ཧྥ་རན་སིར་གནས་སྡོད་རྒྱ་རིགས་ཧུའུ་ཝེ་དང་ཧྥ་རན་སིའི་གློག་བརྙན་འཁྲབ་ཁྲིད་པ་ཞིག་གིས་ཕབ་སྐྲུན་བྱས་པའི་བོད་སྐོར་གྱི་གློག་བརྙན་༼མཆོད་མེ༽ཞེས་པར་ཨོ་སི་ཁར་བྱ་དགའ་འཐོབ་རེ་ཡོད་འདུག
ཟླ་འདིའི་ཕྱི་ཚེས་ ༡༥ ཉིན་ཨ་རིའི་པར་རིས་སྒྱུ་རྩལ་དང་ཚན་རིག་ཁང་ (The Academy of Motion Picture Arts and Sciences)གིས། ཐེངས་ ༨༧ པའི་ཨོ་སི་ཁར་(Oscar)བྱ་དགའི་འོས་མིའི་མིང་གཞུང་ཕྱིར་བསྒྲགས་བྱས་ཡོད་པ་དང་། དེའི་ནང་ཧྥ་རན་སིར་གནས་སྡོད་རྒྱ་རིགས་ཧུའུ་ཝེ་དང་ཧྥ་རན་སིའི་འཁྲབ་ཁྲིད་པ་ཞིག་གིས་ཕབ་སྐྲུན་བྱས་པའི་༼མཆོད་མེ༽ཞེས་པའི་གློག་བརྙན་ཞིག་བརྙན་ཐུང་ལེགས་ཤོས་ཀྱི་བྱ་དགའི་འོས་གཞིའི་ཁོངས་སུ་བཞག་ཡོད་པ་དང་། འདི་ལོའི་ཕྱི་ཟླ་ ༢ ཚེས་ ༢༢ ཉིན་དངོས་སུ་བྱ་དགའ་སྤྲོད་པའི་མཛོད་སྒོ་དེ་ཨ་རིའི་ལོ་སི་ཨན་ཇི་ལི་སིའི་ཧོ་ལི་ཝུ་ཌིར་སྐོང་ཚོགས་བྱ་རྒྱུ་ཡིན་འདུག
སྐར་ཆ་ ༡༥ ཅན་གྱི་བརྙན་ཐུང་དེ་ནི་བོད་རིགས་ན་གཞོན་བརྙན་ལེན་པ་ཞིག་དང་ཁོང་གི་ལས་རོགས་ཀྱིས། སི་ཁྲོན་ཞིང་ཆེན་རྔ་བ་ཁུལ་མཛོད་དགེ་རྫོང་ཁོངས་ཀྱི་བོད་རིགས་འབྲོག་པ་ཚོ་པར་དུ་བླངས་བ་བརྗོད་གཞིར་བཟུང་ཡོད་པ་དང་། གློག་བརྙན་ཐུང་ངུ་འདིའི་ནང་འབྲོག་པ་ཁག་ཅིག་ལ་ཕོ་བྲང་པོ་ཏ་ལ་དང་གནམ་སྡེ་སྒོ་མོ་ཆེ། ༢༠༠༨ ལོའི་པེ་ཅིན་ཨོ་རྩལ་ར་བ། དེ་བཞིན་རྒྱ་ནག་ལྕགས་རི་རིང་པོ་སོགས་རྒྱབ་ལྗོངས་རས་གཞི་མི་འདྲ་བ་ ༦ གི་མདུན་དུ་འདྲ་པར་བརྒྱབ་སྟེ། རྒྱ་གཞུང་གི་འདུ་ཤེས་ཁྲོད་ཀྱི་བོད་མི་རིགས་ཀྱི་རིག་གནས་དང་དད་མོས་ཀྱི་གནས་བབ་མཚོན་ཐབས་བྱས་ཡོད་འདུག
རྒྱབ་ལྗོངས་མི་འདྲ་བའི་པར་རིས་དེ་དག་གི་ནང་ནས་གནམ་སྡེ་སྒོ་མོ་ཆེ་རྒྱབ་ལྗོངས་བྱས་ཤིང་། འབྲོག་པ་ཁག་ཅིག་གི་དཀྱིལ་དུ་ཨ་མ་རྒན་མོ་ཞིག་རྐུབ་སྟེགས་སྟེང་དུ་བསྡད་དེ། ལག་ཏུ་རྒྱ་གཞུང་གིས་བཙན་ཁྲིད་བྱས་ནས་ལོ་ངོ་ ༡༩ ལྷག་འགྲོ་བཞིན་པའི་༸པཎ་ཆེན་ཆུང་སྲིད་རིན་པོ་ཆེའི་སྐུ་པར་བཟུང་བའི་པར་རིས་དེར། འཛམ་གླིང་གི་ལྟད་མོ་བ་མང་པོས་དོ་སྣང་ཆེན་པོ་བྱེད་ཀྱིན་ཡོད་འདུག
