བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༦༣ སྟེང་གི་རྩོམ་སྒྲིག་པའི་གཏམ།
བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་ལ་བཅར་མཁན་ཚོ་༧གོང་ས་མཆོག་ལ་མཇལ་ཁ་ཞུས་སྐབས། བུད་མེད་ལྷན་ཚོགས་ཀྱིས་མི་རིགས་འཕེལ་རྒྱས་ཐོག་ཐུགས་འགན་འཁུར་དགོས་པའི་བཀའ་སློབ་ཡང་བསྐྱར་གནང་འདུག ད་ལོ་གཅིག་པུར་༧གོང་ས་མཆོག་གིས་གནད་དོན་འདིའི་ཐོག་བཀའ་སློབ་རིམ་པ་གསུམ་གནང་པ་ངས་བརྒྱུད་ལམ་ཁག་ནས་དངོས་སུ་མཐོང་ཐོས་བྱུང་ཞིང་། ད་དུང་ངས་མ་གོ་མ་མཐོང་ས་རུ་དེ་ལས་ཀྱང་མང་བ་གསུངས་ཡོད་སྲིད།
ཉེ་ལམ་ཕྱི་ཟླ་གཉིས་པའི་ནང་ཡུ་རོབ་ཌེན་མག་གི་བོད་མི་ཚོར་༧གོང་ས་མཆོག་གིས། སྔོན་མ་ཆོས་རྒྱལ་ཚོའི་སྐབས་སུ་བོད་པའི་མི་འབོར་ས་ཡ་བརྒྱ་སྐོར་ཡིན་པ་དང་། འབྲོམ་གྱི་མི་རྩིས་ཆེན་མོའི་སྐབས་ལ་ས་ཡ་བཅུ་ཡོད། རྗེས་སུ་རིམ་གྱིས་ས་ཡ་དྲུག་ལ་མར་ཆག་ཡོད་ཚུལ་གསུངས། ད་དུང་བོད་པའི་རབ་བྱུང་ཕོ་མོ་དང་གཟའ་གསུམ་གྱི་ལམ་སྲོལ་རྙིང་ཧྲལ་དེས་བོད་པའི་མི་འབོར་འཕེལ་རྒྱས་ལ་གནོད་ཀྱིན་ཡོད་སྐོར་གསུངས་ཏེ། ནུབ་ཕྱོཊ་ཡུལ་གྲུ་ཁག་གི་བོད་མི་ཚོས་མི་འབོར་འཕེལ་རྒྱས་དང་། རིཊ་རྒྱུད་གཙང་མ་ཉར་འཛིན་ལ་འགན་འཁུར་དགོས་སྐོར་ནན་གྱིས་གསུངས།
༧གོང་ས་མཆོག་གི་གསུང་ཙམ་མ་རེད། བོད་པའི་མི་འབོར་གྱི་ཛ་དྲག་གནད་དོན་དེ། བོད་མིའི་སྒྲིག་འཛུགས་ཀྱིས་གསལ་བོར་མཐོང་གི་ཡོད་ལ། གཞུང་འབྲེལ་མིན་པའི་ཚོགས་སྡེ་ཁག་གིས་ཀྱང་ཤེས་ཀྱི་ཡོད། བོད་མི་སྒེར་བ་ཚོས་ཀྱང་སོ་སོའི་ཕ་མར་གཅེན་གཅུང་ག་ཚོད་ཡོད་པ་དང་། སོ་སོར་སྤུན་སྲིང་ཅི་ཙམ་ཡོད་པ། སོ་སོ་རང་ལ་ཕྲུ་གུ་ག་ཚོད་ཡོད་པ་སོགས་བསྡུར་ནས་བལྟས་ན། བོད་པར་ཞེན་ཁོག་ལ་རྒྱ་ཡོད་མཁན་ཞིག་ཡིན་ན། ཞེ་བློ་དེ་བོ་ཞིག་དང་གཉིད་ཡུལ་སྐྱིད་པོ་ཞིག་ཡོང་ཐབས་མེད་སྟབས། ༧གོང་ས་མཆོག་ཀྱང་ཨུ་ཐུག་སྟེ་འདི་ལྟར་གསུངས་དགོས་བྱུང་ཡོད།
