ཁ་སང་ཨ་རིའི་བྱང་ཀོ་རི་ཡའི་རྡུལ་ཕྲན་མཚོན་ཆ་སྔོན་འགོག་བྱ་རྒྱུར་གྲོས་མོལ་བྱེད་མཁན་སི་ཎེ་སི་ལར་ལགས་ཀྱིས་བྱང་ཀོ་རི་ཡས་ཨི་རན་ལ་ལེགས་ཆ་བླངས་ནས་དཀའ་རྙོག་སེལ་ཐབས་བྱེད་དགོས་སྐོར་བརྗོད་འདུག
ཁ་སང་བྱང་ཀོ་རི་ཡའི་རྡུལ་ཕྲན་མཚོན་ཆ་བཟོ་སྐྲུན་སྔོན་འགོག་བྱ་རྒྱུར་གྲོས་མོལ་བྱེད་མཁན་ཨ་རིའི་དམིགས་བསལ་སྐུ་ཚབ་སི་ཎེ་སི་ལར་ (Sydney Seiler) ལགས་ཀྱིས་ཝ་ཤིན་ཌོན་ནང་རྟེན་གཞི་བྱས་པའི་ཨ་རིའི་རྒྱལ་སྤྱིའི་ཐབས་ཇུས་བསྟི་གནས་ཁང་དུ་གཏམ་བཤད་ཅིག་སྤེལ་ཏེ། ཨི་རན་གཞུང་གིས་རྡུལ་ཕྲན་མཚོན་ཆ་བཟོ་སྐྲུན་སྔོན་འགོག་བྱ་རྒྱུ་ཐག་གཅོད་བྱས་པ་ལྟར། བྱང་ཀོ་རི་ཡས་གཞུང་གིས་ཀྱང་མོས་མཐུན་བྱས་ཚེ་ཨ་རིས་བྱང་ཀོ་རི་ཡ་དང་ལྷན་དུ་རྡུལ་ཕྲན་མཚོན་ཆའི་དཀའ་རྙོག་སེལ་རྒྱུར་གྲོས་མོལ་བྱ་རྒྱུ་ཡིན་སྐོར་བརྗོད་འདུག
སི་ཎེ་སི་ལར་ལགས་ཀྱིས་ཚོང་ལས་ཚད་གཞི་ (Business Standard) ཐོག “དེ་སྔོན་འབར་མ་དང་ཁུའུ་བྷའི་གཞུང་གིས་ཨ་རི་དང་ལག་གདང་སྦྲེལ་ནས་རྡུལ་ཕྲན་མཚོན་ཆ་སྔོན་འགོག་བྱ་རྒྱུར་ལག་པ་འཆིང་རྒྱུ་ཡིན་སྐོར་བརྗོད་དེ་ཐག་གཅོད་བྱས་ཐུབ་ཡོད། ང་ཚོས་འདས་པའི་ལོ་གཉིས་ལྷག་རིང་བྱང་ཀོ་རི་ཡར་དཔལ་འབྱོར་ཉེས་ཆད་བཅད་དེ་རྡུལ་ཕྲན་མཚོན་ཆ་བཟོ་སྐྲུན་སྔོན་འགོག་བྱེད་ཐབས་བྱས་ཡོད་ཀྱང་། ཁོ་ཚོས་དེ་ལས་ལྡོག་སྟེ་རྡུལ་ཕྲན་མཚོན་ཆ་བཟོ་སྐྲུན་དང་ཚོད་ལྟ་བྱེད་བཞིན་ཡོད་སྟབས། ད་ལྟ་རྒྱལ་སྤྱིའི་སྤྱི་ཚོགས་ཀྱིས་བྱང་ཀོ་རི་ཡར་ངན་ཕྱོགས་ཀྱི་ཆབ་སྲིད་ཁ་ལོ་བསྒྱུར་འགྱུར་གྲ་སྒྲིག་བྱེད་བཞིན་ཡོད”ཅེས་བརྗོད་འདུག
