན་ཨུ་མར་མན་སུར་ (Umar Mansoor) གྱིས་པ་ཀི་སི་ཐན་གྱི་སློབ་གྲྭར་འཇབ་རྒོལ་བྱས་རྗེས་བརྙན་ཐུང་ཞིག་ཕྱིར་བསྒྲགས་བྱས་པའི་ནང་ཁོས། “ངས་པ་ཀི་སི་ཐན་གཞུང་དང་སློབ་གྲྭའི་འགན་འཛིན། དགེ་ལས་སློབ་ཕྲུག་རྣམས་ལ་ཞུ་རྒྱུ་ཞིག་ལ། ཁྱེད་ཚོ་ནི་ཁ་ཆེའི་དམངས་གཙོའི་རྒྱལ་ཁབ་འདིའི་ནུས་ཤུགས་གོང་འཕེལ་གཏོང་མཁན་ཆགས་ཡོད་པ་མ་ཟད། མ་འོངས་པར་ཏ་ལི་བྷན་དམར་གསོད་གཏོང་མཁན་གྱི་དམག་སྤྱི་དང་དམག་དཔོན། རུ་དཔོན་བྱེད་མཁན་ཞིག་ཀྱང་ཡིན་པར་བརྟེན། གལ་ཏེ་ཁྱེད་ཚོས་ང་ཚོའི་བུད་མེད་དང་ཕྲུག་གུ་གསད་ཚེ། ཁྱེད་ཚོའི་བུ་ཕྲུག་ཀྱང་བྲོས་ཐར་མི་སྲིད་པ་ཞིག་ཡིན་སྟབས། ཁྱེད་ཚོས་ང་ཚོར་འཐབ་རྒོལ་བྱས་ན་ང་ཚོས་ཀྱང་འཁོན་ལན་བསློག་ངེས་ཡིན”ཞེས་བརྗོད་འདུག

ཁ་སང་རྒྱལ་སྤྱིའི་ཉེས་ཡངས་ཚོགས་པས་བྷི་བྷི་སི་ཐོག་བརྗོད་དོན། པ་ཀི་སི་ཐན་གཞུང་གིས་མི་ ༥༠༠ ཙམ་སྲོག་ཐོག་གཏོང་རྒྱུ་ཕྱིར་བསྒྲགས་བྱས་པ་དེས། ཏ་ལི་བྷན་རྩ་མེད་གཏོང་རྒྱུའི་ཚབ་ལ་ཁོང་ཁྲོ་མང་བ་སློང་སྲིད་པ་ཞིག་ཡིན་སྟབས། ཁོང་ཚོ་སྲོག་ཐོག་གཏང་ན་མ་འོངས་པར་མང་ཚོགས་ཀྱི་བདེ་འཇགས་ལ་སྔར་ལས་ཉེན་ཁ་ཆེ་བ་ཡོང་སྲིད་པ་དང་། པ་ཀི་སི་ཐན་གྱི་ (Justice Project Pakistan) ཞེས་པའི་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོ་སཱ་ར་བྷེ་ལཱ་ (Sarah Belal) ཡིས་པ་ཀི་སི་ཐན་གཞུང་གིས་སྲོག་ཐོག་གཏོང་འཆར་ཡོད་པའི་མི་དེ་དག་ཁྲོད་ནས་བརྒྱ་ཆ་ ༨༠ ཙམ་གྱི་དྲག་སྤྱོད་ལས་འགུལ་སྤེལ་མྱོང་མེད་སྟབས། གཞུང་ངོས་ནས་མི་དེ་འདྲ་མང་པོ་ཞིག་གི་སྲོག་གཅོད་བཞིན་ཡོད་པ་ནི་འགྲོ་བ་མིའི་ཐོབ་ཐང་རྡོག་རོལ་བཏང་བ་ཞིག་རེད་ཅེས་བརྗོད་འདུག

པ་ཀི་སི་ཐན་ནི་འཛམ་གླིང་ཐོག་སྲོག་ཁྲིམས་གཅོད་མཁན་མང་ཤོས་ཡིན་པ་མ་ཟད་ད་ལྟ་མི་ ༨༠༠༠ ཙམ་སྲོག་ཁྲིམས་གཅོད་རྒྱུ་ལྷག་ཡོད་འདུག

གསར་འགོད་པ། དོན་གྲུབ།