ཟླ་འདིའི་ཕྱི་ཚེས་ ༡ ནས་ ༡༢ བར་རྒྱ་གར་ལྷོ་ཕྱོགས་མོན་གྷོ་བྱང་ཆུབ་ཆོས་གླིང་དུ་དགེ་བཤེས་མའི་རྒྱུགས་སྤྲོད་སྐབས་ ༣ པ་དེ་འཚོགས་བཞིན་ཡོད་འདུག
ཁ་སང་ཕྱི་ཚེས་ ༡ ཉིན་རྒྱ་གར་ལྷོ་ཕྱོགས་ཀྱི་མོན་གྷོ་བཙུན་དགོན་བྱང་ཆུབ་ཆོས་གླིང་དུ། བོད་མིའི་སྒྲིག་འཛུགས་ཆོས་རིག་ལས་ཁུངས་དང་བོད་ཀྱི་བཙུན་མའི་ལས་འཆར་ཁང་། རྡ་ས་རིག་ལམ་སློབ་གཉེར་ཁང་། དེ་བཞིན་འབྲེལ་ཡོད་བཙུན་དགོན་དྲུག་གི་སྐུ་ཚབ་བཅས་ཀྱིས་གྲུབ་པའི་རྒྱུགས་སྤྲོད་དོ་དམ་ཚོགས་ཆུང་གི་གོ་སྒྲིག་འོག དགེ་བཤེས་མའི་རྒྱུགས་སྤྲོད་སྐབས་གསུམ་པ་འགོ་འཛུགས་གནང་ཡོད་པ་དང་། ཐེངས་འདིའི་རྒྱུགས་སྤྲོད་ནང་ལོ་རིམ་དང་པོར་བཙུན་མ་ ༡༡ དང་། གཉིས་པར་ ༦། གསུམ་པར་ ༢༡ བཅས་ཁྱོན་བཙུན་མ་ ༣༨ མཉམ་ཞུགས་གནང་ཡོད་པ་དང་། ད་རེས་གྱི་རྒྱུགས་སྤྲོད་ཟླ་འདིའི་ཕྱི་ཚེས་ ༡༢ ཉིན་མཇུག་བསྡུ་རྒྱུ་ཡིན་འདུག
རྒྱུགས་སྤྲོད་ཁྲོད་སློབ་ཚན་རྣམས་རྩ་བ་དང་ཞར་བྱུང་གཉིས་སུ་ཕྱེ་ནས་ལོ་རིམ་དང་པོ་དང་གཉིས་པས་དབུ་མ་དང་། ཚད་མ། ཕར་ཕྱིན། ལོ་རིམ་གསུམ་པས་འདུལ་བ། མཛོད། ཚད་མ་བཅས་ལ་རྩོད་རྒྱུགས་དང་འབྲི་རྒྱུགས་སྤྲོད་དགོས་པ་དང་། ཞར་བྱུང་སློབ་ཚན་ཁོངས་བརྡ་སྤྲོད་དང་ལོ་རྒྱུས། ཚན་རིག་བཅས་ཀྱི་ཡིག་རྒྱུགས་སྤྲོད་དགོས་ལ། དགེ་བཤེས་མའི་རྒྱུགས་སྤྲོད་དང་ལག་འཁྱེར་འབུལ་ཕྱོགས་ཀྱི་སྒྲིག་གཞི་ལྟར། རྩོད་རྒྱུགས་དང་ཡིག་རྒྱུགས་ལེན་པར་སེ་ར་བྱེས་སྨད་གཉིས་དང་དགའ་ལྡན་ཤར་རྩེ། འབྲས་སྤུངས་སྒོ་མང་གྲྭ་ཚང་བཅས་ནས་དགེ་བཤེས་ལྷ་རམས་པ་ ༥ ཆེད་གཏོང་གནང་ཡོད་པ་མ་ཟད། གྲྭ་ཚང་མི་འདྲ་བའི་དགེ་བཤེས་ལྷ་རམས་པ་ཁག་གཉིས་ནས་རྒྱུགས་འབྲས་ལ་ཞིབ་འཇུག་གནང་རྒྱུ་ཡིན་འདུག
སང་ལོའི་དགེ་བཤེས་མའི་རྒྱུགས་སྤྲོད་སྐབས་ ༤ པ་དེ་དྷ་ས་བཙུན་དགོན་དགེ་ལྡན་ཆོས་གླིང་དུ་འཚོགས་རྒྱུ་ཡིན་པ་དང་། སྐབས་དེར་རྒྱུགས་འབྲས་ཚད་ལོན་པའི་བཙུན་མ་ཚོར་༧གོང་ས་མཆོག་གི་བཀའ་དགོངས་ལྟར་དགེ་བཤེས་མའི་མཚན་གནས་ཐོག་མ་དེ་གནང་རྒྱུ་ཡིན་འདུག
གསར་འགོད་པ། པདྨ་མཚོ།
