སི་ནོལ་ཌིན་ལ་གཟེངས་རྟགས་ཐོབ།

ནོར་ཝེ་རྒྱལ་ཁབ་ཀྱི་རྩོམ་རིག་དང་སྨྲ་བརྗོད་རང་དབང་འཕེལ་རྒྱས་ཁང་གིས་འདི་ལོའི་སྨྲ་བརྗོད་རང་དབང་གི་གཟེངས་རྟགས་དེ་ཨ་རིའི་གསང་བ་ཁྱབ་བསྒྲགས་བྱེད་མཁན་སི་ནོལ་ཌིན་ལ་སྤྲོད་གཏན་ཁེལ་ཡོད་འདུག

ཁ་སང་ནོར་ཝེ་རྩོམ་རིག་དང་སྨྲ་བརྗོད་རང་དབང་ཤེས་ཡོན་འཕེལ་རྒྱས་ལྟེ་གནས་ཁང་གིས་གསལ་བསྒྲགས་ཤིག་སྤེལ་ཏེ། འདི་ལོའི་ནོར་ཝེ་གཞུང་གི་སྨྲ་བརྗོད་རང་དབང་གི་གཟེངས་རྟགས་དེ་ཨ་རིའི་གསང་བའི་ལས་ཁུངས་ཀྱི་ཚུལ་མིན་གསང་བའི་བྱ་སྤྱོད་ཐེར་འདོན་བྱེད་མཁན་སྐུ་ཞབས་སི་ནོལ་ཌིན་ལགས་སུ་སྤྲོད་རྒྱུ་ཡིན་པ་གསལ་བསྒྲགས་སྤེལ་ཡོད་པ་མ་ཟད། དེ་དང་མཉམ་དུ་ཟླ་ ༩ པའི་ཚེས་ ༥ ཉིན་ཁོང་ནོར་ཝེ་རྒྱལ་ས་ཨོ་སོ་ལོ་རུ་གཟེངས་རྟགས་དང་བྱ་དགའི་མ་དངུལ་ཡུ་སྒོར་ ༡༡༥༠༠ བཞེས་པར་ཡོང་དགོས་པའི་མགྲོན་ཤོག་བསྐུར་ཡོད་འདུག

ནོར་ཝེ་རྩོམ་རིག་དང་སྨྲ་བརྗོད་རང་དབང་ཤེས་ཡོན་འཕེལ་རྒྱས་ལྟེ་གནས་ཁང་གིས་སི་ནོལ་ཌིན་ལ་གཟེངས་རྟགས་སྤྲོད་དགོས་དོན་ཐད་བརྗོད་དོན། “ང་ཚོས་ནོར་ཝེ་རྩོམ་རིག་གཟེངས་རྟགས་བཞེས་མཁན་གྱི་ནོར་ཝེ་བ་སྐུ་ཞབས་བི་ཇོན་སན་ (Bjørnstjerne Bjørnson) མཆོག་གི་མིང་ཐོག་གི་གཟེངས་རྟགས་འདི་སྐུ་ཞབས་སི་ནོལ་ཌིན་ལགས་ཀྱིས་རང་གི་ཚེ་སྲོག་གི་ཉེན་ཁར་མ་ལྟོས་པར། རྒྱལ་སྤྱིའི་མང་ཚོགས་ལ་ཨ་རིའི་གསང་བའི་ལས་ཁུངས་ཀྱིས་འཇའ་ཤེལ་ (Prism)ལས་གཞིའི་འོག ཁ་པར་དང་དྲ་རྒྱའི་ཡིག་ཚགས་ས་ཡ་ ༦༠༠ ལྷག་ལ་ལྐོག་ཉན་བྱས་ཏེ་གསང་བ་རྐུ་འཁྱེར་བྱེད་ཀྱི་ཡོད་པའི་གནས་ཚུལ་ཕྱིར་བསྒྲགས་བྱས་ཡོད་སྟབས། ང་ཚོས་ཁོང་གི་འཇིགས་ཞུམ་བྲལ་བའི་བློ་སྟོབས་ལ་ཡིད་རངས་ཞུ་ཆེད། འདི་ལོའི་གཟེངས་རྟགས་དེ་ཁོང་ལ་འབུལ་རྒྱུའི་ཐག་གཅོད་བྱས་པ་ཡིན།”ཞེས་བརྗོད་འདུག

