ཨ་རིའི་སྲིད་འཛིན་ཨོ་བྷ་མས་རྒྱ་གར་འཛམ་གླིང་མཉམ་འབྲེལ་རྒྱལ་ཚོགས་བདེ་འཇགས་ཚོགས་མིའི་ཁུངས་སུ་ཞུགས་རྒྱུར་རྒྱབ་སྐྱོར་ཡོད་སྐོར་བརྗོད་པར་པ་ཀི་སི་ཐན་གཞུང་གིས་སྐྱོན་བརྗོད་བྱས་འདུག
ཟླ་འདིའི་ཚེས་ ༢༥ ནས་ཉིན་གསུམ་རིང་ཨ་རིའི་སྲིད་འཛིན་ཨོ་བྷ་མ་རྒྱ་གར་ནང་སྐོར་སྐྱོད་སྐབས། རྒྱ་གར་མཉམ་འབྲེལ་རྒྱལ་ཚོགས་བདེ་འཇགས་ཚོགས་མིའི་ཁོངས་སུ་འཛུལ་ཞུགས་ལ་རྒྱབ་སྐྱོར་ཡོད་སྐོར་བརྗོད་ཡོད་པར། ཁ་སང་པ་ཀི་སི་ཐན་གཞུང་གིས་སྐྱོན་འཛུགས་བསྒྲགས་གཏམ་སྤེལ་ཡོད་པ་མ་ཟད། གནད་དོན་དེར་རྒྱལ་ཚོགས་ནང་མང་མོས་གྲོས་བསྡུར་བྱས་ནས་ཐག་གཅོད་དགོས་པ་ཞིག་ཡིན་སྐོར་བསྒྲགས་འདུག
པ་ཀི་སི་ཐན་ཕྱི་སྲིད་ལྷན་ཁང་གི་མགྲིན་ཚབ་མ་ཌ་སེ་ཎེམ་ (Tasnim Aslam) ཡིས་བརྗོད་དོན། “རྒྱ་གར་ནི་མཉམ་འབྲེལ་རྒྱལ་ཚོགས་ཀྱིས་གཏན་འབེབས་བྱས་པའི་ཇམ་མུ་ཀཱ་ཤཱེ་མེར་མི་རིགས་ལ་རང་ཐག་རང་གཅོད་སྤྲོད་དགོས་པའི་གྲོས་ཆོད་ལ་རྡོག་རོལ་གཏོང་མཁན་གྱི་རྒྱལ་ཁབ་ཅིག་ཡིན་སྟབས། མཉམ་འབྲེལ་རྒྱལ་ཚོགས་ཀྱི་བདེ་འཇགས་ཚོགས་མིའི་ཁོངས་སུ་ཞུགས་རྒྱུའི་ཆ་རྐྱེན་ཚང་ཡོད་དམ།”ཞེས་དང་། ཁོ་མོས་མུ་མཐུད་དུ། “པ་ཀི་སི་ཐན་གཞུང་གིས་མཉམ་འབྲེལ་རྒྱལ་ཚོགས་ནང་དོན་འབྲས་ལྡན་པའི་བཅོས་བསྒྱུར་ཡོང་རྒྱུར་རྒྱབ་སྐྱོར་བྱེད་བཞིན་ཡོད་པ་མ་ཟད། རྒྱལ་སྤྱིའི་ནང་ཞི་བདེ་དང་བརྟན་ལྷིང་ཡོང་ཆེད་ཚོགས་མིའི་རྒྱལ་ཁབ་བར་མང་མོས་གྲོས་བསྡུར་ཡོང་བ་བྱེད་དགོས”ཞེས་བརྗོད་འདུག
