རྡེ་ར་རྡུན་བདེ་སྐྱིད་གླིང་གཞིས་ཆགས་ནས་ཡིན་པའི་བུ་མོ་པདྨ་ཆོས་སྒྲོན་ལགས་ལ་འདི་ལོའི་བོད་ཀྱི་མཛངས་མའི་རྒྱལ་ཁ་ཐོབ་སོང་།
དེ་རིང་དགོང་དྲོའི་ཆུ་ཚོད་ ༧།༣༠ ཙམ་ལ་དྷ་ས་བོད་ཀྱི་ཟློས་གར་ཐང་དུ། འདི་ལོའི་བོད་ཀྱི་མཛངས་མའི་རྟིང་རྩོད་འགྲན་སྡུར་གྱི་དགོང་ཚོགས་ཚོགས་སོང་བ་དང་། འགྲན་སྡུར་གྱི་གཟུ་དཔང་དུ་དྷ་རམ་ས་ལའི་གློག་བརྙན་དུས་སྟོན་མཉམ་འབྲེལ་གསར་འཛུགས་གནང་མཁན་ལྕམ་མོ་ནི་ཀཱ་ནཱ་ཐཱ་རཱ་ཇི་(Monika Nataraj) དང་། ཡོ་ག་དགེ་རྒན་ཤོན་ཤོ་(Shawn Shaw)རྣམ་གཉིས་གདན་འདྲེན་བྱས་འདུག་ལ། ཐེངས་འདིའི་དགོང་ཚོགས་ཐོག་ཕྱི་ལོ་ ༢༠༠༧ ལོའི་བོད་ཀྱི་མཛངས་མ་བསྟན་འཛིན་སྒྲོལ་མ་ལགས་དང་ ༢༠༡༡ ལོའི་མཛངས་མ་བསྟན་འཛིན་དབྱངས་སྐྱིད་ལགས། དེ་བཞིན། ༢༠༡༤ ལོའི་མཛངས་མ་བསྟན་འཛིན་དབྱངས་འཛོམས་ལགས་དང་། ཧི་མ་ལ་ཡའི་རོལ་དབྱངས་ཚོགས་པ་སོགས་གླུ་གར་འཁྲབ་སྟོན་པ་ཁག་ཅིག་དང་། ལྟད་མོ་བ་བཅས་ཁྱོན་མི་གྲངས་ ༣༠༠༠ ཡས་མས་འཛོམས་འདུག
རྟིང་རྩོད་འགྲན་སྡུར་ཁྲོད་འགྲན་ཞུགས་པ་བུ་མོ་གསུམ་གྱིས་ཕོ་མོ་འདྲ་མཉམ་དང་དེང་སང་འགོས་ཁྱབ་ཏུ་འགྲོ་བཞིན་པའི་ཨེ་ཙི་སྔོན་འགོག་བྱེད་ཐབས་སོགས་ཀྱི་ཐོག་གཏམ་བཤད་དང་། སྒྱུ་རྩལ་འཁྲབ་སྟོན། ཆས་གོས་འགྲན་སྡུར། གཟུ་དཔང་གཉིས་ཀྱི་དྲི་བར་ལན་འདེབས་བཅས་བྱས་པ་བརྒྱུད། རྡེ་ར་རྡུན་ནས་ཡིན་པའི་པདྨ་ཆོས་སྒྲོན་ལགས་ལ་འདི་ལོའི་བོད་ཀྱི་མཛངས་མའི་དབུ་རྒྱན་གཡོགས་ཏེ། ཧིན་སྒོར་འབུམ་ ༡ གི་བྱ་དགའ་དང་། བལ་ཡུལ་གྱི་རྒྱལ་ས་ཀ་ཐ་མན་ཀྲུ་ནས་ཡིན་པའི་བློ་བཟང་སྐྱིད་འཛོམས་ལགས་ལ་ཧིན་སྒོར་ཁྲི་ ༥ དང་། བལ་ཡུལ་སྦོག་ར་ནས་ཡོང་བའི་ཚེ་རིང་སྒྲོལ་མ་ལགས་ལ་ཧིན་སྒོར་ ༢༥༠༠༠ བཅས་ཀྱི་བྱ་དགའ་སྤྲད་སོང་།
