ཁ་ཉིན་ནས་བཟུང་བྷར་ཛིལ་གྱི་མང་ཚོགས་ས་ཡ་གཅིག་ལྷག་གིས་རྒྱལ་ཡོངས་ཀྱི་གྲོང་ཁྱེར་ཁག་ཏུ་སྲིད་འཛིན་གནས་དབྱུང་གཏོང་དགོས་པའི་ངོ་རྒོལ་ལས་འགུལ་སྤེལ་བཞིན་ཡོད་འདུག
ཟླ་འདིའི་ཚེས་ ༡༥ ཉིན་བྷར་ཛིལ་གྱི་ཁྲིམས་རྩོད་པ་ཌལ་ཌན་ (Deltan Martinazzo Dallagnol) ཞུ་བ་ཞིག་གིས་གཞུང་འཛིན་ངལ་རྩོལ་ཚོགས་པའི་དངུལ་གཉེར་ཇའོ་ཝ་ཁཱ་རེ་ (Joao Vaccari) གཙོས་ཆབ་སྲིད་པ་ ༢༧ གྱིས་གཞུང་གི་སྟངས་འཛིན་འོག་ཡོད་པའི་པེ་ཌོར་བྷར་སི་རྡོ་སྣུམ་ཁེ་ལས་ (Petrobras) ནས་ཨ་སྒོར་ཐེར་འབུམ་མང་པོ་ལྐོག་ཟ་དང་ལྐོག་རྔན་བླངས་ཡོད་སྐོར་བསྒྲགས་ཡོད་སྟབས། རྒྱལ་ས་བྷར་ཛི་ལི་གཙོས་རྒྱལ་ཡོངས་ཀྱི་མངའ་སྡེ་ ༢༢ དང་གྲོང་ཁྱེར་ཁག་ ༡༥༠ ཡི་མང་ཚོགས་ས་ཡ་གཅིག་ལྷག་གིས་ངོ་རྒོལ་བྱས་ཏེ། བྷར་ཛིལ་གྱི་སྲིད་འཛིན་ལྕམ་ཌིལ་མཱ་རོབ་སི་ཧྥི་ (Dilma Rousseff)ལས་གནས་ནས་གནས་དབྱུང་གཏོང་དགོས་པའི་དགོས་འདུན་བཏོན་ཡོད་འདུག
འདིའི་ཐད་ཁྲིམས་གཏུགས་བྱེད་མཁན་ཁྲིམས་རྩོད་པ་ཌལ་ཌན་གྱིས་རོའུ་ཌར་གསར་ལམ་ཐོག “ང་ཚོར་གཞུང་འཛིན་ངལ་རྩོལ་ཚོགས་པའི་དངུལ་གཉེར་ཇའོ་ཝ་ཁཱ་རེ་ཡིས་པེ་ཌོར་བྷར་ སི་རྡོ་སྣུམ་ཁེ་ལས་ཀྱི་འགན་འཛིན་ཟུར་པ་རེ་ཎཱ་ཌོ་ (Renato Duque) ས་ནས་ཞལ་འདེབས་མ་དངུལ་མང་པོ་བསླུ་བྲིད་བྱས་ཡོད་པ་ཁུངས་སྐྱེལ་བྱ་རྒྱུ་ཡོད་པ་མ་ཟད། ཎཱ་ཌོ་ཡིས་ཁོར་དངུལ་དེ་དག་ལྐོག་རྔན་གྱི་ཚུལ་དུ་སྤྲད་ཡོད་པ་བདེན་དཔང་བྱས་ཡོད་པར་བརྟེན། འདས་ལོའི་ནང་ཎཱ་ཌོ་བཙོན་འཇུག་བྱས་ཡོད་ཀྱང་ངན་རོགས་མང་པོ་ཞིག་འཛིན་བཟུང་བྱེད་ཐུབ་མེད་སྟབས། ད་ཐེངས་ཆེས་མཐོའི་ཁྲིམས་ཁང་གིས་བརྟག་དཔྱད་ནན་མོ་བྱས་ནས་ཉེས་ཆད་གཅོད་དགོས”ཞེས་བརྗོད་འདུག
