དེ་རིང་རྒྱ་དཀར་ནག་གཉིས་ཀྱི་སྲིད་བློན་ཐུག་འཕྲད་གནང་སྟེ་ས་མཚམས་རྩོད་ཉོག་ཐད་གྲོས་མོལ་དང་ཨ་སྒོར་ཐེར་འབུམ་ ༡༠ ཡི་ཚོང་དོན་གྲོས་མཐུན་བཞག་ཡོད་འདུག
དེ་རིང་སྔ་དྲོར་པེ་ཅིན་གྱི་མི་དམངས་ཚོགས་ཁང་ཆེན་མོའི་ནང་། རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་དང་རྒྱ་ནག་གི་སྲིད་བློན་ལི་ཁེ་ཆང་རྣམ་གཉིས་ཐུག་འཕྲད་གནང་སྟེ། རྒྱ་གར་གྱིས་རྒྱ་ནག་གི་གྲོང་ཁྱེར་ཁྲིན་ཏུའུ་ནང་རྒྱ་གར་གྱི་ཚོང་འབྲེལ་དོན་གཅོད་ཁང་དང་རྒྱ་ནག་གིས་རྒྱ་གར་གྱི་གྲོང་ཁྱེར་མ་དྷ་ར་སི་ནང་རྒྱ་ནག་གི་ཚོང་འབྲེལ་དོན་གཅོད་ཁང་འཛུགས་རྒྱུ་དང་། རྒྱ་གར་གྱི་མི་སྣ་གསོ་སྐྱོང་དང་ཁེ་ལས་བདག་སྐྱོང་ལྷན་ཁང་དང་རྒྱ་ནག་གི་མི་ཁུངས་ལྷན་ཁང་བར་ལས་རིགས་དང་ལག་རྩལ་ཐོག་མཉམ་ལས་བྱ་རྒྱུ། ༢༠༡༥ ནས་ ༢༠༡༦ ལོ་བར་རྒྱལ་ཁབ་གཉིས་ཀྱི་མེ་འཁོར་བདག་སྐྱོང་ལྷན་ཁང་བར་ཚོང་འབྲེལ་འཛུགས་རྒྱུ། རྒྱལ་ཁབ་གཉིས་བར་ཤེས་ཡོན་སྤེལ་རེས་དང་གཏེར་ལས་ལྷན་ཁང་བར་མཉམ་འབྲེལ་བྱ་རྒྱུ། རྒྱ་གར་གྱི་གཞུང་འབྲེལ་བརྙན་འཕྲིན་བརྒྱུད་ལམ་དྷུར་ཌར་ཤིན་ (Doordarshan) དང་རྒྱ་ནག་གི་གཞུང་འབྲེལ་བརྒྱུད་ལམ་བར་གསར་འགྱུར་རྒྱང་སྲིང་བྱེད་ཕྱོགས་དང་བར་སྣང་གི་ཚན་རྩལ་འཕེལ་རྒྱས་གཏོང་ཕྱོགས་མཉམ་ལས་བྱ་རྒྱུ། རྒྱ་ནག་སི་ཁྲོན་ཞིང་ཆེན་དང་རྒྱ་གར་གྱི་ཀཱ་ཎ་ཀྲ་ཀཱ་མངའ་སྡེ་དང་། མ་དྷ་ར་སི་དང་ཁྲིན་ཏུའུ། ཧེ་ཌར་བྷ་ཋ་དང་ཆིན་ཏོ། ཨུ་རན་གྷ་བྷ་ཌ་(Aurangabad) དང་ཏུན་ཧོང་བཅས་བར་སྤུན་ཟླའི་གྲོང་ཁྱེར་དང་མངའ་སྡེར་འགྱུར་རྒྱུ། རྒྱ་ནག་གི་ཕུའུ་ཏན་སློབ་ཆེན་ (Fudan) ནང་གྷན་དྷེ་དང་རྒྱ་གར་གྱི་ཤེས་ཡོན་ཚན་ཁག་འཛུགས་རྒྱུ་དང་། ཡུན་ནན་མི་རིགས་སློབ་ཆེན་ནང་རྒྱ་གར་གྱི་རླུང་སྦྱོར་ཡཱོ་གྷ་བསླབ་རྒྱུ། རྒྱལ་ཁབ་གཉིས་ཀྱི་ས་དཔྱད་རིག་པ་དང་མཚོ་ངོས་ཚན་རིག་ཁང་བར་མཚོ་ཐོག་འཕྲུལ་ལས་དང་གནམ་གཤིས་འགྱུར་ལྡོག་བཅས་ཀྱི་ཐོག་མཉམ་འབྲེལ་བྱ་རྒྱུ། དེ་བཞིན་རྒྱལ་ཁབ་གཉིས་ཀྱི་ཕྱི་སྲིད་མི་སྣའི་བར་འབྲེལ་མོལ་དང་མཁས་པའི་བགྲོ་གླེང་འཚོགས་རྒྱུ་སོགས་ཨ་སྒོར་ཐེར་འབུམ་ ༡༠ ཡི་ཚོང་དོན་གྲོས་མཐུན་ཁག་ ༢༤ བཞག་ཡོད་འདུག
དེ་བཞིན། མགོ་ཁྲིད་རྣམ་གཉིས་ཀྱིས་ས་མཚམས་རྩོད་ཉོག་འགྲིག་འཇགས་ཡོང་ཐབས་དང་། རྒྱ་གར་ལ་ཚོང་འབྲེལ་ཐོག་གྱོང་རག་གི་ཡོད་པ། རྒྱ་ནག་གིས་པ་ཀི་སི་ཐན་ལ་ཨ་སྒོར་ཐེར་འབུམ་ ༤༦ ལྷག་གི་ཚོང་འབྲེལ་གྲོས་མཐུན་བཞག་ནས་རྒྱ་གར་ལ་ཤུགས་རྐྱེན་ངན་པ་ཐེབས་བཞིན་ཡོད་པ། རྒྱ་ནག་གཞུང་གིས་ཇམ་མུ་ཀཱ་ཤེ་མེར་དང་ཨ་རུན་ནཱ་ཅལ་མངའ་སྡེའི་ཡུལ་མི་ཚོར་རྒྱ་ནག་ནང་འགྲོ་སྐྱོད་ཆོག་པའི་དམིགས་བསལ་ཐོངས་མཆན་ལག་འཁྱེར་སྤྲོད་བཞིན་ཡོད་པ། དེ་མིན་རྒྱལ་ཁབ་གཉིས་པོས་འཇིགས་སྐུལ་རིང་ལུགས་པར་ཁ་གཏད་གཅོག་ཐབས་བཅས་ཀྱི་ཐོག་གྲོས་མོལ་བྱས་ཡོད་འདུག
ནཱ་རེན་ཌ་མུ་དྷེས་རྒྱལ་སྤྱིའི་དཔལ་འབྱོར་དུས་བབ་དང་རྒྱ་གར་བརྙན་འཕྲིན་བརྒྱུད་ལམ་ (CNNIBNLive) ཐོག “ང་ཚོས་གནད་དོན་ཚང་མའི་ཐོག་གྲོས་བསྡུར་བྱས་ཡོད་པ་མ་ཟད། ལྷག་པར་དུ་རྒྱལ་ཁབ་གཉིས་ཀྱི་འབྲེལ་ལམ་འཕེལ་རྒྱས་ལ་འགོག་རྐྱེན་བཟོ་མཁན་གྱི་དོན་རྐྱེན་ཁག་ལའང་གྲོས་མོལ་བྱས་པ་ཡིན། འདས་པའི་བཅུ་ཕྲག་ཅིག་སྔོན་ནས་བཟུང་རྒྱ་དཀར་ནག་གཉིས་ཀྱི་འབྲེལ་ལམ་རྙོག་འཛིང་ཅན་ཏུ་འགྱུར་ཡོད་