བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༥༥ སྟེང་གི་རྩོམ་སྒྲིག་པའི་གཏམ།
ད་ལོ་བོད་ཕྱི་ནང་གཉིས་དང་མདོ་དབུས་ཁམས་གསུམ་གྱི་ལོ་གསར་ཉིན་གཅིག་ལ་ཁེལ་འདུག ལོ་གསར་གཏོང་སྟངས་ཀྱི་རྣམ་པའང་འདས་པའི་ལོ་ཤས་ནང་གི་ཡག་ཤོས་དེ་རེད། འདི་གཅིག་ནས་བོད་མི་ཚོའི་ཁོག་པའི་སྙིང་དང་དཔྲལ་བའི་མིག་གཅིག་པུ་༧གོང་ས་མཆོག་དགུང་གྲངས་ ༨༠ ལ་ཕེབས་པའི་དགའ་སྟོན་གྱི་རྣམ་པ་ཞིག་ཡིན་ལ། གཉིས་ནས་དཀའ་སྡུག་གི་གོ་རིམ་ཁྲོད་ནས་རེ་བ་གསར་པ་བསླེབས་ཏེ། བོད་མི་ཚོས་ཐབས་ལམ་གསར་པ་ཞིག་གི་ཐོག་ནས་འདོད་པའི་དོན་རྣམས་མངོན་འགྱུར་བྱེད་རྒྱུར་སྟ་གོན་བྱས་པ་མཚོན་ཡོད།
ཉིས་སྟོང་བརྒྱད་ཚུན་གྱི་ལོ་ངོ་དྲུག་རིང་བོད་ཕྱི་ནང་གཉིས་སུ་ལོ་གསར་ལ་སྤྲོ་སྐྱིད་གཏོང་མཚམས་བཞག་སྟེ། ལོ་ནག་སྲུང་གཙི་དང་མྱ་ངན་གྱི་ལོ་གསར། ང་ལ་ལོ་གསར་མེད་ཟེར་བ་སོགས་ཀྱི་སྨྲེ་སྔགས་སྣ་ཚོགས་གང་སར་ཐོས་རྒྱུ་ཡོད། དེ་ནི་མྱ་ངན་གྱི་རྣམ་པས་ངོ་རྒོལ་མཚོན་སྟངས་ཤིག་ཡིན་ནའང་། འདིའི་ཟུར་ཞིག་ན་ཨ་ཆད་ཨུ་ཐུག་གི་ཉམས་ཤིག་ཀྱང་ངང་གིས་མངོན་ཡོད། ད་ལོ་སླར་ཡང་བོད་མི་ཚོ་ཡར་ལངས་ཏེ་བོད་ཀྱི་རྒྱལ་ས་ལྷ་ས་དང་རྒྱ་གར་དྷ་རམ་ས་ལ། ཨ་རིའི་རྒྱལ་ས་ཝ་ཞིན་ཌོན་སོགས་སུ་བོད་ཤིང་མོ་ལུག་གི་ལོ་གསར་གྱི་རྣམ་པས་ཁེངས་ཡོད།
དེ་བཞིན་རྒྱ་གར་ལྷོ་ཕྱོགས་གདན་ས་ཁག་དང་བལ་ཡུལ་མཆོད་རྟེན་ཁུལ། ཡུ་རོབ་དང་ཤར་ཨེ་ཤ་ཡའི་བོད་མི་སྐྱབས་བཅོལ་བ་སྡོད་ཡུལ་གང་སར་ལོ་གསར་གྱི་རྣམ་པ་རྒྱ་ཆེ་ཞིང་། བོད་མི་ཚོའི་གདོང་ལ་དགའ་སྤྲོ་དང་རེ་བས་ཁེངས་འདུག ལྷག་པར་དུ་ཨ་རིའི་ཕྱི་སྲིད་བོད་དོན་འབྲེལ་མཐུད་ཁང་དུ་བོད་པའི་ལོ་གསར་སྲུང་གཙི་ཞུས་པ་དང་། ཉེ་ལམ་༧གོང་ས་མཆོག་ཨ་རིའི་རྒྱལ་ཡོངས་སྨོན་ལམ་གསོལ་སྟོན་སྟེང་གདན་ཞུ་གནང་བ་སོགས་ནི་བོད་དང་ཨ་རིའི་ལོ་རྒྱུས་ཐོག་གི་གོམ་པ་གསར་པ་ཞིག་དང་། སྔ་ལོར་ཨ་རིའི་སྲིད་འཛིན་ཨོ་བྷ་མ་དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་ཀྱིས་གྲང་ཤུར་ཤུར་གྱི་ལག་འཇུ་བྱས་པའི་ཚུན་གྱི་རྣམ་འགྱུར་གསར་ཤོས་དེ་རེད།
