དེ་རིང་སྔ་དྲོའི་བལ་ཡུལ་གྱི་ཆུ་ཚོད་ ༡༡།༣༠ སྟེང་། བལ་ཡུལ་རྒྱལ་ས་ཀ་ཐ་མན་ཌའུ་ཁུལ་དུ་ཚད་རིམ་ ༧།༩ ཅན་གྱི་ས་ཡོམ་ཞིག་བརྒྱབ་སྟེ་མི་རྒྱུ་གཉིས་ཀར་གོད་ཆགས་ཆེན་པོ་ཐེབས་ཡོད་འདུག
གནས་ཚུལ་འབྱོར་གསལ་ལྟར་ན། བལ་ཡུལ་རྒྱལ་ས་ཁུལ་ཀ་ཐ་མན་ཌའུ་(Kathmandu) ནས་པོག་ར་(Pokhara) བར་ས་འགུལ་ཤུགས་རྐྱེན་ཆེན་པོ་བྱུང་སྟེ། ཁང་རྩེག་མང་པོར་རྡིབ་སྐྱོན་བྱུང་བའི་ཁྲོད་མི་ ༡༡༠༠ ཙམ་གྲོངས་ཡོད་པ་དང་མི་ ༡༨༩༠ ལྷག་ལ་རྨས་སྐྱོན་ཕོག་ཡོད་འདུག མི་འདས་གྲོངས་ཀྱི་གྲངས་ཚད་ད་ལྟ་མུ་མཐུད་འཕར་བཞིན་ཡོད་པ་མ་ཟད། ས་གནས་ཁུག་ཀྱོག་དག་ཏུ་ད་རེབ་ས་འགུལ་གྱི་ཤུགས་རྐྱེན་ཐེབས་པའི་གནས་ཚུལ་གསར་དུ་འཐོན་བཞིན་ཡོད་འདུག
ས་འགུལ་དེ་བྱུང་མ་ཐག་བལ་ཡུལ་གཞུང་གིས་མྱུར་སྐྱོབ་ཀྱི་ལས་འདོན་མགོ་འཛུགས་བྱས་ཏེ། དམག་མི་ཕོན་ཆེན་བཏང་སྟེ་ཁང་པ་བརྡིབ་པ་དང་ལམ་ཁ་ཞིག་པ་སོགས་བསྔོགས་ཏེ་མིའི་ཚེ་སྲོག་སྐྱོབ་པ་དང་། རྨས་མ་རྣམས་སྨན་ཁང་དུ་དབོར་འདྲེན་བྱེད་བཞིན་ཡོད་འདུག་ལ། རྒྱ་གར་སོགས་བལ་ཡུལ་གྱི་ཁྱིམ་མཚེས་རྒྱལ་ཁབ་ཁག་གི་རོགས་སྐྱོར་ཡང་ལམ་ལ་ཆས་བཞིན་ཡོད་འདུག
བལ་ཡུལ་རྒྱལ་སའི་མཆོད་རྟེན་ཁུལ་དུ་ས་འགུལ་ཤུགས་གྱི་རྐྱེན་ཆེན་པོ་ཐེབས་ཡོད་པ་དང་། མཆོད་རྟེན་བྱ་རུང་ཁ་ཤོར་འགྲམ་གྱི་མཆོད་རྟེན་ཆུང་བ་ཞིག་ལ་གཏོར་སྐྱོན་ཐེབས་ཡོད་པ་མ་ཟད། མཆོད་རྟེན་བྱ་རུང་ཁ་ཤོར་གྱི་སྟེང་དུའང་གས་ཁ་ཆེན་པོ་ཞིག་བྱུང་ཡོད་འདུག བལ་ཡུལ་དུ་བོད་པའི་དགོན་པ་མང་པོ་ཡོད་པ་མ་ཟད། མཆོད་ཇོར་ཁུལ་དུ་བོད་མི་མང་པོ་གནས་སྡོད་བྱས་ཡོད་ཀྱང་། ད་སྔ་ཐེངས་འདིའི་ས་འགུལ་ཁྲོད་བལ་ཡུལ་དུ་བོད་མི་ལ་ཤི་རྨས་བྱུང་བའི་གནས་ཚུལ་གང་ཡང་མི་འདུག
