༢༠༡༤ ལོའི་རྒྱལ་སྤྱིའི་གནས་ཚུལ་ཆེ་ཁག་བཅུ།

༼གཅིག༽གནམ་གྲུ་བོར་བརླག།

ཕྱི་ཟླ་ ༣ ཚེས་ ༨ ཉིན་མ་ལེ་ཞི་ཡ་ནས་རྒྱ་ནག་པེ་ཅིན་ལ་འཕུར་སྐྱོད་བྱེད་མཁན་གྱི་མ་ལེ་ཞི་ཡའི་ (༣༧༠) རྟགས་ཅན་གྱི་གནམ་གྲུ་ཞིག་ལྷོ་རྒྱ་ནག་རྒྱ་མཚོའི་ཐོག་བསླེབས་རྗེས། གནམ་གྲུའི་དོ་དམ་ལྟེ་གནས་དང་འབྲེལ་གཏུག་ཆད་ཡོད། གནམ་གྲུ་དེའི་ནང་འགྲུལ་བ་ ༢༢༧ དང་ལས་མི་ ༡༢ བཅས་ཁྱོན་མི་ ༢༣༩ ཡོད་འདུག འདས་པའི་ཟླ་ཤས་རིང་ཨ་རི་དང་སིང་གྷ་པུར། རྒྱ་ནག་གཙོས་རྒྱལ་སྤྱིའི་རྒྱལ་ཁབ་ ༢༤ གིས་འཚོལ་ཞིབ་བྱས་ཀྱང་རྙེད་མེད།

༼གཉིས།༽ཨི་བྷོ་ལཱ་ནད་ཡམས།

ཕྱི་ཟླ་ ༣ པའི་ནང་ནུབ་ཨ་ཧྥི་རི་ཀའི་རྒྱལ་ཁབ་སེ་ར་ལོན་དང་གྷི་ནི་ཡཱ། ལེ་བྷི་རི་ཡ། ། ནེ་ཇི་རེ་ཡ་བཅས་རྒྱལ་ཁབ་ནང་ཨི་བྷོ་ལཱ་ཞེས་པའི་ནད་ཡམས་ཁྱབ་བརྡལ་ཕྱིན་ཏེ། རིམ་པས་མཱ་ལི་དང་ཨ་རི། སི་པན། སེ་ཎི་གྷལ། དབྱིན་ཡུལ་བཅས་ནང་ཁྱབ་སྟེ་ཟླ་ ༡༢ ཚེས་ ༢༠ བར་ལེ་བྷི་རི་ཡའི་མི་ ༣༤༢༣ དང་སེ་ར་ལོན་གྱི་མི་ ༢༧༣༤། གྷི་ནིའི་མི་ ༡༦༧༢། ནེ་ཇི་རི་ཡའི་མི་ ༡༢། ཨ་རིའི་མི་ ༡ བཅས་ཤི་ཡོད་ཅིང་མི་ ༢༠༩༡ ལ་ནད་ཡམས་དེ་ཕོག་ཡོད་འདུག

༼གསུམ།༽རྒྱ་གར་འོས་བསྡུ་ཆེན་མོ།

ཕྱི་ཟླ་ ༤ ཚེས་ ༧ ནས་ ༥ ཚེས་ ༡༢ ཉིན་བར་རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུ་ཆེན་མོ་བྱས་ཏེ། ཟླ་ ༥ ཚེས་ ༡༧ ཉིན་འོས་བསྡུའི་གྲུབ་འབྲས་གསལ་བསྒྲགས་བྱས་པར། རྒྱ་གར་གྱི་གྲོས་ཚོགས་འོག་མའི་ནང་རྐུབ་སྟེགས་ ༥༤༣ ཡོད་པའི་ཁྲོད། བྷི་ཇེ་པི་ཕྱོགས་གཏོགས་ལ་ཁྱོན་རྐུབ་སྟེགས་ ༣༣༩ ཐོབ་སྟེ། བྷི་ཇེ་པི་སྲིད་དོན་ཚོགས་པའི་སྣེ་འཁྲིད་པ་ནཱ་རེན་ཌ་མུ་དྷེ་རྒྱ་གར་གྱི་སྲིད་བློན་སྐབས་ ༡༥ པར་བསྐོ་བཞག་བྱས།

