རེས་གཟའ་སྤེན་པའི་ཉིན་པེ་ཅིན་གྲོང་ཁྱེར་གྱི་ཝང་ཧྥི་ཅིན་སྲང་ལམ་དུ་གླ་འཁོར་ཁ་ལོ་བ་ ༣༠ ལྷག་གིས་རང་ཤི་ངོ་རྒོལ་བྱས་ཡོད་འདུག
ཟླ་འདིའི་ཕྱི་ཚེས་ ༤ ཉིན་ཧེ་ལུང་ཅང་ཞིང་ཆེན་གྱི་སོའུ་ཧྥིན་ཧི་གྲོང་ཁྱེར་ནས་ཡིན་པའི་གླ་འཁོར་ཁ་ལོ་བ་ ༣༠ ལྷག་གིས། མི་ཚོགས་ཆེ་བའི་པེ་ཅིན་གྲོང་ཁྱེར་ཝང་ཧྥི་ཅིན་སྲང་ལམ་དུ་སྨན་རྫས་རིགས་ཤིག་བཏུངས་ཏེ་རང་ཤི་བརྒྱབ་ཡོད་ཀྱང་། དེ་མ་ཐག་མྱུར་སྐྱོབ་བྱས་ཏེ་ད་ལྟ་ཚང་མ་སྲོག་ཉེན་ལས་ཐར་ཡོད་ལུགས་བསྒྲགས་འདུག
རྒྱ་ནག་ལྷོ་ཕྱོགས་ཞོགས་པའི་ཚགས་པར་ཁང་གིས་གནས་ཚུལ་སྤེལ་བ་ལྟར་ན། གླ་འཁོར་ཁ་ལོ་བ་དེ་ཚོས་གླ་འཁོར་བརྗེ་བསྒྱུར་དང་འགྲུལ་བ་སྐྱེལ་འདྲེན་གྱི་ཐོབ་ཐང་རྩོད་ལེན་ཆེད། ཐེངས་མང་པེ་ཅིན་དུ་ཕྱིན་ཏེ་ཞུ་གཏུག་བྱས་ཡོད་ཀྱང་གྲུབ་འབྲས་གང་ཡང་སོན་མེད་པ་དང་། ཉེ་སྔོན་ཁ་ལོ་བ་ ༣༠ ལྷག་བསྐྱར་དུ་པེ་ཅིན་ལ་ཕྱིན་ནས་ཞུ་གཏུག་བྱས་ཀྱང་ཕན་འབྲས་མ་ཐོན་པར་བརྟེན་རང་ཤི་བརྒྱབ་ཡོད་འདུག
པེ་ཅིན་ནོར་དོན་དྲ་བའི་གསར་འགོད་པས་ཞུ་གཏུག་བྱེད་མཁན་གྱི་ཁ་ལོ་བ་ཞིག་ལ་ཁ་པར་བརྒྱུད་བཅར་འདྲི་བྱེད་སྐབས། ཁོ་ཚོ་ཉིན་ལྔ་ཡི་གོང་པེ་ཅིན་དུ་བསླེབས་པ་དང་། རྒྱལ་ཁབ་འགྲིམ་འགྲུལ་ལས་ཁུངས་དང་ཞུ་གཏུག་ལས་ཁུངས་སུ་ཞུ་གཏུག་བྱས་ཀྱང་། ཕན་ཐོགས་གང་ཡང་མ་བྱུང་བར་བརྟེན། འུ་ཐུག་ཐབས་ཟད་ཀྱིས་རང་ཤི་རྒྱག་པའི་ཐབས་ལམ་འདེམས་དགོས་བྱུང་བ་དང་། ད་ལྟའི་ཆར་ཁོང་ཚོའི་ནང་ནས་མི་ ༤ ཡི་གནས་སྟངས་ཅུང་ཛ་དྲག་ཡིན་སྐོར་བརྗོད་ཡོད་འདུག བཅར་འདྲི་བྱེད་བཞིན་པའི་སྐབས་སུ་ཉེན་རྟོག་པས་ཁ་པར་བཙན་གྱིས་བཅད་ཡོད་པ་མ་ཟད། བརྒྱུད་ལམ་དུ་ཐོན་པའི་ཐེངས་འདིའི་གནས་ཚུལ་སྐོར་ནག་གསུབ་གཏོང་གི་ཡོད་འདུག
རྒྱ་གཞུང་གི་དཔལ་འབྱོར་འཛུགས་སྐྲུན་ཞེས་པའི་གཞི་རྒྱ་ཆེ་བའི་ལས་གཞིའི་འོག ཞིང་འབྲོག་མང་ཚོགས་ཀྱི་ས་ཆ་བཙན་འཕྲོག་དང་ཚོང་ལས་ཐོབ་ཐང་ལ་དབྱེ་འབྱེད་སོགས་ཀྱི་གནད་དོན་མང་དུ་བྱུང་བཞིན་ཡོད་པ་ལྟར། མི་མང་གིས་སོ་སོའི་ཐོབ་ཐང་བརྩོན་ལེན་ཆེད་རང་ལུས་མེར་བསྲེགས་ཀྱིས་ངོ་རྒོལ་བྱས་པ་དང་། པེ་ཅིན་དུ་ཆེད་སྐྱོད་ཀྱིས་ན་གཞོན་ཚགས་པར་ཁང་དང་ཀྲུང་ནན་ཧེ་གཞུང་སྒྲུབ་ལྟེ་གནས་སོགས་ཀྱི་སྒོ་ཆེན་འགྲམ་དུ། སྨན་རྫས་རིགས་འཐུང་ནས་རང་ཤི་རྒྱག་མཁན་བསྟུན་མར་བྱུང་ཡོད་པ་ལྟར། ཕྱི་ལོ་ ༢༠༡༤ ལོ་གཅིག་པུར་ཉུང་མཐར་མི་གྲངས་ ༥༠ ཙམ་གྱིས་རང་ཤི་ངོ་རྒོལ་བྱས་ཡོད་འདུག
གསར་འགོད་པ། པདྨ་མཚོ།
་་་་་་་་་་ ད་ལྟའི་ཆར་ཁོང་ཚོའི་ནང་ནས་མི་ ༤ ཡི་གནས་སྟངས་ཅུང་ཛ་དྲག་ཡིན་སྐོར་བརྗོད་ཡོད་འདུག བཅར་འདྲི་བྱེད་བཞིན་པའི་སྐབས་སུ་ཉེན་རྟོག་པས་ཁ་པར་བཙན་གྱིས་བཅད་ཡོད་པ་མ་ཟད།
བརྒྱུད་ལམ་དུ་ཐོན་པའི་ཐེངས་འདིའི་གནས་ཚུལ་སྐོར་ནག་གསུབ་གཏོང་གི་ཡོད་འདུག ་་་་་་་་་་་་