དེ་རིང་རྒྱ་གར་གྱི་སྲིད་བློན་ནཱ་རེན་ཌ་མུ་དྷེས་རྒྱ་ནག་གི་ཁེ་ལས་མཁས་ཅན་ ༢༠ ལྷག་ཐུག་སྟེ་ཨ་སྒོར་ཐེར་འབུམ་ ༢༢ ཀྱི་ཚོང་དོན་གྲོས་མཐུན་བཞག་ཡོད་འདུག
ཉིན་འདི་འགར་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་རྒྱ་ནག་ནང་གཟིགས་སྐོར་གནང་གི་ཡོད་པ་ལྟར། དེ་རིང་སྔ་དྲོ་ཧྲང་ཧེ་གྲོང་ཁྱེར་རྒྱ་དཀར་ནག་གཉིས་ཀྱི་ཚོང་དོན་གླེང་སྟེགས་ཐོག་བཞུགས་ཏེ། རྒྱལ་ཁབ་གཉིས་ཀྱི་ཁེ་ལས་ཕན་ཚུན་བར་མཉམ་ལས་གོང་འཕེལ་གཏོང་ཐབས་ཐོག་གཏམ་བཤད་སྤེལ་ཡོད་པ་མ་ཟད། རྒྱ་ནག་གི་དྲ་ཐོག་ཚོང་གཉེར་ཁེ་ལས་ཨ་ལེ་བྷ་བྷ་དང་ཞའོ་མེ་ (Xiaomi)། ཧཱ་བྷེ་(Huwei) སོགས་ཀྱི་ཁེ་ལས་ཁག་གི་སྤྱི་ཁྱབ་འགན་འཛིན་ ༢༢ དང་ཐུག་འཕྲད་བྱས་ཏེ། རྒྱ་གར་གྱི་ཝོལ་སེ་པུང་གློག་ཤུགས་ཁེ་ལས་ (Welspung Energy PVT.Ltd) དང་རྒྱ་ནག་གི་ཉི་འོད་བཀོལ་སྤྱོད་ཁེ་ལས་(Trina Solar) བར་ཚོང་འབྲེལ་བྱ་རྒྱུ་དང་། རྒྱ་གར་གྱི་གློག་འདོན་ཁེ་ལས་དང་རྒྱ་ནག་གི་མེན་ཡན་དང་རྒྱལ་སྤྱིའི་རླུང་བཀོལ་ནུས་ཤུགས་ཁེ་ལས་བར་མཉམ་ལས་ཁེ་ལས་འཛུགས་རྒྱུ། རྒྱ་གར་གྱི་ཇིན་ཌལ་དྭངས་ལྕགས་དང་གློག་ཤུགས་ཁེ་ལས་དང་རྒྱ་ནག་གི་བཟོ་ཚོང་དངུལ་ཁང་བར་མཉམ་ལས། རྒྱ་གར་གྱི་ཨ་ཌ་ཎེ་གྲུ་ཁ་དང་གོང་ཀྲུའུ་གྲུ་ཁ་གཉིས་སྤུན་ཟླའི་གྲུ་ཁར་འགྱུར་རྒྱུ་སོགས་ཨ་སྒོར་ཐེར་འབུམ་ ༢༢ ཀྱི་ཚོང་དོན་གྲོས་མཐུན་ཁག་ ༢༡ བཞག་ཡོད་འདུག
ནཱ་རེན་ཌ་མུ་དྷེས་རྒྱ་གར་གྱི་དུས་བབ་དང་བརྙན་འཕྲིན་བརྒྱུད་ལམ་ (NDTV) ཐོག་བརྗོད་དོན། “ད་ལྟ་རྒྱ་གར་ལ་ཚོང་འབྲེལ་གྱི་སྒོ་མོ་ཕྱེ་ཡོད་པ་མ་ཟད། ཁྱེད་ཚོས་ཀྱང་ཤེས་ཀྱི་ཡོད་སྟབས། ངས་ཁྱེད་ཚོས་རྒྱ་གར་དེང་རབས་ཅན་གྱི་རྒྱལ་ཁབ་ཅིག་བཟོ་རྒྱུར་ནུས་པ་འདོན་སྤེལ་བྱ་རྒྱུའི་རེ་བ་རྒྱག་གི་ཡོད། ཁྱེད་ཅག་ནི་འཛམ་གླིང་གི་བཟོ་གྲྭ་ཞིག་ཡིན་པ་དང་། ངེད་ཅག་ནི་འཛམ་གླིང་ཐོག་རིག་རྩལ་གྱི་ཞབས་ཞུ་སྒྲུབ་མཁན་ཞིག་ཡིན་སྟབས། ང་ཚོས་ཐུན་མོང་གི་ཁེ་ཕན་དང་འཕེལ་རྒྱས་ཆེད་མཉམ་ལས་བྱེད་དགོས། རྒྱ་ནག་དང་རྒྱ་དཀར་ནི་སྟོབས་ཆེན་རྒྱལ་ཁབ་ཡིན་པ་མ་ཟད་ལོ་རྒྱུས་ཐོག་དཔལ་ཡོན་རྙིང་ཤོས་གྲས་ཡིན་པའི་ཡུལ་གྲུ་ཞིག་ཀྱང་ཡིན་སྟབས། ངས་དུས་རབས་འདི་ནི་ཨེ་ཤ་ཡའི་དུས་རབས་ཤིག་ཡིན་པར་ངོས་འཛིན་བྱེད་བཞིན་ཡོད་པ་མ་ཟད། ནང་ཆོས་ནི་ཨེ་ཤ་ཡའི་རྒྱལ་ཁབ་བར་ནུས་སྤུངས་གཅིག་སྒྲིལ་བྱེད་མཁན་གྱི་རྒྱུ་ཆ་གཙོ་བོ་དེ་ཡིན།
རྒྱ་ནག་དང་རྒྱ་དཀར་ལ་མཐུན་པའི་ཆ་མང་པོ་ཡོད་སྟབས་མཉམ་ལས་གང་མང་བྱེད་ཐུབ་ཀྱི་རེད། རྒྱ་གར་ནི་ཤེས་ཡོན་གྱིས་ཕྱུག་པའི་སྤྱི་ཚོགས་ཤིག་ཡིན་པ་དང་། རྒྱ་ནག་ནི་གསར་གཏོད་ཀྱི་རྣམ་དཔྱོད་ལྡན་པའི་སྤྱི་ཚོགས་ཤིག་ཡིན། རྒྱ་གར་བས་གསར་གཏོད་བྱས་པའི་རྣམ་གྲངས་ཀླད་ཀོར་དང་། ཚན་རིག་པས་གཏོད་པའི་གོ་ལའི་རྒྱུ་སྐར་དགུ་པོས་རྒྱ་ནག་གིས་ཕུགས་བསམ་མངོན་འགྱུར་བྱེད་ཐུབ་ཡོད་སྟབས། ད་ལྟ་ང་ཚོས་བསམ་རྒྱ་དང་ཆོས་ཕྱོགས་ཐོག་ཕན་ཚུན་རོགས་ཕན་བྱེད་བཞིན་པ་ལྟར། དཔལ་འབྱོར་འཕེལ་རྒྱས་ཐད་ལའང་རོགས་རམ་བྱེད་དགོས་པ་ཆགས་ཡོད་སྟབས། ངས་ཁྱེད་ཚོར་རྒྱ་གར་བསྐྲུན་པར་ཕེབས་ཤོག་ཞུ་གི་ཡོད། དེ་ཡང་ཞིང་ཁ་ནས་རྒྱུ་ཆ་དང་། རྒྱུ་ཆ་ནས་དཔེ་གསར་གྱོན་གོས། དཔེ་གསར་གྱོན་གོས་ནས་ཕྱི་རྒྱལ་ལ་ཕྱིར་ཚོང་བྱ་རྒྱུ་བཅས་(5F’ formula)ཞེས་པའི་ཐབས་ལམ་འོག་ཕེབས་ཤོག་ཞུ་གི་ཡོད།”ཅེས་བརྗོད་འདུག
རྒྱ་ནག་གི་དྲ་ཐོག་ཚོང་གཉེར་ཁེ་ལས་ཨ་ལི་བྷ་བྷ་ཡི་སྤྱི་ཁྱབ་འགན་འཛིན་ཇག་མཱ་ (Jack Ma) ཡིས་ཧིན་རྡུ་སི་ཐན་དུས་བབ་ཐོག “ང་ཚོས་རྒྱ་གར་ལ་སྤྲོ་བ་ཚད་མེད་སྐྱེས་ཀྱི་འདུག་ལ། ང་ཚོས་དེ་བས་རྒྱ་གར་བསྐྲུན་པ་དང་རྒྱ་གར་ཚན་རྩལ་འཕེལ་རྒྱས་ཀྱི་རྒྱལ་ཁབ་ཅིག་ཏུ་འགྱུར་རྒྱུར་འདོད་པ་ཡོད།”ཅེས་དང་། ཞའོ་མེ་ཁེ་ལས་ཀྱི་སྤྱི་ཁྱབ་འགན་འཛིན་ལིན་བན་ (Lin Bin) གྱིས། “ང་ཚོས་རྒྱ་གར་གཞུང་གིས་ང་ཚོའི་ཁེ་ལས་ཁག་ལ་ཁྲོམ་རྭ་དང་ངལ་རྩོལ་བ་གང་མང་བསྐྲུན་རྒྱུའི་ཡིད་ཆེད་བྱེད་ཀྱི་ཡོད།” ཅེས་བརྗོད་འདུག
དེ་རིང་རྒྱ་གར་གྱི་བང་ཆེན་ (Indian Express) དང་ཧིན་རྡུ་སི་ཐན་དུས་བབ་(Hindustan Times)། དབྱིན་ཡུལ་གྱི་ཆ་འཕྲིན་དང་ཨ་རིའི་ནེའུ་ཡོག་དུས་བབ་བཅས་ཐོག་གནས་ཚུལ་སྤེལ་བ་ལྟར་ན། ༢༠༠༡ ནས་ ༢༠༠༢ ལོའི་བར་རྒྱ་ནག་དང་རྒྱ་གར་བར་གྱི་ཚོང་འབྲེལ་ཐོག་རྒྱ་གར་ལ་ཨ་སྒོར་ཐེར་འབུམ་གཅིག་ཙམ་ལས་ཚོང་འབྲེལ་ཐོག་གྱོང་རག་གི་མེད། ༢༠༡༤ ལོར་རྒྱལ་ཁབ་གཉིས་བར་ཨ་སྒོར་ཐེར་འབུམ་ ༧༠ ཙམ་གྱི་ཚོང་འབྲེལ་བྱས་ཡོད་ཀྱང་། རྒྱ་གར་ལ་ཨ་སྒོར་ཐེར་འབུམ་ ༣༨ ཙམ་གྱི་ཚོང་འབྲེལ་གྱོང་རག་ཡོད་སྟབས། ཁ་སང་དང་ཁ་ཉིན་བཅས་ཉིན་གཉིས་རིང་སྲིད་བློན་མུ་དྷེས་རྒྱ་ནག་གི་སྲིད་འཛིན་དང་སྲིད་བློན་ཐུག་སྐབས་རྒྱལ་ཁབ་གཉིས་བར་ཚོང་དོན་མཉམ་ལས་དང་ས་མཚམས་རྩོད་ཉོག རྒྱ་གར་ལ་ཚོང་དོན་ཐོག་གྱོང་རག་བཞིན་པ་དག་ལ་གྲོས་མོལ་བྱས་ཡོད་པ་མ་ཟད། ལྷག་པར་དུ་རྒྱལ་ཁབ་གཉིས་ཀྱིས་ཞི་མོལ་བརྒྱུད་ས་མཚམས་རྩོད་ཉོག་ཞི་འགྲིག་བྱ་ རྒྱུ་ཐག་གཅོད་བྱས་ཡོད་ཀྱང་། མ་འོངས་པར་ས་མཚམས་རྩོད་ཉོག་གསལ་རྒྱུ་ཁག་པོ་ཡིན་པ་མ་ཟད་རྒྱ་གར་གྱི་ཁྲོམ་རྭ་མང་ཆེ་བ་རྒྱ་ནག་ནང་བཟོས་པ་ (Made in China) རེད་ཅེས་སོགས་ཀྱི་དངོས་ཟོག་གིས་ཁེངས་རྒྱུ་ཡིན་སྐོར་སོགས་བཀོད་འདུག
