ཁོང་གི་ནོར་འཁྲུལ་ལས་སློབ་སྦྱོང་བླངས་ཏེ་མདུན་སྐྱོད་བྱ་རྒྱུའི་རེ་བ་འཆང་འདུག

ཉེ་ཆར་སྐུའི་གཅེན་པོ་རྒྱལ་ལོ་དོན་གྲུབ་མཆོག་གི་མི་ཚེའི་ལོ་རྒྱུས་༼ཀ་ལོན་སྦུག་གི་ཐུག་བཟོ་བ།༽ཞེས་པའི་དཔེ་དེབ་ཨ་རིའི་དཔེ་སྐྲུན་ཁང་ཞིག་གནས་འགྲེམ་སྤེལ་བྱས་པ་དང་བསྟུན་ཏེ། དེབ་དེའི་སྐོར་ལ་སྤྱི་ཚོགས་ནང་གླེང་སློང་ཆེན་པོ་འབྱུང་བཞིན་ཡོད། ཉེ་ལམ་དེབ་དེའི་རྩོམ་པ་པོ་ཨེནེ་ཐོར་སི་ཊོན་ (Anne F Thurston) དྷ་རམ་ས་ལར་འབྱོར་བ་དང་བསྟུན་ཏེ། འདི་གའི་གསར་འགོད་པས་ཁོང་མོར་བཅར་འདྲི་ཞུས།

དྲི་བ། ཁྱེད་རང་ད་རེས་བཙན་བྱོལ་བོད་མིའི་བསྟི་གནས་བཞུགས་སྒར་དྷ་རམ་ས་ལར་ཡོང་དོན་ཅི་ཡིན།

ལན།  ལོ་སྔོན་མའི་ཕྱི་ཟླ་ ༩ བའི་ནང་ང་འདིར་ལྟ་སྐོར་ཡོང་བ་ཡིན། སྐབས་དེར་མི་མང་པོར་ཐུག་འཕྲད་བྱུང་བའི་ཁྲོད་ནས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་སུ་ཐུག་སྟེ། ངེད་གཉིས་ཀྱིས་ཨ་རིའི་ཇོན་ཧོབ་ཁེན་གཙུག་ལག་སློབ་གཉེར་ཁང་ (Johns Hopkins unniversty) དུ་རྒྱ་ནག་གི་རྨང་རིམ་སྤྱི་ཚོགས་ཀྱི་རྗེས་འབྲས་ལ་ལྟོས་པའི་དཔལ་འབྱོར་ཡར་རྒྱས་ཀྱི་སློབ་ཚན་སྐོར་ལ་གླེང་མོལ་བྱས་པ་ཡིན། གླེང་མོལ་དེ་བརྒྱུད་ང་དྷ་རམ་ས་ལ་ཡོང་རྒྱུའི་ཐག་གཅོད་བྱུང་བ་མ་ཟད། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་ཚོར་རྒྱ་ནག་གི་གནས་སྟངས་སྐོར་ལ་སློབ་ཁྲིད་བྱ་རྒྱུ་བྱས་པ་ལྟར། ངས་ད་ལྟ་ཁོ་ཚོར་སློབ་ཀྱིན་ཡོད།

དྲི་བ། ཁྱེད་ཀྱིས་༧གོང་ས་ཏཱ་ལའི་བླ་མ་མཆོག་གི་གཅེན་པོ་རྒྱལ་ལོ་དོན་གྲུབ་ཀྱི་མི་ཚེའི་ལོ་རྒྱུས་སྐོར་གྱི་དེབ་ཅིག་བྲིས་པ་དེ་ཉེ་ལམ་འགྲེམ་སྤེལ་བྱས་སོང་། དེབ་འདི་འབྲི་དགོས་པའི་བསམ་བློ་ཇི་ལྟར་འཁོར་སོང་།