ཁ་སང་པ་ཀི་སི་ཐན་གྱི་སྐྱ་རེངས་ (Dawn)ཞེས་པའི་གསར་འགོད་པས་པ་ཀི་སི་ཐན་ཕྱི་སྲིད་ལྷན་ཁང་གི་མགྲིན་ཚབ་མ་ཌ་སེ་ཎེམ་ཨ་སེ་ལཱམ་ལ་རྒྱ་གར་དང་ཨ་རིའི་བར་རྡུལ་ཕྲན་གློག་ཤུགས་སྐོར་ལ་གྲོས་མཐུན་བཞག་པའི་སྐོར་ལ་དྲི་བ་བཏོན་པའི་ལན་དུ། ད་བར་རྒྱ་གར་གཞུང་གིས་མཚོན་ཆ་མང་པོ་གསོག་འཇོག་བྱས་ཤིང་། ༢༠༡༤ དང་ ༢༠༡༥ ལོར་དམག་དོན་འགྲོ་གྲོན་བརྒྱ་ཆ་ ༡༢ སྤར་ཏེ་ཨ་སྒོར་ཐེར་འབུམ་ ༣༨།༣༥ གཏོང་རྒྱུ་ཐག་བཅད་ཡོད་ལ། འདས་པའི་ལོ་གསུམ་ནང་རྒྱལ་སྤྱིའི་ཐོག་མཚོན་ཆ་མང་ཤོས་ཉོ་མཁན་ཆགས་ཡོད་པ་མ་ཟད། ད་ལྟ་ཨ་རི་དང་ལོ་ ༡༠ ཡི་དམག་དོན་གྲོས་མཐུན་བཞག་ཡོད་པར་བརྟེན། མ་འོངས་པར་ཨེ་ཤ་ཡའི་བདེ་འཇགས་ལ་ཉེན་ཁ་འཕྲད་རྒྱུ་ཡིན་སྟབས། ང་ཚོས་རྒྱལ་སྤྱི་དང་མངའ་ཁུལ་གྱི་བརྟན་ལྷིང་སྲུང་སྐྱོབ་ཆེད་རྒྱ་ནག་གཞུང་དང་འཕྱར་གྲུ་མཉམ་འདེགས་བྱས་ཏེ་ནུས་པ་འདོན་རྒྱུ་ཡིན། ཞེས་བརྗོད་འདུག
ཟླ་འདིའི་ཚེས་ ༢༧ ཉིན་རྒྱ་ནག་གཞུང་གིས་ཨ་རིའི་སྲིད་འཛིན་ཨོ་བྷ་མ་རྒྱ་གར་དམངས་གཙོའི་དུས་དྲན་གྱི་སྐུ་མགྲོན་གཙོ་བོར་ཕེབས་རྗེས་ཀྱི་ཉིན་གཉིས་རྗེས། ལོ་འདིའི་ནང་རྒྱ་ནག་རྒྱལ་ས་པེ་ཅིན་དུ་འཛམ་གླིང་དམག་ཆེན་གཉིས་པ་མཇུག་སྒྲིལ་རྗེས་ཀྱི་དུས་དྲན་ཐེངས་ ༧༠ ཞེས་པ་སྲུང་བརྩི་ཞུ་རྒྱུ་ཕྱིར་བསྒྲགས་བྱས་ཡོད་པ་མ་ཟད། སྐབས་དེའི་སྐུ་མགྲོན་གཙོ་བོ་ཨུ་རུ་སུའི་སྲིད་འཛིན་པུ་ཌིན་གྱིས་རྒྱ་ནག་གི་དམག་དོན་རྒྱས་ཤོམ་འགྲེམ་སྟོན་ཁག་ལ་གཟིགས་རྗེས། དམག་ཆེན་གཉིས་པའི་སྐབས་འདས་གྲོངས་སུ་སོང་བའི་དམག་མིའི་འདས་མཆོད་དུས་དྲན་ཐོག་མཉམ་ཞུགས་བྱ་རྒྱུ་ཡིན་ཞིང་། དེ་ནི་རྒྱལ་ཁབ་གཞན་གྱི་མགོ་ཁྲིད་ཀྱིས་རྒྱ་ནག་གི་དམག་དོན་འགྲེམ་སྟོན་གྱི་དུས་དྲན་ལ་གཟིགས་ཞིབ་གནང་བ་ཐོག་མ་དེ་ཆགས་རྒྱུ་ཡིན་འདུག
