རྒྱ་ནག་གཞུང་གིས་ཁ་ཆེ་ཆོས་ལུཊ་ཀྱི་དུས་ཆེན་སྐབས་ཚོང་ལས་གཉེར་མཁན་གྱི་ཁ་ཆེ་བ་ཚོས་ལས་མཚམས་འཇོག་མི་ཆོག་ལ། ལས་བྱེད་པ་དང་དགེ་རྒན་སོགས་དུས་ཆེན་གྱི་བྱེད་སྒོར་མི་ཞུགས་པའི་དམ་བཅའ་དགོས་སྐོར་གྱི་བཀའ་རྒྱ་བསྒྲགས་འདུག
ཕྱི་ཚེས་ ༡༨ ཉིན་ནས་ཉིན་གྲངས་ ༣༠ རིང་འཛམ་གླིང་གི་ཡུལ་ཕྱོགས་གང་སར་ཡོད་པའི་ཁ་ཆེ་ཆོས་ལུགས་ཀྱི་རྗེས་འཇུག་པ་ཚོས། ཁ་ཆེ་ཆོས་ལུགས་ཀྱི་དུས་ཆེན་ཆེ་ཤོས་(Ramadan)ཞེས་པ་སྲུང་གཙི་བྱེད་བཞིན་སྟབས། ཟླ་འདིའི་ཕྱི་ཚེས་ ༡༤ ཉིན་རྒྱ་ནག་ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་དམར་ཤོག་དྲུང་ཆེ་ཀྲང་ཁྲིན་ཞན་གྱིས། ཤིན་ཅང་ཁུལ་གྱི་བརྟན་ལྷིང་ལ་ཆོས་ལུགས་ཐལ་དྲག་རིང་ལུགས་པའི་བསྟུད་མར་ཤུགས་རྐྱེན་ཐེབས་ཀྱི་ཡོད་སྐོར་བརྗོད་དེ། ཤིན་ཅང་ཁུལ་གྱི་ཁ་ཆེའི་གུང་ཁྲན་ཏང་ཡོན་དང་གཞུང་ཞབས་པ། དགེ་རྒན། སློབ་མ་སོགས་ཐེངས་འདིའི་དུས་ཆེན་གྱི་བྱེད་སྒོར་འཛུལ་ཞུགས་མི་ཆོག་པའི་བཀའ་རྒྱ་བསྒྲགས་ཡོད་པ་མ་ཟད། དེ་སྔོན་དྲག་སྤྱོད་ཀྱི་དོན་རྐྱེན་བྱུང་མྱོང་བའི་རྫོང་དང་གྲོང་ཁྱེར་ཁག་གི་སྲིད་གཞུང་གི་ལས་བྱེད་ཚོ། ཐེངས་འདིའི་དུས་ཆེན་སོགས་ཆོས་ཕྱོགས་ཀྱི་བྱེད་སྒོ་ཁག་གི་ནང་འཛུལ་ཞུགས་བྱ་རྒྱུ་མིན་པའི་དམ་བཅའ་འཇོག་དགོས་སྐོར་བསྒྲགས་ཡོད་འདུག
ཡང་སྲིད་གཞུང་གི་བསྒྲགས་གཏམ་ནང་། ད་ལོའི་དུས་ཆེན་སྐབས་ཁ་ཆེའི་ཟ་ཁང་ཚོས་སྒོ་བརྒྱབ་པ་ཡིན་ན་ཉེས་ཆད་གཅོད་རྒྱུ་དང་། སློབ་མ་ཚོས་དབྱར་ཀའི་གུང་སེང་སྐབས་བདུན་ཕྲག་རེ་རེ་བཞིན་ཕྱིར་སློབ་གྲྭར་ལོག་སྟེ་ཆབ་སྲིད་སློབ་སྦྱོང་བྱེད་དགོས་སྐོར་དང་། དེ་བཞིན། ཁ་ཆེ་མང་པོ་གནས་སྡོད་བྱས་ཡོད་པའི་ཡེ་ལི་ས་ཁུལ་གྱི་རྫོང་ཞིག་གི་སྲིད་གཞུང་དྲ་བའི་ཐོག རྫོང་དེའི་ཁོངས་སུ་ཡོད་པའི་ཁ་ཆེ་ཚོང་པ་ཚོས་དུས་ཆེན་སྐབས་རྒྱུན་ལྡན་ལྟར་ཚོང་ལས་གཉེར་དགོས་པའི་བརྡ་ཁྱབ་བཏང་ཡོད་པ་མ་ཟད། སྐབས་དེར་ཁ་ཆེའི་ཟ་ཁང་ཚོའི་ཟས་རིགས་ལ་འཕྲོད་བསྟེན་ཞིབ་བཤེར་ཉུང་དུ་གཏོང་རྒྱུ་ཡིན་ལུགས་བརྗོད་ཡོད་འདུག
