བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༤༩ སྟེང་གི་རྩོམ་སྒྲིག་པའི་གཏམ།
ཉིས་སྟོང་བཅུ་བཞི་ལོ་འདི་ལྟར་རྫོགས་འགྲོ་སྐབས། ཉིས་སྟོང་བཅོ་ལྔ་ལོར་འཆར་འགོད་ཀྱི་སྔོན་ལ། ཉིས་སྟོང་བཅུ་བཞིར་ལས་བསྡོམས་ཤིག་རྒྱག་དགོས། གསར་འགོད་པ་ཞིག་དང་། ལྷག་པར་དུ་བོད་པའི་གསར་འགོད་པ་ཞིག དེ་ལས་ཀྱང་ཆབ་སྲིད་སྐྱབས་བཅོལ་བའི་གསར་འགོད་པ་ཞིག་གི་ངོས་ནས། འདས་ལོའི་བོད་ཕྱི་ནང་གི་གནས་ཚུལ་དང་། ཕར་ཙམ་བལྟས་ན་རྒྱ་ནག་དང་རྒྱལ་སྤྱིའི་གནས་ཚུལ་ཆེ་ཁག་སྔོག་ཡོང་སྐབས། ༢༠༡༤ ལོ་འདིར་གནས་ཚུལ་བཟང་ངན་མང་དག་ཅིག་བྱུང་ཡོད་ཀྱང་། བོད་པའི་གསར་འགོད་པ་ཞིག་གི་ངོས་ནས་བློ་དོགས་དང་ཡིད་ཆད་ཀྱང་སྣ་ཚོགས་ཤིག་ཡོང་གི་འདུག
འདས་མ་ཐག་གི་ལོ་འདི་གཅིག་པུའི་ནང་བོད་ནང་གི་བོད་མི་ ༡༡ གིས་རང་དབང་གི་ཆེད་དུ་རང་ལུས་མེར་བསྲེགས་གནང་སོང་། འདི་བོད་ནང་གི་གནས་ཚུལ་ཛ་དྲག་ཤོས་དེ་ཡིན་པ་མ་ཟད། ད་ལྟའི་རྒྱ་ནག་རྒྱལ་ཁོངས་ཀྱི་གནས་ཚུལ་ཚབས་ཆེ་ཤོས་ཀྱང་ཡིན་ལ། རྒྱལ་སྤྱིའི་ཐོག་ནས་ཀྱང་བོད་མིའི་རང་སྲེག་འདི་གནས་ཚུལ་ཆེ་ཤོས་མིན་ཡང་ཆེ་གྲས་སུ་བགྲང་དགོས། འདས་པའི་བདུན་ཕྲག་གཅིག་ནང་དགོས་འདུན་གཅིག་དང་འབོད་སྒྲ་གཅིག་གི་འོག་ཏུ་མི་གསུམ་གྱིས་རང་སྲེག་བྱས་སོང་། འདི་དུས་ཚོད་དང་གྲངས་ཀ་གཉིས་བརྒྱ་ཆར་བཀུག་ན་འཛམ་གླིང་ཐོག་གི་གནས་ཚུལ་ཛ་དྲག་ཤོས་ཆགས་ཡོད།
དཀྱིལ་ཤར་ཡུལ་གྲུའི་འཇིགས་སྐུལ་བ་ཚོས་སྡོད་ཁང་ཞིག་མེར་བརྒྱབ་ན་རྒྱལ་སྤྱིའི་གསར་ལམ་ཆེ་ཁག་གི་མདུན་ངོས་སུ་འཐོན་པ་མ་ཟད། ཨ་རི་དང་ཡུ་རོབ་སོགས་དམངས་གཙོ་དང་རང་དབང་ལྡན་པའི་ཡུལ་ལུང་དག་ཏུ་གླུ་གཞས་དང་རི་མོས་མི་ལ་ཕོག་ཐུག་བཏང་ཡང་གསར་འགྱུར་ཆེན་པོ་ཆགས་ཡོད། བོད་ནང་དུ་མིའི་ལུས་ལ་མེ་འབར་ཞིང་། ཁ་ནས་ཀི་འདེབས་བཞིན་ཁྲོམ་ན་རྒྱུག་གི་ཡོད་པའང་རྒྱལ་སྤྱིའི་སྤྱི་ཚོགས་ཀྱིས་མཐོང་གི་མེད་ལ། ཆོས་དང་རིག་གཞུང་མི་རིགས་དང་བཅས་པ་རྩ་མེད་བཟོ་བའི་སྲིད་བྱུས་མངོན་སུམ་དུ་ལག་བསྟར་བྱས་ཀྱང་རྒྱལ་སྤྱིའི་གསར་ལམ་ཁག་གིས་མཐོང་མེད།
ཡིད་ཆད་དང་བློ་ཕམ་རང་བཞིན་གྱི་གནད་དོན་འདིའི་ཐད་ནས་ང་ཚོས་ ༢༠༡༤ ལོའི་བོད་དོན་ལ་ཕྱོགས་བསྡོམས་ཤིག་དང་། བོད་མིའི་རང་སྲེག་ཆེན་མོ་འདིའི་ཁྱོན་ཡོངས་ལ་མནོ་བསམ་ཞིག་བཏང་ན། ད་ལྟའི་གླིང་ཆེན་བདུན་གྱི་ཆེན་པོ་མཐོན་པོ་དག་རྒྱ་འབྲུག་དམར་པོའི་སྡེར་འོག་ཏུ་ཚུད་བཞིན་པའི་སྐབས་འདིར། བོད་མིའི་རང་ལུས་མེར་བསྲེགས་འདི་རྒྱལ་སྤྱིའི་གསར་ལམ་ཐོག་འཐོན་རྒྱུར་རེ་བ་ཆེན་པོ་མེད་པ་མ་ཟད། འཐོན་ཡང་དྲང་ཕྱོགས་ནས་ལྟ་མཁན་ཡང་དཀོན་པོ་ཡིན་པ་ཟུར་བལྟས་ལེབ་མཐོང་རེད་ལ། ནམ་ཞིག་བོད་པའི་གསར་ལམ་ཁག་ནས་ཀྱང་བོར་རྒྱུའི་ཉེན་ཁ་ཞིག་འདུག
ཚེ་སྲོག་གི་གྲངས་ཚད་ཅི་ཙམ་ཡར་འཕར་ཡང་རིན་ཐང་གི་ཁྱབ་ཚད་དེ་ཙམ་མར་ཆག་བཞིན་པའི་སྐབས་འདིར། ང་ཚོ་བོད་མི་ཚོས་བསམ་བློ་གཏོང་ས་གཉིས་རང་ལས་ལྷག་མེད། གཅིག་ཚེ་སྲོག་འདི་དག་ས་རྡོའི་ཁམས་སུ་འཐིམ་དུ་མ་བཅུག་པར་ཚེ་སྲོག་གི་རིན་ཐང་ཚེ་སྲོག་གིས་ཡར་འདེགས་རྒྱུ་དེ་རེད་ལ། ཅིག་ཤོས་ང་ཚོའི་ལག་ནས་ཤོར་ཚར་བའི་ཚེ་སྲོག་དེ་དག་གི་ཆེད་དུ་ང་ཚོ་དོན་དང་ལྡན་པ་ཞིག་གསོན་དགོས་པ་དེ་རེད། མདོར་ན། བོད་མི་ཚོས་ཀྱང་རྒྱལ་སྤྱིའི་གསར་ལམ་མདུན་ངོས་སུ་བསླེབ་ཐུབ་པ་ཞིག་བཟོ་རྒྱུ་ཡིན་ནམ། བོད་ཡིག་བོད་སྐད་དང་། བོད་གཤིས་བོད་ཞེན། ཐ་ན་བོད་ལྭ་བོད་ཟས་ཚུན་གྱི་ཚེ་སྲོག་གི་རྒྱུན་བསྲིང་ཐབས་བྱ་རྒྱུ་ཡིན། འདི་ཤིང་མོ་ལུག་ལོའི་བོད་པ་ཚང་གི་གདམ་ཀ་རེད།