བྷར་ཛིལ་གྱི་སྲིད་འཛིན་ལྕམ་ཌིལ་མཱ་རོབ་སི་ཧྥི་ཡིས། “ཁོ་ཚོས་བརྟག་དཔྱད་བྱེད་དགོས་ཚེ་བྱ་རྒྱུ་ཡིན་སྟབས། སུས་ནོར་འཁྲུལ་བྱས་ཡོད་ཀྱང་འགན་འཁུར་དགོས”ཞེས་བརྗོད་ཡོད་པ་དང་། བདུན་ཕྲག་འདིའི་ནང་ཁོ་མོས་གྲོས་ཚོགས་ནང་ལྐོག་ཟ་རུལ་སུངས་ལ་རྡུང་རྡེག་གཏོང་རྒྱུའི་ཐབས་ལམ་ཞིག་གསལ་སྟོན་དང་འབྲེལ་ཆབ་སྲིད་བཅོས་སྒྱུར་གྱི་རྩ་འཛིན་ཁྲིམས་ཡིག་ཁྱབ་བསྒྲགས་བྱ་རྒྱུ་ཡིན་ཞེས་བརྗོད་འདུག གཞུང་འཛིན་ངལ་རྩོལ་ཚོགས་པས་པེ་ཌོར་བྷར་རྡོ་སྣུམ་ཁེ་ལས་ནས་ཁྲིམས་མཐུན་ཐོག་ཞལ་འདེབས་བསྡུ་སློང་བྱས་པ་ལས་ལྐོག་ཟ་རུལ་སུངས་བྱས་མེད་སྐོར་བརྗོད་འདུག
༢༠༠༣ ནས་ ༢༠༡༢ ལོའི་བར་རེ་ཎཱ་ཌོ་ (Renato Duque) ཡིས་པེ་ཌོར་རྡོ་སྣུམ་ཁེ་ལས་ཀྱི་འགན་འཛིན་བྱེད་སྐབས། གཞུང་གིས་ཁོས་ལྐོག་ཟ་བྱས་པ་དང་ལྐོག་རྔན་བླངས་ཡོད་པའི་དོགས་གཞིའི་འོག་རླངས་འཁོར་གཙང་ཕྱག་ལས་འགུལ་(Operation Car Wash) ཞེས་པ་ཞིག་སྤེལ་ཏེ། རྟོག་ཞིབ་ཚོགས་ཆུང་གིས་ཎཱ་ཌོ་ཡིས་ཨ་སྒོར་ས་ཡ་ ༢༡ ཙམ་སུད་སི་དང་མོ་ཎཱ་ཁཱོ། ཨ་རི་དང་ཧོང་ཀོང་སོགས་ཀྱི་དངུལ་ཁང་ནང་བཏང་ཡོད་པ་ཤེས་རྟོགས་བྱུང་སྟེ་འདས་ལོར་ཁོ་འཛིན་བཟུང་བྱས་ཡོད།
བདུན་ཕྲག་སྔོན་མའི་ནང་པེ་ཌོར་རྡོ་སྣུམ་ཁེ་ལས་ཀྱི་འགན་འཛིན་ཟུར་པ་པེ་ཌོར་ (Pedro Barusco) གྱིས་བྷར་ཛིལ་གྲོས་ཚོགས་ཀྱི་བསྐྱར་ཞིབ་བགྲོ་གླེང་སྐབས། གཞུང་འཛིན་ངལ་རྩོལ་ཚོགས་པས་པེ་ཌོར་རྡོ་སྣུམ་ཁེ་ལས་ལ་གཞུང་གི་ལས་འཆར་ཁག་ཅིག་ཐོབ་ཆེད་རྡོ་སྣུམ་ཁེ་ལས་ནས་ཨ་སྒོར་ས་ཡ་ ༢༠༠ ལྷག་ལྐོག་རྔན་བླངས་ཚུལ་བརྗོད་ཡོད་པ་མ་ཟད། ཁ་ཉིན་ཁྲིམས་རྩོད་པ་ཌལ་ཌན་གྱིས་གཞུང་འཛིན་ངལ་རྩོལ་ཚོགས་པའི་དངུལ་གཉེར་ཐེ་པའི་ཆབ་སྲིད་པ་ ༢༧ གྱིས་གཞུང་འཛིན་རྡོ་སྣུམ་ཁེ་ལས་ནས་ལྐོག་ཟ་བྱས་ཡོད་པ་ཐེར་འདོན་བྱས་ཡོད་འདུག
༢༠༡༤ ལོའི་ཟླ་ ༢ ནང་བྷར་ཛིལ་ཆེས་མཐོའི་ཁྲིམས་ཁང་གིས་ཆབ་སྲིད་པ་དང་ཁེ་ལས་པ་གཙོས་གཞུང་གི་གནད་ཡོད་མི་སྣ་མང་པོ་ཞིག་གིས་བྷར་ཛིལ་གྱི་པེ་ཌོར་བྷར་སི་རྡོ་སྣུམ་ཁེ་ལས་ (Petrobras) ནས་ཨ་སྒོར་ཐེར་འབུམ་ ༣ ལྐོག་ཟ་བྱས་ཡོད་པ་ཕྱིར་བསྒྲགས་བྱས་ཡོད་ཅིང་། རྡོ་སྣུམ་ཁེ་ལས་ཀྱི་འགན་འཛིན་ཟུར་བ་གཉིས་དང་ས་ཁང་ཐོན་ལས་ཀྱི་ཁེ་ལས་པ་བརྒྱད། ཆབ་སྲིད་པ་དང་སྲི་ཞུ་བ་ཁག་ཅིག་བཅས་ཁྱོན་མི་ ༣༩ འཛིན་བཟུང་བྱ་རྒྱུའི་བཀའ་རྒྱ་བཏང་ཡོད་སྟབས། སྐབས་དེར་གསར་ལམ་ཁག་ཅིག་གིས་ལྕམ་ཌིལ་མཱ་རོབ་སི་ཧྥི་ཡིས་ཀྱང་ལྐོག་ཟ་བྱས་ཡོད་པའི་ནག་ཉེས་བཙུགས་ཡོད་ཀྱང་། ཁོ་མོས་གནད་དོན་ངོས་ལེན་བྱས་མེད་པ་མ་ཟད། ད་ཐེངས་ཀྱང་ཁོ་མོས་དོན་རྐྱེན་དེ་དང་འབྲེལ་བ་མེད་སྐོར་བརྗོད་ཡོད།
ཁ་སང་ངོ་རྒོལ་ནང་མཉམ་ཞུགས་བྱེད་མཁན་ཨན་ཌར་ (Andre Menezes) གྱིས་དབྱིན་ཡུལ་གྱི་ཉིན་རེའི་གསར་འཕྲིན་ (Daily Mail) ཐོག སྲིད་འཛིན་མཆོག་ལྐོག་ཟ་རུལ་སུངས་དོན་རྐྱེན་དང་ཐད་ཀར་འབྲེལ་བ་མེད་སྲིད་ཀྱང་། ཁོ་མོས་དོན་རྐྱེན་དེ་ཤེས་བཞིན་དུ་དུས་ཐོག་ཐག་གཅོད་མ་བྱས་པར་ནར་འགྱངས་བྱས་ཡོད་སྟབས། ལས་གནས་ནས་གནས་དབྱུང་གཏོང་དགོས་ཞེས་བརྗོད་འདུག
གསར་འགོད་པ། དོན་གྲུབ།