ད་ལྟ་བལ་ཡུལ་དུ་དབྱར་མགོ་ཚུགས་ཡོད་པ་དང་གནམ་གཤིས་ཀྱང་ཧ་ཅང་ཡག་པའི་དུས་ཡིན་སྟབས། བལ་ཡུལ་ནང་ཡུལ་སྐོར་སྤྲོ་འཆམ་པ་ཧ་ཅང་མང་བའི་དུས་ཚོད་ཅིག་ཏུ་ཁེལ་ཡོད་སྟབས། ཐེངས་འདིའི་ས་ཡོམ་ཤི་རྨས་ཁྲོད་རྒྱལ་ཁབ་གཞན་ནས་ཡོང་བའི་ཡུལ་སྐོར་སྤྲོ་འཆམ་རེ་ཟུང་ཡང་ཚུད་ཡོད་པ་དང་། བལ་ཡུལ་ནང་གི་སྤྲོ་འཆམ་པ་མང་པོ་ཞིག་ཕྱིར་རང་རང་གི་ཡུལ་དུ་ལོག་བཞིན་ཡོད་འདུག
བལ་ཡུལ་རྒྱལ་ཁབ་དེ་ནི། ཡུ་རོབ་གླིང་དང་ཨེ་ཤ་ཡའི་གླིང་ཆེན་གཉིས་བར་གནོན་བཙིར་བྱས་པ་ལས་ཡར་འཕགས་པའི་འཛམ་གླིང་གི་རི་བོ་མཐོ་ཤོས་ཧི་མ་ལ་ཡ་༼ཇོ་མོ་གླང་མ།༽ཞེས་པའི་འདབས་རོལ་དུ་ཆགས་ཡོད་པ་དང་། རྒྱ་མཚོ་ཆེན་པོའི་གཡོ་ཁྱོམ་དང་བསྟུན་ཏེ་ཡུ་རོབ་དང་ཨེ་ཤ་ཡའི་གླིང་གཉིས་རྩུབ་རྡར་བྱེད་ཀྱིན་ཡོད་སྟབས། བལ་ཡུལ་ནི་ས་གཡོམ་གྱི་ཉེན་ཁ་ཆེན་པོ་ཡོད་པ་ཞིག་ཡིན་པ་དང་། ཐེངས་འདི་ནི་ལོ་ངོ་ ༨༡ ཚུན་དུ་བལ་ཡུལ་ནང་བྱུང་བའི་ས་འགུལ་ཚད་རིམ་མཐོ་ཤོས་དེ་ཆགས་ཡོད་འདུག
རྒྱ་ནག་གི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཐེངས་འདིའི་བལ་ཡུལ་གྱི་ས་འགུལ་དེ་ཚད་རིམ་ ༨།༡ ཡིན་པ་དང་། ས་འགུལ་དེའི་ཤུགས་རྐྱེན་བོད་ལྗོངས་གཞིས་ཀ་རྩེ་དང་ལྷ་ས་སོགས་སུའང་བྱུང་ཡོད་འདུག གཉའ་ལམ་རྫོང་གི་རྫོང་དཔོན་དང་འགྲམ་མཐའ་མཚམས་དོ་དམ་འགན་འཛིན་ཝང་ཕིན་(Wang Ping)གྱིས་གསར་འགོད་པར། ཐེངས་འདིར་བལ་ཡུལ་དུ་བྱུང་བའི་ས་འགུལ་དེས་གཞིས་ཀ་རྩེའི་འོག་གི་སྐྱིད་གྲོང་དང་གཉའ་ལམ། འགྲམ་སོགས་སུ་ཤུགས་རྐྱེན་ཆེན་པོ་ཐེབས་ཡོད་པ་དང་། འགྲམ་ས་ཆའི་ཁང་པ་བརྒྱ་ཆ་ ༧༠ ཙམ་ལ་གས་སྐྱོན་བྱུང་ཡོད་པ་མ་ཟད། ད་སྔ་ཤེས་རྟོགས་བྱུང་བར་བོད་མི་གཅིག་གི་ཚེ་སྲོག་ཤོར་ཡོད་པ་དང་། མི་གཞན་མང་པོ་ཞིག་ལ་རྨས་སྐྱོན་ཕོག་ཡོད་འདུག
