སྐུའི་གཅེན་པོ་རྒྱལ་ལོ་དོན་གྲུབ་མཆོག་གི་མི་ཚེའི་ལོ་རྒྱུས་༼ཀ་ལོན་སྦུག་གི་ཐུག་བཟོ་བ།༽ཞེས་པའི་དཔེ་དེབ་ཨ་རིའི་དཔར་སྐྲུན་ཁང་ཞིག་གིས་འགྲེམ་སྤེལ་བྱས་པ་དང་བསྟུན་ཏེ། བོད་ཀྱི་དུས་བབ་གསར་ཁང་གི་རྩོམ་སྒྲིག་པ་དོན་འགྲུབ་བཀྲ་ཤིས་ལགས་ཀྱིས་དཔེ་དེབ་དེ་དངོས་སུ་ཀློག་པ་པོ་འཇམ་དབྱངས་བཀྲ་ཤིས་ལགས་སུ་གླེང་མོལ་བྱས་པའི་ནང་དོན་ཁག་བོད་ཀྱི་དུས་བབ་དྲ་ཐོག་ཏུ་མུ་འགོད་བྱས་པ་བཀླགས་རྗེས་ཀྱི་ཚོར་སྣང་ཞིག་བརྗོད་འདོད་བྱུང་།
རང་ཉིད་ཀྱི་དབྱིན་ཡིག་མི་ཤེས་སྟབས་སྐུ་ཞབས་འཇམ་དབྱངས་བཀྲ་ཤིས་ཀྱིས་བརྗོད་དོན་དེ་དེབ་དེའི་ནང་དོན་གནད་ཟིན་ཞིག་བཤད་ཐུབ་ཡོད་དང་མེད་ཀྱི་ཐད་ནས་བཤད་མི་ཤེས་མོད། འོན་ཀྱང་། སྐུའི་གཅེན་པོའི་དེབ་དེ་ལ་མཚོན་ན། ང་ཚོའི་སྤྱི་ཚོགས་ནང་རེ་སྒུག་བྱེད་སྡོད་མཁན་གྱི་ཁྲོད་དུ་སྐུའི་གཅེན་པོ་རེད་བསམ་མཁན་སོགས་ལས་ལྷག་པར་དུ་རྒྱལ་གཅེས་པ་དང་རྒྱལ་བཙོང་བ་ཞེས་བཟང་ཕྱོགས་ངན་ཕྱོགས་གཉིས་ཐད་ནས་གླེང་མཁན་ཡོད་པ་དེའི་ཐད་ནས་ལྟ་འདོད་གྱིས་མིག་ཧྲིག་ཧྲིག་དང་ཨམ་ཅོག་ཀྲོང་ཀྲོང་བྱེད་མཁན་ཧ་ཅང་མང་།
དེར་བརྟེན། སྐུའི་གཅེན་པོ་ཁོང་གིས་ཀྱང་ཐུགས་བསམ་ནན་བཞེས་ཀྱིས་དཀའ་རྙོག་ག་རེ་བྱུང་ཡང་ཁོང་རང་གིས་འགན་འཁུར་རྒྱུ་ཡིན་གསུངས་འདུག་པ་ཞིག་འཁོད་འདུག་སྟབས། དེ་ནི་དངོས་གནས་དྲང་གནས་བུ་རྒོད་པོ་ཞིག་གིས་གནང་སྟངས་དངོས་དེ་རེད། རྩོམ་ཡིག་དང་ལོ་རྒྱུས། ལས་དོན་སོགས་གང་ཡིན་ཡང་གཞན་ལ་ལག་པ་ཕྱི་ས་མ་བྱས་པར་རང་ཉིད་ཀྱིས་འགན་ཁུར་ནས་བཤད་པར་ཧ་ཅང་རྗེས་སུ་ཡི་རངས་ཡོད།