༢༠༡༣ ལོའི་ཟླ་ ༥ པའི་ཚེས་ ༢༠ ཉིན་ཧོང་ཀོང་དུ་ཨ་རིའི་གསང་བའི་ལས་ཁུངས་གློག་ཀླད་སྡེ་ཚན་གྱི་ཆོད་གན་ལས་བྱེད་སི་ནོལ་ཌིན་ལགས་ཀྱིས་གློག་བརྙན་བཟོ་སྐྲུན་པ་དང་གསར་འགོད་པ་ལྕམ་ལོ་ར་ ( Laura Poitra)ལགས་སུ། ཨ་རིའི་བདེ་སྲུང་ལས་ཁུངས་ཀྱི་འཇའ་ཤེལ་ (Prism)ལས་གཞི་དེས། འཛམ་གླིང་ཐོག་བེད་སྤྱོད་ཤུགས་ཆེན་གཏོང་བཞིན་པའི་དྲ་གནས་གྷོ་གྷལ་ ( Google)དང་ངོ་དེབ་ ( Facebook)། ཌོའུ་ཌར་ ( twitter )། སི་ཁཡེ་ཕུ་ ( Skype)། ཡཱ་ཧོ་ ( Yahoo) ཡུ་ཀྲུབ་ ( Youtube) སོགས་སྤྱི་ཚོགས་དྲ་གནས་ཁག་ ༩ ཙམ་ནང་ལྐོག་འཛུལ་བྱས་ཏེ། ཉིན་ལྟར་འཇར་མན་དང་ཧྥ་རན་སི། བྷར་ཛིལ། རྒྱ་ནག རྒྱ་གར། ཡུ་རོབ་མཐུན་ཚོགས། དབྱིན་ཡུལ་སོགས་ཀྱི་དབུ་ཁྲིད་དང་ཚོགས་པ་ཁག་གི་ཁ་པར་དང་དྲ་རྒྱའི་ཡིག་ཚགས་ས་ཡ་ ༦༠༠ ལྷག་ལ་ལྐོག་ཉན་བྱས་ཏེ་གསང་བ་རྐུ་འཁྱེར་བྱེད་ཀྱི་ཡོད་པའི་གནས་ཚུལ་དབྱིན་ཇིའི་ཚགས་པར་གྷ་ཌེན་ (The Guardian) བརྒྱུད་ཕྱིར་བསྒྲགས་བྱས་ཡོད་སྟབས། ཨ་རིའི་གཞུང་དང་ཨ་རིའི་མཐུན་གྲོགས་རྒྱལ་ཁབ་ཁག་གིས་སི་ནོལ་ཌིན་རྒྱལ་ཚོང་བ་ཞིག་ཡིན་ཚུལ་བརྗོད་དེ་འཛིན་བཟུང་བཀའ་རྒྱ་བཏང་ཡོད་པ་མ་ཟད། རྒྱལ་ཁབ་དང་ཚོགས་སྡེ་མི་སྒེར་སུས་ཀྱང་ཁོང་སྦས་སྐུང་དང་སྐྱབས་བཅོལ་སྤྲད་ཚེ་མ་འོངས་པར་དཀའ་ངལ་འཕྲད་རྒྱུ་ཡིན་པའི་ཉེན་བརྡ་བཏང་ཡོད།