ལན། ཐོག་མར་ང་རང་གི་གྲོགས་མཆོག་ཨེལ་སེ་ཝོལ་ཁཱར་ (Elsie Walker) ཡིས་རྒྱལ་ལོ་དོན་གྲུབ་ངོ་སྤྲོད་གནང་བྱུང་། ཨེལ་སེ་ཝོལ་ཁཱར་ནི་སྐྱབས་མགོན་༧ཏཱ་ལའི་བླ་མ་མཆོག་དང་རྒྱལ་ལོ་དོན་གྲུབ་རྣམ་གཉིས་ཀྱི་ཡུན་རིང་གཤིབ་པའི་གྲོགས་པོ་རེད། རྒྱལ་ལོ་དོན་གྲུབ་ཀྱིས་དེབ་འདི་ལོ་མང་པོ་ཞིག་གི་གོང་ནས་འབྲི་འདོད་ཡོད་པ་དང་འབྲི་དགོས་ཡོད་ཀྱང་བྲིས་ཐུབ་མེད་སྟབས། མཐར་ཁོང་གིས་རང་གི་གྲོགས་པོ་ཨལི་སེ་ཝལ་ཁེར་ལ་ཁོའི་དེབ་འབྲི་རོགས་ཤིག་བཙལ་རོགས་ཞེས་སྐུལ་མ་བཏང་ཡོད་པ་དང་། ཁོ་མོ་ངའི་གྲོགས་མོ་ཡིན་པ་མ་ཟད་ངའི་དེབ་ཁ་ཤས་ཤིག་བཀླགས་ཡོད་པའི་ཁྲོད་ནས་དམིགས་བསལ་༼གཙོ་འཛིན་མའོ་ཡི་རང་རྣམ།༽ཞེས་པའི་དེབ་དེར་དགའ་བོ་ཡོད་པ་མ་ཟད། དེབ་དེའི་ལེའུ་དང་པོར་ཧ་ཅང་དགའ་བོ་བྱུང་ཡོད་སྟབས། ཁོ་མོས་ང་རྒྱལ་ལོ་དོན་གྲུབ་ཀྱི་དེབ་འབྲི་མཁན་མཚམས་ཤོས་སུ་འདོད་དེ། རྒྱལ་ལོ་དོན་འགྲུབ་དང་ཨལི་སེ་ཝལ་ཁེར་གཉིས་ཝ་ཤིན་ཊོན་དུ་ངའི་ནང་ལ་ཕེབས་པར་བརྟེན། ང་དང་ཁོང་ཐོག་མར་ཐུག་འཕྲད་བྱས་པ་ཡིན། ཐོག་མར་ངའི་བསམ་བློའི་ནང་དེབ་དེ་འབྲི་རོགས་བྱ་རྒྱུའི་འདོད་པ་མེད། གང་ཡིན་ཞེ་ན། སྐབས་དེར་ང་བྲེལ་བ་ཆེན་པོ་ཡོད་སྟབས་འབྲི་རྒྱུ་ཁག་པོ་ཆགས་ཡོད། རྗེས་སུ་དུས་ཚོད་ཀྱི་གོམ་འགྲོས་ཁྲོད་ནས་དེབ་དེ་འབྲི་མཁན་མེད་སྟབས་ངས་རྒྱལ་ལོ་དོན་གྲུབ་དང་མཉམ་དུ་འབྲི་རོགས་བྱས་པ་ཡིན།

དྲི་བ། དེབ་འདིས་གཞུང་དང་ཚོགས་པ་མདོར་ན་མི་སྒེར་སོགས་གང་མང་ཞིག་ལ་ཕོག་ཐུག་བཏང་ཡོད་པ་ཞིག་མཐོང་སོང་། དེའི་ཐོག་ཁྱོད་རང་ལ་བསམ་ཚུལ་གང་འདྲ་ཡོད་དམ།