རང་ཉིད་ཀྱི་མི་ཚེའི་ནང་སྤྱི་དོན་ལ་དཀའ་ལས་བརྒྱབ་སྐད་ཆ་ཡག་ཉེས་མང་པོ་ཞིག་གི་སྣེ་ནས་མི་སྣ་སྐད་གྲགས་ཅན་བཤད་ཕོད་པ་སྒྲུབ་ཕོད་པ་དེ་ཚོའི་གྲས་ནས་རང་ཉིད་ཀྱི་མི་ཚེའི་ལོ་རྒྱུས་ནང་རང་ཉིད་ལས་གཞན་རང་དང་དུས་མཉམ་གྱི་ལས་ཐོག་པ་ཕལ་ཆེར་སྐྱོན་ཅན་ཤ་སྟག་ཏུ་སྒྲུབ་སྟེ་དེབ་གྲངས་ཀློག་ན་མི་ཚར་བ་དེ་འདྲ་ཡང་ཡོད་པ་རེད། དེའི་ནང་བདེན་པ་མི་འདུག་ཟེར་གྱི་མེད། བདེན་པ་ཡོད་པ་དངོས་ཡོད་གནས་ཚུལ་རེད། ཡིན་ནའང་རྩོམ་པ་པོ་རང་ཉིད་ཀྱིས་ཕ་རོལ་པོ་ནག་པོར་བསྒྲུབ་དགོས་ན་རང་གཞན་གཉིས་ཀ་ཚེ་ངོགས་སུ་ཡོད་སྐབས་བཤད་དགོས་ལ། མ་མཐར་ཡང་རང་ཉིད་ཚེ་ངོགས་སུ་ཡོད་པ་ཙམ་མ་ཟད་རང་འགན་འཁུར་ནས་རྩོམ་དགོས་པ་དེ་བཤད་མི་དགོས་པ་ཞིག་རེད།
ངས་འདི་ལྟར་བཤད་ན། ནང་ཆོས་ཀྱི་ཁྲོད་ནས་གཞུང་ལུགས་མང་པོ་ཞིག་རྩོམ་པ་པོ་གྲོངས་པའི་རྗེས་ལ་བཏོན་ཡོད་པའི་མིང་འདོན་སྲིད་མོད། དེ་དག་དང་འདི་ཚོ་རྩ་བའི་ཆ་ནས་ཐ་དད་རེད། འདི་ནི་རྒྱལ་ཁྲིམས་ལྟར་བདེན་དཔང་ཡོད་མེད་དང་དངོས་གཙོའི་སྒང་ནས་འགྲོ་དགོས་དུས་ཡག་ས་ནས་བཤད་ན་རང་ཉིད་བདེན་པའི་རྒྱལ་ཁ་ཡོད་པས་ཕ་རོལ་པོས་ཁ་གཏད་གཅོག་མ་ཐུབ་པ་དེ་འདྲ་བྱུང་ན་བཀྲ་ཤིས་བདེ་ལེགས་རེད། དེ་འདྲ་མིན་པར་ཁ་བདེ་བོ་དང་། དབང་ཚད་མཐོ་བོ། མི་འཇོན་པོ་ཡོད་བསམ་པའི་ཆ་ནས་བྱུང་བའི་སྐད་ཆར་གྱུར་པ་ཡིན་ན། དེའི་རིགས་དྲང་བདེན་གྱི་ཁྲིམས་ལྟར་སོང་ན་བདེན་པར་འཛིན་རྒྱུ་ཁག་པོ་ཡིན་པས་ཚད་འཛིན་བྱེད་མི་ཐུབ་པ་ཞིག་ཆགས་ཡོད།
སྐུའི་གཅེན་པོ་མཆོག་གིས་དེབ་དེའང་བོད་པའི་གནས་སྟངས་ཀྱི་དུས་ལ་དཔག་ན་སྔ་ཡོད་སྲིད་མོད། ཁོང་དང་ལས་ཐོགས་པ་སྐོར་ཞིག་གི་ཐད་ནས་བསམ་བློ་བཏང་ན་འཕྱིས་ཡོད་པ་ཞིག་རེད། ཡིན་ནའང་ཁོང་གིས་རང་ཉིད་ལ་ཁ་མཆུ་སོགས་ཇི་འདྲ་རྒོད་ཀྱང་། རང་ཉིད་ལ་ཕ་རོལ་བས་རྒོད་ལན་ཇི་ལྟར་སྤྲོད་མིན་ཆ་མ་འཚལ་ཡང་། དེ་དག་ལ་གདོང་གཏད་དེ་མདུན་མཆོངས་བྱས་ཏེ་མི་ཚེའི་ལོ་རྒྱུས་བརྩམས་པ་དེ་ཕོ་རབ་ཅིག་གིས་གནང་སྟངས་རེད། ཡིན་ནའང་བརྗོད་དོན་རེ་ཟུང་ལ་ཀླན་ཀ་སློག་མཁན་དངོས་ཀྱི་ཚེའི་འཕེན་པ་རྫོགས་ཟིན་པས་ཁོའི་མི་རབས་རྗེས་མས་ཀླན་ཀ་སློག་སྲིད་པས་དེའི་རིགས་ནི་ཟིང་ཆ་ཆེ་བའི་ལས་དོན་དུ་མི་འགྱུར་བའི་ངེས་པ་མེད་པ་ཞིག་རེད།
རྒྱལ་པོའི་ལས་ལ་སྤྲང་སྡུག། སྤྲང་པོའི་ལས་ལ་སུ་སྡུག། གི་དཔེ་ལྟར་རེད་དེ། ལོ་གྲངས་བརྒྱད་ཅུ་གྱ་བདུན་ལ་སོན་པའི་མི་ཞིག་གིས་རང་གི་ཚེ་སྟོད་ལ་མྱོང་བའི་སྐྱིད་སྡུག་གི་གཏམ་རྒྱུད་དེ་དག་ཚེ་མཇུག་མ་རྫོགས་སྔོན་དུ་དྲང་པོ་དྲང་བཞག་དང་བདེན་པ་བདེན་ཐུབ་ཀྱིས་གསལ་བཤད་ཅིག་བྱེད་ཐུབ་པ་བྱུང་ན་སྙམ་པའི་ཀུན་སློང་ཞིག་གིས་རང་ཉིད་ཀྱི་མི་ཚེའི་ལོ་རྒྱུས་བྲིས་པ་ཙམ་མ་ཡིན་པར་རང་གི་མི་ཚེ་དང་མི་རིགས་ཤིག་གི་སྐྱིད་སྡུག་དང་འབྲེལ་བ་ཡོད་པའི་རྐྱེན་གྱིས་བྲིས་པ་ཞིག་ཡིན་ཐག་ཆོད་རེད།
དཔྱིད་ཉི་ཞིག་ལ་དྲོ་འཁྱག་གསུམ།། མི་ཚེ་ཞིག་ལ་སྐྱིད་སྡུག་གསུམ།། ཞེས་པའི་དཔེ་ལྟར། ཡག་ཉེས་ཅི་འབྱུང་བཤད་དཀའ་བའི་ཡུལ་དུ་གྱུར་ཡོད། ད་དུང་སྐུའི་གཅེན་པོ་ཁོང་གིས་ཁ་མཆུ་ཅི་འདྲ་ཞིག་འབྱུང་མིན་དང་སྐྱིད་སྡུག་ག་འདྲ་ཞིག་མྱོང་དགོས་མིན་མི་ཤེས་ཀྱང་། དེ་དག་རེ་རེ་ལ་གདོང་མཆོངས་རྒྱག་པ་ནི། རང་ཉིད་ལ་ངོ་གནོང་མི་དགོས་པའི་གདེང་ཚོད་ཡོད་པའི་རྟགས་མཚན་ཞིག་ཡིན་པར་ངེས། དེ་མ་གཏོགས་བོད་ཡིག་གི་སྒང་ནས་བཏོན་ཆོག་ཀྱང་དེའི་སྒང་ནས་མ་བཏོན་པར་ཁྱབ་ཆེ་ཤོས་དབྱིན་ཡིག་གི་སྒང་ནས་བཏོན་དགོས་དོན་མེད་པར་འདོད།
དྲ་ལམ་ཁག་ཏུ་གླེང་རྙོག་མང་པོ་ཞིག་ཡོང་གི་ཡོད་ཀྱང་། དེ་དག་དེབ་དེ་ཀློག་ཡོད་མེད་ཀྱི་ཆ་ནས་བཤད་ན། ཁྱི་ལ་ལ་རིག་ནས་ཟུག། ཁྱི་ལ་ལ་མ་རིག་པར་ཟུག། ཅེས་པའི་དཔེ་ལྟར། མ་རིག་པར་ཟུག་མཁན་ཧ་ཅང་མང་། སྤྱིར་ཀློག་མཁན་འཇམ་དབྱངས་ལགས་ཀྱིས་བཤད་