ཟླ་འདིའི་ཚེས་ ༢༩ ཉིན་༧གོང་ས་མཆོག་དབྱིན་ཡུལ་གྱི་ལྷོ་ནུབ་ཀྱི་སོ་མེར་སེཊ་ (Somerset) དུ་གྷིལ་སི་ཊོན་བྷ་རེ་ (GlastonburyFestival)ཞེས་པའི་རོལ་དབྱངས་སྤྲོ་ཚོགས་ཤིག་ཚོགས་འཆར་ཡོད་པའི་སྟེང་ཕེབས་ཏེ་གསུང་བཤད་གནང་རྒྱུ་ཡིན་འདུག
གཟའ་ལྷག་པའི་ཉིན་རོའུ་ཊར་གསར་ཁང་དྲ་བའི་སྟེང་དབྱིན་ཇིའི་རྒྱལ་ས་ལོན་ཌོན་ནང་ཡོད་པའི་བོད་ཀྱི་སྐུ་ཚབ་དོན་གཅོད་ཁང་གི་དྲུང་ཆེ་དབང་འདུས་ཚེ་རིང་ལགས་ཀྱིས། ཟླ་འདིའི་ཚེས་ ༢༧ ནས་ ༣༠ བར་བོད་མིའི་འདི་ཕྱིའི་སྐྱབས་མགོན་ཏཱ་ལའི་བླ་མ་མཆོག་དབྱིན་ཡུལ་དུ་ཆིབས་བསྒྱུར་བསྐྱང་རྒྱུ་ཡིན་པ་དང༌། སྐབས་དེར་༧གོང་ས་མཆོག་གིས་གྷིལ་སི་ཊོན་བྷ་རེ་ཞེས་ས་གནས་སུ་འཚོགས་སྲོལ་ཡོད་པའི་ཡུ་རོབ་གླིང་ཆེན་གྱི་རོལ་དབྱངས་འདུ་འཛོམས་ཆེ་ཤོས་སར་མང་ཚོགས་ལ་བཀའ་སློབ་གསུང་བཤད་གནང་རྒྱུ་ཡིན་པ་ཡིན་པ་མ་ཟད། དེའི་རྗེས་གྲོང་ཁྱེར་ཨལ་ཌེར་ཞོ་ཊི་(Aldershot) སོགས་སུ། དུས་རབས་ཉི་ཤུ་རྩ་གཅིག་ནང་གི་ནང་ཆོས་ཞེས་པ་དང་། བྱམས་བརྩེ་དང་འཚེ་མེད་ཞི་བའི་ལྟ་གྲུབ། འགྲོ་བ་མི་གཅིག་གྱུར་ཡིན་པའི་འདུ་ཤེས་སོགས་ཀྱི་ཐོག་མི་མང་ལ་བཀའ་སློབ་གནང་རྒྱུ་ཡིན་འདུག
བྷེ་བྷེ་སིས་གནས་ཚུལ་སྤེལ་བ་ལྟར་ན། ༧གོང་ས་ཏཱ་ལའི་བླ་མ་མཆོག་འབྱུང་འགྱུར་གྱི་རེས་གཟའ་ཉི་མའི་ཉིན་སོ་མེར་སེཊ་དུ་གྷིལ་སི་ཊོན་བྷ་རེ་ཡི་རོལ་དབྱངས་སྤྲོ་ཚོགས་སྟེང་ཆིབས་སྒྱུར་བསྐྱང་རྒྱུ་ཡིན་པ་དང་།གོ་སྒྲིག་ཚོགས་མི་ཨེ་མེལ་ཨ་ཝེ་སུ་(Emily Eavis) ཡིས་༧གོང་ས་ཏཱ་ལའི་བླ་མ་མཆོག་ཐེངས་འདིར་ང་ཚོའི་སྤྲོ་ཚོགས་སྟེང་ཐེབས་འཆར་ཡོད་པ་དེ་ནི་ཧ་ཅང་གཟི་བརྗིད་ཆེན་པོ་ཞིག་ཆགས་ཡོད་ལ། དེར་ང་ཚོས་དགའ་བསུ་ཆེན་པོས་༼དམིགས་བསལ་དུས་ཀྱི་སྤྲོ་སྟོན།༽ཞེས་འབོད་བཞིན་ཡོད་ཅེས་སོགས་བརྗོད་འདུག
