ཨ་རིར་བྲོས་བྱོལ་ཕྱིན་པའི་རྒྱ་དཔོན་རུལ་སུངས་པ་ཚོ་འཛིན་རོགས་བྱོས།

རྒྱ་གཞུང་གིས་རྒྱ་ནག་གི་ལྐོག་ཟ་རུལ་སུངས་བྱེད་མཁན་མང་པོ་ཞིག་ཨ་རི་སོགས་ཕྱི་རྒྱལ་ཁག་ཏུ་བྲོས་བྱོལ་བྱས་ཡོད་པའི་དམིགས་བསལ་མིང་ཐོ་ཞིག་ཨ་རིའི་གཞུང་ལ་སྤྲད་དེ། ཉེས་ཅན་དེ་དག་འཛིན་བཟུང་དང་རྒྱ་ནག་ནང་གི་ནག་ཚོགས་རྩ་གཏོར་ཆེད་ཨ་རིའི་གཞུང་གིས་རོགས་འདེགས་དགོས་པའི་རེ་སྐུལ་ཞུས་ཡོད་འདུག

གཟའ་ལྷག་པའི་ཉིན། རྒྱ་ནག་ཆེས་མཐོའི་ཁྲིམས་ཞིབ་ཁང་གི་དབུས་རུལ་སུངས་རྒོལ་རྡུང་ལས་འགུལ་གྱི་མགོ་གཙོ་ཞི་ཅིན་ཧོའུ་ (Xu Jinhui) གྱིས་རྒྱ་ནག་གཞུང་འབྲེལ་གསར་ལམ་ཐོག ཨ་རིར་བྲོས་བྱོལ་དུ་ཕྱིན་པའི་རྒྱ་ནག་ལྐོག་ཟ་རུལ་སུངས་དང་ལྐོག་རྔན་བླངས་པ། དེ་བཞིན་ཁྲིམས་འགལ་གྱི་དངུལ་འབོར་ཆེན་པོ་ལྐོག་ཉར་བྱས་ཡོད་པའི་མི་སྣ་མང་པོ་ཞིག་གི་དམིགས་བསལ་མིང་ཐོ་ཞིག་ཨ་རིའི་གཞུང་ལ་ཕུལ་ཏེ། ཨ་རིའི་གཞུང་ནས་འཛིན་བཟུང་རོགས་སྐྱོར་ཡོང་བའི་འབོད་སྐུལ་ཞུས་ཡོད་པ་དང་། དམིགས་བསལ་མིང་ཐོ་དེའི་ནང་རྒྱ་ནག་གི་ཁྲིམས་འགལ་ཉེས་ཅན་པ་མང་པོ་ཞིག་ཨ་རིའི་ནང་སྐུང་ཡོད་སྐོར་འཁོད་ཡོད་ཀྱང་། མི་སུ་དག་ཚུད་ཡོད་མེད་ཁྱབ་བསྒྲགས་བྱས་མེད་སྟབས། ཕྱི་ཕྱོགས་ཀྱི་ལམ་གསར་ཁག་ཏུ། དེ་ནི་རྒྱ་གཞུང་གི་གསང་བའི་གནས་ཚུལ་མང་པོ་ཤེས་མཁན་ལིན་ཅི་ཧྭ་ཡི་ནུ་བོ་ལིན་ཝན་ཁྲིན་དང་། ལྐོག་ཟ་དངུལ་འབོར་ཆེ་ཤོས་གྲས་ཀོ་ཝན་ཀོའུ་ (Guo Wengui) སོགས་ཀྱི་མིང་ཐོ་ཡིན་ཚུལ་བརྗོད་པ་མ་ཟད། དཔྱད་ཞིབ་པ་ཁག་ཅིག་གིས། ཝང་ཆི་ཧྲན་ཨ་རི་ལ་སྐོར་སྐྱོད་བྱེད་འཆར་ཡོད་པ་དེའང་དཔོན་ངན་བྲོས་བྱོལ་པ་དེ་ཚོ་འཛིན་རྒྱུའི་ལས་འཆར་ཞིག་ཡིན་པ་དང་། གང་མགྱོགས་ “སྟག་རྒན་རྒྱལ་བོ་” གསོན་འཛིན་བྱ་རྒྱུའི་རྟགས་མཚན་གསལ་བོ་ཡིན་སྐོར་ཡང་བརྗོད།