༼བཞི ༽འཛམ་གླིང་རྐང་སྤོལ་འགྲན་བསྡུར།

ཕྱི་ཟླ་ ༦ ཚེས་ ༡༢ ནས་ ༧ ཚེས་ ༡༣ བར་བྷར་ཛིལ་གྲོང་ཁྱེར་སཱན་ཧྥོ་ལོའི་རྩེད་ཐང་དུ། ༢༠༡༤ ལོའི་འཛམ་གླིང་རྐང་རྩེད་སྤོ་ལོའི་འགྲན་བསྡུར་ཐེངས་ ༢༠ པ་ཚོགས་ཏེ་རྒྱལ་ཁབ་ ༣༢ ཡི་རྐང་སྤོལ་རུ་ཁག་བར་འགྲན་བསྡུར་བྱས་པ་བརྒྱུད་ཇར་མན་ལ་ཨང་དང་པོ་ཐོབ་ཏེ་ཨ་སྒོར་ས་ཡ་ ༣༥ དང་། ཨར་ཇིན་ཌེ་ཎའི་ལ་ཨང་གཉིས་པ་ཐོབ་སྟེ་ཨ་སྒོར་ས་ཡ་ ༢༥། ཧོ་ལན་ཌིའི་ལ་ཨང་གསུམ་པ་ཐོབ་སྟེ་ཨ་སྒོར་ས་ཡ་ ༢༢ བཅས་ཀྱི་བྱ་དགའ་ཐོབ་ཡོད།

༼ལྔ༽དྲག་སྤྱོད་པའི་སྨྱོ་སྤྱོད།

ཕྱི་ཟླ་ ༧ ནང་ཨི་རག་དང་སི་རི་ཡའི་མཉམ་འབྲེལ་དྲག་སྤྱོད་ཤོག་ཁག་(ISIS) ཞེས་པ་གསར་འཛུགས་བྱས་ཏེ། ཟླ་ ༡༢ ཚེས་ ༢༧ བར་ཨི་རག་དང་སི་རི་ཡའི་གཞུང་ལ་འཇབ་རྒོལ་བྱས་ཏེ་སྔ་ཕྱིར་མི་ ༦༨༧༢ བསད་ཡོད་པ་དང་། ཨ་རིའི་གསར་འགོད་པ་ ༢ དང་དབྱིན་ཇིའི་རོགས་སྐྱོར་ལས་མི་ ༢ བཅས་ཀྱི་མགོ་བཅད་དེ་བརྙན་ཐུང་ཞིག་ཁྱབ་བསྒྲགས་ཡོད་སྟབས། ཟླ་ ༩ ཚེས་ ༢༤ ནས་བཟུང་ཟླ་འདིའི་ཚེས་ ༡༨ ཉིན་བར་ཨ་རིའི་མཐུན་གྲོགས་རྒྱལ་ཁབ་ཁག་གིས་དྲག་སྤྱོད་ཤོག་ཁག་ལ་མཁའ་ཐོག་ནས་ཐེངས་ ༣༥ ཙམ་ལ་རྒོལ་འཛིང་བྱས་ཏེ་དྲག་སྤྱོད་པ་ ༥༢༦ བསད་ཡོད།

