རྒྱ་གར་གྱི་སྲིད་བློན་རྒྱ་ནག་ནང་སྐོར་སྐྱོད།

དེ་རིང་རྒྱ་དཀར་ནག་གཉིས་ཀྱི་དབུ་ཁྲིད་རྣམ་གཉིས་ཐུག་འཕྲད་གནང་སྟེ་ས་མཚམས་རྩོད་ཉོག་དང་ཚོང་དོན་རིག་གཞུང་བརྗེ་རེས་བཅས་ཀྱི་སྐོར་ལ་གྲོས་མོལ་གནང་བཞིན་ཡོད་པ་རེད།

དེ་རིང་ནས་བཟུང་ཉིན་གསུམ་རིང་རྒྱ་གར་སྲིད་བློན་ནཱ་རེན་ཌ་མུ་དྷེ་མཆོག་རྒྱ་ནག་ནང་རྒྱལ་དོན་སྐོར་སྐྱོད་གནང་མགོ་བཙུགས་ཡོད་ཅིང་། སྔ་དྲོའི་ཆུ་ཚོད་ ༨།༠༠ ཐོག་སྲིད་བློན་ནཱ་རེན་ཌ་མུ་དྷེ་རྒྱ་ནག་གི་ཞི་ཨན་རྒྱལ་སྤྱིའི་གནམ་ཐང་དུ་འབྱོར་ཡོད་ཅིང་། སྐབས་དེར་ཞི་ཨན་གྲོང་ཁྱེར་གྱི་སྤྱི་ཁྱབ་པ་ལེའུ་ (Lou Qinjian) ཡིས་ཕེབས་བསུ་ཞུས་ཡོད་པ་མ་ཟད། རྒྱ་ནག་གི་རིག་གཞུང་འཁྲབ་སྟོན་འདྲ་མིན་འཁྲབ་ནས་བསུ་བ་ཞུས་ཡོད་པ་དང་། དེའི་རྗེས་ནཱ་རེན་ཌ་མུ་དྷེས་ཤིན་ནན་གྲོང་ཁྱེར་གྱི་དམག་དམག་འགྲེམས་སྟོན་ཁང་(Terracotta Warriors) ཞེས་པ་དང་། ཌ་ཤིན་ཀྲང་དགོན་པར་(Daxingshan Temple) གཟིགས་སྐོར་ལ་ཕེབས་ནས་ལེགས་སྦྱར་སྐད་ནས་རྒྱ་སྐད་ནང་ཕབ་བསྒྱུར་བྱས་པའི་དཔེ་རྙིང་ཁག་གཅིག་ལ་གཟིགས་ཞིབ་གནང་ཡོད་པ་མ་ཟད། དགོན་པའི་མཁན་པོས་ཁོང་ལ་དྲན་རྟེན་གྱི་ཕྱག་རྟགས་སོགས་འཕུལ་ཡོད་འདུག 

རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ནཱ་རེན་ཌ་མུ་དྷེ་རྒྱ་ནག་གི་ནང་པའི་དགེ་སློང་ཞན་ཙང་གིས་རྒྱ་གར་ནས་ཆོས་ཞུས་རྗེས་དར་གོས་ཚོང་ལམ་བརྒྱུད་དེ་ཕྱིར་རྒྱ་ནག་ལ་ལོག་རྗེས་ཆོས་ཀྱི་གླེགས་བམ་དང་སངས་རྒྱས་ཀྱི་སྐུ་བཞུགས་སར་བཞེངས་ཡོད་པའི་ཏཱ་ཡན་མཆོད་རྟེན་ (Big Wild Goose Pagoda) ཞེས་པར་ཕེབས་བསུ་ཞུས་ཡོད་ཅིང་། སྐབས་དེར་གྲོང་ཁྱེར་གྱི་གཞུང་ལམ་གཡས་གཡོན་དུ་མང་ཚོགས་སྟོང་ཕྲག་མང་པོས་འཚམས་འདྲི་ཞུས་ཡོད་འདུག དེའི་རྗེས་ཞི་ཅིན་ཕིན་གྱིས་ནཱ་རེན་ཌ་མུ་དྷེ་ཞི་ཨན་མགྲོན་ཁང་དུ་ (Shaanxi Guest House) གདན་ཞུ་བྱས་ཏེ། ས་མཚམས་རྩོད་ཉོག་གཙོས་ཚོང་དོན་གྲོས་མཐུན་ཁག་ལ་གྲོས་མོལ་བྱས་ཡོད་འདུག

