ཨོ་སྭ་སྟི།།
བྱེ་བ་ཕྲག་བརྒྱའི་ཞིང་གི་ཡོན་ཏན་ཀུན།།
གཅིག་ཏུ་བསྡུས་པའི་བླ་མེད་ཞིང་གི་མགོན།།
བསྐལ་མང་ཚོགས་གཉིས་ལས་གྲུབ་པད་རག་མདོག།།
རྒྱལ་བ་འོད་དཔག་མེད་ལ་གུས་ཕྱག་འཚལ།།
གང་ཐུགས་གཉིས་སུ་མེད་པའི་ཡེ་ཤེས་ཀྱི།།
སྙིང་རྗེ་ཆེན་པོའི་རྩལ་ལས་དཔལ་ཤར་བ།།
རྟ་བདུན་འོད་ཀྱི་འཁྱུད་པས་གངས་རི་མདངས།།
འཕགས་མཆོག་འཇིག་རྟེན་དབང་ཕྱུག་སྲིད་ན་རྒྱལ།།
ལཱོ་ཀའི་འགྲོ་ལ་དམིགས་མེད་བརྩེ་བས་གཟིས།།
རབ་འབྱམ་རྒྱལ་བའི་གསང་གསུམ་ཐུགས་བསྐྱེད་གར།།
འོད་སྣང་མཐའ་ཡས་ཧྲི་ལས་རྫུས་སྐྱེས་སྐུ།།
པདྨ་ཀཱ་ར་ཚེ་རབས་གཏན་གྱི་སྐྱབས།།
གངས་རིའི་ལྗོངས་སུ་ཆོས་རྒྱལ་སེམས་དཔའི་ཚུལ།།
སྲོང་བཙན་སྒམ་དང་ཆོས་རྒྱལ་ལྷའི་མེ་ཏོག།།
བསྒྲུབ་བརྒྱུད་ཤིང་རྟ་བརྒྱད་དང་གཡུང་དྲུང་བོན།།
བཤེས་གཉེན་ཚུལ་གྱི་བསྟན་པའི་བླ་སྲོག་བཟུང་།།
མཁྱེན་རབ་དབང་ཕྱུག་རྒྱལ་བ་ཙོང་ཁ་པའི།།
ལུང་རྟོག་གསུང་གི་བདུད་རྩི་བཅུད་མྱང་ཞིང་།།
ཕུལ་བྱུང་སྲས་ཀྱི་མཐུ་བོའི་ཚུལ་འཛིན་པ།།
ཕྱག་ན་པདྨོ་དགེ་འདུན་གྲུབ་པར་འདུད།།
གང་གི་ཐུགས་བསྐྱེད་བརྟན་པོས་གོ་བསྒོས་ནས།།
དགེ་འདུན་རྒྱ་མཚོ་བསོད་ནམ་རྒྱ་མཚོ་དང་།།
ཡོན་ཏན་རྒྱ་མཚོའི་བར་དུ་རྒྱལ་བའི་བསྟན།།
རྒྱ་སོག་འགྲོ་མང་འདུལ་མཛད་ཕྱག་གི་ཡུལ།།
ཆོས་རྒྱལ་ཆེན་པོ་ཚང་པ་ལྷའི་མེ་ཏོག།།
སླར་ཡང་སྲིད་པར་བཟུང་བས་ཚུལ་བསྟན་ཅིང་།།
ལུགས་ཟུང་ཁྲིར་བཞུགས་བཀའ་གཏེར་བསྟན་པ་སྤེལ།།
ངག་དབང་བློ་བཟང་རྒྱ་མཚོར་ཕྱག་འཚལ་བསྟོད།།
སྔགས་འཆང་རིག་འཛིན་ཚང་དབྱངས་རྒྱ་མཚོ་དང་།།
གསུམ་ལྡན་འཛིན་པ་སྐལ་བཟང་རྒྱ་མཚོ་བཅས།།
དུས་དང་འགྲོ་ངོར་མཚམ་པའི་མཛད་སྤྱོད་ཀྱི།།
གངས་ཅན་ཆོས་སྲིད་བསྟན་པའི་མངའ་བསྐྱོངས།།