ལན། ཐོག་མར་ང་ཚོས་དེབ་འདི་མགོ་བཙུགས་དུས་རྩོད་རྙོག་ཡོང་རྒྱུ་ཡིན་པ་ཧ་གོ་ཡོད་པ་མ་ཟད། སྐུ་ཞབས་དོན་གྲུབ་ལགས་ཀྱིས་ཀྱང་རྩོད་རྙོག་དེར་གདོང་ལེན་བྱ་རྒྱུའི་གྲ་སྒྲིག་ཨང་གསར་ཡོད་པ་རེད། ཁོ་རང་གིས་དངོས་ཡོད་གནས་ཚུལ་གང་ཡིན་པ་དེ་བཤད་དགོས་ཀྱི་ཡོད་པ་རེད། ངས་ཀྱང་རྩོད་རྙོག་ལྷག་རྒྱུ་ཡིན་པར་གྲ་སྒྲིག་གང་ཙམ་ཞིག་བྱས་ཡོད་སྟབས་སྐྱོན་མི་འདུག གལ་སྲིད་ཁྱེད་ཀྱིས་ངའི་དེབ་དེའི་མཇུག་གི་གཏམ་ལ་བལྟས་པ་ཡིན་ན། ང་རྒྱལ་ལོ་དོན་གྲུབ་དང་མོས་མཐུན་མེད་པའི་གནད་དོན་ཁག་ཅིག་མཐོང་གི་རེད། ང་རང་མོས་མཐུན་མེད་པའི་གནས་ཚུལ་ཁག་ཅིག་ནི། དཔེར་ན། ངས་ཁོང་གིས་པཎ་ཆེན་རིན་པོ་ཆེ་དང་ཚ་རོང་ལ་ལྟ་ཕྱོགས་ཐད་ཉམས་ཞིབ་མཐིལ་ཕྱིན་པ་ཞིག་བྱུང་མེད་པའི་ཚོར་བ་བྱུང་སོང་། འདི་མི་གཅིག་གི་ལྟ་སྟངས་ཡིན་སྟབས་ཕྱོགས་གཞན་གྱི་ལྟ་སྟངས་ཤིག་ཀྱང་ངེས་པར་དུ་དགོས་རྒྱུ་གལ་ཆེན་པོ་ཡིན་པ་མ་ཟད། དེ་བཞིན་དུ་གནད་དོན་གཞན་མང་པོ་ཡོད་པའང་བརྗོད་དགོས་པ་ཞིག་ཀྱང་རེད། དེབ་འདིའི་ཐོག་མི་གང་མང་མང་གིས་སོ་སོའི་དགོངས་ཚུལ་གསུང་རྒྱུར་རེ་བ་ཞུ་བཞིན་ཡོད། འདིའི་སྐོར་ལ་ཞིབ་འཇུག་མང་ཙམ་བྱ་དགོས་པའི་སྣང་བ་སྐྱེས་བྱུང་། རྒྱལ་ལོ་དོན་གྲུབ་ཀྱི་ལོ་རྒྱུས་དེབ་འདི་ད་དུང་མཇུག་རྫོགས་ཡོད་པ་མ་རེད།

