འབྲས་སྤུངས་བློ་གསལ་གླིང་གྲྭ་ཚང་གི་མཆོད་འབུལ་སྨོན་ལམ།

༄༅། །འདི་ག་འབྲས་སྤུངས་བློ་གསལ་གླིང་གྲྭ་ཚང་གི་མཁན་བླ་འདུས་མང་ཡོངས་ནས་རང་ཅག་གངས་ཅན་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་འཛམ་གླིང་ཞི་བདེའི་དེད་དཔོན་ཆེན་པོ་ཁམས་གསུམ་འགྲོ་བའི་མགོན་སྐྱབས་བླ་ན་མ་མཆིས་པ་སྤྱི་ནོར་༸གོང་ས་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་དབུས་པའི་རིས་མེད་བསྟན་འཛིན་གྱི་སྐྱེས་བུ་དམ་པ་གང་ན་སུ་བཞུགས་རྣམས་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་བཞེད་ལྷུན་གྱིས་འགྲུབ་པ་དང་། གཞིས་བྱེས་བོད་ལྗོངས་ལྷ་མི་ཡོངས་ཀྱིས་རིང་ནས་སྙིང་ལ་བརྣག་པའི་བསྟན་སྲིད་རང་དབང་འཐབ་རྩོད་ཀྱི་བདེན་མཐའ་མྱུར་བ་མྱུར་དུ་འཐོབ་ཐུབ་པ། གཞན་ཡང་གྲྭ་ཚང་འདི་ཉིད་ཀྱི་དབུ་བཞུགས་འཇམ་མགོན་༸རྒྱལ་བའི་རྒྱལ་ཚབ་སྐྱབས་རྗེ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་མཚུངས་མེད་སྐྱབས་རྗེ་ཤར་པ་ཆོས་རྗེ་རིན་པོ་ཆེ་མཆོག སྐྱབས་རྗེ་༸ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་དབུས་པའི་མཁན་ལས་ཟུར་རྣམ་པ། བཀའ་རབ་འབྱམས་དགེ་བའི་བཤེས་གཉེན་རྣམ་པ། རྒྱལ་སྲས་བླ་སྤྲུལ་ཁག དགེ་འདུན་མང་དང་བཅས་པའི་སྐུ་གེགས་མཚན་མ་རང་སར་ཞི་ཞིང་ཆོས་སྤྱོད་སློབ་གཉེར་སོགས་ཡར་ངོའི་ཟླ་ལྟར་འཕེལ་ཐུབ་པ་སོགས་ལེགས་ཚོགས་སྒོ་བརྒྱའི་སླད་དུ་ལྷ་བླ་མའི་བཀའ་ལུང་ཕྱིར་ཕེབས་ལམ་སྟོན་ལྟར་ཞབས་རིམ་༸རྒྱལ་བའི་བཀའ་འགྱུར་དག་ཐོན་དང་སྲུང་མ་སྤྱིའི་བསྐང་བཤགས་སོགས་ཉིན་ལྔ་ཙམ་རིང་ལོ་ལྟར་བོད་ཟླ་གཉིས་པའི་ནང་གནད་སྨིན་འབད་སྒྲུབ་ཞུས་དང་ཞུ་མུས་ལགས་ཤིང་། འདི་ལོར་དམིགས་བསལ་༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་བརྒྱད་ཅུར་ཕེབས་པའི་སྐལ་བཟང་དགའ་སྟོན་དང་སྦྲགས་གྲྭ་ཚང་ནས་ཟླ་འདིའི་ཕྱི་ཚེས་ ༧ རེས་གཟའ་མིག་དམར་ནས་ཉིན་གྲངས་དྲུག་རིང་བསྟན་འགྲོའི་བདེ་ཐབས་སྤྱི་དང་།༸རྒྱལ་བའི་སྐུ་ཕྱྭའི་སླད་གནས་ཆུང་ཆོས་རྒྱལ་ཆེན་པོའི་བཀའ་ལུང་དང་བླ་ཆེན་རྣམ་པའི་ཐུགས་དམ་བཀའ་ལན་ཕྱིར་ཕེབས་ལྟར་༸རྒྱལ་བའི་བཀའ་འགྱུར་དག་ཐོན། ཤེར་ཕྱིན་བརྒྱད་སྟོང་པ་སྟོང་ཚར། གཟུངས་བསྡུས་སྟོང་ཚར། སྒྲོལ་མ་འབུམ་ཐེར། པཎ་གྲུབ་བསྟོད་ཆེན། གནས་བརྟན་ཕྱག་མཆོད་དང་འབྲེལ་མཆོད་སྤྲིན་སྟོང་ཚར། གསོལ་འདེབས་བདེན་པའི་རྔ་སྒྲ། འདོད་ཁམས་བདག་མོའི་བསྐང་བཤགས། དཔའ་མགོན་ཞལ་བཞིའི་བསྐང་བཤགས། རྡོ་རྗེ་གྲགས་ལྡན་དང་དམ་ཅན་བསྐང་བཤགས། ཤེས་རབ་སྙིང་པོ་ཁྲི་ཚར། རྗེ་བླ་མའི་མཚན་སྔགས་འབུམ་ཐེར་བཅས་སྒྲུབ་བཞིན་པར་སྤྱིར་མཆོད་བསྙེན་དད་སྦྱིན་ཞུ་མུས་ཁོངས་འདི་ལོ་ལྷག་པར་ཨ་རིར་གནས་བཞུགས་གྲྭ་ཚང་གི་དགེ་འདུན་པ་དང་དེ་སྔ་གྲྭ་ཚང་སྒྲིག་ཁོངས་སུ་ཞུགས་མྱོང་ཞིང་ད་ལྟ་ཨ་རིའི་རྒྱལ་ཁོངས་སུ་འཚོ་སྡོད་སེར་སྐྱ་བརྒྱ་དང་བརྒྱད་ཀྱིས་མ་སྐུལ་དང་བླངས་ཐོག་ཞལ་འདེབས་བསྡུ་འབུལ་གནང་བ་ད་ལམ་ཕྱར་བ་གྲུ་འདེགས་སུ་གྱུར་པས་བཀའ་དྲིན་ཆེ་ཞུ་བཅས་འབྲས་སྤུངས་བློ་གསལ་གླིང་གྲྭ་ཚང་ནས་ ༢༠༡༥ ཟླ་ ༤ ཚེས་ ༨ ཉིན་བཟང་པོར་ཕུལ།