ཐའེ་ཝན་ཤིན་པའེ་གྲོང་ཁྱེར་གྱི་སྤྲོ་ཚོགས་ཤིག་གི་ཐོག་མེ་ཤོར་ཏེ་མི་གྲངས་ ༥༠༠ ཙམ་ལ་རྨས་སྐྱོན་བཟོས་ཡོད་འདུག
ཟླ་འདིའི་ཕྱི་ཚེས་ ༢༧ ཉིན་གྱི་དགོང་མོ་ཐའེ་ཝན་གྱི་ཆུ་ཚོད་ ༨ ཡོལ་ཙམ་ལ། ཐའེ་ཝན་ཤིན་པའེ་གྲོང་ཁྱེར་གྱི་ཆུ་ཐོག་སྤྲོ་སྐྱིད་གླིང་ཞིག་ཏུ་མི་གྲངས་སྟོང་ཕྲག་མང་པོ་འདུ་འཛོམས་བྱས་ཏེ། དཀར་སེར་དམར་ལྗང་གི་གློག་འོད་ཁྲོད་གླུ་གར་གྱི་དགའ་རྩེད་ལ་རོལ་སྐབས་གློ་བུར་དུ་མེ་ཤོར་ཏེ་མི་མང་པོར་རྨས་སྐྱོན་ཕོག་ཡོད་འདུག
ཁ་སང་ཤིན་པའེ་གྲོང་ཁྱེར་འཕྲོད་བསྟེན་ཁང་གིས་བསྒྲགས་པའི་གྲངས་འབོར་ལྟར་ན། མི་གྲངས་ ༤༩༨ ལ་རྨས་སྐྱོན་ཕོག་ཡོད་ཅིང་། དེའི་ནང་ནས་མི་གྲངས་ ༢༠༢ ལ་ཚིག་སྐྱོན་ཚབས་ཆེན་བྱུང་ཡོད་པ་དང་། མི་ ༡༥༧ ལ་རྨས་སྐྱོན་འབྲིང་ཙམ། མི་ ༧༩ ལ་རྨས་སྐྱོན་ཆུང་ངུ་ཕོག་ཡོད་ལ། ད་ལྟའི་ཆར་རྒྱལ་ས་ཐའེ་པའེ་དང་ཤིན་པའེ་གྲོང་ཁྱེར་སོགས་ཀྱི་སྨན་ཁང་ཁག་ ༤༣ གྱི་ནང་མྱུར་སྐྱོབ་སྨན་བཅོས་བྱེད་བཞིན་ཡོད་འདུག
དོན་རྐྱེན་བྱུང་སྐབས་ཡུལ་དངོས་སུ་ཡོད་མཁན་ཞིག་གིས། མཚན་མོ་དེར་མི་མང་ཆེ་བས་ཆུ་བསྐྱལ་རྒྱག་བྱེད་ཀྱི་ལྭ་བ་གྱོན་ཡོད་ལ། སྤྲོ་ཚོགས་གོ་སྒྲིག་པས་རྡུལ་ཚོན་སྣ་ཚོགས་གཏོར་ཏེ་མི་ཚང་མའི་མགོ་དང་ངོ་གདོང་སོགས་སུ་ཚོན་གྱིས་ཁེངས་ཡོད་པ་དང་། སྤྲོ་ཚོགས་གྲོལ་ལ་ཉེ་སྐབས་གོ་སྒྲིག་པས་རྡུལ་ཚོན་ཤུགས་ཆེན་པོ་བཏང་བའི་རྐྱེན་གྱིས་མེ་འབར་ཡོད་སྐོར་བརྗོད་འདུག
རྡུལ་ཚོན་རྣམས་མེ་འདྲེན་སླ་བའི་མ་རྨོས་ལོ་ཏོག་གིས་བཟོས་པ་ཡིན་ལ། གློག་དང་གནམ་གཤིས་ཀྱི་ཚ་རླབས་ཁྲོད་ས་ངོས་སུ་འཐོར་བའི་རྡུལ་ཕྱེ་ལ་གློ་བུར་དུ་མེ་ཤུགས་ཆེན་པོ་འབར་ཡོད་པ་མ་ཟད། སྤྲོ་ཚོགས་ཐོག་ཞུགས་མཁན་ཚོའི་མགོ་ལུས་གང་སར་རྡུལ་ཕྱེ་ཡིས་ཁྱབ་ཡོད་སྟབས། རྨས་སྐྱོན་ཕོག་མཁན་མང་ཆེ་བའི་གཟུགས་པོའི་བརྒྱ་ཆ་ ༤༠ ཡན་མེ་ཡིས་ཚིག་ཡོད་འདུག
དོན་རྐྱེན་བྱུང་བའི་མཚན་མོ་དེར། ཤིན་པའེ་གྲོང་ཁྱེར་གྱི་སྤྱི་ཁྱབ་ཀྲུའུ་ལི་ལིན་གྱིས་རྨས་སྐྱོན་བྱུང་བའི་རྨས་མ་ཚོར་སྨན་བཅོས་དང་གུན་གསབ་ཆ་ཚང་སྤྲོད་རྒྱུ་ཡིན་པ་མ་ཟད། དོན་རྐྱེན་གྱི་འབྱུང་རྐྱེན་ཐད་འབྲེལ་ཡོད་མི་སྣར་རྩད་གཅོད་གཟབ་ནན་བྱ་རྒྱུ་ཡིན་ལ། ཤིན་པའེ་གྲོང་ཁྱེར་ནང་གནས་སྐབས་རིང་རྡུལ་ཚོན་བེད་སྤྱོད་གཏོང་བའི་བྱ་འགུལ་རིགས་གཅིག་ཀྱང་སྤེལ་མི་ཆོག་པ་ཁྱབ་བསྒྲགས་བྱས་འདུག
གསར་འགོད་པ། པདྨ་མཚོ།