དྲི་བ། དེབ་དེ་འབྲི་སྐབས་དུས་ཡུན་ཅི་ཙམ་འགོར་ཡོད་པ་དང་དཀའ་ངལ་འདྲ་འཕྲད་སོང་ངམ།

ལན། དེབ་དེ་འབྲི་བར་ལོ་ ༤ ཙམ་འགོར་སོང་། དཀའ་ངལ་དེ་ང་ལ་དེབ་འབྲི་རྒྱུའི་གཏན་འཇགས་ལས་ཀ་ཡོད་ལ་བྲེལ་ཚུབ་ཀྱང་ཆེན་པོ་ཡོད་སྟབས་དེབ་དེ་ཉིན་གང་འབྲི་ཐུབ་ཀྱི་མི་འདུག སྤྱིར་བཏང་དེབ་དེ་འབྲི་རྒྱུར་དུས་ཡུན་རིང་པོ་དེ་འདྲ་དགོས་ཀྱི་མེད་ཀྱང་ལས་ཀའི་བྲེལ་ཚུབ་ཀྱི་དབང་གིས་དེ་ལྟར་འབྲི་ཐུབ་མ་སོང་། རྒྱལ་ལོ་དོན་འགྲུབ་དང་ངེད་གཉིས་སྐབས་རེར་ལྟ་བ་མི་མཐུན་པ་འབྱུང་གི་ཡོད་ཀྱང་། ངེད་གཉིས་བར་ལ་དཀའ་ངལ་ཆེན་པོ་དེ་འདྲ་གང་ཡང་འཕྲད་མ་སོང་།  ངས་ཀ་ལོན་སྦུག་ཏུ་ཁོང་དང་མཉམ་དུ་ཡུན་རིང་བསྡད་པ་ཡིན། སྐབས་དེར་ཁོང་གིས་ང་ལ་ཧ་ལས་པའི་སྣེ་ལེན་ཡག་པོ་གནང་བྱུང་། ང་ད་དུང་ཁོང་གི་ཀ་ལོན་སྦུག་གི་གཟིམ་ཁང་ལ་དགའ་བོ་ཡོད་པ་དང་། དེ་ནི་ཡིད་འོང་ལྟ་ན་སྡུག་པའི་ས་ཆ་ཞིག་རེད་འདུག ཐོག་མ་གཅིག་བྱས་ན་དཀའ་ངལ་རེ་ཡོང་སྲིད་པར་དོགས་ནས་ངེད་གཉིས་ཀྱིས་སྔོན་ནས་གྲ་སྒྲིག་བྱས་པ་ཡིན། ཡིན་ནའང་ལས་ཀ་དངོས་སུ་བྱས་ཡོང་སྐབས། ངེད་གཉིས་བར་ལ་དངོས་གནས་དཀའ་ངལ་ཆེན་པོ་གང་ཡང་འཕྲད་མ་སོང་།  ང་རང་ ༡༩༧༨ ལོ་ནས་རྒྱ་ནག་ལ་འགྲོ་མགོ་བཙུགས་པ་ཡིན་ཡང་། རྒྱ་ནག་གཞུང་གིས་ངས་དེབ་དེ་འབྲི་རྒྱུའི་མོས་མཐུན་མ་བྱས་གོང་ལ་ང་ལ་ཐོངས་མཆན་སྤྲོད་མ་སོང་། ངས་བསམ་ན། དེབ་འདི་ཐོན་རྗེས་དེ་བས་ཀྱང་ང་དང་རྒྱ་ནག་བར་གྱི་རྩོད་རྙོག་ཅན་ཞིག་ཆགས་རྒྱུ་རེད་དྲན་ཏེ། ད་ལྟ་ནས་ཁོ་ཚོས་ང་རྒྱ་ནག་ལ་འགྲོ་རྒྱུ་བཀག་འགོག་བྱས་འདུག

དྲི་བ། ད་བར་ཁྱེད་ཀྱིས་དེབ་མང་པོ་ཞིག་བྲིས་ཡོད་ཁོངས་ནས་༼གཙོ་འཛིན་མའོ་ཡི་རང་རྣམ༽ཞེས་པ་དེ་སྐད་གྲགས་ཆགས་ཡོད་འདུག དེ་ག་འདྲ་བྱས་ནས་སྐད་གྲགས་ཆགས་པ་རེད་དྲན་གྱི་འདུག་གམ།

ལན། ངས་བལྟས་ན། དེབ་དེ་སྐད་གྲགས་ཆགས་དོན་ནི། དེབ་དེའི་ནང་གི་གནས་ཚུལ་ཤོད་མཁན་གཙོ་བོ་དེ་གཙོ་འཛིན་མའོ་ཡི་རྗེས་སུ་ལོ་ ༢༢  མཉམ་དུ་གཤིབ་པའི་མི་ཞིག་ཡིན་ཞིང་། ཁྱེད་ཀྱིས་མའོ་ཡི་དངོས་བྱུང་གློག་བརྙན་ལ་བལྟས་པ་ཡིན་ན། ཁོའི་རྒྱབ་ཕྱོགས་སུ་ག་དུས་ཡིན་ནའང་ཨེམ་ཆི་ལི་ (Li) མཐོང་ཐུབ་པ་མ་ཟད། ཁོས་ཉིན་ལྟར་མའོ་དང་མཉམ་དུ་གཤིབ་ནས་ལོ་མང་ཕྱིན་ཡོད། ཁོའི་མཐོང་སྣང་ལ་མའོ་ནི་འགྲོ་བ་མི་ཞིག་ཡིན་པའི་ལྟ་ཕྱོགས་འཛིན་པ་ལས་གནམ་བདེ་སྒོ་མོ་ཆེ་རུ་མི་མང་ལ་ལག་པ་གཡུག་གཡུག་བྱེད་བཞིན་པའི་མགོ་ཁྲིད་ཅིག་ཡིན་པར་ངོས་འཛིན་བྱེད་ཀྱི་མེད་པ་མ་ཟད། མི་དཀྱུས་མ་ཞིག་གི་འཚོ་བ་ག་འདྲ་བྱས་ནས་སྐྱེལ་གྱི་ཡོད་པ་སོགས་དང་། དེའི་ནང་དུ་མའོ་ཡི་གསང་བ་མང་པོ་ཞིག་གསལ་སྟོན་བྱས་ཡོད། མི་གཞན་དང་མ་འདྲ་བ་ཞིག་ཡོད་པ་ནི། མའོ་དེ་ཧ་ཅང་རྙོག་འཛིང་ཅན་གྱི་མི་ཞིག་རེད། དེབ་དེ་ནི་མའོ་དང་ཐག་ཉེ་བའི་འགྲེལ་བཤད་ཁ་གསལ་ཤོས་དང་ཚད་ལྡན་ཤོས་དེ་ཆགས་ཡོད་སྟབས། སྐད་གྲགས་ཆགས་པ་རེད་བསམ་གྱི་འདུག

