བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༥༤ སྟེང་གི་རྩོམ་སྒྲིག་པའི་གཏམ།
ཉེ་ལམ་རྒྱ་གར་རྒྱལ་ས་ལྡི་ལི་བོད་སྒར་བསམ་ཡས་གླིང་ཉེ་འཁྲིས་སུ་ལྟས་ངན་གྱི་གནས་ཚུལ་ཞིག་བྱུང་ཡོད། བཙན་བྱོལ་བོད་མིའི་སྤྱི་ཚོགས་ནང་ཤེས་ཡོན་པ་དང་། རྩོམ་པ་པོ། ལས་འགུལ་བ། ཆབ་སྲིད་པའང་ཡིན་ཟེར་མཁན་སེར་མོ་བ་ཞིག་དང་སྐྱ་བོ་ཞིག་གིས་དམར་འཛིང་བྱས་མཐར་ཁོ་གཉིས་ཀའི་ཚེ་སྲོག་ཤོར་ཏེ་གཏམ་ངན་གླིང་ལ་བཞག་སོང་།
ཐེངས་འདིར་བསོད་རེས་བྱས་པའི་གྲྭ་བ་དེ་འབྲས་སྤུངས་སྒོ་མང་གི་གྲྭ་བ་དང་དགེ་རྒན་ཞིག་ཀྱང་ཡིན་རབས་འདུག མི་སྐྱ་དེའང་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་རེད། འདི་གཉིས་ཀ་ཤེས་ཡོན་རིག་གནས་གང་འཚམ་ཡོད་པ་མ་ཟད། ནང་པའི་ཆོས་ཀྱི་བག་ཆགས་དང་ནུབ་ཕྱོགས་ཀུན་སྤྱོད་སྨྲ་བའི་ཤེས་ཚད་ཡང་གང་འཚམ་ཡོད་མཁན་རེད།
ཐལ་སྐྱའི་འོག་གི་མེ་དམར་བཞིན་ང་ཚོའི་བོད་མི་རིགས་ལ་རང་བཞིན་ལྷན་སྐྱེས་ཀྱི་གཏུམ་དྲག་གི་གཤིས་ཀ་ཞིག་ཡོད་པ་དེ། སྦྱངས་པའི་ཤེས་ཡོན་དང་བརྒྱུད་པའི་ཉམས་མྱོང་། མཐའ་ན་ནང་པའི་ཆོས་ཀྱི་སློབ་གསོས་ཀྱང་འདུལ་མ་ཐུབ་བསྒྱུར་མ་ནུས་པའི་གནས་ལུགས་ཤིག་ཕྱིར་བསྟན་པ་རེད། ཐབས་གདུག་གི་གནས་ཚུལ་འདི་བརྒྱུད་དེ། དབྱིན་ཡིག་གཏམ་དཔེར། ཡོན་ཏན་ཆུང་ཆུང་ཉེན་ཁ་ཆེན་པོ་ཅེས་པ་ལྟར། འུ་ཅག་བཙན་བྱོལ་བོད་མིའི་སྤྱི་ཚོགས་ནང་གི་ཤེས་ཡོན་ཅན་དང་མི་མང་གི་སྣེ་འཁྲིད་པ་ཡིན་ཟེར་མཁན་དེ་དག་ཀྱང་ཧ་ཅང་འཇིགས་སུ་རུང་བ་རྐྱང་རྐྱང་ཡིན་པ་བསྟན་ཡོད།