སྐྱིད་གྲོང་རྫོང་གི་རྫོང་དཔོན་ཧོ་ཧོན་(HuHong)ཟེར་བས་གསར་འགོད་པར་བརྗོད་པ་ལྟར་ན། སྤྱིར་བཏང་དེང་སྐབས་ས་གནས་དེ་ཁུལ་དུ་ཞིང་ཁ་འདེབས་ལས་བྱེད་པའི་དུས་ཚོད་ལ་འཁེལ་ཡོད་སྟབས། ཁང་པའི་ནང་དུ་མི་མང་པོ་བསྡད་མེད་པ་དང་། ཁྱིམ་དུ་བསྡད་ཡོད་པ་དག་ཀྱང་ས་འགུལ་བྱུང་བ་ཚོར་མ་ཐག་ཕྱི་ལོགས་སུ་བྲོས་ཏེ་ཉེན་གཡོལ་བྱས་ཡོད་སྟབས་མི་ལ་གནས་ཚུལ་ཆབས་ཆེན་བྱུང་མེད་ཀྱང་། ཁང་པ་མང་པོ་ཞིག་ལ་གཏོར་སྐྱོན་ཐེབས་ཡོད་པ་དང་། ས་གནས་དེ་ཁུལ་གྱི་གློག་དང་བརྡ་འཕྲིན་སོགས་ཀྱི་བརྒྱུད་ལམ་ཆད་ཡོད་འདུག
དེ་རིང་བལ་ཡུལ་རྒྱལ་སར་ས་འགུལ་ཤུགས་ཆེན་བྱུང་སྟེ་མི་མང་པོ་ཤི་རྨས་ཐེབས་པ་དང་། ལྷག་པར་དུ་བལ་ཡུལ་མཆོད་རྟེན་བྱ་རུང་ཁ་ཤོར་ལ་གས་སྐྱོན་བྱུང་བ་སོགས་ཀྱི་ཐད་བོད་མི་ཚོས་སྤྱི་ཚོགས་བརྒྱུད་ལམ་ཁག་ཏུ་གླེང་སློང་སྣ་ཚོགས་བྱེད་བཞིན་ཡོད་ཅིང་། ཁག་ཅིག་གིས་རྟེན་འབྲེལ་ཡག་པོ་མིན་པའི་རྟགས་མཚན་ཞིག་ཡིན་ལུགས་བརྗོད་པ་དང་། ཁག་ཅིག་གིས་ད་རེབ་ས་འགུལ་ཁྲོད་ཉེས་མེད་མི་སེར་མང་པོའི་ཚེ་སྲོག་ཤོར་བ་དེ་ནི་ཧ་ཅང་སྙིང་རྗེའི་ཡུལ་ཞིག་དང་གདུང་སེམས་མཉམ་སྐྱེད་བྱ་དགོས་པ་ཞིག་རེད་ཅེས་མ་ཎི་བགྲང་གི་ཡོད་པ་དང་། ཡང་རྒྱ་ནག་གི་གནོན་ཤུགས་འོག་བལ་ཡུལ་གཞུང་གིས་བོད་མི་ལས་འགུལ་བ་ཚོར་རྡུང་རྡེག་བཙོན་འཇུག་མང་པོ་བྱས་སྟབས། ད་རེབ་ཀྱི་གོད་ཆག་དེ་ནི་བལ་ཡུལ་གཞུང་ལ་ཉེས་ཆད་ལྟ་བུ་ཞིག་ཆགས་ཡོད་སྐོར་གྱི་སེམས་ཚོར་གླེང་མཁན་ཡང་རེ་ཟུང་འདུག