དེའི་ཐད་ཕྱི་ཕྱོགས་སུ་ཡོད་པའི་ཡུ་གུར་ཚོགས་པ་དང་འགྲོ་བ་མིའི་ཐོབ་ཐང་ལས་འགུལ་བ་ཚོས། རྒྱ་ནག་གཞུང་གིས་ཁ་ཆེའི་ཆོས་ལུགས་ཀྱི་བྱེད་སྒོར་དམ་དྲག་བྱེད་པའི་སྲིད་བྱུས་སྤེལ་བཞིན་པ་དེས། ཤིན་ཅང་ཁུལ་གྱི་སྤྱི་ཚོགས་བརྟན་ལྷིང་མེད་པ་དང་དྲག་པོའི་དོན་རྐྱེན་སློང་གི་ཡོད་ཀྱང་། རྒྱ་ནག་གཞུང་གིས་གནད་དོན་དེ་གཏན་ནས་ངོས་ལེན་བྱེད་ཀྱི་ཡོད་པ་མ་རེད། ཉེ་བའི་ལོ་ཤས་ནང་ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་ལས་བྱེད་པ་དང་ལོ་ན་ ༡༨ མན་གྱི་བྱིས་པ་ཚོ་ཆོས་ཕྱོགས་ཀྱི་བྱེད་སྒོར་ཞུགས་པར་བཀག་སྡོམ་བྱེད་ཀྱི་ཡོད་པ་རེད། རྒྱ་ནག་གཞུང་ཕྱོགས་ནས་ཆོས་ལུགས་རང་དབང་ལ་སྲུང་སྐྱོབ་དགོས་པའི་སྐོར་ཡང་ཡང་རྗོད་ཀྱི་ཡོད་ཀྱང་། རྒྱ་ནག་ནང་ཁུལ་དུ་ཆོས་ལུགས་བྱེད་སྒོ་ཁག་ལ་བཀག་སྡོམ་བྱས་ཏེ། ཆོས་ལུགས་སྡེ་ཁག་གི་འཁོར་སྐྱོད་ཚོང་ལས་ཁོ་ན་མ་གཏོགས་ཆོག་མཆན་སྤྲོད་ཀྱི་ཡོད་པ་མ་རེད། ཅེས་བརྗོད་འདུག
འཇར་མན་དུ་ཡོད་པའི་འཛམ་གླིང་ཡུ་གུར་མི་རིགས་མཐུན་ཚོགས་ཀྱི་མགྲིན་ཚབ་པ་ཌི་ལི་ཤཱ་ཡིས། རྒྱ་ནག་གཞུང་གིས་ཁ་ཆེའི་དུས་ཆེན་བསླེབ་ལ་ཉེ་སྐབས་ཆོས་ཕྱོགས་ཀྱི་བྱེད་སྒོར་དམ་དྲག་སྔར་ལས་ཤུགས་ཆེ་རུ་བཏང་སྟེ། རིམ་པ་ཁག་གི་ཡུ་གུར་ལས་བྱེད་ཚོ་དུས་ཆེན་སྐབས་ལྷ་ཁང་དུ་མི་འགྲོ་བ་དང་སྨོན་ལམ་མི་རྒྱག་པའི་ངག་ཐོག་དང་ཡིག་ཐོག་གི་དམ་བཅའ་དགོས་པ་མ་ཟད། སོ་སོའི་ཁྱིམ་མི་དང་གཉེན་ཉེ་ཚོ་ལྷ་ཁང་དུ་མི་འགྲོ་བ་དང་དུས་ཆེན་གྱི་བྱེད་སྒོར་མི་ཞུགས་པའི་ཁག་ཐེག་བྱེད་དགོས་ཀྱི་ཡོད་པ་རེད། ནམ་རྒྱུན་ལྷ་ཁང་དུ་འགྲོ་ཆོག