གསང་བ་རྐུ་འཁྱེར་བྱས་པའི་གླེང་སློང་།

ཧྥ་རན་སིའི་གསར་ལམ་ཁག་ཏུ་ཨ་རིའི་གསང་བའི་ལས་ཁུངས་ཀྱིས་ཧྥ་རན་སིའི་སྲིད་འཛིན་རིམ་པ་གསུམ་གྱི་ཁ་པར་དང་དྲ་ཚིགས་སོགས་སུ་ལྐོག་འཛུལ་བྱས་ཏེ་རྒྱལ་ཁབ་ཀྱི་གསང་བ་རྐུ་འཁྱེར་བྱས་ཡོད་ཚུལ་བཀོད་འདུག

ཟླ་འདིའི་ཚེས་ ༢༩ ཉིན་ཧྥ་རན་སི་གསར་འགྱུར་བརྒྱུད་ལམ་ཁག་གིས་ཉེ་ལམ་ཝུ་ཁེ་ (WikiLeaks) ཡིས་འདོན་སྤེལ་བྱས་པའི་གསང་བའི་ཡིག་ཚགས་ལུང་འདྲེན་བྱས་ཏེ། ཨ་རིའི་གསང་བའི་ལས་ཁུངས་ཀྱིས་ཧྥ་རན་སིའི་དཔལ་འབྱོར་བློན་ཆེན་གཉིས་དང་སྲིད་འཛིན་རིམ་པ་ཁག་གསུམ་གྱི་ཁ་པར་དང་དྲ་ཚིགས་ནང་ལྐོག་འཛུལ་བྱས་ཏེ་ཚོང་དོན་དང་སྲིད་དོན་གསང་བ་རྐུ་འཁྱེར་བྱས་ཡོད་སྐོར་བཀོད་འདུག

ཧྥ་རན་སིའི་གཞུང་འབྲེལ་བརྒྱུད་ལམ་ཁག་ཏུ་སྲིད་འཛིན་ཧོ་ལན་ཌི་ (François Hollande) མཆོག་གིས། ཨ་རིས་རྒྱལ་སྤྱིའི་སྡིངས་ཆའི་སྟེང་དྲ་རྒྱའི་བདེ་འཇགས་ལ་སྲུང་སྐྱོབ་དང་མི་སྒེར་གྱི་ཁ་པར་ལ་ལྐོག་ཉན་བྱེད་མཁན་ཚོར་ཆད་པ་ལྕི་མོ་གཅོད་དགོས་པའི་གྲོས་མཐུན་མང་པོ་བཞག་ཡོད་ཀྱང་། ད་ཆ་ཨ་རིས་གྲོས་མཐུན་དེ་དག་ལ་རྡོག་རོལ་བཏང་སྟེ། མུ་མཐུད་དུ་རྒྱལ་ཁབ་གཞན་གྱི་གསང་བ་རྐུ་འཁྱེར་བྱེད་བཞིན་ཡོད་པ་མ་ཟད། ལྷག་པར་དུ་འདས་པའི་ལོ་ཤས་གོང་ནས་བཟུང་ང་ཚོའི་རྒྱལ་ཁབ་ཀྱི་གསང་བ་མང་པོ་ཞིག་བརྐུས་ཡོད་སྟབས། ཨ་རིས་གང་མགྱོགས་རང་སྐྱོན་ངོས་ལེན་མ་བྱས་ཚེ། མ་འོངས་པར་རྒྱལ་ཁབ་གཉིས་ཀྱི་འབྲེལ་ལམ་ལ་དོ་ཕོག་འགྲོ་རྒྱུ་མ་ཟད། ཨ་རིར་རྒྱལ་ཁབ་གཞན་གྱི་ཡིད་ཆེས་ཆུང་དུ་འགྲོ་རྒྱུ་ཡིན་སྐོར་བརྗོད་འདུག

