ཁ་སང་ཨོ་བྷ་མས་གྲོས་ཚོགས་གོང་མའི་རྒྱབ་སྐྱོར་འོག་ཌ་ཝུ་ཌེ་ཧཱ་ལེ་མཆོག་ཨ་རིའི་པ་ཀི་སི་ཐན་གྱི་གཞུང་ཚབ་པ་ཆེན་མོར་བསྐོ་བཞག་བྱས་ཡོད་འདུག
ཁ་སང་ཨ་རིའི་སྲིད་འཛིན་ཨོ་བྷ་མས་གྲོས་ཚོགས་གོང་མའི་རྒྱབ་སྐྱོར་འོག་ད་ལྟའི་ལེ་བྷ་ཎོན་གྱི་ཨ་རིའི་གཞུང་ཚབ་པ་ཆེན་མོ་ཌ་ཝུ་ཌེ་ཧཱ་ལེ་ (David Hale) མཆོག་པ་ཀི་སི་ཐན་གྱི་ཨ་རིའི་གཞུང་ཚབ་པར་བསྐོ་བཞག་བྱས་ཡོད་འདུག
ཨོ་བྷ་མས་རྒྱལ་སྤྱིའི་བརྒྱུད་ལམ་ཁག་ཏུ། “སྐུ་ཞབས་ཌ་ཝུ་ཌེ་ཧཱ་ལེ་ལགས་ནི་ཨ་རིའི་ཕུལ་བྱུང་གི་ཕྱི་འབྲེལ་སྐུ་ཚབ་ཅིག་ཡིན་པ་མ་ཟད། རྒྱལ་སྤྱིའི་གནད་དོན་ཆེ་ཆུང་ཁག་ལ་རྒྱུས་མངའ་དང་ཉམས་མྱོང་ཕུན་སུམ་ཚོགས་པོ་ཡོད་མཁན་ཞིག་ཀྱང་ཡིན་སྟབས། ད་ཐེངས་ཁོང་ཨ་རིའི་པ་ཀི་སི་ཐན་གྱི་གཞུང་ཚབ་པར་བསྐོ་བཞག་བྱས་པ་དེས། རྒྱལ་ཁབ་གཉིས་ཀྱི་འབྲེལ་ལམ་སྡུག་ཏུ་འགྲོ་བཞིན་པ་བསྐྱར་གསོ་ཐུབ་པར་རེ་བ་བྱེད་བཞིན་ཡོད”ཅེས་བརྗོད་འདུག
ཌ་ཝུ་ཌེ་ཧཱ་ལེ་ལགས་ཀྱིས་ ༡༩༨༤ ལོར་ཨ་རིའི་ཕྱི་སྡོད་གཞུང་ཞབས་ཁོངས་ཞུགས་ཏེ། ཨི་ཛི་རལ་དང་པ་ལི་སི་ཐན་གནད་དོན་ལས་ཁང་གི་འགན་འཛིན་དང་། དེའི་རྗེས་ཨ་རིའི་ཕྱི་སྲིད་ལྷན་ཁང་གི་དྲུང་ཆེའི་ཕྱག་རོགས་སོགས་བྱས་ཡོད་པ་དང་། ཨ་ཧྥི་རི་ཀའི་ཡུལ་གྲུ་བྷ་རེན་ (Bahrain) དང་སོ་ཌི་ཨེ་རབ་བྷེ་ཡ་ (Saudi Arabia) ནང་ཨ་རིའི་ཕྱི་འབྲེལ་མི་སྣའི་བྱ་བ་བསྒྲུབས་ཡོད་པ་མ་ཟད། ༢༠༠༥ ནས་ ༢༠༠༨ བར་ཇོར་ཌན་གྱི་ཨ་རིའི་གཞུང་ཚབ་ཆེན་མོའང་གནང་ཡོད་འདུག
༢༠༠༨ ནས་ ༢༠༠༩ ལོ་བར་ཨ་རིའི་ཕྱི་སྲིད་ལྷན་ཁང་གི་ནུབ་ཨེ་ཤ་ཡའི་ལས་དོན་ཁང་གི་འགན་འཛིན་གཞོན་ པར་བསྐོས་ཡོད་པ་དང་། ༢༠༠༩ ནས་ ༢༠༡༡ ལོ་བར་དཀྱིལ་ཤར་ཡུལ་གྲུའི་དམག་འཐབ་ལྷིང་འཇགས་ཡོང་ཐབས་ལ་ཞི་མོལ་གནང་མཁན་གྱི་ཨ་རིའི་དམིགས་བསལ་སྐུ་ཚབ་གཞོན་པ་བཅས་ཀྱི་བྱ་གཞག་ཁག་བསྒྲུབས་རྗེས། ༢༠༡༡ ནས་ ༢༠༡༣ ལོའི་བར་དཀྱིལ་ཤར་ཡུལ་གྲུའི་ཨ་རིའི་དམིགས་བསལ་སྐུ་ཚབ་གནང་སྟེ་གྲུབ་འབྲས་ཡག་པོ་ཐོབ་ཡོད་སྟབས། ༢༠༡༣ ལོའི་ལོ་མཇུག་ཏུ་ ལེ་བྷ་ཎོན་གྱི་ཨ་རིའི་གཞུང་ཚབ་ཆེན་མོར་བསྐོ་བཞག་བྱས་ཏེ་ད་ལྟ་ལས་འགན་སྒྲུབ་ཡོད་པ་རེད།
ཆབ་སྲིད་དབྱེ་ཞིབ་པ་ཚོས། ད་ལྟ་ཨ་རིས་པ་ཀི་སི་ཐན་དང་བདེ་སྲུང་དང་གསང་བའི་ལས་དོན་ཐོག་མཉམ་ལས་བྱས་ཏེ། ཁ་ཆེའི་དྲག་སྤྱོད་པ་རྩ་མེད་བཟོ་རྒྱུའི་ཁས་ལེན་བྱས་ཡོད་ཀྱང་། དེ་སྔོན་ཨ་རིའི་དམིགས་བསལ་བྱ་སྤྱོད་རུ་ཁག་གིས་པ་ཀི་སི་ཐན་གྱི་ས་ཐོག་ཏུ་བྷིན་ལཱ་ཌིན་བསད་པ་མ་ཟད། ད་ལྟ་རྒྱ་གར་གཞུང་དང་རྡུལ་ཕྲན་གློག་ཤུགས་ཀྱི་གྲོས་མཐུན་བཞག་པ་དང་འབྲེལ། རྒྱ་གར་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ཁོངས་སུ་ཞུགས་རྒྱུར་རྒྱབ་སྐྱོར་བྱེད་བཞིན་ཡོད་སྟབས། གཞུང་ཚབ་པ་གང་འདྲ་ཞིག་བསྐོ་བཞག་བྱས་ཀྱང་རྒྱལ་ཁབ་གཉིས་ཀྱི་འབྲེལ་ལམ་ལ་བཟང་ ཕྱོགས་ཀྱི་འགྱུར་བ་ཞིག་ཡོང་རྒྱུ་ཁག་པོ་ཡིན་སྐོར་བརྗོད་འདུག
གསར་འགོད་པ། དོན་གྲུབ།