ཟླ་འདིའི་ཚེས་ ༢༨ ཉིན་རྒྱ་གར་ཕྱི་སྲིད་བློན་ཆེན་ལྕམ་སུ་ཞི་མ་རྒྱ་ནག་ནང་སྐོར་སྐྱོད་ཐེངས་དང་པོ་བྱས་ཡོད་པ་དང་། ཟླ་ ༢ ཚེས་ ༢ ཉིན་རྒྱ་གར་དང་ཨུ་རུ་སུ། རྒྱ་ནག་བཅས་ཀྱི་ཕྱི་སྲིད་བློན་ཆེན་བར་གྱི་ལྷན་ཚོགས་ཐེངས་ ༡༣ པའི་སྟེང་བཞུགས་ཏེ། རྒྱ་ནག་གི་སྲིད་འཛིན་ཞི་ཅིན་ཕིན་དང་ཕྱི་སྲིད་བློན་ཆེན་ཝང་ཡེ་སོགས་ལ་ཐུག་འཕྲད་བྱས་ཏེ། རྒྱལ་ཁབ་གཉིས་བར་གྱི་ཚོང་དོན་དང་དམག་དོན་གཙོས། རྒྱལ་སྤྱིའི་ཐོག་མཉམ་ལས་བྱེད་ཤུགས་ཆེ་རུ་གཏོང་ཐབས་བཅས་ཀྱི་ཐོག་ལ་གྲོས་མོལ་བྱ་རྒྱུ་ཡིན་འདུག
ཁ་ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧྭ་ཁྲིན་ཡེན་(Hua Chunying) གིས་ད་ལྟ་དཔལ་འབྱོར་ཡར་རྒྱས་འགྲོ་བཞིན་པའི་རྒྱལ་ཁབ་གཉིས་ཀྱི་འབྲེལ་ལམ་སྲ་བརྟན་དང་རྒྱུན་གནས་ཐོག་འཕེལ་རྒྱས་འགྲོ་བཞིན་ཡོད་ཅེས་དང་། རྒྱ་གར་ཕྱི་སྲིད་བློན་ཆེན་ལྕམ་སུ་ཞི་མ་ཡིས་རྒྱ་གར་དུས་བབ་ཐོག་ད་ལྟ་ང་ཚོའི་འབྲེལ་ལམ་འཕེལ་རྒྱས་འགྲོ་བཞིན་ཡོད་སྟབས། མ་འོངས་པར་ཕྱོགས་གཉིས་བར་ཡིད་ཆེས་ཐོབ་ཐབས་བྱས་ཏེ་མཉམ་ལས་གང་མང་བྱ་རྒྱུ་ཡིན། ད་ཆ་རྒྱལ་ཁབ་གཉིས་ཀྱིས་རྒྱལ་སྤྱི་དང་མངའ་ཁུལ་གྱི་གནད་དོན་ཁག་ལ་མཉམ་ལས་བྱེད་བཞིན་ཡོད་པ་མ་ཟད། མ་འོངས་པར་ཡང་རྒྱུན་འཁྱོངས་བྱེད་དགོས་སྟབས། ད་ཐེངས་ལྷན་ཚོགས་ཐོག་རྒྱལ་ཁབ་གཉིས་བར་སྔར་ལྷག་མཉམ་ལས་ཡོང་རྒྱུར་གྲོས་མོལ་བྱ་རྒྱུ་ཡིན། ཞེས་སོགས་བརྗོད་འདུག
་་་་་་་་ཨ་རིའི་སྲིད་འཛིན་ཨོ་བྷ་མ་རྒྱ་གར་ནང་སྐོར་སྐྱོད་སྐབས། རྒྱ་གར་མཉམ་འབྲེལ་རྒྱལ་ཚོགས་བདེ་འཇགས་ཚོགས་མིའི་ཁོངས་སུ་འཛུལ་ཞུགས་ལ་རྒྱབ་སྐྱོར་ཡོད་སྐོར་བརྗོད་ཡོད་་་་་་་་
ཡང་།
་་་་་་་་ རྒྱ་ནག་གི་སྲིད་འཛིན་ཞི་ཅིན་ཕིན་དང་ཕྱི་སྲིད་བློན་ཆེན་ཝང་ཡེ་སོགས་ལ་ཐུག་འཕྲད་བྱས་ཏེ། རྒྱལ་ཁབ་གཉིས་བར་གྱི་ཚོང་དོན་དང་དམག་དོན་གཙོས། རྒྱལ་སྤྱིའི་ཐོག་མཉམ་ལས་བྱེད་ཤུགས་ཆེ་རུ་གཏོང་ཐབས་བཅས་ཀྱི་ཐོག་ལ་གྲོས་མོལ་བྱ་རྒྱུ་་་་་་་་་