སྟབས། རྒྱལ་ཁབ་གཉིས་ཀྱིས་འགན་འཁུར་བླངས་ནས་འབྲེལ་ལམ་ཡག་ཏུ་གཏོང་ཐུབ་པ་བྱེད་དགོས། ངས་ནན་བཤད་བྱས་ནས་ཞུ་རྒྱུ་ཞིག་ལ་རྒྱ་ནག་གཞུང་གིས་རྒྱལ་ཁབ་གཉིས་ཀྱི་འབྲེལ་ལམ་ལ་དོ་ཕོག་གཏོང་མཁན་གྱི་གནད་དོན་ཁག་ལ་ཕུགས་རྒྱང་རིང་པོའི་བསམ་གཞིགས་བྱས་ཏེ། ད་ཐེངས་འབྲེལ་མོལ་འདི་བརྒྱུད་གཉིས་ཕན་གྱི་ཐག་གཅོད་ཅིག་བྱེད་ཐུབ་པའི་རེ་བ་རྒྱག་གི་ཡོད་པ་མ་ཟད། ས་མཚམས་ཁུལ་དུ་བརྟན་ལྷིང་དང་ཞི་བདེ་ཡོང་བའི་སྐུལ་ལྕག་ཀྱང་བྱེད་བཞིན་ཡོད།” ཅེས་བརྗོད་འདུག
རྒྱ་ནག་གི་སྲིད་བློན་ལི་ཁེ་ཆང་གིས་གསར་ལམ་ཐོག “ང་ཚོས་རྒྱལ་ཁབ་གཉིས་བར་མི་མཐུན་པའི་ཆ་མང་པོ་ཡོད་པ་ཁས་ལེན་བྱེད་ཀྱི་ཡོད་ཀྱང་། དཀའ་རྙོག་དེ་དག་ཆབ་སྲིད་ཀྱི་ཐབས་ལམ་སྤྱད་ནས་ཕན་ཚུན་ཡིད་ཆེས་བསླེབ་ཐབས་བྱས་ནས་སེལ་དགོས་པ་ཆགས་ཡོད་སྟབས། ས་མཚམས་རྩོད་ཉོག་ནི་འབྲེལ་ལམ་ཡག་པོ་ཡོང་མིན་གྱི་འགོག་རྐྱེན་ཆེ་ཤོས་དེ་ཆགས་ཡོད་པར་བརྟེན། རྒྱལ་ཁབ་གཉིས་པོས་ས་མཚམས་ཁུལ་དུ་བརྟན་ལྷིང་ཡོང་བ་བྱས་ནས་ཕན་ཚུན་ཡིད་ཆེས་ཐོབ་པ་བྱེད་དགོས།”ཞེས་བརྗོད་འདུག
ཟླ་འདིའི་ཚེས་ ༡༥ ཉིན་དེ་རིང་གི་རྒྱ་གར་ (India Today) དང་རྒྱ་གར་གྱི་བདེན་དོན་ (F.India) ཞེས་པའི་ཐོག་གནས་ཚུལ་སྤེལ་དོན་ལྟར་ན། འདས་ལོའི་ནང་རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ནང་སྐོར་སྐྱོད་བྱེད་སྐབས། རྒྱ་ནག་གི་དམག་མིས་ལ་དྭགས་ཁུལ་དུ་སིམ་འཛུལ་ཐེངས་གཉིས་བྱས་ཡོད་པ་དང་། རྒྱ་གར་གཞུང་འབྲེལ་བརྒྱུད་ལམ་དྷུར་ཌར་ཤིན་(Doordarshan) གྱིས་ཞི་ཅིན་ཕིན་སྐོར་གྱི་གནས་ཚུལ་རྒྱང་སྲིང་བྱེད་སྐབས་ཞི་ཅིན་ཕིན་བཅུ་གཅིག་ (Eleven Xi Jinping) ཞེས་པ་བཤད་ཡོད། ད་རེབ་ནཱ་རེན་ཌ་མུ་དྷེས་རྒྱ་ནག་ནང་སྐོར་སྐྱོད་མ་བྱས་གོང་། རྒྱ་གར་གཞུང་སྔོན་མས་རྒྱ་གར་བྱང་ཤར་ཁུལ་གྱི་ས་མཚམས་ཁག་ཏུ་དམག་མི་༩༥༠༠༠ ལྷག་འགྲེམས་འཇོག་བྱས་ཡོད་པ་དག་ལས་དམག་མི་ ༦༠༠༠༠ ཙམ་ཕྱིར་འཐེན་བྱས་ཡོད་པ་མ་ཟད། རྒྱ་གར་གྱི་བྷེ་ཇེ་པི་ཚོགས་པའི་ཚོགས་གཙོ་ཨ་མེ་ཌ་ཤཱ་ (Amit Shah) ཡིས་བཞུགས་སྒར་དྷ་རམ་ས་ལར་༧གོང་ས་ཏཱ་ལའི་བླ་མ་མཆོག་དང་མཇལ་འཕྲད་ཞུ་རྒྱུ་ཕྱིར་བཤིག་བརྒྱབ་པ་སོགས་བྱས་ནས་རྒྱ་ནག་ལ་བསྟུན་མཁས་བྱས་ཡོད་ཀྱང་། ནཱ་རེན་ཌ་མུ་དྷེ་རྒྱ་ནག་ལ་མ་ཕེབས་སྔོན་གྱི་ཉིན་དེར་རྒྱ་ནག་གི་གཞུང་འབྲེལ་བརྒྱུད་ལམ་ ༼གོ་ལའི་དུས་བབ༽ཐོག་ཆེད་བརྗོད་རྩོམ་ཡིག་ཅིག་སྤེལ་ཏེ། ནཱ་རེན་དྷ་མུ་དྷེས་ཉི་ཧོང་དང་འབྲེལ་བ་བྱས་ནས་རྒྱ་ནག་ལ་ཁ་གཏད་གཅོག་རྩིས་བྱེད་བཞིན་ཡོད་སྐོར་སོགས་བྲིས་ཡོད་པ་མ་ཟད། མུ་དྷེ་རྒྱ་ནག་ནང་བསླེབས་རྗེས་རྒྱ་ནག་གི་གཞུང་འབྲེལ་བརྙན་འཕྲིན་བརྒྱུད་ལམ་ (CCTV)སྟེང་རྒྱ་ནག་གི་ས་ཁྲའི་ཁོངས་སུ་རྒྱ་གར་ཨ་རུན་ནཱ་ཅལ་མངའ་སྡེ་དང་ཨག་སེ་ཆེན་ (Aksai Chin) གཉིས་བཅུག་ཡོད་པ་དང་། ཇ་མུ་དང་ཀཱ་ཤེ་མེར་མངའ་སྡེ་རྒྱ་གར་གྱི་ས་ཁྲ་ལས་ཕྱིར་བཏོན་ནས་བསྟན་ཡོད།
དེ་བཞིན་རྒྱ་ནག་གི་ཝུ་པོ་སྤྱི་ཚོགས་དྲ་རྒྱ་ཐོག་མུ་དྷེ་ལ་དགའ་མོས་བྱེད་མཁན་ ༤༥༠༠༠ ལྷག་བྱུང་ཡོད་ཀྱང་། མང་པོ་ཞིག་གིས་ཨ་རུ་ནཱ་ཅལ་མངའ་སྡེ་རྒྱ་ཁོངས་ཡིན་ཚུལ་བརྗོད་པ་སོགས་ཀྱི་གནས་ཚུལ་བྱུང་ཡོད་སྟབས། ད་ལྟ་རྒྱལ་ཁབ་གཉིས་བར་གྲོས་མཐུན་ག་ཚོད་ཅིག་བཞག་ཀྱང་མ་འོངས་པའི་ལོ་ཤས་རིང་ཕན་ཚུན་ཡིད་ཆེས་ཐོབ་པའི་མཉམ་ལས་འབྲེལ་ལམ་ཡོང་རྒྱུ་ཁག་པོ་ཡིན་སྐོར་སོགས་བཀོད་འདུག
