དྷ་སའི་དབུ་མ་གླིང་དྲ་ཐོག་ཚོང་ལས་སྡེ་ཚན་སྒོ་བརྒྱབ་འདུག

སྔོན་ཆད་རྒྱ་གར་གྱི་ཚོང་ལས་སྡེ་ཚན་ཞིག་དང་དཔལ་འབྱོར་ལས་ཁུངས་གཉིས་མཉམ་འབྲེལ་ཐོག་བཙུགས་པའི་དབུ་མ་གླིང་དྲ་ཐོག་ཚོང་ལས་སྡེ་ཚན་གྱི་སྦྱིན་བདག་བར་རྙོག་གྲ་ཞིག་བྱུང་བར་བརྟེན་ཏེ་བདུན་ཕྲག་སྔོན་མའི་ནང་ལས་ཁུངས་དེ་སྒོ་རྒྱག་དགོས་བྱུང་ཡོད་འདུག

བོད་མིའི་སྒྲིག་འཛུགས་དཔལ་འབྱོར་ལས་ཁུངས་དང་རྒྱ་གར་གྱི་ཁེ་ལས་སྡེ་ཚན་ཆེ་གྲས་ཨོ་ཀེ་སི་(OKS)ཞེས་པའི་ཚོགས་པ་གཉིས་མཉམ་འབྲེལ་ཐོག བོད་རིགས་གཞོན་སྐྱེས་ཚོར་ལས་ཀ་རག་ཐབས་སུ་དམིགས་ཏེ་ ༢༠༡༣ ཟླ་ ༨ ཚེས་ ༡༤ ཉིན་ངྷ་སྟེང་བོད་ཁྱིམ་བཟོ་གྲྭའི་ཉེ་འཁྲིས་སུ། དབུ་མ་གླིང་དྲ་ཐོག་ཚོང་ལས་སྡེ་ཚན་(Uma Ling Technical Solutions)ཞེས་པ་ཞིག་གསར་འཛུགས་གནང་ཡོད་ཅིང་། དེ་ནི་རྒྱ་གར་དང་ཕྱི་རྒྱལ་གྲོང་ཁྱེར་ཆེ་ཁག་ཏུ་ཡོད་པའི་དྲ་ཐོག་ཚོང་ལས་སྡེ་ཚན་ (Call center)ཞེས་པ་དང་འདྲ་བའི་ལས་གཞི་ཞིག་ཡིན་ཡང་། ལས་གཞི་དེ་ལོ་གཅིག་དང་ཕྱེད་ཙམ་ལས་ཕྱིན་མེད་པར་ཟླ་འདིའི་ཚེས་ ༢ ཉིན་སྒོ་རྒྱག་དགོས་བྱུང་ཡོད་འདུག

རྒྱུས་ལོན་བྱུང་བ་ལྟར་ན། ལས་གཞི་དེ་ཐོག་མ་མགོ་འཛུགས་སྐབས། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱིས་ས་ཆ་འཚོལ་རྒྱུ་དང་ལས་མི་འཚོལ་བསྡུའི་འགན་འཁུར་རྒྱུ་དང་། རྒྱ་གར་ཨོ་ཀེ་སི་ཚོགས་པས་ལས་མི་འདེམ་སྒྲུག་དང་གླ་ཕོགས་སྤྲོད་རྒྱུ་སོགས་ཀྱི་འགན་གཙོ་བོ་འཁུར་རྒྱུ་བྱས་ཡོད་འདུག ཨ་རི་བ་ལྕམ་སྐུ་ཌེ་བྷོ་ར་ཨ་ཀར་(Dr. Deborah Akers)ལགས་ཀྱིས་འབྲེལ་མཐུད་གནང་རྒྱུ་བཅས་ཀྱི་བཀོད་སྒྲིག་ཡོད་འདུག