གཟའ་ལྷག་པའི་ཉིན་ཏཱ་ཅིས་ཡོན་དྲ་བའི་སྟེང་། ཉེ་ལམ་པེ་ཅིན་གཞུང་གིས་རྒྱལ་ཁབ་གཞན་ལ་བྲོས་བྱོལ་ཕྱིན་བའི་རུལ་སུངས་དཔོན་ངན་འཛིན་བཟུང་གི་ནུས་ཤུགས་ཆེ་རུ་གཏོང་གི་ཡོད་པ་དང་། རྒྱ་གཞུང་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་གཙོ་ཝང་ཆི་ཧྲན་འབྱུང་གྱུར་ཨ་རིར་བསྐྱོད་འཆར་ཡོད་པ་དེ་ནི། བྲོས་བྱོལ་བ་དེ་དག་གི་སྐོར་ལ་ཨ་རིའི་གཞུང་དང་གྲོས་མོལ་བྱ་འཆར་ཡིན་ཡང་། ལས་རིམ་ད་དུང་གཏན་འཁེལ་མེད་པ་དང་། འབྱུང་གྱུར་ཕྱི་ཟླ་ ༩ བའི་ནང་སྲིད་འཛིན་ཞི་ཅིན་ཕིན་ཨ་རི་སྐོར་སྐྱོད་བྱ་འཆར་ཡོད་ཚུལ་སོགས་བཀོད་འདུག

ལིན་ཝན་ཁྲིན་ཨ་རིར་བྲོས་བྱོལ་བྱས་པ་དང་། ཁོའི་ལག་ཏུ་ཀྲུང་ནན་ཧེ་ཡི་གལ་ཆེའི་གསང་བ་ཁ་ཤས་ཡོད་སྟབས། རྒྱ་ནག་གཞུང་གིས་ལིན་ཁྱིམ་རྒྱུད་གྱི་ཁེ་ཕན་མེད་པའི་སྔོག་བཤེར་མཚམས་འཇོག་བྱས་ཡོད་པའི་གནས་ཚུལ་ཞིག་གསར་ལམ་ཁག་ཏུ་ཐོན་ཡོད་པ་མ་ཟད། ཕྱི་རྒྱལ་གྱི་རྒྱ་ཡིག་བརྒྱུད་ལམ་ཁག་ཏུ། ལིན་ཝན་ཁྲིན་ཨ་རིར་བྲོས་སྐབས་ཁོའི་ལག་ཏུ་རྒྱ་ནག་དཔོན་རིགས་ཚོའི་གཡེམ་སྤྱོད་ཀྱི་བརྙན་ཐུང་འགའ་ཡོད་ཚུལ་ཡང་བཀོད་ཡོད་ཀྱང་། ཟླ་འདིའི་ཚེས་ ༡༠ ཀྲུང་ནན་ཧེ་ནས་གསལ་བཤད་བྱས་པར། ལིན་ཝན་ཁྲིན་གྱི་ལག་ཏུ་ཆབ་སྲིད་ཀྱི་ཉིང་རྡུལ་ཞིག་ཡོད་པ་རེད་ཟེར་བ་དེར་ཀྲུང་ནན་ཧེའི་མཐོ་རིམ་དཔོན་ཚོ་ཁྱོན་ནས་ཞེད་ཀྱི་མེད་པར་དེ་ལ་རྒོལ་རྡུང་བྱེད་རྒྱུའི་གྲ་སྒྲིག་ཨང་གསར་ཡོད་ཚུལ་བརྗོད་འདུག དེ་བཞིན། ཟླ་འདིའི་ཚེས་ ༡༣ ཉིན། རྒྱ་ནག་གཞུང་གི་ཆེས་མཐོའི་ཁྲིམས་ཁང་གི་མགྲིན་ཚབ་པ་སཱོན་ཅོན་ཀོན་ (Sun Jungong) གྱིས། ཀྲུའུ་ཡོན་ཁཱང་དང་ལིན་ཅི་ཧྭ་གཉིས་ཀྱི་ཉེས་དོན་ཡོངས་ཁྱབ་ཐོག་འདྲི་གཅོད་བྱ་རྒྱུ་ཡིན་པ་དང་། གནས་ཚུལ་དེ་ཐད་ཀར་རྒྱང་སྲིང་བྱ་རྒྱུ་ཡིན་ཚུལ་བརྗོད་ཡོད་འདུག