འཇམ་དཔལ་ལུང་རྟོགས་ཚུལ་ཁྲིམས་རྒྱ་མཚོ་དང་།།
མཁས་གྲུབ་རྒྱ་མཚོ་འཕྲིན་ལས་རྒྱ་མཚོའི་བར།།
ཕྱག་ན་པདྨོའི་སྐུ་ཕྲེང་བཅུ་གཉིས་ཀྱི།།
གདུལ་དཀའ་དམུ་རྒོད་མ་དོར་བརྩེ་བས་གཟིགས།།
སྐུ་ཕྲེང་བཅུ་གསུམ་ཐུབ་བསྟན་རྒྱ་མཚོ་ཡིས།།
རང་བཙན་བདེན་པའི་རྒྱལ་རྔ་བརྡུང་དང་ལྷན།།
ཆོལ་གསུམ་སྤུན་ཟླ་རྡོག་རྩ་གཅིག་བསྒྲིལ་གྱི།།
དགྲ་བོ་ཕྱིར་བསྐྲད་མངའ་འབངས་བྱམས་བརྩེས་བསྐྱངས།།
མདོར་ན་རྒྱལ་ཀུན་མཁྱེན་བརྩེ་ནུས་པ་ཀུན།།
གཅིག་ཏུ་སྤུངས་པ་ལས་ཀྱང་ཆེས་མཐོ་བ།།
བདག་སོགས་འགྲོ་ལ་རྙེད་དཀའི་ནོར་གྱི་མཆོག།།
སྟོན་པ་ཏཱ་ལའི་བླ་མ་སྲིད་ན་རྒྱལ།།
རྨད་བྱུང་དཔལ་ལྡན་ལྷ་མོའི་བླ་མཚོ་ལས།།
སྒྲིབ་མེད་གསལ་བའི་ལུང་བསྟན་ཇི་བཞིན་དུ།།
ངོ་མཚར་མཚན་དཔེ་བཞད་པའི་གཏམ་བཟང་གྲགས།།
སྤྲུལ་པའི་བླ་མཚོ་དེ་ལ་གུས་ཕྱག་འཚལ།།
ཁྲི་ཤོར་རྒྱལ་མོའི་མི་རིང་ཡུལ་གྱི་ཆ།།
རྒྱ་བོད་ཐ་དད་ལོ་རྒྱུས་རྡོ་རིང་ཆེད།།
སྟག་འཚེར་ཞེས་པར་མདོ་སྨད་ཆོལ་ཁའི་ཡུལ།།
སྐུ་ཡི་འཁྲུངས་ཡུལ་དེ་ལ་གུས་ཕྱག་འཚལ།།
ཐབས་ཀྱི་མཆོག་གྱུར་ཆོས་སྐྱོང་ཚེ་རིང་དང་།།
ཤེས་རབ་མཆོག་གྱུར་བསོད་ནམས་མཚོ་མོ་ཟུང་།།
རིགས་ཀྱི་མྱུ་གུ་བལྟམས་པའི་ཡབ་ཡུམ་གང་།།
དྲིན་ཆེན་རྣམ་པ་གཉིས་ལ་གུས་ཕྱག་འཚལ།
རབ་བྱུང་བཅུ་བདུན་ཆུ་མོ་ཕག་གི་ལོ།།
སྣྲོན་ཟླའི་ཡར་ཚེས་ལྔ་ཉིན་སྐུའི་པདྨ།།
ངོ་མཚར་སྐྱེ་འགྲོའི་དཔལ་དུ་མཚན་དཔེ་བཞད།།
ཚེས་བཟང་དུས་བཟང་དེ་ལ་གུས་ཕྱག་འཚལ།།
མདོ་སྨད་ཡུལ་ནས་དབུས་སུ་སྤྱན་འདྲེན་ཞུས།།
ཇོ་ཤཱཀ་མདུན་དུ་དབུ་སྐྲའི་ལྕང་ལོ་བསིལ།།
བོད་མའི་རིག་བདག་གང་ལ་བཀུར་བས་མགོན།།
རྒྱལ་ཚབ་རྭ་སྒྲེང་དེ་ལ་གུས་ཕྱག་འཚལ།།