ཞི་ཅིན་ཕིན་གྱིས་གསར་འགྱུར་བརྒྱུད་ལམ་ཐོག “ ཁྱེད་ཀྱིས་ང་ཁྱེད་རང་གི་ཕ་ཡུལ་ནང་གདན་ཞུ་བྱས་ནས་སྣེ་ལེན་ཟབ་རྒྱས་ཞུས་བྱུང་བས། ངས་ཀྱང་ཁྱེད་རང་ངའི་ཕ་ཡུལ་ནང་སྣེ་ལེན་ཞུ་རྒྱུ་བྱུང་བར་དགའ་ཚོར་ཆེན་པོ་བྱུང་།”ཞེས་དང་། ནཱ་རེན་ཌ་མུ་དྷེས། “ངས་རྒྱ་གར་བ་ཀཱ་རོ་ ༡༢༥ ཡི་སྐུ་ཚབ་བྱེད་ཐུབ་པར་གཟི་བརྗིད་ཆེན་པོ་སྐྱེ་ཡི་འདུག་ལ། སྲིད་འཛིན་ཞི་ཅིན་ཕིན་གྱིས་ཁོང་གི་ཕ་ཡུལ་ལ་གདན་དྲངས་བར་དེ་བས་དགའ་ཚོར་ཆེན་པོ་བྱུང་།”ཞེས་བརྗོད་འདུག

ཐེངས་འདིར་རྒྱལ་ཁབ་གཉིས་ཀྱི་དབུ་ཁྲིད་བར་གྱི་ས་མཚམས་རྩོད་ཉོག་དང་། རྒྱ་ནག་གིས་རྒྱ་གར་རྒྱ་མཚོའི་ཐོག་ཧམ་བྷན་ཌོ་ཌ་(Hambantota) གྲུ་ཁ་སོགས་བཟོས་ནས་ཨེ་ཤ་ཡའི་མངའ་ཁུལ་གྱི་བརྟན་ལྷིང་ལ་འགོག་རྐྱེན་བཟོ་བཞིན་པའི་སྐོར་དང་། རྒྱ་ནག་གིས་པ་ཀི་སི་ཐན་ནང་རྒྱལ་ཁབ་འཛུགས་སྐྲུན་ཆེད་མ་འཇོག་ཆེན་པོ་བྱེད་བཞིན་ཡོད་པ། རྒྱ་གར་གྱི་རླུང་སྦྱོར་ཡོ་གྷ་དང་རྒྱ་ནག་གི་དྲག་རྩལ་ཋེ་ཅེ་ (Tai chi) བར་གྱི་རིག་གཞུང་སྤེལ་རེས་དང་། རྒྱལ་ཁབ་ཕན་ཚུན་བར་ཡུལ་སྐོར་སྤྲོ་འཆམ་པ་མང་དུ་གཏོང་རྒྱུའི་ཐོངས་མཆན་སྤྲོད་ཕྱོགས། རྒྱལ་ཁབ་གཉིས་ཀྱི་གྲོང་ཁྱེར་ཁག་གཅིག་བར་སྤུན་ཟླའི་གྲོང་ཁྱེར་དུ་བསྒྱུར་རྒྱུ། རྒྱ་ནག་གིས་རྒྱ་གར་ནང་མྱུར་བགྲོད་མེ་འཁོར་འཚོང་རྒྱུ་དང་རྡུལ་ཕྲན་གློག་ཤུགས་ས་ཚིགས་རྒྱག་རྒྱུ། རྒྱ་གར་གྱིས་རྒྱ་ནག་ལ་སྨན་དང་འཕྲུལ་ལས་རིག་པའི་ཞབས་ཞུ་བསྒྲུབ་རྒྱུ་སོགས་ལ་གྲོས་མོལ་བྱས་ཏེ། མ་འོངས་པར་རྒྱལ་ཁབ་གཉིས་བར་ཨ་སྒོར་ཐེར་འབུམ་ ༡༠ ལྷག་གི་ཚོང་འབྲེལ་བྱ་རྒྱུར་གྲོས་མོལ་བྱས་ཡོད་འདུག