དྲི་བ། ཁྱེད་ཀྱི་རྒྱལ་ལོ་དོན་གྲུབ་ཀྱི་དེབ་འདིའི་ནང་ནས་ཀློག་པ་པོས་ཅི་ཞིག་སྦྱོང་དགོས་པ་དང་གནས་ཚུལ་འདིའི་སྟེང་ལ་འགྱུར་བ་ག་འདྲ་ཞིག་འགྲོ་གི་རེད་དྲན་གྱི་འདུག

ལན། ཐོག་མའི་བཅར་འདྲིའི་ནང་རྒྱལ་ལོ་དོན་གྲུབ་ཀྱིས་དེབ་འདི་འབྲི་དགོས་པའི་གནད་འགག་གཙོ་བོ་གང་ཡིན་ཞེ་ན། ཁོང་གི་དུས་སྐབས་ཀྱི་ཤུགས་རྐྱེན་རྫོགས་ཀྱིན་ཡོད་པ་ཁོང་གིས་ཡིད་ཆེས་བྱེད་བཞིན་ཡོད་པ་མ་ཟད། གང་ཐུབ་ཐུབ་ཀྱིས་བོད་ཀྱི་རྩ་དོན་དང་སྐྱབས་མགོན་ཏཱ་ལའི་བླ་མའི་ཆེད་དུ་བྱ་གཞག་བསྒྲུབས་ཡོད། ད་ལྟ་མི་རབས་རྗེས་མར་ཁོང་གི་མཛད་རྗེས་རྩིས་སྤྲོད་བྱེད་པའི་དུས་ལ་བསླེབས་ཡོད་སྟབས། དེབ་འདི་བྲིས་ཏེ་ཕྱི་རབས་པ་ཚོར་ཁོང་གི་ལག་རྗེས་ག་རེ་བཞག་ཡོད་པ་ཤེས་རྟོགས་ཐུབ་རྒྱུ་དང་། མི་རབས་གསར་པ་ཚོས་བོད་ཀྱི་རྩ་དོན་སྒྲུབ་སྐབས་ཁོང་གིས་ནོར་འཁྲུལ་ཤོར་བ་དག་ལས་སློབ་སྦྱོང་བྱས་ཏེ་མདུན་སྐྱོད་བྱ་རྒྱུའི་རེ་བ་འཆང་འདུག

དྲི་བ། ཁྱེད་ཀྱིས་དེབ་དེ་འབྲི་སྐབས་རྒྱལ་ལོ་དོན་གྲུབ་དང་༧་གོང་ས་མཆོག་བར་ཁྱད་པར་ག་རེ་མཐོང་སོང་།

