ལིན་ཅི་ཧྭ་ཡི་ནུ་བོ་ལིན་ཝན་ཁྲིན་ཨ་རིར་བྲོས་བྱོལ་ཕྱིན་ཡོད་པ་དང་ཁོའི་ལག་ཏུ་རྒྱ་གཞུང་གི་མཐོ་རིམ་དཔོན་རིགས་ཚོའི་གསང་བ་མང་པོ་ཞིག་ཡོད་སྟབས་རྒྱ་གཞུང་གིས་ཐབས་ཤེས་སྣ་ཚོགས་བྱས་ཏེ་རྗེས་འདེད་བྱེད་ཀྱི་ཡོད་འདུག
རྒྱ་ནག་གཞུང་གི་བཀག་བསྐྱིལ་ཞིབ་བཤེར་འོག་ཡོད་པའི་རྒྱ་ནག་འཐབ་ཕྱོགས་གཅིག་གྱུར་གྱི་བློན་ཆེན་ལིན་ཅི་ཧྭ་ཡི་ནུ་བོ་ལིན་ཝན་ཁྲིན་ཉེ་ལམ་ཨ་རི་ལ་བྲོས་བྱོལ་དུ་ཕྱིན་ཡོད་པ་དང་། ལིན་ཝན་ཁྲིན་གྱི་ལག་ཏུ་ཀྲུང་ནན་ཧེ་ཡི་གལ་ཆེའི་གསང་བ་ཁ་ཤས་ཡོད་སྟབས། ཁོ་ཕྱི་ལོགས་སུ་ཤོར་བའི་གནས་ཚུལ་དེ་ཐོན་མ་ཐག་རྒྱ་ནག་གཞུང་གིས་ལིན་ཁྱིམ་རྒྱུད་ཀྱི་གྱོད་དོན་ཞིབ་བཤེར་མཚམས་འཇོག་བྱས་ཡོད་པའི་གནས་ཚུལ་ཐོན་ཡོད་པ་དང་། ལིན་ཝན་ཁྲིན་གྱི་ལག་ཏུ་ཡོད་པའི་རྒྱ་ནག་གི་གསང་བ་དེ་ནི་ཝང་ལི་ཅིན་གྱིས་གསང་བ་ཕྱི་གྱར་བྱས་པ་ལས་ཀྱང་ལྷག་ཡིན་པ་དང་། དེ་ནི་རྒྱ་གཞུང་གི་མཐོ་རིམ་དཔོན་རིགས་ཚོའི་གཡེམ་སྦྱོར་གྱི་བརྙན་པར་རིགས་ཡིན་པའི་གནས་ཚུལ་ཐོན་འདུག
ཕྱི་ཚེས་ ༢༠ ཉིན་ཀྲུང་གོར་ལྟ་བ་ཞེས་པའི་དྲ་བའི་སྟེང་། ལིན་ཅི་ཧྭ་ཡི་ཕུ་བོ་གཉིས་པ་ཧྲན་ཞི་ཞིང་ཆེན་སྲིད་གྲོས་འགན་འཛིན་གཞོན་པ་ཟུར་པ་ལིན་ཀྲིན་ཚི། རྒྱ་གཞུང་གིས་བཀག་ཉར་ཞིབ་བཤེར་བྱས་པའི་ཉིན་གཉིས་སྔོན་ལ་ལིན་ཝན་ཁྲིན་ཨ་རི་ལ་བྲོས་བྱོལ་ཕྱིན་ཡོད་པ་དང་། ལིན་ཝན་ཁྲིན་ལ་ཨ་རི་དང་ཁེ་ན་ཌ་སོགས་སུ་སྡོད་ཁང་ཡོད་པའི་བཤད་ཚུལ་ཡོད་སྟབས། ཟླ་གཉིས་པའི་ནང་ཨ་རིའི་རླུང་འཕྲིན་ཁང་གིས་ཨ་རའི་ཕྱི་སྲིད་ལྷན་ཁང་ལ་གནས་ཚུལ་དེའི་སྐོར་བཅའ་འདྲི་བྱས་པར། གྱོད་དོན་འདིའི་སྐོར་ལ་གསལ་བཤད་ཞུ་ཐུབ་ཀྱི་མི་འདུག་ཅེས་ལན་བསྐྱོན་འདུག