ཁ་སང་བྷར་ཛིལ་རྒྱལ་སར་ལྕམ་ཌིལ་མཱ་རོབ་སི་ཧྥི་ཡིས་སྲིད་འཛིན་གྱི་ལས་འཁུར་དམ་འབུལ་ཞུ་སྐབས་རྒྱལ་སྤྱིའི་རྒྱལ་ཁབ་ ༡༣༠ ལྷག་གི་སྐུ་ཚབ་མཉམ་ཞུགས་གནང་ཡོད་འདུག
ཁ་སང་སྔ་དྲོའི་ཆུ་ཚོད་ ༩།༣༠ ཡས་མས་སུ་བྷར་ཛིལ་རྒྱལ་ས་བྷར་ཛི་ལི་ཡའི་སྲིད་འཛིན་ལས་ཁུངས་ཀྱི་མདུན་ཐང་དུ། ད་ལྟའི་སྲིད་འཛིན་ལྕམ་ཌིལ་མཱ་རོབ་སི་ཧྥི་ཡིས་སྲིད་འཛིན་གྱི་ལས་འཁུར་དམ་འབུལ་ཞུས་ཡོད་ཅིང་། སྐབས་དེར་ཁོ་མོས་མ་འོངས་པའི་སྲིད་འཛིན་ལས་ཡུན་སྐབས་ཕྱི་གསལ་ནང་གསལ་བྱས་ཏེ། རྒྱལ་སྤྱིའི་ཐོག་བྷར་ཛིལ་ཤེས་ཡོན་སྦྱོང་སའི་བསྟི་གནས་ཤིག་ཏུ་འགྱུར་ཐབས་བྱ་རྒྱུ་མ་ཟད། རྒྱལ་ཡོངས་ཀྱི་འཕྲོད་བསྟེན་དང་བདེ་སྲུང་གནས་སྟངས་གོང་འཕེལ་དང་། ལྐོག་ཟ་རུལ་སུངས་ལ་རྒོལ་རྡུང་བཏང་སྟེ་རྒྱལ་ཁབ་ནང་བརྟན་ལྷིང་དང་དཔལ་འབྱོར་འཕེལ་རྒྱས་ཡོང་བ་བྱ་རྒྱུ་ཡིན་ཞེས་སོགས་གཏམ་བཤད་བྱས་འདུག
སྲིད་འཛིན་དམ་འབུལ་མཛད་སྒོའི་སྟེང་། ཨ་རིའི་སྲིད་འཛིན་གཞོན་པ་ཇཱོ་བྷེ་ཌིན་མཆོག་དང་། རྒྱ་ནག་གི་སྲིད་འཛིན་གཞོན་པ་ལི་ཡན་ཁྲོ་ (Li Yuanchao)། ཝེ་ནེ་ཛུ་ལའི་སྲིད་འཛིན་ཎེ་ཀཱོ་ལཱ་སེ་མཱ་ཌོ་རོ་ (Nicolas Maduro) མཆོག ཡུ་རེ་གྷེའི་སྲིད་འཛིན་ཇོ་སེ་མུ་ཇི་ཁཱ་ (Jose Mujica) མཆོག བྷོ་ལེ་ཝུ་ཡའི་སྲིད་འཛིན་ཨི་ཝ་ (Evo Morales) མཆོག ཅི་ལི་ཡི་སྲིད་འཛིན་མི་ཤཱལ་ (Michelle Bachelet) མཆོག་བཅས་རྒྱལ་སྤྱིའི་རྒྱལ་ཁབ་ ༡༣༠ ཡི་མགོ་ཁྲིད་དང་སྐུ་ཚབ་མཉམ་ཞུགས་གནང་ཡོད་པ་མ་ཟད། བྷར་ཛིལ་གྱི་མི་མང་བཞི་ཁྲི་ལྷག་འདུ་འཛོམས་བྱུང་ཡོད་འདུག
ལྕམ་ཌིལ་མཱ་རོབ་སི་ཧྥི་མཆོག་གིས་དམ་འབུལ་མཛད་སྒོའི་སྐབས་མང་ཚོགས་ལ་གཏམ་བཤད་གནང་དོན། “དེ་སྔོན་བྷར་ཛིལ་རྒྱལ་ཡོངས་ནང་བྲལ་རིམ་བར་མར་མི་མང་པོ་མེད་པ་མ་ཟད། མང་པོ་ཞིག་ལ་ཤེས་ཡོན་སྦྱོང་རྒྱུའི་གོ་སྐབས་ཐོབ་ཀྱི་མེད་ཀྱང་། ད་ལྟའི་གཞུང་གིས་འདས་པའི་ལོ་ཤས་རིང་འབད་བརྩོན་བྱས་ཏེ། ཡུལ་མི་ས་ཡ་ ༣༦ ལྷག་དབུལ་ཕོངས་གནས་ལས་གྲོལ་ཡོད་པར་བརྟེན། ད་རེབ་མང་ཚོགས་ཀྱིས་ངར་ཡིད་ཆེས་བྱས་ནས་འོས་ཤོག་བླུགས་ཡོད་སྟབས། ངས་ཤེས་ཡོན་དང་འཕྲོད་བསྟེན་སློབ་གསོ་འཕེལ་རྒྱས་དང་འབྲེལ། ལྐོག་ཟ་རུལ་སུངས་ལ་རྡུང་རྡེག་བཏང་ནས་མང་ཚོགས་ཀྱི་མངོན་འདོད་བསྒྲུབ་རྒྱུ་ཡིན། ད་ལྟའི་དུས་ཚོད་འདིར་ལྐོག་ཟ་རུལ་སུངས་ནི་གཞུང་གི་ཟུངས་ཁྲག་འཇིབ་མཁན་ལྟ་བུ་དེ་ཡིན་སྟབས། དེ་དག་རྩ་མེད་བཟོ་ཐུབ་པ་བྱ་རྒྱུ་ཡིན། དེ་སྔོན་གཞུང་གིས་བྷར་ཛིལ་གྱི་པེ་ཌོར་བྷར་སི་རྡོ་སྣུམ་ཁེ་ལས་(Petrobras) ཀྱིས་ཕྱི་དགྲ་དང་ལྐོག་ཟ་རུལ་སུངས་ལས་སྲུང་སྐྱོབ་བྱེད་དགོས་དོན་ནི་རྟོག་ཞིབ་ཡག་པོ་བྱེད་ཆེད་ཡིན་སྟབས། ད་ནས་བཟུང་ང་ཚོས་གནད་དོན་དེར་བརྟག་དཔྱད་ཡག་པོ་བྱས་ཏེ་མ་འོངས་པར་གནས་ཚུལ་དེ་རིགས་མ་འཐོན་པ་བྱ་རྒྱུ་ཡིན”ཞེས་བརྗོད་འདུག
ཁོ་མོས་བྷར་ཛིལ་གྱི་གྲོས་ཚོགས་ནང་གཏམ་བཤད་བྱས་དོན། “ངས་མི་གཞན་ལས་ལྷག་པ་བྷར་ཛིལ་གྱི་དཔལ་འབྱོར་ཡར་རྒྱས་འགྲོ་དགོས་པ་ཤེས་ཀྱིན་ཡོད་སྟབས། དང་པོ། གཞུང་གི་རྩིས་ཁྲའི་མ་ལག་ཡོངས་རྫོགས་བསྐྱར་བཅོས་བྱས་ཏེ་རྒྱལ་ནང་གི་ཐོན་ཁུངས་འཕེལ་རྒྱས་བཏང་སྟེ། གཏན་འཇགས་མ་དངུལ་གསོག་འཇོག་གང་ཐུབ་བྱ་རྒྱུ་དང་། གཉིས་པ། རྒྱལ་སྤྱིའི་ཁེ་ལས་ཆེ་ཁག་གིས་བྷར་ཛིལ་ནང་མ་འཛུགས་འཇོག་རྒྱུ་སྐུལ་སློང་དང་རྒྱལ་ཁབ་ནང་ཁེ་ལས་དང་བཟོ་གྲྭ་གང་མང་གསར་འཛུགས་བྱས་ཏེ། ལས་མེད་ཚོར་ལས་ཀ་རག་པ་བྱས་ནས་རྒྱལ་ནང་གི་མི་རྒྱུའི་ཐོན་ཁུངས་འཕེལ་རྒྱས་ཡོང་རྒྱུ་ཡིན”ཞེས་བརྗོད་འདུག
༢༠༠༢ ལོ་ནས་བཟུང་ལྕམ་ཌིལ་མཱ་རོབ་སི་ཧྥི་མཆོག་བྷར་ཛིལ་གྱི་ནུས་ཁུངས་ལས་དོན་ལྷན་ཁང་གི་བློན་ཆེན་ལོ་གསུམ་རིང་བྱས་རྗེས། ༢༠༠༥ ལོར་བྷར་ཛིལ་གྱི་སྲིད་འཛིན་ལེ་ཝུ་ཛེ་ (Luiz Inácio Lula da Silva) ལ་ལྐོག་ཟ་རུལ་སུངས་ཀྱི་དོན་རྐྱེན་བྱུང་སྟེ་གནས་དབྱུང་བཏང་བའི་ཚབ་ཏུ་བསྐོ་བཞག་བྱས་ཡོད་ཀྱང་། ཁོ་མོས་ ༢༠༡༠ ལོའི་སྲིད་འཛིན་འོས་བསྡུར་བཞུགས་ཆེད་ལས་གནས་ནས་དགོངས་པ་ཞུས་ཡོད་ཅིང་། ༢༠༡༠ ལོའི་རྒྱལ་ཡོངས་འོས་བསྡུའི་ཁྲོད་བརྒྱ་ཆ་ ༦༠ བརྒལ་བ་ཐོབ་སྟེ་བྷར་ཛིལ་ལོ་རྒྱུས་ཁྲོད་ཀྱི་བུད་མེད་སྲིད་འཛིན་ཐོག་མ་དེ་ཆགས་ཡོད།