པ་དེ་དག་དེབ་ཀྱི་སྤྱིའི་བརྗོད་དོན་དང་ཏག་ཏག་བསྡད་ཡོད་ན་སྔ་ཕྱི་བར་གསུམ་ན་ནང་འགལ་ཏོག་ཙམ་རེ་ཡོད་རྒྱུ་རེད་བསམ་པའི་དོགས་སློང་ཞིག་ཡོང་སྲིད་པ་ཞིག་རེད། ཡིན་ནའང་དེབ་དེ་བོད་ཡིག་ལ་ནང་དོན་མགོ་མཇུག་མ་ལོག་པར་བསྒྱུར་ཐུབ་པ་ཞིག་བྱུང་ན་སྐབས་དེར་གླེང་སློང་བྱུང་ན་འགྲིག་གི་རེད་མ་གཏོགས། ད་ལྟ་ད་དུང་རྙོག་གླེང་བྱས་ན་སྔ་དྲགས་པ་རེད་སྙམ།
མཐའ་སྡོམ་༸གོང་ས་མཆོག་གིས་བཀའ་སློབ་ཅིག་ཏུ་ “རྒྱལ་ལོ་དོན་གྲུབ་ལ་མཚོན་ན། ངའི་སྤུན་ཡིན་པའི་ཆ་ནས་དག་སྐྱེལ་བྱས་པ་མིན་ཡང་། ཉམས་མྱོང་གིས་མ་ལྡང་པའི་དབང་གིས་ལས་དོན་ཐོག་དགེ་སྐྱོན་མང་པོ་བྱུང་ཡོད། སྐབས་རེར་ང་བློ་ཕམ་དགོས་པ། བཀའ་ཤག་བློ་ཕམ་དགོས་པ་ཐེངས་མང་པོ་བྱས་ཡོད། ཡང་དེ་དང་ཆབས་ཅིག་རྒྱལ་དོན་གྱིས་མ་གཏོགས་བཀའ་ཤག་སོགས་གཞན་དག་སུས་ཀྱང་བྱེད་མ་ཐུབ་པའི་ལས་ཀ་ཡང་མང་པོ་བྱས་ཡོད། བྱས་རྗེས་བཞག་ཡོད། ལས་ཀར་ནོར་འཁྲུལ་མང་པོ་བྱུང་ཡོད་ཀྱང་རྩ་བའི་ལྷག་བསམ་ཡོད་པ་ཚོད་ཐིག་གི་ཡོད།” ཅེས་གསུངས་ཡོད།
གནད་དོན་དེ་ནི་འདིར་ཁ་གསལ་དུ་ཡོད་པའི་གནད་དོན་ཡ་མཚན་ཅན་དེ་རེད། སོགས་ཚས་དབྱིན་ཡིག་མི་མཁྱེན་པ་འདྲ།
སྐུ་ཡི་གཅེན་པོ་དང་མི་རྗེ་ས་དབང་བཀའ་བློན་ཁྲི་ཟུར་སྐུ་ངོ་རྒྱ་ལོ་དོན་གྲུབ་མཆོག་གིས་ལྗགས་རྩོམ་གནང་བའི་མི་ཚེའི་ལོ་རྒྱུས་ནང་། གཅིག་སྟོང་དགུ་བརྒྱ་དོན་ཅུ་དོན་གྲངས་ནང་རང་གཞུང་དོན་གཅོད་སྐུ་གཅོད་སྐུ་ངོ་ལྷའི་ལྡིང་མཆོག་གིས་དབུས་ལས་བྱེད་དང་། བོད་མི་བརྒྱ་ཕྲག་ཁ་ཤས་མི་རྗེ་ས་དབང་མཆོག་གི་གནང་ཕྱོགས་ཀྱིས་རྐྱེན་པས་འབྲུག་གཞུང་གི་རྩོན་ཁང་ནང་ཕྱི་མའི་ལྔ་ལམ་དུ་སོང་ཡོད་པས། དང་པོ་དེ་དག་གི་སྐོར་དག་སྐྱེལ་ཡང་དག་པ་ཞིག་ཡོད་པའི་རེ་བ་ཞུ་བཞིན་ཡོད། དེ་མཚམས་རིམ་པས་མཇལ་ཆོག