བོད་ནང་ཁུལ་གྱི་ས་གནས་མང་པོའི་དགོན་པ་དང་གྲོང་སྡེ་དག་ཏུ། ༧གོང་ས་མཆོག་གི་སྐུ་པར་བཤམས་ཏེ་བསང་གསོལ་དར་འཛུགས་དང་། རླུང་རྟ་གཏོར་བ། མཆོད་བསྟོད་སྨོན་ལམ་སོགས་རྒྱ་ཆེན་པོ་བྱས་འདུག ལོ་གསར་ཚེས་གཅིག་ཉིན་ཁམས་ཕྱོགས་ཀྱི་ལུང་པ་འགའ་རེར་བོད་མི་ཚོས་རྒྱའི་ཉེན་རྟོག་པའི་སྟེང་དུ་རྩམ་པ་གཏོར་ཏེ། སྒྲིག་ཆས་ནག་པོའི་ཁ་དོག་དཀར་པོར་བཏང་འདུག་པ་འདིས། སྔོན་ཆད་ཡུ་ཁུ་རེན་གྱིས་ཨུ་རུ་སུའི་འོག་ནས་རང་བཙན་རྩོད་སྐབས། ཞི་བའི་མི་མང་གིས་དྲག་པོའི་དམག་མིར་མེ་ཏོག་ཕུལ་བའི་རྣམ་པ་དེ་མངོན་འདུག
རྒྱལ་ཁབ་དང་མི་རིགས་སུ་ཞིག་ཡིན་ཡང་ལོ་གསར་ལ་ཧ་ཅང་རེ་བ་དང་དགའ་མོས་བྱེད་ཅིང་། ལོ་གསར་པ་དང་བསྟུན་ཏེ་གནས་ཚུལ་ངན་པ་ཐམས་ཅད་ཞི་ཞིང་དག་སྟེ། ལོ་གསར་པའི་ནང་གི་བྱ་བཞག་ཐམས་ཅད་མགོ་འཛུགས་ཀྱི་རྟེན་འབྲེལ་སྒྲིག་གི་ཡོད། སྤྱིར་བོད་པ་རྟེན་འབྲེལ་གྱི་བདག་པོ་ཡིན་ཡང་། ཆོས་ལུགས་མི་འདྲ་བ་དང་ཆོས་མེད་སྨྲ་བ་ཚོས་ཀྱང་ལོ་གསར་པར་ལས་དོན་གསར་པ་མགོ་འཛུགས་དང་། ལས་དོན་གསར་པ་མགོ་འཛུགས་ལ་རྟགས་དང་རྟེན་འབྲེལ་ཡག་པོ་ཡོང་བར་སྨོན་ལམ་རྒྱག་སྲོལ་ཡོད།
ཤིང་མོ་ལུག་གི་ལོ་མགོ་ཚུགས་པ་དང་མཉམ་དུ་བོད་པ་མི་རེ་ངོ་རེར་ཁས་ལེན་དམ་བཅའ་གསར་པ་རེའང་ཡོད་དགོས། བོད་མི་རེ་རེའི་དམ་བཅའ་དེ་བོད་སྤྱི་ཚོགས་ཀྱི་དམ་བཅའ་ཡིན་ལ། བོད་སྤྱི་ཚོགས་ཀྱི་དམ་བཅའ་དེ་བོད་མི་རིགས་དང་རྒྱལ་ཁབ་ཀྱི་དམ་བཅའ་ཡིན། བོད་སྤྱི་བའི་མངོན་འདོད་མངོན་འགྱུར་བྱེད་ཐུབ་མིན་བོད་མི་རེ་རེའི་ཁས་ལེན་དམ་བཅའ་མངོན་འགྱུར་ཐུབ་མིན་ལ་རག་ལས་ཡོད་ཅིང་། བོད་མི་རེ་རེའི་དམ་བཅའ་མངོན་འགྱུར་ཐུབ་མིན་ང་དང་ཁྱོད་ཚུད་པའི་བོད་མི་ས་ཡ་དྲུག་གིས་དེ་རིང་མགོ་རྩོམ་སྟངས་ནས་མཐར་བསྐྱལ་སྟངས་ལ་ཐུག་ཡོད་དོ།།