གང་གི་བསྟི་གནས་གྲུ་འཛིན་གཉིས་པ་རུ།།
མི་འཇིགས་གསེར་གྱི་ཁྲི་ལ་འཁོད་ནས་ཀྱང་།།
ལུགས་གཉིས་ཕན་བདེའི་མགོན་དུ་རྟག་བརྟན་གནས།།
གནས་མཆོག་པོ་ཊ་ལ་ལ་གུས་ཕྱག་འཚལ།།
བསྟན་དང་བསྟན་འཛིན་དམར་པོས་འཇིགས་ཉེར་སྐབས།།
བསྟན་སྲུང་དྭངས་བླང་དམག་གི་སྐུ་སྲུང་འོག།།
འཕགས་ཡུལ་ཞབས་སོར་འཁོད་ཐུབ་བཀའ་དྲིན་དཔལ།།
ཆུ་བཞི་སྒང་དྲུག་དམག་ལ་གུས་ཕྱག་འཚལ།
རྟ་བདུན་དབང་པོར་འགྲན་པའི་ཡིད་འོང་སྐུ།།
ཞི་དུལ་གར་གྱི་སྟོན་པའི་ཞལ་སྐྱིན་མཛད།།
ཞལ་འཛུམ་མདངས་ཀྱི་སྐྱེ་རྒུར་སྤྲོ་བ་སྟེར།།
ཏཱ་ལའི་བླ་མའི་སྐུ་ལ་གུས་ཕྱག་འཚལ།།
མདོ་སྔགས་རིག་གནས་སྤྱི་དང་གནའ་དེང་གཞུང་།།
རིས་མེད་འཛམ་གླིང་ཧྲིལ་པོའི་ལྟ་གྲུབ་སོགས།།
འཆད་པའི་ལྗག་ལ་སྤྲུལ་པའི་གློག་ཞག་འཁྱུག།།
ཏཱ་ལའི་བླ་མའི་གསུང་ལ་གུས་ཕྱག་འཚལ།།
སྟོང་དང་རྟེན་འབྱུང་ལྟ་བའི་གནས་ལུགས་ཀུན།།
ཇི་བཞིན་ས་ལེར་གཟིགས་པའི་མཁྱེན་རབ་ཀློང་།།
མི་འགྱུར་དམ་བཅའ་གསུམ་གྱི་སྐྱེ་འགྲོ་བསྐྱབ།།
ཏཱ་ལའི་བླ་མའི་ཐུགས་ལ་གུས་ཕྱག་འཚལ།།
ཕྱོགས་དུས་རྒྱལ་བའི་མཁྱེན་བརྩེ་ནུས་པ་ཀུན།།
གཅིག་ཏུ་བསྡུས་པའི་ཡེ་ཤེས་རང་རྩལ་གྱི།།
གླིང་འདིའི་ཉེས་ཚོགས་འཇོམ་ལ་ཡིད་བཞིན་ནོར།།
ཏཱ་ལའི་བླ་མའི་ཡོན་ཏན་གུས་ཕྱག་འཚལ།།
ཁྱེད་ཀྱི་བྱམས་བརྩེ་གསུང་གི་བདུད་རྩི་ཡིས།།
གྲངས་མེད་འགྲོ་ལ་བླང་དོར་མིག་སྩལ་ཅིང་།།
ཞི་བསིལ་བདེ་བའི་དབུགས་དབྱུང་འཐོབ་པ་སོགས།།
ཏཱ་ལའི་བླ་མའི་འཕྲིན་ལས་གུས་ཕྱག་འཚལ།།
མཁྱེ༵ན་པའི་ལེགས་བཤད་གོ་ལར་ཧྲིལ་པོ་རུ།།
ཇི་ལྟར་ཇི་སྙེད་མཁྱེན་པའི་རྣམ་དཔྱོད་ཀྱི།།
ཚན་རྩལ་མཁས་རྒུས་བསྟོད་པའི་མེ་ཏོག་ཡི།།
ཟུར་ཕུད་ལྔ་པའི་མཚན་གྱི་ཅོད་པན་ཕུལ།།