༼དྲུག༽གྷ་ཛ་ལུང་གཤོང་གི་དུད་སྨུག

ཕྱི་ཟླ་ ༧ ཚེས་ ༨ ཉིན་པ་ལི་སི་ཐན་ཧ་མ་སི་དྲག་སྤྱོད་ཤོག་ཁག་གིས་གྷ་ཛ་ལུང་གཤོང་ནས་ཨི་ཛ་རལ་ལ་མེ་ཤུགས་འཕུར་མདེལ་ ༡༠༠ ལྷག་འཕངས་ཏེ་གཏོར་རྒོལ་བྱེད་མགོ་བཙུགས་ཡོད་སྟབས། ཟླ་དེའི་ཚེས་ ༡༧ ཉིན་ཨི་ཛི་རལ་དམག་དཔུང་གིས་གནམ་ས་གཉིས་ནས་ཧ་མ་སི་དྲག་སྤྱོད་ཤོག་ཁག་གི་རྟེན་གཞི་ཁག་ལ་རྒོལ་ལན་སློག་སྟེ་པ་ལི་སི་ཐན་གྱི་མི་ ༢༢༠༠ ལྷག་བསད་ཡོད། ཟླ་ ༧ ཚེས་ ༢༧ ཉིན་མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོགས་ཀྱི་ཚོགས་མིའི་རྒྱལ་ཁབ་ཁག་གི་བར་གྲོས་འཆམ་བྱུང་སྟེ། ཆ་རྐྱེན་གང་ཡང་མེད་པའི་ཐོག་གྷ་ཛ་ལུང་གཤོང་གི་དམག་འཁྲུག་ཞི་འཇགས་ཡོང་དགོས་སྐོར་བསྒྲགས་ཡོད་ཀྱང་གྲུབ་འབྲས་གང་ཡང་ཐོན་མེད།

༼བདུན༽སེ་ཀོ་ལན་ཌིའི་རང་ཐག་རང་གཅོད།

ཕྱི་ཟླ་ ༩ ཚེས་ ༡༨ ཉིན་སེ་ཀོ་ལན་ཌི་དབྱིན་ཇིའི་མངའ་འོག་ནས་ལོགས་སུ་རང་བཙན་བྱེད་མིན་ལ་མང་མོས་འོས་བསྡུ་བྱས་སྐབས། མང་ཚོགས་བརྒྱ་ཆ་ ༤༤།༧ ཡིས་རང་བཙན་ལ་རྒྱབ་སྐྱོར་དང་། བརྒྱ་ཆ་༥༥།༣ ཡིས་དབྱིན་ཇིའི་མངའ་འོག་མུ་མཐུད་སྡོད་རྒྱུར་འོས་ཤོག་འཕངས་ཡོད་སྟབས། སི་ལོ་ལན་ཌི་དབྱིན་ཇིའི་མངའ་འོག་ཏུ་སྡོད་རྒྱུའི་མང་མོས་ཐོབ་ཡོད་ཅིང་། དེ་ནི་སི་ཀོ་ལན་ཌི་དབྱིན་ཇིའི་མངའ་འོག་ཏུ་བསྡད་དེ་ལོ་ ༣༠༧ འཁོར་རྗེས་བྱུང་བའི་མང་མོས་འོས་བསྡུ་དང་པོ་དེ་ཆགས་ཡོད་འདུག

༼བརྒྱད༽ཉི་གདུགས་གསར་བརྗེ་ལས་འགུལ།

ཟླ་ ༩ ཚེས་ ༢༢ ཉིན་ནས་བཟུང་ཧོང་ཀོང་གི་མཐོ་རིམ་སློབ་གྲྭ་ཁག་ ༢༤ ནས་སློབ་མ་ ༢༠༠༠༠ ལྷག་གིས་སློབ་མཚམས་བཞག་སྟེ། ཧོང་ཀོང་གི་གྲོང་ཁྱེར་ལྟེ་བ་ཅིན་ཀྲུང་ཐེན་མཱ་ཞེས་པར་ཞི་བའི་ངོ་རྒོལ་ལས་འགུལ་སྤེལ་ཏེ། ཧོང་ཀོང་གི་དམངས་གཙོ་དང་རང་དབང་ཐོག་རྒྱ་ནག་གི་ཐེ་ཇུས་ཆེ་རུ་འགྲོ་བཞིན་ཡོད་པ་དང་། ལྷག་པར་དུ་ ༢༠༡༧ ལོའི་ཧོང་ཀོང་སྤྱི་ཁྱབ་ཀྱི་འོས་མི་རྒྱ་ནག་གཞུང་གིས་འདོན་འཆར་བཅས་ལ་ངོ་རྒོལ་ཤུགས་ཆེན་བྱས་པར། ཧོང་ཀོང་གི་ཉེན་རྟོག་པས་མིག་ཆུ་ཤོར་བའི་དུག་རླངས་གཏོར་ཏེ་ངོ་རྒོལ་ཞི་འཇགས་ཡོང་ཐབས་བྱས་པར། སློབ་ཕྲུག་ཚོས་ཉི་གདུགས་བཟུང་སྟེ་འགོག་སྲུང་བྱས་པར་ “ཉི་གདུགས་གསར་བརྗེ་ལས་འགུལ།”ཞེས་འཛམ་གླིང་ལ་གྲགས།