ད་ཐེངས་ཧྲང་ཧེ་ཚོང་དོན་ལྷན་ཚོགས་སྐབས་བཅར་བའི་རྒྱ་གར་ཨིན་ཕོ་སི་ (Infosys) ཁེ་ལས་འགན་འཛིན་ཝུ་ཤལ་སེག་ཀཱ་ (Vishal Sikka) ཡིས་རྒྱ་གར་དུས་བབ་ཐོག “སྲིད་བློན་མུ་དྷེས་རྒྱལ་ཁབ་གཉིས་བར་གྱི་དཀའ་རྙོག་དང་ཚོང་དོན་ཐོག་མཉམ་ལས་བྱེད་ཕྱོགས་གཙོས། རྒྱལ་ཁབ་གཉིས་བར་གྱི་ལོ་རྒྱུས་འབྲེལ་ལམ་དང་མ་འོངས་ཁ་ཕྱོགས་འཛིན་སྟངས་ཐད་གསལ་ཁ་ཡག་པོ་བསྟན་སོང་བས། མ་འོངས་རྒྱལ་ཁབ་གཉིས་བར་ཆབ་དཔལ་གཉིས་ཀའི་འབྲེལ་ལམ་ཡག་པོ་ཡོང་བའི་རེ་བ་རྒྱག་གི་ཡོད།”ཅེས་དང་། བྷར་ཌི་ཁེ་ལས་(Bharti Enterprises) ཀྱི་སྤྱི་ཁྱབ་འགན་འཛིན་ར་ཇན་མེ་ཌལ་ (Rajan Mittal) གྱིས། “རྒྱ་གར་ལ་ཚོང་འབྲེལ་ཐོག་གྱོང་ཆེན་པོ་རག་བཞིན་ཡོད་སྟབས། དཀའ་ངལ་དེ་མ་སེལ་ཚེ་ད་དུང་དེ་ལས་མང་བའི་གྱོང་རག་རྒྱུ་རེད།”ཅེས་བརྗོད་འདུག
དེ་རིང་ཉིན་རྒྱབ་ནཱ་རེན་ཌ་མུ་དྷེས་ཧྲང་ཧེ་ཕུའུ་ཏན་སློབ་ཆེན་ (Fudan) ནང་གྷན་དྷེའི་ལྟ་གྲུབ་སྦྱོང་ས་དང་རྒྱ་གར་གྱི་ཤེས་ཡོན་ཚན་ཁག་དབུ་འབྱེད་བྱས་ཡོད་ཅིང་། སྐབས་དེར་རྒྱ་ནག་གི་སློབ་མ་ཚོས་བྷག་བྷ་ཌ་གྷེ་ཌ་ ( Bhagwad Gita) སྐྱོར་རྗེས། མུ་དྷེས་ད་ལྟ་ཁོར་ཡུག་གཏོར་སྐྱོན་རྐྱེན་པས་འཛམ་གླིང་གི་ཚ་དྲོད་འཕེལ་བཞིན་ ཡོད་པ་མ་ཟད། འཇིགས་སྐུལ་རིང་ལུགས་པའི་དཀའ་ངལ་ཡང་ཡོད་སྟབས། གྷན་དྷེའི་ལྟ་གྲུབ་ནི་དཀའ་རྙོག་དེ་དག་སེལ་བའི་ལྡེ་མིག་ལྟ་བུ་ཆགས་ཡོད་སྐོར་སོགས་གཏམ་བཤད་བྱས་འདུག སང་ཉིན་ནཱ་རེན་ཌ་མུ་དྷེ་སོག་ཡུལ་དང་དེའི་རྗེས་ལྷོ་ཀོ་རི་ཡར་ཕྱིར་བསྐྱོད་བྱ་རྒྱུ་ཡིན་འདུག