ཁག་ཅིག་གིས་ད་རེབ་ཀྱི་ས་འགུལ་ལ་ཆོས་ལུགས་དང་ཚན་རིག་འདྲེས་མའི་འགྲེལ་བཤད་རྒྱག་གི་ཡོད་པ་ནི། བལ་ཡུལ་ནང་གི་ཧིན་རྡུའི་ཆོས་ལུགས་ཀྱི་གྲུབ་མཐའ་བྱེ་བྲག་པ་ཞིག་སྟེ་ནུས་སྟོབས་ཀྱི་ལྷ་མོ་(Gadhimai)ཞེས་པའི་རྗེས་འབྲང་པ་ཚོས། ལོ་ལྟར་ཕྱི་ཟླ་ ༡༡ པའི་ཚེས་ ༢༩ དང་ ༣༠ ཉིན་གཉིས་རིང་། ཕྱུགས་ཟོག་སེམས་ཅན་འབུམ་ཕྲག་མང་པོ་སྡེབ་གསོད་བྱས་ཏེ་དམར་མཆོད་བྱེད་ཀྱིན་ཡོད་སྟབས། ད་རེབ་ཀྱི་གོད་ཆགས་དེ་ནི་སྡིག་སྤྱོད་ཆེན་པོའི་ལས་ཀྱི་རྣམ་པར་སྨིན་པ་ཞིག་དང་། སྐྱེས་དངོས་རིག་པའི་གཞུང་ལུགས་ལྟར་ནའང་། སེམས་ཅན་མང་པོ་མེད་པ་བཟོས་སྟབས། རང་བྱུང་ཁམས་བརྟེན་འཚོ་དོ་མཉམ་མ་བྱུང་བའི་ཤུགས་རྐྱེན་ཡིན་སྐོར་ཡང་བརྗོད།
གསར་འགོད་པ། འཇིགས་མེད་རྒྱ་མཚོ།
བལ་ཡུལ་གྱི་ས་ཡོམ་གོད་ཆག་དེ་རང་བྱུང་གི་གནོད་འཚེ་མིན་པར་རང་བྱུང་གི་འཕེལ་རིམ་ཞིག་རེད་ལ་དེ་ལ་ཡང་ཚན་རིག་གི་འགྲེལ་བཤད་བྱེད་ཐུབ་ཀྱི་ཡོད། འོན་ཀྱང་སོ་སོའི་འདོད་བློ་ལྟར་འགྲེལ་བརྗོད་གང་བྱས་ཀྱང་སོ་སའི་འདོད་བློ་རེད། དེ་རིང་གི་བལ་ཡུལ་གོད་ཆག་དེས་བལ་ཡུལ་གྱི་ཡུལ་མི་དང་ལྷག་པར་ངེད་བོད་པ་ཚང་གི་མི་མང་པོ་ཞིག་ལ་གནོད་འཚེ་བྱུང་སྟབས་སེམས་དེ་སྐྱོ་ལྷང་ལྷང་ཞིག་ཏུ་འགྱུར། ཡང་བལ་ཡུལ་གྱི་ས་ཡོམ་གྱི་རྐྱེན་པས་ངེད་གངས་ཅན་གྱི་ས་ཁུལ་གཉའ་ལམ་གཙོས་པའི་ས་ཁུལ་མང་དག་ཞིག་ལ་ཁང་པ་གཏོར་བཤིག་དང་དེ་མིན་མི་ཁ་ཤས་གྲོང་པ་དང་མི་མང་པོ་ཞིག་ལ་གནོད་སྐྱོན་ཕོག་འདུག བརྒྱུད་རིམ་དེའི་ཁྲོད་ནས་སེམས་སྐྱོ་དགོས་པ་ཞིག་ལ། སྲིད་སྐྱོང་གཙོས་པའི་གཞུང་ཞབས་ཚོས་བལ་ཡུལ་དང་རྒྱ་གར་གྱི་ཡུལ་མི་ཚོར་སེམས་གསོའི་སྐད་ཆ་རེ་བཤད་པ་ལས་དེ་མིན་བོད་ནང་གི་བོད་མི་ཚོར་སེམས་གསོའི་སྐད་ཆ་བཤད་མ་སོང་། བྱེད་སྟངས་དེས་ངས་སེམས་པ་ཡང་བསྐྱར་སྡུག་གིས་བརླན་སོང། ད་སྲིད་སྐྱོང་སྤྲེལ་ལད་ཅན་དང་ཚོགས་གཙོ་སྤྲེལ་ལད་ཅན་ལ་མི་དགའ།།།