ཟླ་འདིའི་ཚེས་ ༢༡ ཉིན་རྒྱ་གར་དུས་བབ་དང་ཚོང་ལས་ཚད་གཞིའི་ཐོག་གནས་ཚུལ་སྤེལ་དོན་ལྟར་ན། ད་བར་ཨ་རི་གཙོས་རྒྱ་ནག་དང་ཉི་ཧོང་། ཨུ་རུ་སུ་དང་ལྷོ་ཀོ་རི་ཡ་བཅས་ཀྱིས་བྱང་ཀོ་རི་ཡ་གཞུང་དང་རྡུལ་ཕྲན་མཚོན་ཆ་བཟོ་སྐྲུན་སྔོན་འགོག་བྱ་རྒྱུར་གྲོས་མོལ་ཐེངས་ཁ་ཤས་བྱས་ཡོད་ཀྱང་། བྱང་ཀོ་རི་ཡས་ཁས་ལེན་བྱས་མེད་སྟབས་༢༠༠༨ ལོར་འབྲེལ་མོལ་ཆད་ཡོད་འདུག ༢༠༡༢ ལོར་ཨ་རི་དང་བྱང་ཀོ་རི་ཡ་བར་གྲོས་མཐུན་ཞིག་བཞག་སྟེ། བྱང་ཀོ་རི་ཡས་རྡུལ་ཕྲན་མཚོན་ཆ་བཟོ་སྐྲུན་དང་འབྲེལ་ཚོད་ལྟ་བྱ་རྒྱུ་མཚམས་འཇོག་བྱས་ཚེ། ཨ་རིས་བྱང་ཀོ་རི་ཡར་ཟ་འབྲུའི་རོགས་རམ་སྤྲོད་རྒྱུའི་ཐག་གཅོད་བྱས་ཡོད་ཀྱང་། ལོ་དེའི་ལོ་མཇུག་ཏུ་བྱང་ཀོ་རི་ཡས་སྒྱོགས་མདེལ་མཚོན་ཆ་གཉིས་དང་རྡུལ་ཕྲན་མཚོན་ཆ་གཅིག་ཚོད་ལྟ་བྱས་ཡོད་སྟབས་ད་བར་རྒྱལ་ཁབ་གཉིས་བར་འབྲེལ་མོལ་བྱེད་ཐུབ་མེད་པ་དང་། ཟླ་འདིའི་ནང་ཨི་རན་དང་སྟོབས་ཆེན་རྒྱལ་ཁབ་བར་ཨི་རན་གྱི་རྡུལ་ཕྲན་མཚོན་ཆ་སྔོན་འགོག་བྱ་རྒྱུར་སྒྲོམ་གཞི་ཞིག་གཏན་འབེབས་དང་། ཨི་རན་ལ་དཔལ་འབྱོར་ཉེས་ཆད་གཏོང་མཚམས་འཇོག་རྒྱུ་བྱས་ཡོད་པ་མ་ཟད། ལོ་གསུམ་གོང་ཨ་རིས་འབར་མའི་གཞུང་དང་། འདི་ལོ་ལོ་ ༥༠ རྗེས་ཁུའུ་བྷའི་གཞུང་དང་འབྲེལ་བ་བཙུགས་ཏེ་མཉམ་ལས་བྱེད་མགོ་བཙུགས་ཡོད་ཀྱང་། བྱང་ཀོ་རི་ཡས་ཨ་རིས་བསྟུན་མཁས་ག་ཚོད་བྱས་ཀྱང་ད་དུང་མཁྲེགས་འཛིན་ཅན་གྱི་སྲིད་ཇུས་འཛིན་བཞིན་ཡོད་སྟབས། མ་འོངས་པར་བྱང་ཀོ་རི་ཡ་རྒྱལ་སྤྱིའི་སྡིངས་ཆ་ནས་འཕུད་སྲིད་པ་ཞིག་ཡིན་ཞེས་སོགས་བཀོད་འདུག
རྒྱལ་སྤྱིའི་འབྲེལ་ལམ་ཆེད་མཁས་པ་བྷར་ཎར་ཌི་ཝོལ་སན་ལགས་ཀྱིས་དབྱིན་ཡུལ་ཆ་འཕྲིན་ཐོག ད་ལྟ་རྒྱལ་སྤྱིའི་རྒྱལ་ཁབ་ཁག་གཅིག་ལ་གཅིག་བརྟེན་ཡིན་སྟབས། ད་ལྟ་བྱང་ཀོ་རི་ཡས་མཁྲེགས་བཟུང་སྲིད་ཇུས་གང་འདྲ་ཞིག་བཟུང་ཡང་རྒྱུན་རིང་གནས་ཐུབ་ཀྱི་མ་རེད་ཅེས་བརྗོད་འདུག
གསར་འགོད་པ། དོན་གྲུབ།
