བོད་བཞུགས་རྩོམ་པ་པོ།
དང་པོ།
དེ་སྔོན་ཕྱི་ལོ་ ༢༠༡༥/༠༣/༠༥ ཙམ་ལ་རྒྱ་གཞུང་གི་བཀག་རྒྱ་ལ་མ་བལྟས་པར་ཐབས་ཤེས་སྣ་ཚོགས་ཀྱི་ལམ་ནས་དོན་ཚན་ལྔ་ཅན་གྱི་བསམ་ཚུལ་ཞིག་བརྒྱུད་བསྒྲགས་བྱས་ཡོད་པ་དང་། མདོ་དབུས་ཁམས་གསུམ་གྱི་སྐད་ཐོག་ཨེ་ཤ་ཡའི་རང་དབང་རླུང་འཕྲིན་ཁང་གིས་རྒྱང་སྲིང་ཡང་བྱས་ཟིན། དེ་ནི་གཙོ་བོ་བཙན་བྱོལ་གཞུང་དང་ཕྱི་བཞུགས་གནད་ཡོད་མི་སྣ་དག་ལ་དམིགས་ནས་ཕུལ་པ་ཞིག་ཡིན། ཐུགས་སྣང་གནང་གལ་ཆེན་པོ་ཞིག་ཀྱང་ཡིན་པས་སྣང་མེད་བསྐྱུར་འཇོག་བྱས་མེད་པའི་རེ་བ་དང་ཡིད་ཆེས་བྱེད་ཀྱིན་ཡོད།
གཉིས་པ།
བོད་མི་རིགས་ཀྱི་དབུ་ཁྲིད་༸གོང་ས་སྐྱབས་མགོན་རིན་པོ་ཆེ་མཆོག་ཕྱི་ཕྱོགས་སུ་བཞུགས་པ་འདི་རྒྱ་གཞུང་ལས་རྣམ་པར་རྒྱལ་བ་ཞིག་ཡིན། རྒྱ་གཞུང་གིས་རྒྱ་ནག་རྒྱལ་ཁབ་ཆེན་པོའི་ཕྱིའི་རྫིག་ཉམས་ཙམ་བསྟན་ཏེ་ཡིན་མདོག་གི་རྣམ་པ་སྟོན་མོད། འོན་ཀྱང་། ༸གོང་ས་མཆོག་སྐུ་སྒེར་གྱི་མཛད་འཕྲིན་དང་སྙན་གྲགས་ཕྱི་རྒྱལ་ཡུལ་གྲུ་ཀུན་ཏུ་ཁྱབ་པ་དེས་རྒྱ་གཞུང་ཡོངས་སུ་ཕམ་དུ་བཅུག་ཡོད་ལ། སྐུ་སྒེར་གྱི་ངོས་ནས་བསྒྲུབ་དགོས་པ་གང་དག་བསྒྲུབས་ནས་དོན་དངོས་སྟེང་རྒྱ་གཞུང་ལས་རྒྱལ་ཡོད་པ་ཧ་ཅང་གསལ། མ་ཟད་དགོངས་དོན་དེ་ཡང་བོད་རྒྱའི་ཁེ་ཕན་ཙམ་མ་ཡིན་པར་སའི་གོ་ལའི་སྟེང་གི་མིའི་འགྲོ་བ་ཡོངས་ལ་བདེ་སྐྱིད་བསྐྲུན་ཐབས་དང་། བྱམས་བརྩེ་སྤྲོད་རྒྱུ་དེ་ཡིན། རྒྱ་ནག་གཞུང་གིས་འདི་ལྟ་བུ་ངོས་ལེན་མི་བྱེད་པ་ནི་རྒྱ་མི་རིགས་ཀྱི་གྱོང་གུད་ཆེན་པོ་ཞིག་ཡིན་པ་དང་། མ་འོངས་པར་ད་ལྟའི་རྒྱ་གཞུང་གི་དབུ་ཁྲིད་ཚོ་ནི་འདིའི་ཐད་ཀྱི་ཉེས་ཅན་ཞིག་ཏུ་འགྱུར་ངེས་ཡིན།
གསུམ་པ།