་པའི་ལས་བྱེད་ཉུང་ཤས་ཤིག་ཡོད་པ་དེ་ཚོར་ཡང་གཞུང་གི་ཆོག་མཆན་མེད་ན་འགྲོ་ཆོག་གི་མ་རེད། རྒྱ་ནག་གཞུང་གིས་འཇིགས་སྐུལ་དྲག་སྤྱོད་པར་རྒོལ་རྡུང་བཏང་ནས་སྤྱི་ཚོགས་བརྟན་ལྷིང་སྲུང་སྐྱོབ་བྱེད་པར་ཁ་གཡར་ཏེ། རྒྱུན་མཐུད་ནས་ཡུ་གུར་མི་རིགས་ཀྱི་གཞི་རྩའི་འགྲོ་བ་མིའི་ཐོབ་ཐང་དང་ཆོས་ལུགས་དད་མོས་ལ་རྒོལ་རྡུང་བཏང་བ་ཡིན་ན། ནམ་ཡང་ཤིན་ཅང་ནང་བརྟན་ལྷིང་ཡོང་མི་སྲིད་སྐོར་བརྗོད་འདུག
ལོ་རེའི་ཕྱི་ཟླ་ ༦ པའི་ཟླ་མཇུག་ནས་བཟུང་ཉིན་གྲངས་ ༣༠ རིང་ཁ་ཆེའི་ཆོས་ལུགས་ཀྱི་ལྟེ་གནས་སུ་འབོད་པའི་ཨེ་ཛི་རལ་གྱི་རྒྱལ་ས་(Jerusalem)ཡི་གཙོས་འཛམ་གླིང་གང་སར་ཡོད་པའི་ཁ་ཆེའི་ཆོས་ལུགས་པ་ཚོ། ས་གནས་ཀྱི་ལྷ་ཁང་ཁག་ཏུ་འདུ་འཛོམས་ཀྱིས་མཆོད་འབུལ་སྨོན་ལམ་རྒྱ་ཆེན་པོ་བྱེད་སྲོལ་ཡོད་ཀྱང་། འདས་པའི་ལོ་ཤས་ནས་བཟུང་རྒྱ་ནག་ནང་དུས་ཆེན་དེའི་བྱེད་སྒོ་ཁག་ལ་དམ་དྲག་ཆེན་པོ་བྱེད་ཀྱི་ཡོད་འདུག ཞིབ་འཇུག་བྱས་པ་ལྟར་ན། ད་ལྟའི་ཆར་འཛམ་གླིང་ཐོག་ཁྱོན་ཁ་ཆེ་ཆོགས་ལུགས་ཀྱི་རྗེས་འཇུག་པ་དུང་ཕྱུར་ ༡༠ ལྷག་ཡོད་པ་དང་། རྒྱ་ནག་ནང་ཁྱོན་ཁ་ཆེ་བ་ས་ཡ་ ༢༠ ཙམ་ཡོད་པའི་ནང་ནས་མི་གྲངས་ས་ཡ་ ༡༣ ལྷག་ཤིན་ཅང་ཡུ་གུར་མི་རིགས་རང་སྐྱོང་ཁུལ་དུ་གནས་སྡོད་བྱས་ཡོད་འདུག
གསར་འགོད་པ། པདྨ་མཚོ།
ཡ་་་་་་རྒྱ་ནག་གཞུང་གིས་སེམས་ཅན་མང་པོ་ཞིག
གིས་སྲོག་སྐྱབས་འདུག་་་་་་་་དེ་མ་ཏོག་ཡང
སེམས་ཅན་གྲངས་ལས་འདས་པ་ཞིག་ཆོས
ཕྱོགས་ཀྱི་མིང་འོག་ནས་སྲོག་འགྲོ་སྲིད་
་་་་་་་་་་་་ ད་ལྟའི་ཆར་འཛམ་གླིང་ཐོག་ཁྱོན་ཁ་ཆེ་ཆོགས་ལུགས་ཀྱི་རྗེས་འཇུག་པ་དུང་ཕྱུར་ ༡༠ ལྷག་ཡོད་པ་དང་། རྒྱ་ནག་ནང་ཁྱོན་ཁ་ཆེ་བ་ས་ཡ་ ༢༠ ཙམ་ཡོད་པའི་ནང་ནས་མི་གྲངས་ས་ཡ་ ༡༣ ལྷག་ཤིན་ཅང་ཡུ་གུར་མི་རིགས་རང་ཁུལ་དུ་གནས་སྡོད་བྱས་ཡོད་འདུག ་་་་་་་་་་་་་