ཚོགས་པ་འདིའི་ནང་ལས་ཀ་བྱེད་བར་ལག་འཁྱེར་སོགས་ཀྱི་ཆ་རྐྱེན་མད་པར་དབྱིན་སྐད་གང་འཚམ་ཤེས་ན་འགྲིག་གི་ཡོད་པ་དང་། འདིར་ཉིན་ལས་དང་མཚན་ལས་བྱེད་མཁན་གཉིས་ཡོད་ཅིང་། ཉིན་ལས་བྱེད་མཁན་ཚོར་ཟླ་ཕོགས་ ༦༥༠༠ དང་། མཚན་ལས་བྱེད་མཁན་ཚོར་ཟླ་ཕོགས་ ༨༠༠༠ ནས་ ༩༠༠༠ བར་ཡོད་འདུག་ལ། ཉམས་མྱོང་ཡོད་མཁན་ཡིན་ཚེ་སྒོར་ ༥༠༠ འཕར་མ་སྤྲོད་བཞིན་ཡོད་འདུག ལས་གཞི་འདི་མགོ་འཛུགས་སྐབས་ལས་ཀ་བྱེད་མཁན་གཞོན་སྐྱེས་ ༤༥ ཙམ་ཡོད་ཀྱང་། ཕྱིས་སུ་རིམ་པས་ཇེ་ཉུང་དུ་ཕྱིན་ཏེ་ཉེ་ལམ་སྒོ་རྒྱག་ལས་ཀ་བྱེད་མཁན་ ༩ ལས་ལྷག་མི་འདུག

ཚོགས་པའི་ལས་འཆར་དོ་དམ་པ་བསྟན་འཛིན་དར་རྒྱས་ལགས་ཀྱིས་བརྗོད་པ་ལྟར་ན། ལས་གཞི་འདིའི་འགྲོ་སོང་ལྡི་ལིར་ཡོད་པའི་ཨོ་ཀེ་སི་(OKS)ཞེས་པའི་བཟོ་གྲྭའི་བདག་པོ་ཝུཎོ་ཌ་ཁཱ་ཎཱ་ཡིས་བརྒྱ་ཆ་ ༥༡ དང་། དྷ་རམ་ས་གནས་སྡོད་ན་རོ་ཏམ་ས་ཡལ་(Mr. Narotam Sayal)ལགས་ཀྱིས་བརྒྱ་ཆ་ ༤༩ ཡིས་མ་འཇོག་བྱས་ཏེ་མགོ་འཛུགས་བྱས་ཡོད་ཀྱང་། རྗེས་སུ་ན་རོ་ཏམ་ས་ཡལ་ལགས་དང་ཝུཎོ་ཌ་ཁཱ་ཎཱ་ལགས་རྣམ་གཉིས་འཆམ་མིན་གྱི་གནས་ཚུལ་ཞིག་བྱུང་བ་དང་། ཨོ་ཀེ་སི་ཡིས་དྷ་སའི་ལས་གཞི་དེའི་ས་ཆ་བརྗེ་བོ་རྒྱག་འཆར་ཡོད་ཀྱང་དུས་ལྟར་ལམ་ལྷོངས་མ་བྱུང་བ་བཅས་ལ་བརྟེན་ཏེ་ཟླ་འདིའི་ཚེས་ ༢ ཉིན་སྒོ་རྒྱག་དགོས་བྱུང་ཡོད་འདུག