ད་ལྟའི་བོད་ནང་གི་རང་དབང་འཐབ་རྩོད་ནི་དཔའ་བོ་ཁེར་རྒྱུག་གི་རྣམ་པ་ལྟ་བུ་ཞིག་རེད། ལ་རྒྱ་དང་དཔའ་སྤོབས་ཅན་དག་གིས་རང་ལུས་སྦྱིན་སྲེག་ཅི་ཙམ་གནང་ནའང་། ཚེ་སྲོག་གི་རིན་ཐང་དང་བསྡུར་ན་ནུས་པ་དེ་ཙམ་ཐོན་གྱི་མི་འདུག་ལ། དཔའ་བོ་དཔའ་མོ་དག་ཀྱང་རེ་རེ་བཞིན་ཚར་པ་ལས་མི་འདུག་པས། ང་ཚོས་ལས་འགུལ་གྱི་རྣམ་པ་གཞན་ཞིག་ཏུ་བསྒྱུར་ཏེ་ཚང་མ་མཉམ་རུབ་བྱེད་དགོས། དེ་ཡང་དུས་ཚོད་གཏན་ཁེལ་གོ་རིམ་ཡོད་པ་ཞིག་ཡིན་ན་མཆོག དཔེར་ན། ལོ་གཅིག་གི་ལོ་གསར་ཚེས་དང་པོ་ནས་ལོ་དེའི་ལོ་མཇུག་གི་གནམ་གང་བར་ལྟ་བུར་དུས་ཆད་བྱས་ཏེ། དེའི་རིང་ཆོལ་ཁ་གསུམ་གྱི་ཞིང་འབྲོག་ཚང་མས་ལས་ཀ་མཚམས་འཇོག་གིས་མཉམ་ལངས་བྱས་ཏེ་གནམ་ས་གཡོ་བའི་ལས་འགུལ་སྤེལ་པའི་དུས་ལ་རན་ཡོད། ལས་འགུལ་གྱི་རྣམ་པ་ནི་༸གོང་ས་མཆོག་གི་དགོང་གཞི་ལྟར་འཚེ་མེད་ཞི་བའི་ངོ་བོ་ཡིན་དགོས་ལ། འཛམ་གླིང་ཡོངས་གང་ནས་ཀྱང་འཚེ་བའི་རིགས་ལ་བརྒྱབ་སྐྱོར་མི་འཐོབ་པ་དེ་མང་ཚོགས་ལ་ཡང་སྔོན་ནས་གྲ་སྒྲིག་གིས་རྟོགས་སུ་འཇུག་དགོས་པ་མ་ཟད། ལས་འགུལ་ཚགས་ཚུད་ཡོང་དགོས་ན་དབུ་ཁྲིད་ཅིག་ལ་ངེས་པར་ལྟོས་དགོས་པས། གཞོན་ནུ་ལྷན་ཚོགས་ལྟ་བུའི་ཚོགས་པ་གང་རུང་ཞིག་གིས་ལས་འགུལ་གྱི་ངོ་བོ་དང་རྣམ་པ། གཅིག་གྱུར་གྱི་འབོད་ཚིག་དང་དུས་ཚོད་སོགས་སྔ་མོ་ནས་ཁྱབ་བསྒྲགས་འཐུས་ཚང་གིས་དབུ་ཁྲིད་བྱེད་དགོས།
བཞི་བ།
རྒྱ་གཞུང་ནི་བོད་མིར་བསམ་དོན་གང་ཡོད་ན་དེ་རུ་བསམ་བཞིན་དུ་ཞེ་ནག་བཟོ་མཁན་ཡིན་པས། ང་ཚོས་རེ་བ་གང་བཏོན་པ་ཐམས་ཅད་བརྩིས་མེད་དང་རྡོག་བརྫུས་བྱེད་རྒྱུ་ལས་མི་འདུག