ཟླ་འདིའི་ཚེས་ ༢༤ ཉིན་ཝུ་ཁེ་ཡིས་ཨོ་སི་ཊོ་ལི་ཡ་དང་དབྱིན་ཡུལ། ཁེ་ན་ཌ་དང་ནེའུ་ཛི་ལན་ཌི་བཅས་ནང་རྟེན་གཞི་བྱས་པའི་ཨ་རིའི་གསང་བའི་ལས་ཁུངས་ཁག་གིས་ ༢༠༠༢ ནས་ ༢༠༡༢ ལོའི་བར་ཧྥ་རན་སི་གཞུང་གིས་རྒྱལ་ཁབ་གཞན་དང་ཏར་འཕྲིན་དང་གློག་ཆས། རྡུལ་ཕྲན་གློག་ཤུགས་དང་འཕྲོད་བསྟེན་ཡོ་ཆས་བཅས་ཀྱི་ཐོག་ཨ་སྒོར་ས་ཡ་ ༢༠༠ ལྷག་གི་ཚོང་འབྲེལ་གན་རྒྱ་བཞག་ཡོད་པའི་ཆོད་ཡིག་ཁག་གི་གསང་བ་རྐུ་འཁྱེར་བྱས་ཡོད་པ་མ་ཟད། ཧྥ་རན་སིའི་སྲིད་འཛིན་ཇག་ (Jacques Chirac) དང་སར་ཁོ་ཛི་ (Nicolas Sarkozy)། ཧོ་ལན་ཌི་ (François Hollande) བཅས་སྲིད་འཛིན་རིམ་པ་གསུམ་གྱི་ཁ་པར་ལྐོག་ཉན་དང་། དཔལ་འབྱོར་བློན་ཆེན་དང་མཐོ་རིམ་དཔོན་རིགས་ཁག་གི་དྲ་ཚིགས་དང་ཁ་པར་ལ་ལྐོག་འཛུལ་བྱས་ཏེ་ཚོང་དོན་དང་སྲིད་དོན་གསང་བ་མང་པོ་རྐུས་ཡོད་པ་ཕྱི་བསྒྲགས་བྱས་ཡོད་སྟབས། ཧྥ་རན་སིའི་དཔལ་འབྱོར་བློན་ཆེན་ཟུར་པ་དང་ད་ལྟ་ཡུ་རོབ་མཐུན་ཚོགས་ཀྱི་དཔལ་འབྱོར་ལྷན་ཚོགས་ཀྱི་འགན་འཛིན་པེ་རར་མོ་སོ་ཁཱོ་(Pierre Moscovici) ལགས་ཀྱིས་ང་ཚོའི་མཐུན་གྲོགས་རྒྱལ་ཁབ་ཀྱིས་ང་ཚོར་སོ་ལྟ་དེ་འདྲ་བྱེད་བཞིན་ཡོད་པ་ནི་བློ་ཡུལ་ལས་འདས་པའི་གནས་ཚུལ་ཞིག་ཡིན་སྟབས། ཨ་རིའི་དབང་འཛིན་པས་གནད་དོན་དེར་འགྲེལ་བཤད་གསལ་བོ་ཞིག་རྒྱག་དགོས་ཞེས་བརྗོད་འདུག

མདང་དགོང་ཧྥ་རན་སིའི་གསར་འགྱུར་བརྒྱུད་ལམ་བཅིངས་གྲོལ་ཞེས་པས་གནས་ཚུལ་སྤེལ་བའི་ནང་། ཨ་རིའི་གསང་བའི་ལས་ཁུངས་ཀྱིས་ ༢༠༡༡ ནས་ ༢༠༡༤ ལོའི་བར་གྱི་ཧྥ་རན་སིའི་དཔལ་འབྱོར་བློན་ཆེན་ཧྥན་ཁཱོ་སི་དང་པེ་རར་མོ་སོ་ཁཱོ་ལགས་རྣམ་གཉིས་ཀྱི་ཁ་པར་དང་དྲ་ཚིགས་ལ་ལྐོག་འཛུལ་བྱས་ཏེ། ཧྥ་རན་སིའི་ཁེ་ལས་ཆེ་ཁག་ ༡༠༠ ལྷག་གི་ཚོང་དོན་གསང་བ་བརྐུས་ཡོད་པ་མ་ཟད། ད་དུང་བརྒྱུད་ལམ་གཞན་པ་བཀོལ་སྤྱོད་བྱས་ཏེ་རྒྱལ་ཁབ་ཀྱི་ཚོང་དོན་དང་དཔལ་འབྱོར་གནས་བབ་ག་པར་ཁ་ཕྱོགས་སྒྱུར་གྱི་ཡོད་མེད་ཐོག་རྟོག་ཞིབ་བྱེད་བཞིན་འདུག ཅེས་བཀོད་འདུག