སྤྱིར་བཏང་གནས་ཚུལ་དེ་གླེང་མི་འདོད་པ་ཞིག་དང་། གླེང་མི་འོས་པ་ཞིག་ཡིན་ནའང་། དངོས་སུ་བྱུང་ཟིན་པའི་གནས་ཚུལ་ལ་གཡོལ་ཐབས་དང་སྦེད་ཐབས་མེད། ད་ལྟ་གནས་ཚུལ་འདི་ཇི་ལྟར་བྱུང་བ་དང་ཅིའི་ཕྱིར་བྱུང་བར་དོན་སྙིང་མེད་པར། གནས་ཚུལ་གྱི་ངོ་བོ་གང་འདྲ་ཞིག་ཡིན་པ་དང་འདི་ལ་བརྟེན་ནས་ཅི་ཞིག་འབྱུང་སྲིད་པ་དེ་གླེང་དགོས།
མི་ཞིག་དུས་མིན་རྐྱེན་ལམ་དུ་སོང་ན་མྱ་ངན་དང་གདུང་སེམས་མཉམ་སྐྱེད་བྱེད་པ་མི་རིགས་ཐུན་མོང་གི་ལུགས་སྲོལ་ཞིག་ཡིན་ལ། སྲིན་བུ་རྡོག་པས་བརྫིས་ན་མ་ཎི་བགྲང་མཁན་བོད་པ་ཚོ་དེ་བས་ཀྱང་སྨོས་མ་དགོས་ཀྱང་། ཐེངས་འདིར་དེ་ལས་ལྡོག་སྟེ་མི་ཚང་མས་ཞབས་འདྲེན་ཐན་ལྟས་དང་། ཐ་ཤལ་བླུན་རྨོངས་ཞེས་དམོད་མོ་བྱེད་ཡུལ་ཞིག་ཆགས་སོང་།
དམར་འཛིང་དེའི་རྒྱབ་ཏུ་རྒྱུ་དང་རྐྱེན་གང་འདྲ་ཞིག་ཡོད་པ་སུས་ཀྱང་རྟོགས་ཐུབ་མེད་ཅིང་། གཅིག་བྱས་ན་བདེན་དོན་དང་གནས་ལུགས་ཡིད་འགུལ་ཐེབས་པ་ཞིག་ཡོད་ཀྱང་སྲིད་མོད། བྱེད་སྟངས་ཀྱི་ཆ་ནས་དགེ་ཆོས་ཀྱིས་བླུན་པོ་མཁས་པའི་རྗེས་སུ་མི་འབྲང་ཡང་། །མཁས་པ་བླུན་པོའི་རྗེས་སུ་མི་འབྲང་བ། །འདི་ནི་མཁས་པའི་དམ་ཚིག་དང་པོ་སྟེ། འཆི་བ་སྲོག་ལ་བབས་ཀྱང་འབད་པས་སྲུང་ཞེས་གསུངས་པ་ལྟར། བླུན་པོ་ལུག་གི་མགོ་ཅན་དང་གླང་གི་སྣ་ཅན་གྱི་བྱ་སྤྱོད་ལས་ཀྱང་རྫོབ།
སྤྱི་ཚོགས་གང་ཞིག་ཡིན་ནའང་མང་ཚོགས་དཀྱུས་མ་ཚོས་མིག་དཔེ་ལྟ་ས་དང་། ལད་ཟློས་བྱེད་ས་དེ་སྤྱི་ཚོགས་ནང་གི་ཤེས་ཡོན་ཅན་དང་། དུས་རྒྱུན་མང་ཚོགས་ཀྱི་མིག་ལམ་རྣ་ལམ་བརྒྱུད་མཁན་དེ་ཚོ་ཡིན། ད་རེབ་གནས་ཚུལ་འདིས་སྤྱི་ཚོགས་ལ་མིག་དཔེ་ངན་པ་བཞག་པའི་ནག་ཉེས་དེ་ཁྲིམས་ཐོག་ནས་མི་བསད་པའི་ནག་ཉེས་ལས་ཀྱང་ལྡབ་འགྱུར་གྱིས་ལྕི་ཞིང་། ཆོས་ཕྱོགས་ནས་བསྟན་པ་བཤིག་པ་ལས་ཀྱང་ལྡབ་འགྱུར་གྱིས་སྡིག་པ་ཆེ་བར་སུས་མི་བརྩི།།༡