ཉེ་ཆར་རྒྱ་ནག་ལྐོག་གྱུར་གྱི་ཚོང་པ་ “པེ་ཅིན་སྟེང་ཕྱོགས་ཚོང་འབྲེལ་འཛིན་སྐྱོང་ལྷན་ཁང་” (北京政泉控股)ཟེར་བའི་རྒྱབ་ཀྱི་སྤྱིན་བདག་ཀོ་ཝན་ཀོའུ་དང་རྒྱ་ནག་གཞུང་གི་དཔོན་ངན་ཚོའི་བར་ཐོག་མར་མཉམ་འབྲེལ་བྱས་པ་དང་། རྗེས་སུ་འགལ་ཟླ་བྱུང་པའི་བརྒྱུད་རིམ་གཅིག་རྗེས་གཉིས་མཐུད་དུ་གླེང་སློང་བྱུང་པ་དང་། དེ་འབྲེལ་གྱི་རྩོམ་ཡིག་ཅིག་ཏུ། ཀོ་ཝན་ཀོའུ་ལ་སྔོན་ཆད་འབྲེལ་བ་ཟབ་མོ་ཡོད་པའི་རྒྱ་ནག་གཞུང་བདེ་འཇགས་ལྷན་ཁང་གི་འགན་འཛིན་གཞོན་པ་མཱ་ཅིན་()གྱི་ནག་ཉེས་སྐོར་ཀོ་ཝན་ཀོའུ་ཡིས་རྒྱ་གཞུང་ལ་སྙན་སེང་ཞུས་རྗེས་མཱ་ཅན་གྱི་གོ་གནས་ཕབ་ཡོད་པའི་གནས་ཚུལ་ཕྱི་ཟླ་ ༢ ཚེས་ ༡༡ ཉིན་རྒྱ་ནག་གི་སཱོ་ཧོའི་དྲ་བའི་སྟེང་། “ཀོ་ཝན་ཀོའུ་སྔ་རྗེས་ཀྱི་སྲིད་ཚོང་རྒྱལ་ཁབ་” ཅེས་པའི་རྩོམ་ཡིག་ཅིག་ཏུ་བཀོད་ཡོད་ཀྱང་། དེའི་རྗེས་རྗེས་རྩོམ་ཡིག་དེ་དྲ་བའི་སྟེང་ནས་ནག་གསུབ་བཏང་ཡོད་འདུག

