རྒྱ་གར་ལྷོ་ཕྱོགས་འབྲས་སྤུངས་དགོན་གྱི་གྲྭ་རིག་འཛིན་བསོད་ནམས་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༧ ཉིན་མགོ་ལོག་ཨ་སྐྱོང་ཁྲ་ཚོགས་དགོན་དགའ་ལྡན་ཆོས་འཁོར་གླིང་དུ། མདོ་སྨད་འཇང་དགུན་ཆོས་ཐེངས་ ༡༦ པ་དབུ་འཛུགས་གནང་ཡོད་པ་དང་། ཐེངས་འདིའི་འཇང་དགུན་ཆོས་ཐོག་བྱ་ཁྱུང་དགོན་དང་རོང་བོ་དགོན་ཆེན། སེར་ཤུལ་དགོན། ཟིལ་དཀར་དགོན། དབོན་པོ་དགོན། གཙང་དགོན། ཀིརྟི་དགོན་སོགས་དགོན་སྡེ་ཆེ་ཆུང་ཁག་ ༣༤ ཡི་དགེ་འདུན་པ་ ༡༡༡༠ ལྷག་ཆེད་ཕེབས་གནང་སྟེ། ཉིན་གྲངས་བཅུའི་རིང་ཚད་མ་རྣམ་འགྲེལ་དང་ལམ་རིམ། ཕར་ཕྱིན་བཅས་ཀྱི་ཐོག་རྩོད་སྒྲུབ་དོགས་གཅོད་གནང་བཞིན་ཡོད་འདུག
གསར་འགོད་པ། པདྨ་མཚོ།