ང་ཚོས་“རིག་གཞུང་དང་སྐད་ཡིག་སྲུང་སྐྱོབ་བྱེད་རོགས། ༸གོང་ས་མཆོག་བོད་དུ་གདན་འདྲེན་ཞུ་དགོས”ཞེས་རེ་སྐུལ་ཇི་ལྟར་བྱས་ཀྱང་། དེ་ལས་ལྡོག་པའི་དྲག་གནོན་མང་བོ་དང་གཡོ་ཇུས་མང་བོ་ལག་བསྟར་བྱེད། དེས་ན་ང་ཚོས་ཀྱང་རང་རྐང་ཚུགས་པའི་ལས་འགུལ་ཞིག་སྤེལ་དགོས་པས། ༸གོང་ས་མཆོག་ཁྲི་ལོར་ཤོག་ཟེར་བའི་ཚབ་ཏུ་བོད་ཁྲི་ལོར་ཤོག་དང་། ཁོང་གི་སྐུ་པར་གྱི་ཚབ་ཏུ་རྒྱལ་དར་བསྒྲེང་རྒྱུ་དེ་ཡིན།
མཆན། གོང་གི་རྩོམ་ཡིག་དེ་བོད་ནང་གི་མཁས་དབང་ཞིག་གིས་བྲིས་ཀྱང་ཕྱི་ཕྱོགས་སུ་བསྐུར་སྟབས་མ་བདེ་བའི་དབང་གིས་ཁ་པར་བརྒྱུད་ངག་ཐོག་ནས་ཞུས་པ་ཨུ་རུ་སུར་གནས་སྡོད་དྲ་མིང་འོད་ཅན་གྱིས་ ༢༠༡༥། ༠༥། ༡༡ ཉིན་ཡིག་ཐོག་ཏུ་བཀོད།
དེང་སང་བོད་ཕྱི་ལ་ཡོད་མཁན་ཁ་ཤས་ནས་བོད་ནང་གི་མཁས་པའི་མིང་བེད་སྤྱད་ནས་རྩོམ་ཡིག་སྤེལ་མཁན་དེ་འདྲ་མང་པོ་ཡོང་གི་འདུག བོད་ནང་ནས་དགོངས་པ་མ་ཞུ་ཞེས་ཁ་པར་སླེབས་སོང་ཞེས་པ་དང་བོད་ནང་ནས་ཡི་གེ་སླེབས་སོང་ཞེས་པ་སོགས་དེ་འདྲ་བཤད་མཁན་འགོ་སྤྱི་མཐུས་ཚོགས་ཁང་ནས་བཟུང་ནད་ཡམས་དེ་ཁྱབ་འདུག་ན་ཀུན་གྱིས་ཧོབ་རྒྱུགས་མི་གནང་བར་དགོངས་པ་ཟབ་མོ་བཞེས་རྒྱུ་གལ་ཆེ་སྙམ།
བོད་བཞུགས་མཁས་པ་ལགས། གོང་དུ་བཀོད་པའི་བསམ་ཚུལ་སྔ་མ་རྣམས་ལ་མི་འཐད་པ་གང་ཡང་མ་མཐོང་མོད། མཐའ་མའི་བསམ་ཚུལ་ཐོག་ཅུང་ཟད་ཅིག་གསལ་འདེབས་ཞུ་དགོས་སྙམ། ཁྱོད་ཀྱི་མ་ཤེས་མ་མཐོང་བ་ཡིན་མི་སྲིད་སྙམ་བཙན་བྱོལ་ལ་ཡོད་མཁན་རྣམས་ཀྱིས་ཁྲོམ་སྐོར་དང་སྐད་འབོད་ནམ་ཡིན་ལ་བོད་རྒྱལ་གྱུར་ཅིག་དང་བོད་ཀྱི་རྒྱལ་དར་འཁྱེར་བཞིན་པ་མ་ཟད་དེ་དང་མཉམ་དུ་རྒྱལ་བ་རིན་པོ་ཆེ་ཁྲི་ལོར་བརྟན་པར་ཤོག་དང་ཁོང་གི་སྐུ་པར་ཡང་འཁྱེར་བཞིན་པ་རེད། ཁྱོད་ཀྱིས་བསམ་བཞིན་དུ་ཁོང་གི་སྐུ་པར་དང་ཁོང་ཁྲི་ལོར་བརྟན་པར་ཤོག་ཅེས་པ་འགོག་དོན་གང་ཡིན་ནམ།