མཛོད་དགེ་རྫོང་ཐང་སྐོར་ཡུལ་ཚོའི་ས་ཁང་གནད་དོན་ཞུ་གཏུག་པ་འཇིགས་བྱེད་སྐྱབས་ལགས་ཀྱིས་བརྙན་ཐུང་ཞིག་བསྐུར་ཏེ། མུ་མཐུད་ཞུ་གཏུག་བྱེད་པའི་གོ་སྐབས་ཐོབ་ཆེད་ཁོང་ཡིབ་ནས་ཡོད་སྐོར་བརྗོད་འདུག
འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། སི་ཁྲོན་མཛོད་དགེ་རྫོང་ཐང་སྐོར་ཡུལ་ཚོའི་འབྲོག་མང་གི་ས་ཁང་སྲིད་གཞུང་གིས་བཙན་འཕྲོག་བྱས་པའི་གནད་དོན་ཞུ་གཏུག་བྱེད་མཁན་འཇིགས་བྱེད་སྐྱབས་ལགས། ཉེ་སྔོན་གར་ཡོད་ཅི་བྱུང་མེད་པར་གྱུར་ཏེ་ཁྱིམ་མི་གཉེན་འབྲེལ་སོགས་ཀྱིས་སེམས་འཁྲལ་ཆེན་པོ་བྱས་ཡོད་ཀྱང་། ཟླ་འདིའི་ཕྱི་ཚེས་ ༡༤ ཉིན་ཁོང་གིས་བརྙན་ཐུང་ཞིག་བསྐུར་ཏེ། ཟླ་འདིའི་ཕྱི་ཚེས་ ༡༣ ཉིན་གྱི་སྔ་དྲོར་སྲིད་གཞུང་གིས་ཁོང་བཙན་ཁྲིད་བྱས་པ་མ་ཟད། རྗེས་དེད་པ་བཏང་སྟེ་གསང་བའི་འཛིན་བཟུང་བྱེད་པའི་ངན་ཇུས་འཐེན་པར་བརྟེན། ད་ལྟ་ཁོང་ཉེན་གཡོལ་དུ་ཕྱིན་ཏེ་མཐོ་རིམ་མགོ་ཁྲིད་ཚོར་ཞུ་གཏུག་བྱེད་པའི་གོ་སྐབས་ཤིག་ལ་སྒུག་ཡོད་སྐོར་བརྗོད་འདུག
བརྙན་ཐུང་དེའི་ནང་ཁོང་གིས། ཐང་སྐོར་གྱི་ས་དོན་གྱི་རྐྱེན་གྱིས་ཁ་སང་ཕྱི་ཚེས་ ༡༣ ཉིན་ས་གནས་སྲིད་གཞུང་གི་ལས་བྱེད་ཚོས་ང་བཙན་གྱིས་ཁོང་ཚོའི་སར་ཁྲིད་དེ། གནས་གང་ཡིན་མི་ཤེས་ས་ཞིག་ཏུ་བཙན་གྱིས་འཁྲིད་རྩིས་བྱས་ཀྱང་ང་མ་སོང་བར་བརྟེན། ང་ཚོའི་བར་ཁ་རྩོད་ཤོར་ཏེ་རྒྱག་རིས་བྱས་པ་ཡིན། ཕྱི་དྲོར་ང་ཁྱིམ་དུ་ཡོང་སྟེ་སྒོ་ཕྱིར་འབུད་སྐབས། ངོ་མི་ཤེས་པའི་མི་རེས་ངའི་རྗེས་དེད་ཡོང་ནས་གཏོང་གི་མི་འདུག་པས་ཡར་མར་ཞིག་ལ་བཟུར་བཞག་པ་ཡིན། གཉེན་ཉེ་དང་གྲོགས་པོ་ཚང་མས་ངའི་དོན་དུ་སེམས་འཁུར་བྱེད་ཀྱི་ཡོད་པས། གནས་སྐབས་རིང་ང་གང་དུ་ཡོད་མེད་བཤད་མ་ཐུབ་པར་དགོངས་དག་ཞུས་པ་ཡིན། ང་གང་དུ་ཡོད་མེད་མི་བཤད་པའི་རྒྱུ་མཚན་ནི། ངས་ཁྱེད་ཚོར་ཁ་པར་བརྒྱབ་པ་ཡིན་ན། ཁོ་ཚོས་ཁ་པར་ལ་ལྐོག་ཉན་བྱས་ནས་བསྡད་ཡོད་སྟབས། ང་གང་དུ་ཡོད་ཤེས་ནས་འཛིན་བཟུང་བྱ་ངེས་རེད། ཁོ་ཚོའི་འཛིན་བཟུང་བྱེད་སྟངས་ཡང་ཁྲིམས་མེད་ལུགས་མེད་ཀྱིས་དགོང་མོ་དང་མི་མང་པོས་མི་མཐོང་ས་ནས་འཛིན་བཟུང་བྱེད་འགྲོ་ཡི་འདུག ཅེས་དང་།
ཡང་ཁོང་གིས། ང་གཡོལ་དགོས་པའི་དམིགས་ཡུལ་ཅི་ཡིན་ཟེར་ན། ང་ལ་ཉི་མ་གཅིག་མ་དགོས་སྐར་ཆ་གཅིག་ལས་མ་བྱུང་བ་ཡིན་ནའང་། གོང་རིམ་གྱི་མགོ་ཁྲིད་རྣམས་ལ་ང་ཚོར་གནས་ཚུལ་འདི་འདྲ་བྱུང་གི་འདུག་ཅེས་བཤད་པའི་གོ་སྐབས་ཤིག་རག་ན་བསམ་པ་ཡིན། ང་ཚོའི་ཁེ་ཕན་དང་བདེ་འཇགས་ལ་གོང་རིམ་གྱི་མགོ་ཁྲིད་ཆེན་པོ་ཞིག་གིས་ཁག་ཐེག་བྱེད་མ་ཐུབ་ཚེ། ང་ཚོའི་བདེ་འཇགས་དང་ཁེ་ཕན་ལ་སྲུང་སྐྱོབ་བྱེད་མཁན་མི་འདུག ཅེས་བརྗོད་འདུག
ཕྱི་ལོ་ ༢༠༡༠ ལོར་ཐང་སྐོར་ཡུལ་ཚོའི་ས་གནས་སྲིད་གཞུང་གིས་གྲོང་ཁྱེར་ལྗང་མདོག་ཅན་དུ་བསྒྱུར་བར་ཁ་གཡར་ཏེ། ཐང་སྐོར་ཡུལ་ཚོ་སྐ་བར་མ་སྡེ་བའི་འབྲོག་ཁྱིམ་ ༢༠ ལྷག་བཙན་གྱིས་གནས་སྤོར་དུ་བཅུག་ནས་ས་ཁང་བཙན་འཕྲོག་བྱས་པར་བརྟེན། ས་གནས་མི་མང་གིས་ཐེངས་དུ་མར་རྫོང་སྲིད་གཞུང་ལ་ཞུ་གཏུག་བྱས་ཡོད་ཀྱང་། གོང་རིམ་ནས་གནད་དོན་ཐག་གཅོད་རྒྱུ་ཡིན་ལུགས་བརྗོད་དེ་ནར་འགྱངས་བྱས་ཡོད་པ་མ་ཟད། ཞུ་གཏུག་བྱས་ན་ཁྲིམས་ཐག་གཅོད་རྒྱུ་ཡིན་པའི་འཇིགས་སྐུལ་ཡང་བྱས་ཡོད་པ་རེད།
གསར་འགོད་པ། པདྨ་མཚོ།
