ཁ་སང་ཐའེ་ཝན་སུང་ཧྲན་གྲོང་ཁྱེར་གྱི་འགྲུལ་སྐྱེལ་གནམ་གྲུ་བརྡབ་སྐྱོན་ཁྲོད་ཉུང་མཐར་འགྲུལ་བ་ ༣༡ རྐྱེན་ལམ་དུ་ཤོར་ཡོད་འདུག
ཁ་སང་ཐའེ་ཝན་གྱི་སྔ་དྲོའི་ཆུ་ཚོད་ ༡༠ ཙམ་ལ། ཐའེ་ཝན་སུང་ཧྲན་གྲོང་ཁྱེར་ནས་ཅིན་མིན་དུ་འཕུར་བའི་འགྲུལ་སྐྱེལ་གནམ་གྲུ་(ATR72-600)རྟགས་ཅན་ཞིག མཁའ་དབྱིངས་སུ་འཕུར་ནས་སྐར་མ་ ༡༠ ཙམ་མ་འགོར་བར་ཟམ་ཆེན་ཞིག་ལ་བརྡབ་སྐྱོན་བྱུང་སྟེ་ཅི་ལུང་གཙང་པོའི་ནང་དུ་ལྷུང་ཡོད་པ་དང་། གནམ་གྲུ་དེའི་ནང་ཁྱོན་འགྲུལ་བ་ ༥༨ ཡོད་འདུག
དེ་རིང་སྔ་དྲོར་ཐའེ་ཝན་གཞུང་ཕྱོགས་ནས་བསྒྲགས་པ་ལྟར་ན། འགྲུལ་བ་ ༥༨ ཀྱི་ནང་ནས་མི་ ༣༡ རྐྱེན་འདས་སུ་ཕྱིན་ཡོད་པ་དང་། མི་ ༢༧ ཆུ་ཁར་བཏོན་ཐུབ་ཡོད་ཀྱང་། ད་དུང་ཡང་འདས་གྲོངས་ཀྱི་གྲངས་འབོར་འཕར་བཞིན་ཡོད་འདུག བརྡབ་སྐྱོན་བྱུང་བའི་གནམ་གྲུ་དེའི་ནང་རྒྱ་ནག་སྐམ་ས་ནས་ཡིན་པའི་ཡུལ་སྐོར་སྤྲོ་འཆམ་ཚོགས་པ་གཉིས་དང་རང་དབང་སྤྲོ་འཆམ་པ་བཞི་བཅས་རྒྱ་ནག་གི་འགྲུལ་བ་ ༣༡ ཡོད་པ་དང་། དེའི་ནང་ནས་མི་ ༢ རྐྱེན་འདས་དང་མི་ ༣ ལ་རྨས་སྐྱོན་ཕོག་པ། མི་ ༢༦ གར་ཡོད་ཆ་མེད་དུ་གྱུར་ཡོད་འདུག
ཐའེ་ཝན་མཁའ་འགྲུལ་ལས་ཁུངས་ཀྱི་འགན་འཛིན་ལིན་ཀྲི་མེན་གྱིས། ཐེངས་འདིར་དོན་རྐྱེན་བྱུང་བའི་གནམ་གྲུ་དེ་འདས་ལོའི་ཕྱི་ཟླ་ ༤ པའི་ནང་འཕུར་སྐྱོད་བྱེད་མགོ་བརྩམས་ཤིང་། འདི་ལོའི་ཕྱི་ཟླ་ ༡ པོའི་ནང་ཕྱོགས་ཡོང་ནས་བསྐྱར་གསོ་བྱས་ཡོད་སྐོར་བརྗོད་འདུག་ལ། ད་ལྟའི་ཆར་མཁའ་འགྲུལ་བདེ་འཇགས་ཞིབ་བཤེར་ཁང་གི་ཆེད་མཁས་ཚོགས་ཆུང་གིས། བརྡབ་སྐྱོན་བྱུང་བའི་གནམ་གྲུའི་སྒྲ་ལེན་འཕྲུལ་ཆས་དང་མཁའ་འགྲུལ་ལྟ་ཞིབ་སྒམ་ཆུང་(Black Box)གཉིས་ལ་ཞིབ་བཤེར་བྱེད་ཀྱིན་ཡོད་འདུག
དོན་རྐྱེན་བྱུང་རྗེས། ཐའེ་ཝན་འགྲིམ་འགྲུལ་ལྷན་ཁང་གི་མགོ་ཁྲིད་ཁྲིན་ཅན་ཡས་ཀྱིས་ཐེངས་འདིའི་དོན་རྐྱེན་ཁྲོད་ཚེ་སྲོག་ཤོར་བའི་འདས་པོའི་ཁྱིམ་མི་གཉེན་འབྲེལ་དང་རྨས་སྐྱོན་ཕོག་པའི་འགྲུལ་བ་ཚོར་དགོངས་དག་ཞུས་པ་དང་སྦྲགས། ཧྥི་ཞིན་མཁའ་འགྲུལ་ཁང་གིས་བཟོ་སྐྲུན་བྱས་པའི་ (ATR72)རིགས་ཀྱི་གནམ་གྲུ་ཚང་མར་གཏིང་ཟབ་ཀྱིས་ཞིབ་བཤེར་དགོས་ལུགས་བརྗོད་པ་ལྟར། ད་ལྟའི་ཆར་(ATR72-500) དང་(ATR72- 600)རྟགས་ཅན་གྱི་གནམ་གྲུ་ ༤ བཅས་(ATR)གནམ་གྲུ་ཚང་མར་ཞིབ་བཤེར་བྱེད་བཞིན་ཡོད་པ་རེད།
འདས་ལོའི་ཕྱི་ཟླ་ ༧ པའི་ནང་ཧྥི་ཞིན་གྱི་ (ATR72) འགྲུལ་སྐྱེལ་གནམ་གྲུ་(GE222)རྟགས་ཅན་ཞིག་ཕུན་ཧུའུ་གླིང་ཕྲན་དུ་བརྡབ་སྐྱོན་བྱུང་སྟེ། ཉུང་མཐར་འགྲུལ་བ་ ༤༨ རྐྱེན་ལམ་དུ་ཤོར་བ་དང་། མི་ ༡༡ ལ་རྨས་སྐྱོན་ཕོག་ཡོད་འདུག ད་རེས་ཀྱི་དོན་རྐྱེན་དེ་ཧྥི་ཞིན་མཁའ་འགྲུལ་ཁང་གི་ལོ་རྒྱུས་ཁྲོད་(ATR)རིགས་ཀྱི་གནམ་གྲུ་བརྡབ་སྐྱོན་བྱུང་བ་ཐེངས་བཞི་པ་དེ་ཆགས་ཡོད་འདུག
གསར་འགོད་པ། པདྨ་མཚོ།