འདི་གའི་གསར་འགོད་པས་ཚེས་ ༡༣ ཉིན་དྲ་ཐོག་ཚོང་ལས་སྡེ་ཚན་གྱི་ལས་འཆར་དོ་དམ་པ་ (Team leader) བསྟན་འཛིན་དར་རྒྱས་ལགས་སུ་ལས་ཁུངས་སྒོ་རྒྱག་དོན་གང་ཡིན་སྐོར་དྲིས་པར། ཁོང་གིས། སྤྱིར་བཏང་ཚེས་ ༡ ཉིན་ལས་ཁུངས་སྒོ་བརྒྱབ་ཚར་ཡོད་ཀྱང་། ཚེས་ ༢ ཉིན་ལྡི་ལི་ནས་ང་ཚོའི་ལས་གཞི་ལ་བདག་པོ་རྒྱག་མཁན་ཞིག་དང་འཕྲུལ་ལས་པ་ཞིག་ཡོང་ནས་ལས་བྱེད་ཚོ་བསྐྱར་དུ་བསྐོངས་ཏེ། དབུ་མ་གླིང་ཚོགས་པ་དངོས་སུ་སྒོ་རྒྱག་རྒྱུ་ཡིན་ཟེར་ནས་སྒོ་བརྒྱབ་སོང་། དེ་ལྟར་སྒོ་རྒྱག་དོན་གཙོ་བོ་གཅིག་ནི་ལས་གཞི་འདིར་བདག་པོ་གཉིས་ཡོད་ཅིང་། གཅིག་གི་མིང་ལ་ན་རོ་ཏམ་ས་ཡལ(Mr. Narotam Sayal) ཞུ་གི་ཡོད་པ་དང་། གཞན་དེའི་མིང་ལ་ཝུཎོ་ཌ་ཁཱ་ཎཱ་ཞུ་བ་རྒྱ་གར་གྱི་ཚོང་ལས་སྡེ་ཚན་ཨོ་ཀེ་སི་(OKS) ཚོགས་པའི་བདག་པོ་ཡིན་པ་མ་ཟད། ང་ཚོའི་ལས་ཀའི་གྲུབ་འབྲས་ཚང་མ་ཁོ་ཚོས་སྟངས་འཛིན་བྱེད་ཀྱི་ཡོད། སྔོན་མ་དབུ་མ་གླིང་མགོ་འཛུགས་སྐབས་ན་རོ་ཏམ་ས་ཡལ་གྱི་མ་འཇོག་བརྒྱ་ཆ་ ༤༩ དང་། ཝུཎོ་ཌ་ཁཱ་ཎཱ་ཡིས་བརྒྱ་ཆ་ ༥༡ བྱས་ཡོད་སྟབས། ཁོ་གཉིས་བར་ལ་རྙོག་གྲ་ཞིག་ཡོང་གི་ཡོད་ས་རེད། དེ་མཐོ་རིམ་བར་གྱི་སྐད་ཆ་ཞིག་ཡིན་སྟབས་ང་ཚོས་དྲང་པོ་ཡིན་མིན་ཤེས་ཀྱི་མི་འདུག ཡིན་ཡང་ང་ཚོས་བོད་ཕྲུག་ཁྱིམ་སྡེ་ལ་ཟླ་གསུམ་རེར་ས་ཆའི་འགན་རྒྱ་འཇོག་དགོས་སྟབས། སྐབས་དེར་ངའི་མཐོ་རིམ་མི་སྣ་རེ་ཌེ་ཤཱི་ཅཱོ་ཌི་རེ་ཡིས་བོད་ཕྲུག་ཁྱིམ་སྡེར་ས་ཆ་བརྗེ་པོ་རྒྱག་འཆར་ཡོད་པའི་ཡི་གེ་ཞིག་བཏང་ཡོད་ཀྱང་། ས་ཆ་བརྗེ་པོ་རྒྱག་རྒྱུའི་འཆར་གཞི་དག་ལམ་ལྷོངས་མ་བྱུང་སྟབས། ཟླ་ ༢ ཚེས་ ༢ ཉིན་སྒོ་རྒྱག་རྒྱུའི་གསལ་བསྒྲགས་སྦྱར་བ་ལྟར་སྒོ་བརྒྱབ་པ་རེད། ཅེས་བརྗོད་བྱུང་།

གསར་འགོད་པས་དབུ་མ་གླིང་ཚོང་འབྲེལ་ལས་ཁང་དུ་ལོ་གཅིག་མ་ཟིན་ཙམ་རིང་ལས་ཀ་བྱས་མྱོང་མཁན་བསྟན་འཛིན་འཛོམས་པ་ལགས་སུ་བཅར་འདྲི་ཞུས་པར། ཁོ་མོས། ང་ཚོའི་ལས་ཁུངས་ནང་ཉིན་མོ་དང་མཚན་ལས་བྱེད་མཁན་བཅས་རིགས་གཉིས་ཡོད་ཅིང་། ཉིན་ལས་བྱེད་མཁན་ཚོས་དྲ་ཐོག་བརྒྱུད་རྒྱལ་སྤྱི་རྒྱལ་ནང་གི་ཁེ་ལས་ཁག་གི་རྐང་འཛིན་པ་དང་འགན་འཁུར་མི་སྣ། ཁོ་ཚོ་དང་ལས་ཁུངས་ཀྱི་ལས་དོན་བྱེད་ཕྱོགས་དང་ངོ་བོ། རྒྱལ་ཁབ་ག་པར་གསར་འཛུགས་བྱས་པ་དང་ད་ལྟ་ག་པར་གནས་ཡོད་མེད་སོགས་ཀྱི་ཞིབ་ཕྲའི་གནས་ཚུལ་རྒྱུས་ལོན་བྱེད་དགོས་པ་དང་། མཚན་ལས་བྱེད་མཁན་ཚོས་དངོས་སུ་ཁ་པར་བཏང་སྟེ་གོང་གི་སྡེ་ཚན་དེ་དག་གི་འགན་འཁུར་མི་སྣ་དང་ལས་བྱེད་ཚོར་སྐད་ཆ་དྲིས་ནས་གསལ་པོ་བཟོས་དགོས་ཀྱི་ཡོད་པ་རེད། ཅེས་བརྗོད་བྱུང་།