དྲ་ཐོག་བརྒྱུད་ལམ་ (Mediapart) ཞེས་པས་གནས་ཚུལ་བཏོན་པའི་ནང་། ༢༠༡༢ ལོ་ནས་བཟུང་ཨ་རིའི་གསང་བའི་ལས་ཁུངས་ཀྱིས་ཧྥ་རན་སིའི་དཔལ་འབྱོར་བློན་ཆེན་པེ་རར་མོ་སོ་ཁཱོའི་ཁ་པར་ལ་ལྐོག་ཉན་བྱས་ཡོད་པ་མ་ཟད། ཕྱི་ཕྱོགས་ཀྱི་ཚོང་དོན་འབྲེལ་ལམ་དང་ཕྱིར་ཚོང་བྱེད་ཕྱོགས་ཀྱི་གསང་བ་རྐུ་འཁྱེར་གྱིས་རྒྱལ་ཁབ་ཀྱི་དཔལ་འབྱོར་འཕེལ་རྒྱས་ལ་གྱོང་གུད་ཆེན་པོ་བཟོས་ཡོད། ཅེས་དང་། བརྒྱུད་ལ་གཞན་ཞིག་ཏུ། ཧྥ་རན་སིའི་ནང་སྲིད་བློན་ཆེན་ཟུར་བ་ཁཱ་ལཱོ་ཌི་ཡིས། ཨ་རིའི་ཐལ་ཆ་ཆེ་བའི་བྱ་སྤྱོད་དེ་ནི་བཟོད་ཐབས་བྲལ་བ་ཞིག་ཡིན་སྟབས། གཞུང་གིས་སྐབས་བབ་ཀྱི་ཡ་ལན་སློག་དགོས་པ་མ་ཟད། ཆེས་མཐོའི་ལྷན་ཚོགས་སྐོང་ནས་མ་འོངས་པར་གནས་ཚུལ་དེ་རིགས་མི་འབྱུང་བྱ་རྒྱུ་གལ་ཆེན་པོ་ཆགས་ཡོད། ད་ལྟ་ང་ཚོ་སྒེར་གྱི་གསང་བ་སྲུང་སྐྱོབ་བྱེད་ས་མེད་པའི་སྤྱི་ཚོགས་ཤིག་གི་ནང་ཁ་ཕྱོགས་བསྒྱུར་གྱི་ཡོད་སྟབས། མ་འོངས་པར་ང་ཚོས་དངངས་སྐྲག་དང་བློ་འཚབ་མེད་པའི་འཚོ་བ་ཞིག་བསྐྱལ་རྒྱུར་འབད་བརྩོན་བྱས་ཏེ། སྒེར་གྱི་གསང་བ་སྲུང་ཐུབ་པ་བྱེད་དགོས། ཞེས་བརྗོད་འདུག

ཨ་རིའི་གསང་བའི་ལས་ཁུངས་ཀྱིས་ཧྥ་རན་སི་དང་ཡུ་རོབ་ཀྱི་དཔོན་རིགས་ཚོའི་ཁ་པར་དང་དྲ་ཚིགས་ནང་ལྐོག་འཛུལ་བྱས་ཡོད་པ་ཤེས་རྟོགས་བྱུང་རྗེས། ཧྥ་རན་སི་གཞུང་གིས་ཨ་རིའི་ཧྥ་རན་སིའི་གཞུང་ཚབ་པ་འབོད་འགུག་གིས་གྲོས་མོལ་བྱས་ཡོད་སྟབས། ཨོ་བྷ་མས་ཧྥ་རན་སིའི་སྲིད་འཛིན་ཧོ་ལན་ཌི་ལ་ཁ་པར་བཏང་སྟེ་འདུམ་འགྲིག་བྱས་ཡོད་ཀྱང་། མི་མང་པོ་ཞིག་གིས་གནས་ཚུལ་དེས་རྒྱལ་ཁབ་གཉིས་ཀྱི་མ་འོངས་པའི་འབྲེལ་ལམ་ཐོག་དོ་ཕོག་འགྲོ་སྲིད་སྐོར་རྗོད་བཞིན་འདུག