རྒྱ་གར་ཧིན་རྡུ་སི་ཐན་དུས་བབ་དང་དབྱིན་ཡུལ་གྱི་ཉིན་རེའི་གསར་འཕྲིན་ཐོག་གནས་ཚུལ་སྤེལ་དོན་ལྟར་ན། ད་ལྟ་རྒྱ་ནག་གི་དཔལ་འབྱོར་ཨ་སྒོར་ཁྲག་ཁྲིག་ཆེན་མོ་ ༡༠ ཡིན་སྟབས། རྒྱ་གར་དང་བསྡུར་ན་ཨ་སྒོར་ཁྲག་ཁྲིག་ཆེན་མོ་བརྒྱད་ཀྱི་མང་བ་ཡོད་ཀྱང་། འདི་ལོ་རྒྱ་གར་གྱི་དཔལ་འབྱོར་འཕེལ་ཚད་ ༧།༥ཡིན་སྟབས། རྒྱ་ནག་དང་བསྡུར་ན་ཚེག་ ༤ ཡི་མང་བ་ཡོད་པར་བརྟེན། རྒྱལ་ཁབ་གཉིས་གཅིག་ལ་གཅིག་རྟེན་ཆགས་ཡོད། རྒྱ་ནག་གིས་རྒྱ་གར་ལ་འཛུགས་སྐྲུན་ཐད་རོགས་རམ་བྱ་རྒྱུ་དང་རྒྱ་གར་གྱིས་རྒྱ་ནག་གི་ཁེ་ལས་གང་མང་རྒྱ་གར་ནང་གསར་འཛུགས་བྱེད་བཅུག་ནས་རྒྱལ་ཁབ་གཉིས་ཀྱི་འབྲེལ་ལམ་གོང་འཕེལ་གཏོང་ཐབས་བྱས་པ་ཡིན་ན། དུས་རབས་ཉེར་གཅིག་ནི་ཨེ་ཤ་ཡའི་དུས་རབས་ཆགས་རྒྱུ་རེད་ཅེས་སོགས་བཀོད་འདུག