གྷིལ་སི་ཊོན་བྷ་རེ་རོལ་དབྱངས་སྤྲོ་ཚོགས་དེའི་སྟེང་། ད་ལྟ་འཛམ་གླིང་ཐོག་སྐད་གྲགས་ཡོད་པའི་གནམ་དཔྱད་རིག་པའི་ཚན་རིག་པ་ཆེན་མོ་སི་ཊེལ་ཧྥིན་ཧྭ་ཁེན་ (Stephen Hawking) ཕེབས་རྒྱུ་ཡིན་ཡང་། ཁོང་གི་ལས་རིམ་ག་རེ་ཡིན་མིན་ད་སྔ་གསལ་ཁ་མི་འདུག
ད་རེབ་ཀྱི་རོལ་དབྱངས་སྤྲོ་ཚོགས་འདིས་ཆབ་སྲིད་ཀྱི་རྩ་དོན་ཞིག་བཟུང་ཡོད་སྟབས། ད་ལོ་ཨུ་རུ་སུའི་དྲག་པོའི་རོལ་དབྱངས་རུ་ཁག་ཕའུ་སེ་རི་ཊི་ (Russian punk band Pussy Riot)ཞེས་པའི་མི་སྣ་གཉིས་ཀྱང་སྤྲོ་ཚོགས་འདིའི་སྟེང་མཉམ་ཞུགས་བྱས་ཏེ།ཁོང་ཚོས་ཨུ་རུ་སུའི་སྲིད་འཛིན་པུ་ཊན་(Vladimir Putin) ལ་ངོ་རྒོལ་གྱི་གཏམ་བཤད་སྤེལ་འཆར་ཡོད་འདུག
ད་རེབ་ཀྱི་རོལ་དབྱངས་སྤྲོ་ཚོགས་མགོ་འཛུགས་སྟེང་། ལྟད་མོ་བ་ ༡༧༧༠༠༠ ཡོང་རྒྱུ་ཡིན་པའི་ཚོད་དཔག་བྱེད་བཞིན་ཡོད་པ་དང་། སྐབས་དེར་སྙན་གྲགས་ཅན་གྱི་གཞས་པ་དང་གཞས་རྩོམ་པ་པོ་བྷར་ཊི་བྷ་ཆཱ་ར་ཅེ་(Burt Bacharach) དང་ཕེར་རལ་ཝུ་ལེམ་(Pharrell Williams)། མཱག་རོན་སོན་(Mark Ronson )། དེ་བཞིན་རོལ་དབྱངས་རུ་ཁག་མུ་ཌེ་བྷུ་ལུ་(Moody Blues)་དང་རུ་ཌི་མན་ཊལ (Rudimental) སོགས་ཀྱིས་འཁྲབ་སྟོན་བྱ་རྒྱུ་ཡིན་པ་འཁོད་འདུག
རྒྱ་ནག་གི་ཕྱི་དྲིལ་མགྲིན་ཚབ་པ་ལོའུ་ཁཱང་ (Lu Kang) གིས་ཉིན་རེ་གསར་འགྱུར་དྲ་བའི་སྟེང་། ༧ཏཱ་ལའི་བླ་མས་གྷིལ་སི་ཊོན་བྷ་རེ་པའི་རོལ་དབྱངས་སྤྲོ་ཚོགས་སྟེང་ག་རེ་བྱེད་བཞིན་ཡོད་མེད་མི་ཤེས་ཀྱང་། རྒྱལ་སྤྱིས་ཏཱ་ལའི་བླ་མ་སྐུ་ཕྲེང་ ༡༤ བའི་ཆབ་སྲིད་ཀྱི་དམིགས་ཡུལ་ལ་ལག་འབྲེལ་བྱེད་ཀྱི་ཡོད་ཀྱང་། རྒྱ་ནག་གི་གནས་སྟངས་ལ་འགྱུར་བ་གང་ཡང་མེད་པ་མ་ཟད། རྒྱལ་ཁབ་དང་ཚོགས་པ། སྒེར་སུ་ཞིག་གིས་༧ཏཱ་ལའི་བླ་མར་རྒྱལ་ཁབ་ཁ་བྲལ་བྱེད་པའི་སྡངས་ཆ་བསྐྲུན་པ་དེར་རྒྱ་གཞུང་གིས་དུས་རྟག་ཏུ་ངོ་རྒོལ་བྱེད་ཀྱིན་ཡོད་ཅེས་བརྗོད་འདུག
ད་ལམ་ཡང་རྒྱ་ནག་གིས་དབྱིན་ལེ་ཡི་ནང་སྲིད་ལ་ཐེ་བྱུས་ཀྱི་འཇིགས་སྐུལ་བྱས་འདུག་ག་