མཛངས་མ་པདྨ་ཆོས་སྒྲོན་ལགས་ཀྱིས་གསར་འགོད་པར། ང་ལ་བོད་ཀྱི་མཛངས་མའི་རྒྱལ་ཁ་འཐོབ་ངེས་རེད་བསམ་མ་སོང་ལ། ང་ལ་དེ་འདྲའི་ནུས་པ་ཆེན་པོ་ཡོད་པ་རེད་ཀྱང་བསམ་མ་སོང་། ཡིན་ནའང་། བོད་ཀྱི་མཛངས་མའི་སྡིངས་ཆ་འདི་དཔེ་ཡག་པོ་འདུག ང་འདིར་བསླེབས་པ་དང་གདེང་ཚོད་བསླེབས་སོང་ལ། ང་རང་གི་སེམས་སུ་སྐད་ཆ་གང་ཡོད་པ་དེ་བཤད་རྒྱུ་རག་སོང་བས་དཔེ་སྐྱིད་པོ་བྱུང་། ཞེས་དང་། བྱ་དགའི་དངུལ་གྱི་ནང་ནས་ཧིན་སྒོར་ཁྲི་ ༡ གིས་བལ་ཡུལ་གྱི་ས་ཡོམ་ཁྲོད་དཀའ་ངལ་འཕྲད་མཁན་ཚོར་རོགས་སྐྱོར་བྱ་རྒྱུ་དང་། དེ་མིན་དགོན་པ་ལ་ཞལ་འདེབས་ཕུལ་དགོས་པ་སོགས་དངུལ་སྤྲོད་དགོས་ས་གཞན་ཡང་ཡོད་སྐོར་བརྗོད་བྱུང་།
ཡང་ཁོང་མོས་བོད་ཀྱི་མཛངས་མ་ཟེར་དུས་ལུང་པ་ཞིག་གི་སྐུ་ཚབ་དང་། དམིགས་བསལ་གྱིས་བོད་ཀྱི་བུད་མེད་ཀྱི་སྐུ་ཚབ་ཅིག་ཡིན་སྟབས། ཁོང་མོ་མཐོ་སློབ་ཏུ་ཡོད་སྐབས་ནས་བུད་མེད་དང་བུད་མེད་ཚོགས་པར་རོགས་རམ་མང་པོ་བྱས་ཡོད་པ་ལྟར་མུ་མཐུད་དེའི་ཐོག་དོ་ཁུར་བྱ་རྒྱུ་དང་། གཞན། ཁོ་མོ་ཆུང་དུས་ནས་ཨ་མས་སེམས་ཅན་ལ་སྙིང་རྗེ་དགོས་པའི་བསླབ་བྱ་གནང་བ་ལྟར། མ་འོངས་པར་སེམས་ཅན་བྱམས་སྐྱོང་གི་ལས་ཀ་བྱ་འདོད་སྐོར་བརྗོད་བྱུང་།
གསར་འགོད་པ། པདྨ་མཚོ།
བོད་མི་རིགས་ཡིན་ན་ཡང་མི་རིགས་ཤིག་རེད་མོ་དེ་འདྲ་ཡིན་དུས་ངེས་པར་འདི་དགོས་པ་ཞིག་རེད་གཙོ་བོ་དྲང་བདེན་གྱིས་ལམ་ནས་འདེམས་དགོས་པ་རེད་མ་གཏོགས་དབང་རྒྱལ་ལགས་ལ་དོན་དམ་བཤད་ན་ཞལ་དྲོ་ཟེར་དགོས་པ་འདྲ་བོ་རེད། གང་ཡིན་ཟེར་ན་འུ་ཚོ་བོད་མི་རིགས་ལ་བུད་མེད་མེད་སོང་ནི་མ་རེད་མོ་དེ་འདྲ་ཡིན་དུས་ངེས་པར་མཛངས་མའི་འགྲན་བསྡུར་དགོས་པ་ཞིག་རེད་ལ་དེ་ཡང་བོད་མི་ཚང་མའི་རྒྱབ་སྐྱོར་གནང་དགོས་པ་རེད་ལ་གནང་འོས་པ་ཞིག་རེད་དྲན་སོང་།
བོད་ཀྱི་མཛངས་མའི་འགྲན་བསྡུར་ལ་ཡང་ན་བོད་པའི་སྤྱི་ཚོགས་ཁྱོན་ཡོངས་ནས་དོ་སྣང་དང་དོ་ཁུར་སོགས་རྒྱབ་སྐྱོར་ཚད་ལྡན་གནང་དགོས་འདུག་མ་གཏོགས། དེ་མིན་བློ་བཟང་དབང་རྒྱལ་གཅིག་པོས་ཁོ་རང་ངོ་ཚ་མེད་པའི་ཐོག་ང་ཚོ་བོད་མི་སྤྱི་བོ་གནམ་བསྟན་ཡོངས་ཀྱི་ཞབས་འདྲེན་ཞུ་རོགས་རེད་འདུག
མཛངས་མའི་དགོངས་ཚོགས་ལ་ལྟས་མོ་བལྟ་བར་འགྲོ་མཁན་ཚོ་ཡང་ཞབས་འདྲེན་གང་འདྲ་ཞུ་གི་ཡོད་མེད་བལྟ་བར་འགྲོ་བ་ལས་ཁྱད་མཚར་གྱི་ངོས་ནས་བལྟ་བར་འགྲོ་མཁན་མེད་པ་རེད།