རྒྱ་ནག་གི་མི་སེར་ ༡༠༠ ལྷག་འཛིན་བཟུང་།

ཉེ་སྔོན་འབར་མའི་སྲིད་གཞུང་དམག་དང་གྱེན་ལོག་དམག་གི་འཐབ་འཛིང་ཁྲོད་མི་མང་དཀྱུས་མ་ ༢༠༠༠ ལྷག་འཛིན་བཟུང་བྱས་ཡོད་པ་དང་། དེའི་ནང་དུ་རྒྱ་ནག་གི་མི་སེར་ ༡༠༠ ལྷག་ཡོད་འདུག

ཁ་སང་རྒྱ་ནག་གཞུང་འབྲེལ་དྲ་བ་གོ་ལའི་དུས་བབ་ཏུ་གནས་ཚུལ་སྤེལ་བ་ལྟར་ན། ཉེ་སྔོན་འབར་མའི་སྲིད་གཞུང་དམག་དང་གྱེན་ལོག་དྲག་ཆས་དམག་དཔུང་གཉིས་ཀྱིས། འབར་མ་དང་རྒྱ་ནག་བར་གྱི་མཐའ་མཚམས་ཁཱ་ཆིན་མངའ་སྡེའི་(Kachin State) ནང་འཐབ་འཛིང་བྱས་ཏེ་རིམ་བཞིན་ཤུགས་ཆེ་རུ་འགྲོ་བཞིན་ཡོད་པ་མ་ཟད། ས་གནས་ཀྱི་མི་མང་དཀྱུས་མ་ ༢༠༠༠ ལྷག་འཛིན་བཟུང་བྱས་ཡོད་པ་དང་། དེའི་ནང་དུ་རྒྱ་ནག་གི་མི་སེར་ ༡༠༠ ལྷག་ཡོད་ཅིང་། ཁོང་ཚོ་མང་ཆེ་བ་ཁྲིམས་འགལ་གྱིས་འབར་མའི་ནང་སིམ་འཛུལ་བྱས་པའི་གཡང་ཊི་དང་གསེར་སོགས་གཏེར་ཁའི་ཚོང་ལས་གཉེར་མཁན་དང་། ཤིང་བཟོ་བ་སོགས་ཡིན་པ་དང་། ད་ལྟའི་ཆར་རྒྱ་ནག་གི་མི་སེར་ག་ཚོད་འཛིན་བཟུང་བྱས་ཡོད་མེད་ཀྱི་གྲངས་འབོར་ཏག་ཏག་ཅིག་ཤེས་རྟོགས་ཐུབ་ཀྱི་མེད་པ་རེད།

ཁ་སང་འབར་མའི་ནང་ཡོད་པའི་རྒྱ་ནག་གཞུང་ཚབ་ཁང་གི་ལས་བྱེད་པས་ད་ལྟའི་བར་འཛིན་བཟུང་བྱས་པའི་རྒྱ་ནག་གི་མི་སེར་ཚོ་སྐྱོབ་ཐབས་ཀྱི་ཞུ་སྐུལ་ཅི་ཡང་བྱས་མེད་ཅེས་བརྗོད་འདུག་པ་དང་། རྒྱ་ནག་ཕྱི་འབྲེལ་མགྲིན་ཚབ་པ་ཧོང་ལི་ཡིས་ད་ལྟ་རྒྱ་ནག་གཞུང་ཕྱོགས་ནས་འབར་མ་བྱང་ཁུལ་གྱི་གནས་བབ་ལ་རྟོག་ཞིབ་བྱེད་བཞིན་ཡོད་སྐོར་བརྗོད་ཡོད་ཀྱང་། དེ་རིང་རྒྱ་ནག་གཞུང་ཕྱོགས་ནས་གནས་ཚུལ་དེ་བདེན་པ་མིན་ལུགས་བརྗོད་འདུག

ཁཱ་ཆིན་གྱེན་ལོག་དམག་དཔུང་གི་དམག་སྤྱི་དང་འབར་མ་བྱང་ཁུལ་མི་རིགས་དྲག་ཆས་དམག་དཔུང་གི་བཀོད་འདོམས་པས་གོ་ལའི་དུས་བབ་ཀྱི་གསར་འགོད་པར། ཆ་རྐྱེན་གྱིས་འགྲིག་པ་ཡིན་ན་ང་ཚོས་རྒྱ་ནག་གི་མི་སེར་ཚོ་བདེ་འཇགས་ཀྱིས་ཕྱིར་རྒྱལ་ནང་ལ་ལོག་ཏུ་འཇུག་ཆོག་ཅེས་བརྗོད་ཡོད་ཀྱང་། འབར་མ་བྱང་ཁུལ་མི་རིགས་དྲག་ཆས་དམག་དཔུང་གི་གནས་ཚུལ་འབྲེལ་མཐུད་པས། ཁོང་ཚོས་ཤེས་རྟོགས་བྱུང་བར་གཞིགས་ན་འཛིན་བཟུང་བྱས་པའི་མི་མང་རྣམས་ལ་མིག་སྔར་ཤི་རྨས་བྱུང་མེད་ཀྱང་། ཟ་མ་དང་འཐུང་ཆུ་འདང་ངེས་མེད་པའི་ཁར་སྨན་བཅོས་ཀྱི་མཐུན་རྐྱེན་ཡང་མེད་སྟབས་བདེ་འཇགས་ཀྱིས་ཕྱིར་ལོག་ཐུབ་རྒྱུ་དཀའ་ལས་ཁག་པོ་ཆགས་ཡོད་སྐོར་བརྗོད་འདུག