ལན། ངས་དེབ་ཀྱི་གླེང་བརྗོད་ནང་དུ་ཁོ་གཉིས་ཧ་ཅང་མ་འདྲ་བ་རེད་ཅེས་བྲིས་ཡོད། རྦད་དེ་མི་མ་འདྲ་བ་གཉིས་རེད། ངའི་བསམ་བློའི་ནང་ཆེས་མ་འདྲ་བ་ཆེ་ཤོས་གཅིག་དེ་ཆོས་པ་ཞིག་དང་གཞན་དེ་ཆབ་སྲིད་ཀྱི་མི་སྣ་ཞིག་ཡིན་པ་མ་ཟད། དངོས་གནས་ཆབ་སྲིད་ཀྱི་ལས་ཀ་བྱེད་མཁན་ཞིག་རེད་འདུག རྒྱ་ནག་གིས་བཤད་སྲོལ་ལྟར་ (Yin and Yang) ཉིན་སྲིབ་ལྟ་བུ་རེད། ཁོ་གཉིས་རྦད་དེ་ལྡོག་ཕྱོགས་རེད་འདུག

དྲི་བ། དེབ་འདི་པར་འགྲེམས་བྱས་པ་ཐོག་མ་ཡིན་སྟབས་ག་ཚོད་ཞིག་དཔར་ཡོད་པ་དང་། ཁྱེད་ཀྱིས་འདི་སྐད་རིགས་གཞན་ནང་བསྒྱུར་རྒྱུའི་འཆར་གཞི་འདྲ་ཡོད་དམ།

ལན། ངས་དངོས་གནས་དེབ་འདི་ག་ཚོད་ཅིག་དཔར་བསྐྲུན་བྱས་ཡོད་མེད་ཤེས་ཀྱི་མེད། འདི་དབྱིན་ཡུལ་དང་ཨ་རི། རྒྱ་གར་བཅས་ནས་དཔར་བསྐྲུན་བྱས་ཡོད་ཀྱང་། ག་ཚོད་ཅིག་དཔར་བསྐྲུན་བྱས་པ་དང་། ད་བར་ག་ཚོད་བཙོངས་ཡོད་པ་སོགས་ཧ་གོ་མ་སོང་། ངས་ཁོ་ཚོས་སྐད་རིགས་གཞན་ལ་བསྒྱུར་རྒྱུའི་འཆར་གཞི་ཡོད་པ་རེད་ཅེས་ལབ་ཐུབ་ཀྱི་མེད་ཀྱང་། ད་ལྟ་བོད་ཡིག་ནང་སྒྱུར་གྱིན་ཡོད་པའི་ཡིད་ཆེས་བྱེད་ཀྱི་ཡོད། དེ་བཞིན། ངས་དེབ་འདི་དཔེར་ན་འཇར་མན་དང་ཧྥ་རན་སིའི་སྐད་ཡིག་སོགས་ནང་བསྒྱུར་རྒྱུའི་དོ་སྣང་བྱུང་ཡོད་པ་གོ་ཐོས་བྱུང་། ང་ལ་ཧྥ་རན་སིའི་སྐད་ནང་བསྒྱུར་རྒྱུའི་འདོད་པ་ཤུགས་ཆེན་པོ་ཡོད། གང་ཡིན་ཞེ་ན་ཧྥ་རན་སིའི་མི་མང་པོ་ཞིག་གིས་དབྱིན་ཇིའི་སྐད་ཤེས་ཀྱི་མེད། སྐད་རིགས་གཞན་ལ་བསྒྱུར་གྱི་ཡིན་ཟེར་མཁན་ཡོང་གི་ཡོད་སྟབས། ད་ལྟ་ཐག་གཅོད་གང་འདྲ་བྱས་ཡོད་མེད་ཤེས་ཀྱི་མེད།