ཐོག་མར་སི་ནོལ་ཌིན་གྱིས་ཧོང་ཀོང་ལ་སྐྱབས་བཅོལ་ཞུས་ཀྱང་ཨ་རི་དང་རྒྱ་ནག་གི་གནོན་ཤུགས་འོག་སྐྱབས་བཅོལ་རེག་མེད་སྟབས་མཁའ་ལམ་བརྒྱུད་ཨུ་རུ་སུར་ཕྱིན་ཏེ། སྲིད་འཛིན་པུ་ཊིན་གྱིས་ཁོང་ཚོའི་རྒྱལ་ཁབ་ནང་གནས་སྐབས་རིང་སྡོད་ཆོག་པའི་ཆོག་མཆན་སྤྲད་དེ་ད་ལྟ་ཨུ་རུ་སུར་བསྡད་ཡོད། ཁོང་ ༢༠༡༣ དང་༢༠༡༤ ལོའི་ནོར་བྷེལ་ཞི་བདེའི་གཟེངས་རྟགས་འབུལ་ཡུལ་གྱི་འོས་མིའི་ཁོངས་སུ་བསླེབས་ཡོད་པ་མ་ཟད། ན་ནིང་ཁོང་ལ་སུད་ཊན་གཞུང་གིས་འཚོ་ཐབས་ཀྱི་རང་དབང་གཟེངས་རྟགས་(Right Livelihood Award) ཞེས་པ་ཞིག་སྤྲད་ཡོད་ཀྱང་། ཨ་རིས་སུད་ཊན་ལ་གནོན་ཤུགས་སྤྲད་དེ་གཟེངས་རྟགས་དེ་སྤྲོད་བཞེས་ཀྱི་མཛད་སྒོར་སི་ནོལ་ཌིན་མཉམ་ཞུགས་བྱེད་ཐུབ་མེད།

ཟླ་འདིའི་ཚེས་ ༡ ཉིན་ནོར་ཝེ་རྩོམ་རིག་དང་སྨྲ་བརྗོད་རང་དབང་ཤེས་ཡོན་འཕེལ་རྒྱས་ཁང་གིས་ནོར་ཝེ་སྲིད་བློན་ཨར་ཎེ་ (Erna Solberg) དང་ཁྲིམས་དོན་བློན་ཆེན་ཨེན་ཌར་ (Anders Anundsen) རྣམ་གཉིས་ལ་ཡི་གེ་བཏང་སྟེ། འདི་ལོ་སི་ནོལ་ཌིན་ཨོ་སོ་ལོ་ནང་གཟེངས་རྟགས་ལེན་པར་ཡོང་ཆོག་པའི་ཆོག་མཆན་སྤྲད་དེ། ཁོང་གི་བདེ་འཇགས་ལ་འགན་སྲུང་བྱེད་དགོས་པ་མ་ཟད། ཨ་རིར་དེ་བས་རྩིས་སྤྲོད་བྱེད་མི་ཆོག་ཚུལ་བརྗོད་ཡོད་ཀྱང་། ནོར་ཝེ་ཁྲིམས་དོན་ལྷན་ཁང་གིས་སོ་ནོལ་ཌིན་རྒྱལ་ཁབ་ནང་ཡོང་ཆོག་མིན་ནི་གཞིས་མི་གནས་སྤོར་ལྷན་ཁང་གི་འགན་ཡིན་སྟབས། ང་ཚོར་ཐེ་ཇུས་བྱེད་དབང་མེད་ཅེས་ལན་འདེབས་བྱས་འདུག