ཡང་ཐེངས་འདིར་འཛིན་བཟུང་བྱས་པའི་རྒྱ་ནག་གི་མི་སེར་ཚོའི་ཐད་ལ། རྒྱ་ནག་གི་མི་སེར་ཚོ་ཕྱིར་རྒྱལ་ནང་དུ་ལོག་ཐུབ་རྒྱུ་ལས་སླ་བོ་ཡོད་པ་མ་རེད། གང་ཡིན་ཟེར་ན། འབར་མ་བྱང་ཁུལ་གྱི་དམིགས་བསལ་གནས་བབ་འོག རྒྱ་ནག་གི་མི་སེར་མང་པོ་རྒྱུན་ལྡན་མ་ཡིན་པའི་ཐབས་ལམ་བརྒྱུད་དེ་འབར་མའི་མངའ་ཁོངས་སུ་སིམ་འཛུལ་བྱས་ཡོད་སྟབས། གལ་སྲིད་འབར་མ་གཞུང་དམག་གི་ཁོངས་གཏོགས་ས་ཁུལ་ནས་ཕྱིར་རྒྱལ་ནང་དུ་ལོག་པ་ཡིན་ན། ཁྲིམས་འགལ་གྱིས་འབར་མའི་ནང་འཛུལ་ཏེ་ཁྲིམས་འགལ་གྱིས་ཚོང་ལས་གཉེར་བའི་རྐྱེན་གྱིས་བཀར་ཉར་བྱ་རྒྱུ་ཡིན་པ་དང་། གལ་སྲིད་མང་ཁྲོད་དྲག་ཆས་དམག་དཔུང་གི་ས་ཁོངས་ནས་ཕྱིར་ལོག་པ་ཡིན་ན་ངེས་པར་དུ་གཡུལ་ས་བརྒྱུད་དགོས་སྐོར་བརྗོད་འདུག

ཕྱི་ལོ་ ༢༠༡༡ ལོར་ལོ་ངོ་ ༥༠ ཉེ་བའི་འབར་མ་དྲག་དམག་གཞུང་གི་དབང་བསྒྱུར་མཇུག་བསྡུས་ཏེ། ལོ་དེའི་ཕྱི་ཟླ་ ༦ པའི་ནང་འབར་མ་གཞུང་དང་གྱེན་ལོག་དྲག་ཆས་དམག་དཔུང་བར་ཞི་བའི་གྲོས་མོལ་བྱེད་པའི་མགོ་བརྩམས་ཡོད་ཀྱང་གྲུབ་འབྲས་དེ་ཙམ་ཐོན་མེད་པའི་ཁར། འདས་ལོའི་ཕྱི་ཟླ་ ༡༡ ནང་འབར་མའི་གཞུང་དམག་གིས་གྱེན་ལོག་དམག་གི་དམག་རྩལ་སྦྱོང་བརྡར་ཁང་ཞིག་ལ་དཔུང་འཇུག་བྱས་ཏེ་མི་ ༢༢ ཡི་ཚེ་སྲོག་ཤོར་བ་དང་། མི་ ༡༥ ཙམ་ལ་རྨས་སྐྱོན་བཟོས་ཡོད་སྟབས། དེ་ནས་བཟུང་ཕྱོགས་གཉིས་ཀྱི་འབྲེལ་བ་ཇེ་སྡུག་ཏུ་ཕྱིན་ཡོད་པ་དང་། ཟླ་འདིའི་ཕྱི་ཚེས་ ༡༥ ཉིན་ཁཱ་ཆིན་འགྲིམ་འགྲུལ་ལྷན་ཁང་གི་བློན་ཆེན་གྱེན་ལོག་ཚོགས་པས་བཙན་ཁྲིད་བྱས་ཡོད་པ་དང་། ཕྱིས་སུ་བློན་ཆེན་དེ་ཀློད་གྲོལ་བཏང་ཡོད་ཀྱང་། ཁཱ་ཆིན་མངའ་སྡེ་གཞུང་གི་ཉེན་རྟོག་པ་ ༣ མུ་མཐུད་བཀག་ཉར་བྱས་ཡོད་པ་སོགས་ཀྱིས་ཕྱོགས་གཉིས་བར་གྱི་འགལ་ཟླ་ཤུགས་ཆེ་རུ་འགྲོ་བཞིན་ཡོད་པ་མ་ཟད། ཁ་སང་ནས་བཟུང་འབར་མ་གཞུང་གིས་འབར་མ་དང་རྒྱ་ནག་གི་མཐའ་མཚམས་(Kambaiti)ཞེས་པར་དམག་མི་མང་པོ་འགྲེམས་འཇོག་བྱས་ཏེ། ཁྲིམས་འགལ་གྱིས་སིམ་འཛུལ་བྱེད་པར་དམ་དྲག་དང་མངའ་ཁོངས་བརྟན་སྲུང་ལ་སྔར་ལས་ཤུགས་སྣོན་བྱེད་མགོ་བརྩམས་ཡོད་འདུག

གསར་འགོད་པ། པདྨ་མཚོ།