དྲི་བ། ཁྱེད་ཀྱིས་དེབ་འདི་རྒྱ་ཡིག་ནང་བསྒྱུར་སྲིད་ཀྱི་རེད་བསམ་གྱི་འདུག་གམ།

ལན། ཡིན་དང་ཡིན། རྒྱ་ཡིག་ནང་བསྒྱུར་འདོད་ཆེན་པོ་ཡོད། ང་ད་རེས་རྒྱ་གར་གྱི་རྗེས་ལ་ཧོང་ཀོང་དུ་འགྲོ་རྒྱུ་ཡིན་སྟབས། ཧོང་ཀོང་གི་མི་ཚོས་དེབ་དེ་རྒྱ་ཡིག་ནང་བསྒྱུར་རྒྱུའི་རེ་འདོད་ཆེན་པོ་བྱེད་ཀྱི་རེད་བསམ་གྱི་འདུག ཡིན་ཡང་ངས་དེབ་དེ་རྒྱ་ཡིག་ནང་བསྒྱུར་བ་ཡིན་ན་རྒྱ་ནག་གཞུང་གིས་དེབ་དེའི་ཆ་ཤས་ཤིག་ཚུར་ལེན་བྱ་རྒྱུ་ཡིན་པའི་དོགས་པ་ཟ་གི་འདུག

དྲི་བ། དེབ་དེའི་ནང་རྒྱལ་ལོ་དོན་གྲུབ་ཀྱི་ལོ་རྒྱུས་ཆ་ཚང་བ་ཞིག་མེད་པའི་སྣང་བ་ཤར་སོང་། ཁྱེད་ཀྱིས་དེར་ག་འདྲ་ཞིག་ཚོར་གྱིན་འདུག་གམ།

ལན། ཐོག་མར་ངས་དེབ་དེའི་ནང་ཁོ་རང་གི་ལོ་རྒྱུས་ཆ་ཚང་ཚུད་མེད་པ་ཧ་གོ་མ་སོང་། གང་ཡིན་ཞེ་ན། ངའི་ལས་ཀ་ནི་ཁོང་གི་ས་ནས་གནས་ཚུལ་གང་ཐུབ་ཐུབ་ཅིག་རག་ཐབས་བྱ་རྒྱུ་དེ་ཡིན་སྟབས། སྐབས་རེར་དཀའ་ངལ་ཏོག་ཙམ་ཡོད། ཡིན་ཡང་ངས་ཁོང་གིས་གསུངས་འདོད་ཡོད་པའི་གནད་དོན་དེ་དག་ཁོང་གིས་གང་ཐུབ་གསུངས་ཡོད་སྟབས། ང་ལ་དེ་ལས་ལྷག་པ་གཞན་དགོས་རྒྱུ་གང་ཡང་མེད། 

དྲི་བ། ད་ལྟ་ཁྱེད་ཀྱིས་བོད་ཀྱི་སྲིད་བྱུས་ཉམས་ཞིབ་ཁང་ནང་ལས་ཀ་བྱས་ནས་བོད་ཀྱི་སྐོར་ལ་གང་མང་ཤེས་རྟོགས་གནང་གི་ཡོད་དམ།

ལན། ངས་སློབ་སྦྱོང་བྱེད་མགོ་བཙུགས་ཡོད་པ་མ་ཟད་འདིར་འབྱོར་ནས་བདུན་ཕྲག་གཅིག་ཙམ་ལས་ཕྱིན་མ་སོང་། ང་ངའི་སློབ་ཕྲུག་བོད་ཀྱི་སྲིད་བྱུས་ཉམས་ཞིབ་ཁང་གི་ལས་བྱེད་ཚོ་དང་གླེང་མོལ་བྱ་རྒྱུར་དགའ་བོ་ཡོད་པ་མ་ཟད། ད་ལྟ་ངས་ཁོ་ཚོའི་ས་ནས་མང་པོ་ཞིག་ཤེས་རྟོགས་བྱུང་། ད་ལྟ་ང་ཁོ་ཚོ་དང་གླེང་མོལ་བྱ་རྒྱུར་དགའ་པོ་ཡོད་པ་མ་ཟད། ཁོ་ཚོའི་ས་ནས་མང་པོ་ཞིག་སྦྱོང་གི་ཡོད། དེ་ཡང་བོད་ཀྱི་གཞི་རིམ་གྱི་གནས་ཚུལ་དང་ཤེས་བྱ་ནས་མགོ་འཛུགས་ཏེ་སློབ་སྦྱོང་བྱེད་ཀྱི་ཡོད།

གསར་འགོད་པ། འཇིགས་མེད་རྒྱ་མཚོ་དང་དོན་གྲུབ།