བརྙན་ཐུང་འདིའི་སྐོར་ལ་གློག་བརྙན་འཁྲབ་ཁྲིད་པ་ཧུའུ་ཝེ་ལགས་ཀྱིས། རས་གཞི་རྒྱབ་ལྗོངས་བྱས་ནས་འདྲ་པར་རྒྱག་པ་དེ་རྒྱ་ནག་ནང་ཧ་ཅང་ཡོངས་ཁྱབ་ཅིག་ཡིན་ལ། ཁོང་གིས་དོན་དངོས་དང་རྨི་ལམ། དེང་རབས་དཔལ་ཡོན་དང་སྲོལ་རྒྱུན་གོམས་གཤིས། དེ་བཞིན། རྒྱ་ནག་གི་བསམ་བློའི་འདུ་ཤེས་དང་བོད་མིའི་དད་མོས་བར་གྱི་གྲུབ་ཚུལ་ལེགས་སྒྲིག་གི་གློག་བརྙན་ཞིག་བཟོ་འདོད་ཡོད་པ་ལྟར། གློག་བརྙན་འདིའི་ནང་དད་མོས་དང་བསམ་བློའི་འདུ་ཤེས་བར་ན་འཕེལ་འགྲིབ་འགྲོ་བཞིན་པའི་ཐུན་མོང་གི་བོད་མིའི་ངོ་བོ་ངོས་འཛིན་མཚོན་ཐབས་དང་། པར་རིས་རྒྱབ་ལྗོངས་བརྗེ་བསྒྱུར་བྱས་པ་དེས་བོད་ཀྱི་འགྱུར་མེད་དང་འགྱུར་ལྡོག་རང་བཞིན་གླེང་ཐུབ་པའི་རེ་བ་ཡོད་སྐོར་བརྗོད་འདུག
ཡང་ཁོང་གིས། བརྙན་ཐུང་དེ་ཧྥ་རན་སི་ཚོང་གཉེར་ཁང་གིས་མ་དངུལ་བཏང་སྟེ་ཕབ་སྐྲུན་བྱས་ཡོད་ཀྱང་། གློག་བརྙན་ཕབ་སྐྲུན་ཚོགས་ཆུང་བོད་ཀྱི་ས་ཆར་རྒྱུས་མངའ་མེད་པ་དང་། མཚོ་ངོས་ལས་མཐོ་ཚད་རྨིད་ ༤༠༠༠ ལྷག་ཡོད་པའི་མཐོ་སྒང་དུ་ལས་ཀ་བྱེད་དགོས་པ། དེ་བཞིན། བོད་རིགས་འཁྲབ་སྟོན་པ་དང་འབྲེལ་འདྲིས་བྱེད་རྒྱུ་སྟབས་བདེ་མིན་པ་སོགས་ཀྱི་དཀའ་ངལ་མང་པོའི་ཁྲོད། དབྱར་དུས་ ༣ རིང་གློག་བརྙན་དེ་མུ་འབྲེལ་ཕབ་སྐྲུན་བྱས་ཏེ་ལེགས་འགྲུབ་བྱུང་ཡོད་སྐོར་བརྗོད་འདུག
གློག་བརྙན་འདིར་ཕྱི་ལོ་ ༢༠༡༣ ལོར་ཧྥ་རན་སིའི་ཞ་ལཱ་རྒྱལ་སྤྱིའི་གློག་བརྙན་དུས་སྟོན་ཐོག་གློག་བརྙན་དཔྱད་ཞིབ་ལྷན་ཚོགས་ཀྱི་བྱ་དགའ་ཐོབ་ཡོད་པ་དང་། ཕྱིས་སུ་འཛམ་གླིང་གི་རྒྱལ་ཁབ་ ༣༠༠ ལྷག་མཉམ་ཞུགས་བྱས་པའི་རྒྱལ་སྤྱིའི་གློག་བརྙན་དུས་སྟོན་ཐོག་བྱ་དགའ་ཐོབ་པ་སོགས་ད་ལྟའི་བར་རྒྱལ་སྤྱིའི་གློག་བརྙན་བྱ་དགའ་ ༧༠ ལྷག་ཐོབ་ཡོད་འདུག
གསར་འགོད་པ། པདྨ་མཚོ།
་་་་་་་་་ རྒྱབ་ལྗོངས་མི་འདྲ་བའི་པར་རིས་དེ་དག་གི་ནང་ནས་གནམ་སྡེ་སྒོ་མོ་ཆེ་རྒྱབ་ལྗོངས་བྱས་ཤིང་། འབྲོག་པ་ཁག་ཅིག་གི་དཀྱིལ་དུ་ཨ་མ་རྒན་མོ་ཞིག་རྐུབ་སྟེགས་སྟེང་དུ་བསྡད་དེ།
ལག་ཏུ་རྒྱ་གཞུང་གིས་བཙན་ཁྲིད་བྱས་ནས་ལོ་ངོ་ ༡༩ ལྷག་འགྲོ་བཞིན་པའི་༸པཎ་ཆེན་ཆུང་སྲིད་རིན་པོ་ཆེའི་སྐུ་པར་བཟུང་བའི་པར་རིས་དེར། འཛམ་གླིང་གི་ལྟད་མོ་བ་མང་པོས་དོ་སྣང་ཆེན་པོ་བྱེད་ཀྱིན་ཡོད་འདུག ་་་་་་་་་་་་་་་