བསྟན་འཛིན་འཛོམས་པ་ལགས་སུ་ཐོག་མར་དབུ་མ་གླིང་ལ་འཛུལ་སྐབས་དམིགས་ཡུལ་གང་ཡོད་དང་། འཛུལ་བཞུགས་རྗེས་ཉམས་མྱོང་གང་བྱུང་ཡོད་མེད་དྲིས་པར། ཁོ་མོས། ད་ལྟ་རྒྱ་གར་ནང་ཁ་པར་བརྒྱུད་འབྲེལ་གྱི་ལས་ཀ་(Call center) བྱེད་ས་མང་པོ་ཡོད་པ་ལྟར། ངས་ལོ་གཅིག་ལྷག་ལྡི་ལིར་ལས་ཀ་བྱས་མྱོང་ཡོད་ཀྱང་། སྤྱི་ཚོགས་ནང་དྷ་རམ་ས་ལར་གསར་འཛུགས་བྱས་པའི་དབུ་མ་གླིང་ནི་བོད་མིའི་སྒྲིག་འཛུགས་ངོས་ནས་མགོ་བཙུགས་གནང་བ་ཞིག་ཡིན་སྟབས་འཛུལ་ཞུགས་བྱས་པ་ཡིན། ལས་ཀ་དེར་ཞུགས་ཏེ་མི་ལ་འབྲེལ་བ་བྱེད་ཕྱོགས་དང་ཚོང་གི་སྐོར་ནས་མི་འགུག་སྟངས་སོགས་ཀྱི་ཐོག་ཉམས་མྱོང་མང་པོ་ཞིག་རེག་སོང་། ཞེས་བརྗོད་བྱུང་།

གསར་འགོད་པས་ཁོ་མོར་ད་ལྟ་ལས་ཁུངས་སྒོ་བརྒྱབ་ཡོད་སྟབས། ཁྱེད་རང་གཙོས་ལས་བྱེད་གཞན་ཚོར་དཀའ་ངལ་དང་ཚོར་བ་འདྲ་པོ་ག་རེ་བྱུང་དྲིས་པར། ཁོ་མོས། སྔོན་མ་ལས་ཀ་མཉམ་དུ་བྱས་པ་མ་ཟད། ཁོར་ཡུག་དང་རོགས་པ་དག་ཀྱང་མཐུན་པོ་ཆགས་ཡོད་སྟབས། ཧོབ་དེ་ཁ་ལ་སྒོ་རྒྱག་སྐབས་ཚང་མ་ཧང་སང་དགོས་པ་བྱུང་ཡོད་ལ་སེམས་སྐྱོ་དགོས་པ་ཞིག་ཆགས་ཡོད། གང་ཡིན་ཞེ་ན། ལས་ཀ་འདི་མེད་པ་ཆགས་ནས་གཞན་ཞིག་འཚོལ་དགོས་ན་གནས་སྐབས་རིང་ལས་མེད་འདྲ་པོ་ཆགས་ཡོད་པ་རེད། ཡིན་ནའང་ལས་ཁུངས་ཟླ་འདིའི་ཚེས་ཤར་ལ་སྒོ་བརྒྱབ་ཡོད་ཀྱང་། ཟླ་འདིའི་ཟླ་ཕོགས་ཆ་ཚང་སྤྲད་སོང་། དེ་མ་གཏོགས་ཁྱིམ་ཚང་ཡོད་མཁན་ཚོར་དཀའ་ངལ་འཕྲད་ངེས་རེད། ཅེས་བརྗོད་བྱུང་། ༢༠༡༣ ལོའི་ཟླ་ ༨ ཚེས་ ༡༤ ཉིན་དབུ་མ་གླིང་གསར་འཛུགས་སྒོ་འབྱེད་སྐབས། སྐུ་མགྲོན་གཙོ་བོར་སྲིད་སྐྱོང་བློ་བཟང་སེང་གེ་མཆོག་ཕེབས་ཡོད་པ་དང་། དེ་བཞིན། ཕྱི་དྲིལ་བཀའ་བློན་དང་བདེ་སྲུང་བཀའ་བློན། ཆོས་རིག་བཀའ་བློན། འཕྲོད་བསྟེན་བཀའ་བློན། བོད་ཁྱིམ་སྤྱི་ཁྱབ་དབུ་འཛིན་ཚེ་དབང་ཡེ་ཤེས་བཅས་ཕེབས་ཡོད།