འོན་ཀྱང་། རྒྱ་ནག་ཕྱི་ཕྱོགས་ཀྱི་རྒྱ་ཡིག་བརྒྱུད་ལམ་ཁག་ཏུ། ལིན་ཝན་ཁྲིན་ཨ་རིར་བྲོས་བྱོལ་དུ་ཕྱིན་པ་དང་ཁོའི་ལག་ཏུ་རྒྱ་གཞུང་གི་ཚོར་བ་རྣོ་བའི་གསང་བ་འབོར་ཆེན་ཞིག་ཡོད་སྟབས། གལ་སྲིད་རྒྱ་གཞུང་གིས་མུ་མཐུད་དུ་ལིན་ཁྱིམ་རྒྱུད་ལ་སྔོག་བཤེར་བྱས་པ་ཡིན་ན། ཁོས་གསང་བ་དེ་དག་ཨ་རི་ནས་ཁྱབ་བསྒྲགས་བྱ་རྒྱུའི་འཇིགས་སྐུལ་བྱས་ཡོད་པ་སོགས་བརྗོད་ཡོད་འདུག
ཟླ་འདིའི་ཚེས་ ༨ ཉིན་མིན་ཅིན་གསར་ཁང་གི་རྩོམ་སྒྲིག་པ་ཁྲིན་ཞོ་ཕིན་ (Chen Xiaoping) གྱིས་གནས་ཚུལ་སྤེལ་བ་ལྟར་ན། ཀྲུང་ནན་ཧེའི་ནང་གི་གཙོ་གཉེར་བ་ཆེན་མོ་ལིན་ཅི་ཧྭ་ཡི་ནུ་བོ་ཕྱི་ལ་བྲོས་བྱོལ་ཕྱིན་པ་དེ་ནི། དེ་སྔའི་ཁྲོན་ཆེན་གྲོང་ཁྱེར་ཉེན་རྟོག་མགོ་བ་ཝང་ལིན་ཅིན་གྱིས་རྒྱ་ནག་ལ་རྒྱབ་འགལ་བྱས་པ་དང་བསྡུར་ན་ཧ་ཅང་ཚབས་ཆེན་ཡིན་པ་མ་ཟད། རྒྱ་ནག་གཞུང་གི་རིག་གནས་གསར་བརྗེ་རྗེས་ཀྱི་བྲོས་བྱོལ་བ་ཚབས་ཆེ་ཤོས་སུ་གྱུར་ཡོད་སྟབས། ད་ལྟ་བར་དུ་པེ་ཅིན་གྱིས་ཐབས་ཤེས་སྣ་ཚོགས་བྱས་ཏེ་ཨ་རི་དང་ཕྱི་ཕྱོགས་ལ་གསང་འཕྲིན་བརྒྱ་ལྷག་བཏང་སྟེ། ཁོ་རྩད་གཅོད་བྱས་ཡོད་ཀྱང་མཇུག་འབྲས་གང་ཡང་ཐོན་མི་འདུག འོན་ཀྱང་། ལིན་ཝན་ཁྲིན་གྱི་ལག་ཏུ་ཆབ་སྲིད་ཀྱི་ཉིང་རྡུལ་འབར་མདེལ་ག་རེ་ཡོད་དམ་ཞེ་ན། རྩོམ་སྒྲིག་པས་མུ་མཐུད་དུ། ལིན་ཅི་ཧྭ་ཡི་ཆབ་སྲིད་གོ་གནས་ཅང་ཙི་མིན་དང་ཧུའུ་ཅིན་ཐོ། ཞི་ཅིན་ཕིན་བཅས་སྲིད་འཛིན་གསུམ་གྱི་ནང་དུ་གནས་པ་འདི་དང་། ལིན་ཝན་ཁྲིན་ནི་ལིན་ཅི་ཧྭ་ཡི་འབྲེལ་མཐུད་པ་གཙོ་བོ་ཡིན་སྟབས། ལིན་ཅི་ཧྭ་ཡིས་གང་ཤེས་པ་ཐམས་ཅད་ཁོས་ཀྱང་ཤེས་པ་དང་། ཡིན་ན་ཡང་། པེ་ཅིན་གྱིས་སེམས་ཁྲལ་བྱེད་ས་ནི། རྒྱ་གཞུང་མཐོ་རིམ་དཔོན་རིགས་ཚོའི་སྒེར་གྱི་གཡེམ་སྦྱོར་གྱི་གནས་ཚུལ་རྫོབ་པོ་དང་། རྒྱ་ནག་གཞུང་གི་སྲིད་བྱུས་ཀྱི་གསང་བ་དག་རེད། གནས་ཚུལ་འདི་གཅིག་པུས་རྒྱ་གཞུང་གི་མཐོ་རིམ་དཔོན་རིགས་ཚོའི་དཔའ་འཁུམ་སྙིང་འདར་བྱེད་ཀྱིན་ཡོད་སྟབས། ད་ལྟ་རྒྱལ་སྤྱིའི་གསང་འཕྲིན་གླིང་ན་ལིན་ཝན་ཁྲིན་རྗེས་འདེད་ཀྱི་དམིགས་འབེན་ཡིན་པའང་དེ་རེད་ཅེས་བརྗོད་འདུག
ཕྱི་ཚེས་ ༡༠ ཉིན། པའོ་ཝིན་ཧྲི་ (baowenshe)བརྒྱུད་ལམ་ལ་ཀྲུང་ནན་ཧེ་ནས་གནས་ཚུལ་འབྱོར་གསལ་ལྟར་ན། ཀྲུང་ནན་ཧེ་མཐོ་རིམ་དཔོན་ཚོ་ལིན་ཝན་ཁྲིན་གྱི་ལག་ཏུ་ཆབ་སྲིད་ཀྱི་ཉིང་རྡུལ་ཞིག་ཡོད་པར་ཁྱོན་ནས་ཞེད་ཀྱི་མེད་པ་མ་ཟད། ཆབ་སྲིད་ཀྱི་འཇིགས་སྐུལ་བྱེད་པ་ལ་དེ་བས་ཀྱང་ཞེད་ཀྱི་མེད་པ་དང་། དེ་ལ་རྒོལ་རྡུང་གི་གྲ་སྒྲིག་ཡོད་སྐོར་བརྗོད་ཡོད་འདུག
ཕྱི་ཚེས་ ༢༠ ཉིན་ཀྲུང་གོ་ལྟ་བ་ཞེས་པའི་དྲ་བས་བརྒྱུད་ལམ་གཞན་གྱི་གནས་ཚུལ་ལུང་འདྲེན་བྱས་པ་ལྟར་ན། པེ་ཅིན་གྱིས་སེམས་ཁྲལ་བྱེད་བཞིན་པ་ནི་ལིན་ཝན་ཁྲིན་གྱི་ལག་ཏུ་ཡོད་པ་ནི་རྒྱ་ནག་གཞུང་གི་དམག་དོན་གནས་ཚུལ་གང་ཡང་མིན་ལ། རྒྱལ་ཁབ་ཀྱི་ཁེ་ཕན་དང་འབྲེལ་བ་ཡོད་པའི་ནང་དོན་ཡང་མེད། འོན་ཀྱང་། ཁོའི་ལག་ཏུ་ཡོད་པ་ནི་རྒྱ་གཞུང་མཐོ་རིམ་དཔོན་རིགས་ཚོའི་གཡེམ་སྦྱོར་བརྙན་ཐུང་འགའ་ཡོད་པའི་དོགས་གཞི་ཡོད་པ་དེ་རེད། ཡིན་ན་ཡང་། གནས་ཚུལ་འདིར་ཡིད་ཆེས་བྱེད་པར་ད་དུང་ཁུངས་སྐྱེལ་ར་སྤྲོད་བྱེད་དགོས་པ་ཞིག་ཆགས་ཡོད། ཅེས་སོགས་འཁོད་འདུག
ད་ང་ཚོ་བཙན་བྱོལ་ནང་དུ་ལྐོག་ཟ་རུལ་སུང་དང་སྤྱི་རྒྱུ་སྒེར་བདག མི་གསོད་ཁྲག་སྦྱོར་གསུམ་ཐོན་སོང་ང་། ད་གཡེམ་སྦྱོར་བརྙན་ཐུང་ཡང་ཐོན་ལ་ཉེ་བ་མེད་འགྲོ་་