ཆུ་ཚོད་གཅིག་སྔོན་ལ་རྒྱ་གར་གྱི་ཕྱི་སྲིད་དྲུང་ཆེ་ཇེ་ཤན་ཀར་ (S Jaishankar)ལགས་ཀྱིས་རྒྱ་གར་གྱི་བརྙན་འཕྲིན་བརྒྱུད་ལམ་ (NDTV) ཐོག “རྒྱལ་ཁབ་གཉིས་ཀྱི་མགོ་ཁྲིད་ཀྱིས་ས་མཚམས་རྩོད་ཉོག་དང་མངའ་ཁུལ་བརྟན་ལྷིང་། རྒྱ་གར་ལ་ཚོང་འབྲེལ་ཐོག་གྱོང་རག་གི་ཡོད་པ། འཇིགས་སྐུལ་རིང་ལུགས་པའི་བྱ་སྤྱོད་འགོག་ཐབས་ལ་མཉམ་ལས་བྱ་རྒྱུ་གཙོས། ཚོང་དོན་གྲོས་མཐུན་ཁག་གཅིག་གི་ཐོག་གྲོས་མོལ་བྱས་ཡོད་པ་རེད།”ཅེས་དང་། རྒྱ་གར་གྱི་རྩོམ་པ་པོ་སུ་པར་མཱ་ཎེན་གྱིས་རྒྱ་གར་དུས་བབ་ཐོག “རྒྱ་ནག་གཞུང་གིས་པ་ཀི་སི་ཐན་དང་ཨ་སྒོར་ཐེར་འབུམ་ ༤༠ ལྷག་གི་ཚོང་འབྲེལ་བྱེད་པ་ལས་རྒྱ་གར་ལ་ཚོང་འབྲེལ་བྱས་ན་ཕན་ཐོགས་ཆེན་པོ་ཡོད་སྟབས། རྒྱ་ནག་གཞུང་གིས་ཆབ་སྲིད་ཀྱི་ཁ་ལོ་བསྒྱུར་ནས་རྒྱ་གར་དང་མཉམ་ལས་བྱེད་དགོས། ད་ཐེངས་ཞི་ཅིན་ཕིན་གྱིས་རྒྱ་ནག་རྒྱལ་སའི་ཕྱི་ཕྱོགས་ལ་སྲིད་བློན་མུ་དྷེ་ཐུག་པ་དེས། རྒྱལ་ཁབ་གཉིས་བར་གྱི་འབྲེལ་ལམ་གོང་འཕེལ་གཏོང་ཐབས་ལ་དམིགས་པ་ཞིག་རེད།”ཅེས་བརྗོད་འདུག

ཞི་ཨན་ནི་རྒྱ་ནག་གི་གནའ་བོའི་དར་གོས་ཚོང་ལམ་གྱི་མགོ་ཁུངས་ཡིན་པ་མ་ཟད། ཞི་ཅིན་ཕིན་གྱི་ཕ་ཡུལ་ཡང་ཡིན། ༢༠༡༤ ལོའི་ཟླ་ ༩ པའི་ནང་ཞི་ཅིན་ཕིན་རྒྱ་གར་ལ་འཚམས་འདྲིར་སྐྱོད་སྐབས། མུ་དྷེས་ཞི་ཅིན་ཕིན་ཁོང་གི་ཕ་ཡུལ་གྷུ་ཅུ་ར་ཌེ་ལ་འཚམས་འདྲིར་གདན་ཞུ་བྱས་ཡོད་སྟབས། ད་ཐེངས་ཞི་ཅིན་ཕིན་གྱིས་མུ་དྷེ་ཁོང་གི་ཕ་ཡུལ་ཞི་ཨན་དུ་གདན་ཞུ་བྱས་ཡོད། ཞི་ཨན་ནི་རྒྱ་ནག་གི་ནང་པའི་དགེ་སློང་ཞན་ཙང་གིས་ཆོས་བསྒྱུར་བའི་གནས་ཡིན་པ་མ་ཟད། ལོ་རྒྱུས་ཐོག་རྒྱ་ནག་དང་རྒྱ་གར་གཉིས་ཀྱི་འབྲེལ་ལམ་མགོ་བཙུགས་བྱེད་ས་ཞིག་ཀྱང་ཡིན་འདུག དེ་རིང་དགོང་དྲོར་ཞི་ཅིན་ཕིན་གྱིས་མུ་དྷེ་ལ་དགོང་དྲོའི་རྒྱལ་སྟོན་གསོལ་ཚིགས་ཤིག་འདེགས་འབུལ་ཞུ་རྒྱུ་དང་། སང་ཉིན་མུ་དྷེ་པེ་ཅིན་དང་དེའི་རྗེས་ཧྲང་ཧེ་ལ་བསྐྱོད་རྒྱུ་ཡིན་འདུག