དབུ་འབྱེད་མཛ་སྒོའི་སྟེང་སྲིད་སྐྱོང་མཆོག་གིས་དབུ་འབྱེད་གཏམ་བཤད་གནང་དོན། “དབུ་མ་གླིང་ཚོང་འབྲེལ་ལས་རིགས་ཁང་འདི་དྷ་སར་གསར་འཛུགས་གནང་བ་བརྒྱུད་བོད་མི་གཞོན་སྐྱེས་ཚོར་ལས་ཀའི་གོ་སྐབས་འཐོབ་རྒྱུ་དང་། དྷ་ས་ཙམ་མིན་པར་ས་གནས་གཞན་དུའང་དེ་བཞིན་འཛུགས་ཐུབ་རྒྱུའི་རེ་བ་ཡོད། བཀའ་ཤག་སྐབས་བཅུ་བཞི་པས་དབུ་མ་གླིང་ཚོང་འབྲེལ་ལས་རིགས་ཁང་དྷ་སར་འཛུགས་ཐུབ་པ་ནི་ཧ་ཅང་གལ་ཆེར་ངོས་འཛིན་བྱེད་བཞིན་ཡོད། དབུ་མ་གླིང་ཚོང་འབྲེལ་ལས་རིགས་ཁང་གི་ལས་གཞི་འདི་བཞིན་ཐོག་མའི་འཆར་གཞིའི་སྐབས་དབུ་མ་གླིང་ཚོང་འབྲེལ་ལས་རིགས་ཁང་གི་འགན་འཛིན་སྐུ་ཞབས་ན་རོ་ཏམ་ས་ཡལ་མཆོག་དང་། བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་གྲོས་མོལ་རིམ་པ་བྱུང་ཡོད། ད་ཐེངས་ལས་གཞི་འདིའི་འོག་བོད་མི་གཞོན་སྐྱེས་སྤྱི་དང་ལྷག་པར་བོད་ནས་གསར་དུ་འབྱོར་བའི་གཞོན་སྐྱེས་རྣམས་རྒྱ་གར་གྲོང་ཁྱེར་ལྡི་ལི་དང་སྦེང་ལོར་སོགས་ནང་ལས་ཀ་འཚོལ་ཆེད་འགྲོ་མི་དགོས་པར་དྷ་སའི་ཁོར་ཡུག་ནང་གནས་ནས་ལས་ཀ་རག་ཐུབ་རྒྱུའི་ཆ་རྐྱེན་བསྐྲུན་ཡོད”ཅེས་སོགས་གསུངས་འདུག

གསར་འགོད་པས་དཔལ་འབྱོར་ལས་ཁུངས་ལ་བཀའ་འདྲི་ཞུས་པར། དཔལ་འབྱོར་དྲུང་ཆེ་འཕྲིན་ལས་རྒྱ་མཚོ་ལགས་ཀྱིས། ང་ཚོས་ཨོ་ཀེ་སི་(OKS) ཚོང་ལས་ཁང་ལ་ཚོགས་པ་དེ་འདྲ་ཞིག་འཛུགས་རོགས་ཞུས་པ་ལྟར་བཙུགས་ཡོད་པ་མ་ཟད། ཚོགས་པ་དེས་བོད་པའི་གཞོན་སྐྱེས་ལས་མེད་ཚོར་ལས་ཀ་སྤྲོད་ཀྱིན་ཡོད་སྟབས། ང་ཚོས་རོགས་རམ་དང་མཐུན་རྐྱེན་གང་དགོས་ཞུས་པ་རེད་མ་གཏོགས་ཚོང་གང་ཡང་རྒྱག་གི་ཡོད་པ་མ་རེད། ཡིན་ཡང་ད་ལྟ་ང་ཚོས་ཚོགས་པ་དེ་སྒོ་རྒྱག་དགོས་དོན་སྐོར་བཀའ་མོལ་ཞུ་བཞིན་པ་ཡིན་སྟབས། གནས་སྟངས་གསལ་བོ་ཞིག་ད་ལྟ་ཞུ་ཐུབ་ཀྱི་མི་འདུག ཅེས་བརྗོད་བྱུང་།

གསར་འགོད་པ། དོན་གྲུབ།