པའོ་ཞིན་དྲ་བས་གནས་ཚུལ་སྤེལ་བ་ལྟར་ན། ༢༠༡༣ ལོའི་ཟླ་ ༡༢ ནང་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ཀོ་ཝན་ཀོའུ་ལ་གྲོས་མོལ་དུས་ཆད་བཟོས་རྗེས་ཁོ་རྒྱ་ནག་ནས་བྲོས་བྱོལ་ཕྱིན་ཡོད་པ་དང་། ༢༠༡༤ ལོའི་ལོ་མཇུག་ལ་དབྱིན་ཡུལ་ནས་ཏོག་ཙམ་བསྡད་རྗེས་ཨ་རིར་འབྱོར་ཡོད་འདུག ཨ་རི་ནས་ཁོས་རྒྱ་ནག་ལ་གནས་ཚུལ་ཁ་ཤས་སྙན་སེང་ཞུས་ཡོད་འདུག་ལ། ༢༠༡༥ ལོའི་ཟླ་ ༡ ཚེས་ ༢༢ ཉིན་སྦྲགས་ཐོག་ནས་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་ལ་ཡི་གེ་ཞིག་བཏང་ཡོད་པའི་ནང་། རྒྱལ་ཡོངས་བདེ་འཇགས་ལྷན་ཁང་གི་འགན་འཛིན་གཞོན་པ་མཱ་ཅིན་(Ma Jian)གྱི་ལག་ཏུ་ང་རང་གི་ཨ་སྒོར་ཁྲི་ ༤༥༠༠ ཙམ་ལྷག་ཡོད་ཚུལ་སོགས་བཀོད་ཡོད་འདུག

ཟླ་འདི་ཚེས་ ༢༤ ཉིན། རྒྱ་ནག་གི་ལིན་ཅེན་ (Lengjing)དྲ་ཚིགས་སྟེང་གནས་ཚུལ་སྤེལ་བའི་ནང་། ཀོ་ཝན་ཀོའུ་ཡིས་པེ་ཅིན་ནས་ཕན་ཀོའི་ཏཱ་ཀན་(盘古大观) འཛུགས་བསྐྲུན་བྱས་པ་དང་། ཆབ་སྲིད་དང་ཚོང་འབྲེལ་གྱི་དྲ་རྒྱ་འབོར་ཆེན་བཙུགས་པའི་བརྒྱུད་རིམ་ཁྲོད། ཁོས་བདེ་འཇགས་ལྷན་ཁང་གི་འགན་འཛིན་གཞོན་པ་མཱ་ཅིན་དང་མཉམ་འབྲེལ་བྱས་ཏེ། པེ་ཅིན་གྲོང་ཁྱེར་གྱི་མགོ་གཙོ་གཞོན་པ་ལིའུ་ཀྲི་ཧྭ་ཕམ་པར་བརྒྱབ་པ། མཇུག་མཐར་རྒྱ་ནག་བདེ་འཇགས་ལྷན་ཁང་གི་འགན་འཛིན་གཞོན་པ་མཱ་ཅིན་འཛིན་བཟུང་བྱས་ཚུལ་སོགས་འཁོད་ཡོད་པ་དང་། ཀོ་ཝན་ཀོའུ་ཡི་བུ་དང་ལིན་ཅི་ཧྭ་ཡི་བུ་གཉིས་འབྲེལ་བ་ཡོད་ཚུལ་དང་ཁོ་གཉིས་རླངས་འཁོར་ལ་དགའ་བ་སོགས་ཀྱང་བཀོད་ཡོད་འདུག

ཝང་ཆི་ཧྲན་འབྱུང་འགྱུར་ཨ་རིར་བསྐྱོད་རྒྱུའི་གནས་ཚུལ་རྒྱ་ནག་སྐམ་སར་ཁྱབ་པ་དང་བསྟུན་ཏེ། རྒྱལ་ཁབ་གཞན་ལ་བྲོས་བྱོལ་ཕྱིན་པའི་རྒྱ་ནག་ཧི་པེ་ཞིང་ཆེན་ཀྲུའུ་ཁཱོའི་གྲོང་ཁྱེར་གྱི་འབྲི་མཛོད་ཁང་གི་འགན་འཛིན་ཆའོ་ཅན་ཅོན་ (Qiao Jianjun)གྱི་སྐྱེས་དམན་སྔ་མ་ཀྲའོ་ཧྲི་ལན་ (Zhao Shilan) འཛིན་བཟུང་བྱས་པའི་གནས་ཚུལ་ཁྱབ་བསྒྲགས་བྱས་ཡོད་འདུག

