ཁ་སང་ཤཱག་ལི་ཨེབ་དྷོ་ཚང་གི་རི་མོ་བ་ལུ་ཛི་ལགས་ཀྱིས་མ་འོངས་པར་ཁ་ཆེའི་སྟོན་པར་ཟུར་ཟའི་རི་མོ་འབྲི་རྒྱུ་མིན་སྐོར་དང་དེ་བྲིས་ཀྱང་སྙིང་བོ་མེད་སྐོར་བརྗོད་འདུག
ཁ་སང་ཧྥ་རན་སིའི་རིག་གཞུང་དུས་དེབ་ལི་སེ་ཨིན་རོག་ཨབ་ཌེ་བྷེལ་ (Les Inrockuptibles) ཞེས་པས་ཧྥ་རན་སིའི་རྒྱལ་སར་རྟེན་གཞི་བྱས་པའི་ཤཱག་ལི་ཨེབ་དྷོ་(Charlie Hebdo) ཟེར་བའི་ཟུར་ཟའི་བདུན་རེ་ཚགས་དེབ་ཁང་ལ་ད་ལོའི་ཕྱི་ཟླ་ ༡ ཚེས་ ༧ ཉིན་ཁ་ཆེ་དྲག་སྤྱོད་པའི་གཏོར་རྒོལ་ཐེབས་རྗེས་ཀྱི་འདོན་ཐེངས་དང་པོའི་མདུན་ཤོག་རི་མོ་འབྲི་མཁན་ལུ་ཛི་ (Renald Luzier) ལགས་སུ་ཟུར་ཟའི་རི་མོ་དང་དུས་དེབ་ཁང་གི་ལས་དོན་བྱེད་ཕྱོགས་ཐོག་བཅར་འདྲི་བྱས་སྐབས། ཁོང་གིས་མ་འོངས་པར་ཁ་ཆེའི་སྟོན་པ་མཱོ་ཧཱ་མཱ་ཋ་(Prophet Muhammad)སྐོར་ལ་ཟུར་ཟའི་རི་མོ་གཅིག་ཀྱང་འབྲི་རྒྱུ་མིན་ལུགས་བརྗོད་འདུག
ཧུ་ཕན་ཌོན་ཆ་འཕྲིན་(The Huffingtonpost) གྱིས་ལི་སེ་ཨིན་རོག་ཨབ་ཌེ་བྷེལ་དུས་དེབ་ཀྱིས་རི་མོ་བ་ལུ་ཛི་ལགས་སུ་བཅར་འདྲི་ཞུས་པ་ལུང་འདྲེན་བྱས་པའི་ནང་ཁོང་གིས། “ངས་མ་འོངས་པར་མཱོ་ཧཱ་མཱ་ཋ་མཆོག་གི་ཟུར་ཟའི་རི་མོ་འབྲི་རྒྱུ་མིན་ལ་འབྲི་འདོད་ཀྱང་མི་འདུག གང་ཡིན་ཟེར་ན། ངས་མི་ཚེ་གཅིག་མཱོ་ཧཱ་མཱ་ཋ་མཆོག་གི་རི་མོ་འབྲི་བསྡད་པ་ཡིན་ན་སྙིང་པོ་གང་ཡང་མཐོང་གི་མི་འདུག དེ་སྔོན་ང་ཚོའི་དུས་དེབ་ཁང་ལ་འཇིགས་སྐུལ་རིང་ལུགས་པས་གཏོར་རྒོལ་བྱས་ནས་ལས་རོགས་མང་པོ་བསད་ཡོད་ཀྱང་ཁོ་ཚོར་རྒྱལ་ཁ་གང་ཡང་ཐོབ་མེད། ཧྥ་རན་སི་མང་ཚོགས་ཀྱིས་ཁོ་ཚོར་མུ་མཐུད་ཞེད་ནས་བསྡད་པ་ཡིན་ན། ཁོ་ཚོར་རྒྱལ་ཁ་དངོས་དེ་ཐོབ་པ་ཡིན་ཡང་ད་བར་མང་ཚོགས་ཚོས་མགོ་སྒུར་མེད་སྟབས་ཕམ་མཁན་དེ་ཁོ་ཚོ་ཆགས་ཡོད།”ཅེས་བརྗོད་འདུག
ཉེ་ཆར་དུས་དེབ་ཁང་ལ་ཨ་རིའི་སྨྱུག་ཚོགས་བསྟི་གནས་ཁང་ (PEN American Center) གིས་འདི་ལོའི་འཇིགས་ཞུམ་མེད་པའི་སྨྲ་བརྗོད་རང་དབང་གི་གཟེངས་རྟགས་དེ་སྤྲད་ཡོད་ཅེས་སོགས་བཀོད་འདུག
དེ་རིང་ལུ་སེ་(Luc Capdeviele ) ཟེར་བ་ཞིག་གིས་ཧུ་ཕན་ཌོན་ཆ་འཕྲིན་གྱི་དྲ་ཚིགས་ཐོག་མཆན་སྤེལ་བ་ཞིག་གི་ནང་ཁོས། ཆོས་ནི་སྐྲན་ནད་ལྟ་བུ་ཞིག་ཡིན་པ་མ་ཟད་འགྲོ་བ་མིའི་འཕེལ་རིམ་དང་སྨྲ་བརྗོད་རང་དབང་ལ་དམ་དྲག་བྱེད་མཁན་ཞིག་ཡིན་སྟབས། སྒྱུ་རྩལ་བ་ཚོས་འཇིགས་ཞུམ་མེད་པར་ཆོས་ལུགས་དང་ཆོས་དད་པའི་ངན་འཚང་དག་ཐེར་འདོན་བྱེད་དགོས་པ་ལས། ཞེད་ནས་བསྡད་ན་རང་གཞན་གཉིས་ཀར་ཕན་ཐོགས་གང་ཡང་འཐོན་གྱི་མ་རེད་ཅེས་བསམ་ཚུལ་སྤེལ་འདུག
གསར་འགོད་པ། དོན་གྲུབ།