བོད་རྒྱལ་ཡོངས་ཚོགས་ཆེན་དང་དམིགས་བསལ་ཚོགས་ཆེན་སྔ་ཕྱི། དེ་བཞིན་སྤྱི་འཐུས་གྲོས་ཚོགས་སོགས་སུ། གནད་དོན་འདིའི་སྐོར་ལ་བསམ་ཚུལ་མང་པོ་བྱུང་ཡོད་ལ། རྒྱ་ཆེའི་མང་ཚོགས་ཀྱིས་བཀའ་ཤག་ལ་སྙན་སྐུལ་དང་། གྲོས་ཚོགས་ནང་འདི་འབྲེལ་གྱི་གནད་དོན་ཐོག་གྲོས་ཆོད་བཞག་པའང་ཉུང་ཉུང་མིན་ཡང་། བཀའ་ཤག་གིས་ཉིན་འགྱངས་ཞག་འཕུལ་བྱས་ཏེ་ད་བར་ཁ་ཡོད་ལག་ཡོད་ཀྱི་ལས་ཀ་ཞིག་བྱས་མེད་ལ། གཞུང་འབྲེལ་མིན་པའི་ཚོགས་སྡེ་ཁག་གིས་ཀྱང་ཁ་ནས་བཤད་པ་དང་ལག་ལེན་བསྟར་བ་མིང་དོན་མཚུངས་པ་ཞིག་བྱུང་མེད།
ཕྱི་ལོ་ ༢༠༡༢ ཟླ་ ༩ ཚེས་ ༢༥ ཉིན་དམིགས་བསལ་ཚོགས་ཆེན་ཐེངས་གཉིས་པའི་སྟེང་། བཙན་བྱོལ་སྤྱི་ཚོགས་ནང་ཕྲུ་གུ་མང་པོ་གསོ་སྐྱོང་བྱེད་དགོས་པ་དང་། ཕྲུ་གུ་གསུམ་ཡན་ཡོད་རིགས་ལ་བོད་མིའི་སྒྲིག་འཛུགས་ཀྱིས་དམིགས་བསལ་ལྟ་སྐྱོང་དགོས་པའི་དགོངས་ཚུལ་བཏོན། ཕྱི་ལོ་ ༢༠༡༤ ཟླ་ ༦ ཚེས་ ༡༦ ཉིན་གནད་དོན་དེའི་ཐོག་བཀའ་ཤག་གིས་སྲིད་བྱུས་དོན་ཚན་ལྔ་གཏན་འབེབས་བྱས། ཕྱི་ལོ་ ༢༠༡༥ ཟླ་ ༥ ཚེས་ ༡ ཉིན་ནས་དངོས་སུ་ལག་བསྟར་བྱེད་རྒྱུ་ཡིན་སྐོར་ཐོས་ཀྱང་། སྲིད་བྱུས་དེར་ད་དུང་ཡང་ཁ་མི་གསལ་བ་དང་འཐུས་མི་ཚང་སའི་ཞན་ཆ་མང་པོ་ཡོད་རབས་གོ།
བོད་པའི་མི་འབོར་འཕེལ་རྒྱས་ཀྱི་བཀག་རྡོ་གཙོ་བོ་དག་ནི། དང་པོ། བོད་ནང་ལ་མཚོན་ན་རྒྱ་ནག་གི་འཆར་ལྡན་བུ་སྐྱེས་སྲིད་བྱུས་དང་། གཉིས་པ། རང་སྐེ་བཙིར་བྱེད་ཕྱང་ཐག་རབ་བྱུང་ཕོ་མོའི་སྡེ་ཡིན། གསུམ་པ། བཙན་བྱོལ་ནང་ལ་མཚོན་ན་འཚོ་བའི་ཆ་རྐྱེན་ཞན་ཞིང་སློབ་ཡོན་རྡོག་ཁྲེས་ལྕི་བ། བཞི་པ། དུས་ཀྱི་འགྱུར་བའི་དབང་གིས་སོ་སོ་གཅིག་པུ་སྐྱིད་འདོད་རྫིག་འདོད་ཙམ་ལས་ཕྲུ་གུ་གསོ་སྤེལ་གྱི་བསམ་བློ་མེད་པ་སོགས་རེད། གནད་དོན་དང་པོ་སེལ་རྒྱུ་རང་ལག་ཏུ་མེད་ཀྱང་གཉིས་པ་དང་གསུམ་པ། བཞི་པ་སོགས་སེལ་ཐུབ་པ་ཞིག་ཡིན་ལ། འཕྲལ་མ་ཉིད་དུ་སེལ་དགོས་པ་ཞིག་ཀྱང་ཡིན།