ཟླ་འདིའི་ཚེས་ ༡༧ ཉིན། ཨ་རིའི་མཉམ་འབྲེལ་མཐུན་ཚོགས་ཟེར་བས་ཀྲའོ་ཧྲི་ལན་ཁྲིམས་འགལ་ཐོག་ཨ་རིར་གནས་སྤོར་བྱས་པ་དང་། དངུལ་གཙང་མ་བཟོས་པའི་ནག་ཉེས་བཅས་ཀྱི་འོག་འཛིན་བཟུང་བྱས་ཡོད་པ་དང་། ཕྱི་ཚེས་ ༢༠ ཉིན། ཝ་ཤིན་ཊོན་མཉམ་འབྲེལ་མཐུན་ཚོགས་ཀྱི་ཁྲིམས་ཁང་ཞིག་ནས་འདྲི་གཅོད་བྱས་མཐར། ལོ་སན་ཇི་ལེ་གྲོང་ཁྱེར་ཁྲིམས་ཁང་གིས་ཐག་གཅོད་བྱ་རྒྱུར་བཀོལ་མངག་བྱས་ཡོད་འདུག ཀྲའོ་ཧྲི་ལན་དང་མོའི་སྔོན་མའི་ཁྱོ་ག་ཆའོ་ཅན་ཅོན་གཉིས་གཞིས་སྤོར་གྱི་མིང་ཐོག་ནས་ཨ་རིར་བསྐྱོད་ཡོད་པ་མ་ཟད། ཁྲིམས་འགལ་གྱི་དངུལ་དང་ཁང་པ་མང་པོ་ཡོད་སྟབས། ཨ་རིའི་གཞུང་གིས་རྩད་ཞིབ་བྱས་པ་བརྒྱུད་དེ་ཁོ་གཉིས་ལ་ནག་ཉེས་མང་པོ་ཡོད་པའི་འཚང་བརྡོལ་ཡོད་འདུག

དཔལ་འབྱོར་དུས་བབ་ (Financial Times) དྲ་བའི་སྟེང་། ཇེམ་སུ་ཊང་ཐེབས་རྩའི་ (Jamestown Foundation) རྒྱ་ནག་བདེ་འཇགས་ཆེད་མཁས་པ་ཕེ་ཊའུ་མཱ་ཊེ་སུ་ (Peter Matisse)ལགས་ཀྱིས། “གལ་སྲིད་ཝང་ཆི་ཧྲན་གྱིས་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་འགན་འཁུར་ཐོག་ནས་ཨ་རིར་བསྐྱོད་པ་ཡིན་ན། ཁོས་རྒྱ་ནག་གི་རུལ་སུངས་ཕྱིར་བྲོས་པ་རྣམས་འཛིན་བཟུང་དང་། ཁྲིམས་འགལ་ཐོག་རྒྱ་གར་ཕྱིར་འདྲེན་བྱས་ཡོད་པ་དག་གི་ར་མདའ་རེད།” ཅེས་བརྗོད་ཡོད་འདུག

ཆབ་སྲིད་དབྱེ་ཞིབ་པ་ཧྲི་ཏཱ་ (Shi Da)ཡིས། ཝང་ཆི་ཧྲན་ཨ་རིར་བསྐྱོད་འཆར་དེ་རུལ་སུངས་དཔོན་ངན་བྲོས་བྱོལ་བ་རྣམས་འཛིན་བཟུང་བྱ་རྒྱུ་གཅིག་པུ་མིན་པར། དེའི་རྒྱབ་ཏུ་གལ་ཆེའི་གྲོས་དོན་གཉིས་ཡོད་པ་ནི། དང་པོ་ཀྲུའུ་ཡོན་ཁཱང་དང་ཞོ་ཚད་ཧོ། པའོ་ཞི་ལེད། ལིན་ཅི་ཧྭ་སོགས་མི་བཞི་ཤོག་ཁག་གསར་བའི་གནད་དོན་ཇི་ལྟར་ཐག་གཅོད་བྱ་དགོས་པ་དང་། ཁོ་ཚོའི་རྒྱབ་ཀྱི་ནག་ཚོགས་མགོ་བ་ཅང་ཙེ་མིན་རྩ་མེད་བཟོ་ཕྱོགས། གཉིས་པ་ཀྲུའུ་ཡོན་ཁང་དང་རྒྱ་ནག་གི་དབང་བོ་གསོན་ལེན་བྱེད་པའི་གྱོད་གཞི་ནག་པོའི་གནད་དོན་གཉིས་ཡིན་སྐོར་སོགས་བཀོད་འདུག