༼དགུ༽འཇིགས་སྐུལ་པས་སློབ་གྲྭར་འཇབ་རྒོལ།

ཕྱི་ཟླ་ ༡༢ ཚེས་ ༡༦ ཉིན་པ་ཀི་སི་ཐན་གི་ཏ་ལི་བྷན་དྲག་སྤྱོད་པ་མི་དགུ་ཡིས་ལུས་ཐོག་ཏུ་འབར་རྫས་དང་ལག་ཏུ་མཚོན་ཆ་བཟུང་སྟེ་པ་ཀི་སི་ཐན་པེ་ཞཱ་ཝ་གྲོང་ཁྱེར་གྱི་དམག་མིའི་སློབ་གྲྭ་ཞིག་ལ་འཇབ་རྒོལ་བྱས་ཏེ། སློབ་ཕྲུག་ ༡༣༢ དང་ལས་བྱེད་ ༡༠། དམག་མི་ ༣ བཅས་ཁྱོན་མི་ ༡༤༥ དམར་གསོད་དང་། སློབ་ཕྲུག་ ༡༠༠ ལྷག་ལ་རྨས་སྐྱོན་བཟོས་ཡོད་སྟབས། པ་ཀི་སི་ཐན་གྱི་བདེ་འཇགས་དམག་མི་དང་ཉེན་རྟོག་པས་ཆུ་ཚོད་བརྒྱད་རིང་ཕར་རྒོལ་བྱས་མཐར་འཇིགས་སྐུལ་བ་དག་བསད་ཡོད་པ་དང་། ཟླ་འདིའི་ཚེས་ ༢༢ ཉིན་པ་ཀི་སི་ཐན་གཞུང་གིས་འཇུ་བཟུང་འོག་ཡོད་པའི་ཏ་ལི་བྷན་དྲག་སྤྱོད་པ་ ༥༠༠ སྲོག་ཁྲིམས་གཅོད་རྒྱུ་ཡིན་པ་གསལ་བསྒྲགས་བྱས།

༼བཅུ།༽ཡུག་རེན་གྱི་གཡོ་འཁྱོམ།

ཕྱི་ཟླ་ ༢ ཚེས་ ༢༡ ཉིན་ཡུག་རེན་མང་ཚོགས་ཀྱིས་རྒྱལ་སའི་ཐང་ཆེན་དུ་འཛོམས་ཏེ་ངོ་རྒོལ་ཤུགས་ཆེན་བྱས་ཡོད་ཅིང་། ཚེས་ ༢༢ ཉིན་ཡུག་རེན་གྲོས་ཚོགས་ཀྱིས་དམིགས་བསལ་བཞུགས་མོལ་ཚོགས་འདུ་བསྐོངས་ཏེ་ཡཱ་ཎོ་ཁོ་བོ་ཆི་སྲིད་འཛིན་གྱི་ལས་གནས་ནས་གནས་དབྱུང་བཏང་ཡོད་སྟབས། ཨུ་རུ་སུར་རྒྱབ་སྐྱོར་བྱེད་མཁན་གྱི་ཡུག་རེན་གྱེན་ལོག་ཤོག་ཁག་དང་ཡུག་རེན་གཞུང་བར་དམག་འཁྲུག་ལངས་ཏེ། མཐར་ཟླ་ ༡༠ ནང་ཨུ་རུ་སུས་ཡུག་རེན་གྱི་ས་ཁུལ་ཁེར་མེ་ཡཱ་མངའ་འོག་ཏུ་བསྡུས་ཡོད་སྟབས། ཨ་རི་དང་ཡུ་རོབ་མཐུན་ཚོགས་ཀྱིས་ཨུ་རུ་སུར་དཔལ་འབྱོར་ཉེས་ཆད་ཐེངས་བཞི་བཏང་ནས་ཟུར་ཕུད་བྱས།

གསར་འགོད་པ། དོན་གྲུབ།