དེ་རིང་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་མ་ལྕམ་མཱ་རེ་ཧབ་ (Marie Harf) ཀྱིས་རྒྱལ་སྤྱིའི་བརྒྱུད་ལམ་ཁག་ཏུ། “ང་ཚོས་རྒྱལ་སྤྱིའི་རྒྱལ་ཁབ་ཁག་ལ་ཞུ་རྒྱུ་ཞིག་ལ། ད་ལྟ་སི་ནོལ་ཌིན་ལ་འགྲོ་ས་གཅིག་ཡོད་པ་ནི་ཨ་རི་ཆགས་ཡོད་སྟབས། ཨ་རིར་ཕྱིར་ལོག་བྱས་ཏེ་ནག་ཉེས་ངོས་ལེན་བྱེད་དགོས། གལ་སྲིད་ཁོ་ལ་ནག་ཉེས་ར་འཕྲོད་བྱ་རྒྱུའི་བློ་སྟོབས་ཡོད་ན། ཨ་རིའི་ཁྲིམས་ཁང་ལ་གཏུག་ནས་དག་ཐེར་བྱེད་དགོས།”ཞེས་ཉེན་བརྡ་བཏང་ཡོད་སྟབས། ནོར་ཝེ་སྤྱི་ཚོགས་རིང་ལུགས་ཚོགས་པའི་ཚོགས་མི་དང་ཁོར་ཡུག་བློན་ཆེན་ཟུར་པ་བྷེར་ཌི་ (Baard Vegar Solhjell) ལགས་ཀྱིས་ནོར་ཝེ་གསར་ལམ་ (The Local) ཞེས་པའི་ཐོག “ཨ་རིའི་གཞུང་གིས་སི་ནོལ་ཌིན་ལ་ནག་ཉེས་བཙུགས་དགོས་དོན་ནི། ཁོང་གིས་མང་ཚོགས་ལ་ཨ་རིའི་བྱས་ཉེས་དག་ཕྱིར་བསྒྲགས་བྱས་པར་བརྟེན་ནས་བྱུང་བ་ཞིག་ཡིན་སྟབས། ནོར་ཝེ་གཞུང་གིས་ཁོང་ཨ་རིར་རྩིས་སྤྲོད་བྱེད་ཆོག་གི་མ་རེད་ལ། ང་ཚོས་ཀྱང་སྤྲོད་དུ་འཇུག་གི་མིན།”ཞེས་བརྗོད་འདུག

ཨོ་སོ་ལོའི་ཞི་བདེ་ཞིབ་འཇུག་ལྟེ་གནས་ཁང་གི་འགན་འཛིན་ (Kristian Berg Harpviken) གྱིས། “ངས་འདི་ལོར་སི་ནོལ་ཌིན་གྱིས་ནོར་ཝེ་ནང་གཟེངས་རྟགས་ལེན་པར་ཡོང་ཐུབ་ཀྱི་མ་རེད་བསམ་གྱི་འདུག གང་ཡིན་ཟེར་ན། ནོར་ཝེ་གཞུང་གིས་སོ་སོའི་མཐུན་གྲོགས་རྒྱལ་ཁབ་ཨ་རིས་རྒྱལ་ཚོང་བར་ངོས་འཛིན་བྱས་ནས་འཇུ་བཟུང་བཀའ་རྒྱ་བཀྲམ་པའི་མིར་ཆེ་མཐོང་ཞུས་ཏེ། རྒྱལ་ཁབ་ནང་ཡོང་བཅུག་ནས་གཟེངས་རྟགས་ལེན་རྒྱུའི་གོ་སྐབས་སྤྲོད་ཀྱི་མ་རེད་བསམ་གྱི་འདུག”ཅེས་བརྗོད་འདུག

ཉིན་ཤས་གོང་ཨ་རིའི་གྲོས་ཚོགས་ཀྱིས་ཨ་རིའི་རྒྱལ་ཡོངས་གསང་བའི་ལས་ཁུངས་ཀྱི་དབང་ཚད་ལ་བཅད་མཚམས་འཇོག་རྒྱུའི་གྲོས་ཆོད་ཅིག་བཞག་པ་དང་བསྟུན་ཏེ། ནོར་ཝེ་རྩོམ་རིག་དང་སྨྲ་བརྗོད་རང་དབང་ཤེས་ཡོན་འཕེལ་རྒྱས་ལྟེ་གནས་ཁང་གིས་སི་ནོལ་ཌིན་ལ་གཟེངས་རྟགས་འདི་འབུལ་རྒྱུ་ཕྱི་བསྒྲགས་བྱས་ཡོད་འདུག