རྒྱ་ནག་འཕྲོད་བསྟེན་ལྷན་ཁང་གི་འགན་འཛིན་གཞོན་པ་ཟུར་བ་ཧོང་ཅེད་ཧྥོ་ (Huang Jiefu) ཡིས་ཟླ་འདིའི་ཚེས་ ༡༥ ཉིན་རྨ་བྱ་བརྙན་འཕྲིན་ཁང་དུ། རྒྱ་ནག་གི་དབང་བོ་བརྗེ་ལེན་བྱེད་པའི་གནད་དོན་དེའི་རྒྱབ་ཀྱི་ཉེས་ཅན་གཏེ་དེ་ཀྲུའུ་ཡོན་ཁཱང་ཡིན་ཚུལ་བརྗོད་པ་དང་། དབང་བོ་གསོན་ལེན་བྱེད་པ་ནི་མིའི་རིགས་ཀྱི་ཀུན་སྤྱོད་ལས་བརྒལ་ཡོད་སྟབས། ཝང་ཆི་ཧྲན་གྱིས་ཨ་རི་དང་འབྲེལ་བ་བྱས་ཏེ་ཀྲུའུ་ཡོན་ཁཱང་གཙོས་བའི་མི་བཞི་ཤོག་ཁག་གིས་དབང་བོ་གསོན་ལེན་བྱས་པའི་མི་སྤྱོད་ལས་འདས་པའི་ནག་ཉེས་ཁག་དང་། དེ་དག་ལ་ཅང་ཙེ་མིན་གྱིས་བཀོད་སྒྲིག་ཡོད་མེད་སོགས་ཐག་གཅོད་བྱ་རྒྱུ་རེད། ཅེས་བརྗོད་འདུག

ཁོང་གིས་མུ་མཐུན་དུ། ཞི་ཅིན་ཕིན་དང་ཅང་ཙེ་མིན་གཉིས་ཀྱི་འཐབ་འཁྲུག་ཁྲོད་ཞི་ཅིན་ཕིན་ལ་ཨ་རིའི་རོགས་སྐྱོབ་ཐོབ་ཀྱི་རེད། དེ་ནི་ཞི་ཅིན་ཕིན་གྱིས་ཅང་ཙེ་མིན་དང་ཁོའི་ཤོག་ཁག་གི་གནད་དོན་རྩ་མེད་གཏོང་བར་ཨ་རིའི་རོགས་རམ་གལ་ཆེན་པོ་ཆགས་ཡོད་པ་ལྟར། ཨ་རིའི་གཞུང་གིས་ཀྱང་བསམ་ཤེས་བྱས་ཏེ་རོགས་རམ་གནང་དགོས་པ་དང་། མདོར་ན་བཟང་སྤྱོད་དང་ལྡན་པའི་བྱ་འགུལ་ཞིག་ཁས་ལེན་བྱེད་དགོས་ཀྱང་རྒྱ་གཞུང་གིས་མཉམ་འབྲེལ་བྱ་རྒྱུའི་རེ་བ་འཆང་ཡོད་པ་རེད། ཅེས་སོགས་བརྗོད་འདུག

གསར་འགོད་པ། འཇིགས་མེད་རྒྱ་མཚོ།