༢༠༡༤ ལོའི་ཟླ་ ༢ ནང་བྷར་ཛིལ་ཆེས་མཐོའི་ཁྲིམས་ཁང་གིས་ཆབ་སྲིད་པ་དང་ཁེ་ལས་པ་གཙོས་གཞུང་གི་གནད་ཡོད་མི་སྣ་མང་པོ་ཞིག་གིས་བྷར་ཛིལ་གྱི་པེ་ཌོར་བྷར་སི་རྡོ་སྣུམ་ཁེ་ལས་ (Petrobras) ནས་ཨ་སྒོར་ཐེར་འབུམ་ ༣ ལྐོག་ཟ་བྱས་ཡོད་པ་ཕྱིར་བསྒྲགས་བྱས་ཡོད་ཅིང་། རྡོ་སྣུམ་ཁེ་ལས་ཀྱི་འགན་འཛིན་ཟུར་བ་གཉིས་དང་ས་ཁང་ཐོན་ལས་ཀྱི་ཁེ་ལས་པ་བརྒྱད། ཆབ་སྲིད་པ་དང་སྲི་ཞུ་བ་ཁག་ཅིག་བཅས་ཁྱོན་མི་ ༣༩ འཛིན་བཟུང་བྱ་རྒྱུའི་བཀའ་རྒྱ་བཏང་ཡོད་སྟབས། སྐབས་དེར་གསར་ལམ་ཁག་ཅིག་གིས་ལྕམ་ཌིལ་མཱ་རོབ་སི་ཧྥི་མཆོག་གིས་ཀྱང་ལྐོག་ཟ་བྱས་ཡོད་པའི་ནག་ཉེས་བཙུགས་ཡོད་ཀྱང་། ཁོ་མོས་གནད་དོན་དེ་དང་འབྲེལ་བ་གང་ཡང་མེད་སྐོར་གསལ་བཤད་བྱས་ཡོད།
ཁ་སང་བྷར་ཛིལ་གྱི་སྤྱི་ཚོགས་རིང་ལུགས་ཚོགས་པའི་གྲོས་ཚོགས་འཐུས་མི་ཨལ་ཧྥར་ཌོ་ (Alfredo Sirkis) ཡིས་རོའུ་ཌར་གསར་ལམ་ཐོག་བརྗོད་དོན། ད་ལྟ་རྒྱལ་སྤྱིའི་དཔལ་འབྱོར་ཉམས་ཉེས་ཀྱི་དཀའ་ངལ་སེལ་ཐུབ་མེད་པ་མ་ཟད། རྒྱལ་ནང་གི་དཔལ་འབྱོར་འཕེལ་ཚད་འགོར་པོ་ཡིན་སྟབས། ལོ་འདིའི་ནང་སྲིད་འཛིན་ལ་དཀའ་ངལ་ཆེན་པོ་འཕྲད་རྒྱུ་ཡིན་ཞེས་དང་། བྷར་ཛལ་གྱི་དམངས་གཙོ་ལས་འགུལ་ཚོགས་པའི་གྲོས་ཚོགས་འཐུས་མི་ཨེ་ཌོར་ཌོ་ (Eduardo Cunha) ཡིས། ད་ཐེངས་གྲོས་ཚོགས་ཚོགས་སྐབས་པེ་ཌོར་བྷར་སི་རྡོ་སྣུམ་ཁེ་ལས་ཀྱི་ལྐོག་ཟ་རུལ་སུངས་དོན་རྐྱེན་དེ་གླེང་སློང་བྱས་ནས་གཞུང་གི་གང་འདྲ་བྱེད་རྩིས་ཡོད་མེད་མང་ཚོགས་ཚོས་ཤེས་རྟོགས་ཐུབ་པ་བཟོ་རྒྱུ་ཡིན་ཞེས་བརྗོད་འདུག
ཁ་སང་ལྕམ་ཌིལ་མཱ་རོབ་སི་ཧྥི་མཆོག་གིས་སྲིད་འཛིན་གྱི་ལས་འཁུར་ཞུས་རྗེས། ཨ་རིའི་སྲིད་འཛིན་གཞོན་པ་ཇཱོ་བྷེ་ཌིན་མཆོག་ཐུག་སྟེ། རྒྱལ་ཁབ་གཉིས་བར་རྒྱལ་སྤྱི་རྒྱལ་ནང་གི་གནད་དོན་དང་ཚོང་དོན་ཐོག་མཉམ་ལས་བྱེད་ ཕྱོགས་ཐད་གྲོས་མོལ་བྱས་ཡོད་པ་མ་ཟད། ཇཱོ་བྷེ་ཌིན་གྱི་སྲིད་འཛིན་ཨོ་བྷ་མའི་ཚབ་བྱས་ནས་ཁོ་མོར་འཚམས་འདྲི་ཞུས་ཡོད་འདུག
གསར་འགོད་པ། དོན་གྲུབ།