དེ་རིང་རྒྱ་ནག་གི་ ༼གོ་ལའི་དུས་བབ།༽ཐོག་ཧྲང་ཧེ་རྒྱལ་སྤྱིའི་འབྲེལ་ལམ་ཤེས་ཡོན་ལྟེ་གནས་ཁང་གི་ཉམས་ཞིབ་པ་དང་རྩོམ་པ་པོ་ལེའུ་ཀྲུང་ཡེ་ (Liu Zongyi) ཡིས་ ༼མུ་དྷེའི་ནེག་སན་གྱི་དཔྱད་གསུམ་དག་པའི་ལྟ་བས་རྒྱལ་ཁབ་གཉིས་ཀྱི་འབྲེལ་ལམ་གྱི་ངལ་དུབ་སེལ་རྒྱུ་རེད།༽ (Modi’s Nixonian pragmatism refreshes ties) ཅེས་པའི་རྩོམ་ཡིག་ཅིག་སྤེལ་བའི་ནང་ཁོས། མུ་དྷེ་ནི་ཨ་རིའི་སྲིད་འཛིན་ནེག་སན་ལྟར་རྒྱལ་ཁབ་གཉིས་ཀྱི་དཀའ་ཉོག་དང་མི་མཐུན་པའི་ཆ་རྣམས་སེལ་ནས་འབྲེལ་ལམ་བསྐྱར་གསོ་བྱེད་མཁན་ཞིག་དང་། ལག་བསྟར་དོན་འཁྱོལ་བྱེད་མཁན་གྱི་མགོ་ཁྲིད་ཅིག་ཡིན་སྟབས་རྒྱལ་ཁབ་གཉིས་ཀྱི་འབྲེལ་ལམ་ཡག་ཏུ་འགྲོ་གི་རེད་ཅེས་དང་། ཡང་རྒྱ་གར་གྱི་རྩོམ་པ་པོ་སུག་དྷེར་ཝར་མ་ཡིས་རྒྱ་གར་གྱི་གཟའ་ཉི་མའི་དུས་དེབ་ (Sunday Indian) ཞེས་པའི་ཐོག རྒྱ་ནག་གི་རྩོམ་པ་པོས་སྲིད་བློན་མུ་དྷེ་དངོས་ཐོག་བདེན་འཚོལ་བྱེད་མཁན་གྱི་མགོ་ཁྲིད་ཅིག་ཡིན་སྐོར་བརྗོད་ཡོད་ཀྱང་། དེ་ནི་རྩོམ་པ་པོས་ཟུར་ཟ་བྱས་ནས་བྲིས་པ་ཞིག་ཡིན་པ་ལས་བརྟག་དཔྱད་བྱས་ནས་བྲིས་པ་ཞིག་མིན། ངས་བྱས་ན་རྒྱ་དཀར་ནག་གཉིས་ཀྱི་འབྲེལ་ལམ་ཡག་ཏུ་འགྲོ་མིན་ནི་རྒྱ་ནག་གི་རྒྱ་སྐྱེད་རིང་ལུགས་ཀྱི་ཆབ་སྲིད་ལངས་ཕྱོགས་གང་འདྲ་འཛིན་མིན་ལ་ཐུག་ཡོད་སྟབས། མ་འོངས་པར་རྒྱ་ནག་གཞུང་གིས་རྒྱ་གར་ལ་ངོ་གཉིས་བསྟན་རྒྱུ་མཚམས་བཞག་ཚེ་གཞི་ནས་རྒྱལ་ཁབ་གཉིས་ཀྱི་འབྲེལ་ལམ་ཡག་ཏུ་འགྲོ་རྒྱུ་རེད་ཅེས་སོགས་བྲིས་འདུག
གསར་འགོད་པ། དོན་གྲུབ།