སེམས་རྒྱ་ཆེ་མདོག་དང་བྱམས་སྙིང་རྗེ་ཡོད་མདོག་མ་བསྟོན་རོགས། བལ་ཡུལ་དངོས་སུ་བསྡད་མེད་མཁན་ཚོས་བལ་ཡུལ་ནང་གི་བོད་མི་ཚོའི་ལུས་སེམས་ཀྱི་དཀའ་སྡུག་ཚོར་གྱི་ཡོད་མ་རེད། བལ་ཡུལ་མི་མིང་སྡུག་ཅག་རེད་སུས་ཀྱང་ཞུ་གི་ཡོད་མ་རེད། བལ་ཡུལ་གཞུང་གི་བྱེད་སྟངས་ལས་སྟངས་བོད་མི་ཚོའི་སེམས་ནང་ཧ་ཅང་སྡུག་པོ་ཆགས་ཡོད་པ་རེད། ད་རེས་ས་འགུལ་གྱི་གནས་ཚུལ་དེ་བྱུང་མ་ཐག་ངོ་དེབ་ཙམ་མ་རེད་སྐད་འཕྲིན་ཚོགས་པ་སོགས་རྒྱུད་ལམ་མང་པོ་ཞིག་གི་ནང་དུ་ཡང་བསྐྱར་བལ་ཡུལ་གཞུང་གི་བྱས་ཉེས་དག་གླེང་སློང་བྱེད་མགོ་བརྩམས་ཡོད་པ་མ་ཟད། པར་མང་པོ་ཞིག་བརྒྱུད་འགོད་བྱེད་བཞིན་ཡོད་པ་གཤམ་གསལ་ལྟར་རེད།
https://www.facebook.com/marina.evers?fref=nf
https://www.facebook.com/photo.php?fbid=687334774728795&set=pcb.687335011395438&type=1&theater
https://www.facebook.com/photo.php?fbid=687334818062124&set=pcb.687335011395438&type=1&theater
དཔེ་མཚོན་ཙམ་ཡིན
དུས་བབ་ཀྱིས་གསུངས་པ་དངོས་ཡོད་གནས་སྟངས་ཤིག་རེད། གནས་ཚུལ་ག་རེ་བྱུང་བ་དང་། དེ་ལ་སྤྱི་ཚོགས་ནང་ལྟ་ཕྱོགས་བསམ་ཕྱོགས་གང་ཡོད་པ་དེ་ཅི་མ་ཅི་བཞིན་འགོད་དགོས་པ་རེད་མ་གཏོགས། དགོས་མཁོ་ལ་གཞིགས་ཏེ་ཡག་པོ་མཛེས་པོ་རྐྱང་རྐྱང་བཙལ་ནས་འཁོད་བསྡད་ན། (བཀྲ་ཤིས་བདེ་ལེགས་ཀྱི་གསར་འགྱུར)ཟེར་བ་དེ་ཆགས་འགྲོ་བ་རེད།
བལ་ཡུལ་གཞུང་ལ་ཅི་ཙམ་སྡིགས་ར་གཏོང་གི་ཡོད་མེད་ངོ་དེབ་ནང་གཟིགས་ན་མཐོང་གསལ་རེད། ཁ་སང་བལ་ཡུལ་ལ་ས་ཡོམ་བརྒྱབ་པའི་པར་རྣམས་གསར་ལམ་དག་ཏུ་འཁོད་པ་དང་མཉམ་དུ་རྒྱ་ནག་གི་རྒྱུག་ཁྱི་བལ་གཞུང་གི་ཉེན་རྟོག་པ་ཚོས་བོད་མི་ཚོར་ཉེས་རྡུང་ཚོད་མེད་གཏོང་གི་ཡོད་པའི་པར་རིས་དང་། བལ་ཡུལ་གྱི་ཕྱུགས་ཟོག་སེམས་ཅན་མང་པོའི་སྐེ་གཅོད་ཀྱི་ཡོད་པའི་པར་རིས་ཧ་ཅང་མང་པོ་གཏོང་གི་ཡོད་པ་མཐོང་གསལ་རེད།
གོ་སྐབས་འདི་འདྲ་ལ། དེ་འདྲའི་སྐད་ཆ་ངན་པ་བཤད་ན་ཡག་པོ་མི་འདུག དངོས་ནས་བྱས་ན་སྐྱེན་ངན་འདི་ལས་ངན་གྱི་འབྲས་བུ་ཞིག་ཡིན་ངེས་མོད། སྐབས་འདི་འདྲ་ལ། ང་ཚོས་ཀྱང་གདུང་སེམས་མཉམ་བསྐྱེད་བྱེད་དགོས་པ་ལས། དམོད་མོ་དང་དགའ་འབོད་བྱེད་ན་ཡག་པོ་མ་རེད། དུས་བབ་གསར་འགོད་པས་ཀྱང་འདི་སྤེལ་ལུགས་ལ་ཅུང་ཙམ་ཐུགས་སྣང་དགོས་པ་ལས། སེམས་ཅན་གསོད་པ་སོགས་དང་སྒྲིག་ན་ཡག་པོ་མ་རེད་ཡ། ང་ཚོ་ཚང་མ་ཚོར་བ་ཅན་གྱི་མི་རེད་པ། གདུང་སེམས་མཉམ་བསྐྱེད།
བལ་བོ་གནས་སྡོད་བོད་མི་རྣམས་ལ་བཀའ་ངལ་རབ་དང་རིམས་པ་འཕྲད་བཞིན་པ་ལྟར་གང་བྱུང་མང་བྱྱང་བཤད་ན་བལ་ཡུལ་གནས་སྡོད་བོད་མི་རྣམས་ལ་དེ་ལས་སྡུག་པའི་བཀའ་འཕྲད་རྒྱུ་ལས་ཕན་པ་མེད་པ་མངོན་གསལ་རེད། དུས་བབས་ཚང་སྡུག་ཚོད་ཟིན་མ་དགའ།
འཕྱི་དྲགས་སོང་བ་རེད་་་ཉེན་རྟོགས་པ་གང་མང་མང་ཞིག་་་ཨོཾ་མ་ཎི་པདྨེ་ཧྰུཾ།
སྔ་ལྟས་འདི་ཇོ་མོ་གླང་མར་ཨི་ཁུང་བརྟོལ་རྗེས་བལ་ཡུལ་རྒྱ་མིར་སླེབས་ནས། རྒྱ་མིའི་མི་སེར་སྤེལ་ཡུལ་ཆགས་རྒྱུ་དེ་དང་། དེ་རིང་སྔ་དྲོ་པན་ཆེན་རིན་པོ་འཁྲུངས་སྐར་ལ་བོད་མི་མང་པོར་ཉེས་རྡུང་བ་དང་དམ་དྲག་བྱས་པའི་རྣམ་སྨིན་ཡང་ཡིན་སྲིད། གང་ལྟར་སྙིང་རྗེ། ཤི་བོ་ཚེ་ཆེད་དུ་ཨོཾ་མ་ཎི་པདྨེ་ཧྰུཾ།