བརྩེ༵་བའི་ཐུགས་རྗེས་དུང་ཕྱུར་བདུན་བཅུའི་འགྲོར།
བཟང་སྤྱོད་གོང་མཐོར་བཏང་བའི་བློ་སྟོབས་ཀྱི།།
ཞི་བདེ་བདུད་རྩི་མན་ངག་ཆད་མེད་དུ།།
སྩལ་བས་མཛད་པ་སྤྱན་རས་གཟིགས་དང་མཚུངས།
ནུས༵་པའི་བྱང་སེམས་བརྩོན་པའི་གོ་ཆ་ཡི།།
སྟོབས་ཆེན་རྒྱལ་ཁབ་ངན་སྤྱོད་ལས་བསྒྲལ་ཏེ།།
སྟོང་དང་རྟེན་འབྱུང་ཞི་བདེའི་ལམ་བཟང་ལ།།
འཁྲིད་པར་ནུས་པའི་ཕྱག་ན་རྡོ་རྗེ་དངོས།།
འདས་པའི་དུས་སུ་པད་འབྱུང་ཨ་ཏི་ཤ།།
ད་ལྟའི་དུས་སུ་ཞི་བདེའི་དེད་དཔོན་ཆེ།།
མ་འོངས་དུས་སུ་རིགས་ལྡན་དྲག་པོ་རྩལ།།
གང་འདུལ་དེར་སྟོན་མཛད་ཁྱེད་གུས་ཕྱག་འཚལ།།
གཞན་ཕན་སྐར་ཆ་བརྒྱད་ཅུ་ལོ་ཡིས་བསྐང་།།
ས་ཡ་དྲུག་གི་རེ་ལྟོས་ཞི་བདེར་བཅོལ།།
དམར་པོའི་དགྲ་ལ་བྱམས་སེམས་སྤྱོད་པས་བསྐྱང།།
དོན་གྱི་སཏྭ་ཁྱོད་ལ་གུས་ཕྱག་འཚལ།།
མཆོག་གསུམ་སྐུ་གསུམ་རྩ་གསུམ་བདེན་པས་མཐུས།།
གངས་རིའི་མགོན་པོ་བསྟན་འཛིན་རྒྱ་མཚོའི་སྡེ།།
ཚེ་འཕྲང་བར་ཆད་ཞི་ཞིང་སྐུ་བསོད་རྒྱས།།
ཐུགས་བཞེད་ཇི་བཞིན་འགྲུབ་པའི་ཤིས་པ་སྩོལ།།
འདི་ནས་བཟུང་ཏེ་ཇི་སྲིད་སྙིང་པོའི་བར།།
མགོན་པོ་ཁྱེད་དང་ནམ་ཡང་མི་འབྲལ་ཏེ་།།
མཉེས་བཞིན་རྗེས་སུ་འཛིན་པས་མཐུ་འཐོབ་ཅིང་།།
སྲིད་ཞུ་བསྒྲུབ་པས་བྱེད་པོ་བདག་འགྱུར་ཤོག།།
བདག་ཅག་གི་སྟོན་པ་བླ་ན་མེད་པ་༧གོང་ས་སྐུ་ཕྲེང་བཅུ་བཞི་པ་མཆོག་དགུང་གྲངས་བརྒྱད་ཅུ་སོན་པའི་འཁྲུངས་སྐར་གྱི་གྱ་སྟོན་དང་འབྲེལ། སྤྱི་ལོ་ ༢༠༡༥/༦/༣༠ ཉིན་བཀའ་དྲིན་རྗེས་དྲན་གྱི་ཚུལ་དུ་མགོན་པོ་གང་གི་མཉེས་བཞིན་རྗེས་སུ་བཟུང་བས་སློབ་མ་དྷརྨ་ས་གཱ་རའམ།། ཤར་སྤྲུལ་དམ་ཆོས་རྒྱ་མཚོ་ཞེས་པ་དེས་སྒོ་གསུམ་གུས་པས་གསོལ་བ་རྩེ་གཅིག་ཏུ་བཏབས་པའོ།། །།
