ཨ་རིས་ཧོང་ཀོང་གི་ནང་སྲིད་ལ་ཐེ་གཏོགས་མ་བྱེད།

ཨ་རིའི་གཞུང་གིས་འགྲོ་བ་མིའི་ཐོབ་ཐང་སྙན་ཐོ་བཏོན་པའི་ནང་ཧོང་ཀོང་གི་འོས་བསྡུ་དྲང་བདེན་ཡོང་གི་མེད་སྐོར་བརྗོད་པར་ཧོང་ཀོང་གཞུང་གིས་ཨ་རིའི་ཧོང་ཀོང་ནང་སྲིད་ལ་ཐེ་གཏོགས་བྱས་ཚུལ་ལན་འདེབས་བྱས་འདུག

ཟླ་སྔོན་མའི་ཚེས་ ༢༦ ཉིན། ཧོང་ཀོང་རང་དབང་གསར་ལམ་ (HKFP)ཞེས་པའི་ཐོག་གནས་ཚུལ་སྤེལ་བའི་ནང་། ཚེས་ ༢༥ ཉིན་ཨ་རིའི་ཕྱི་སྲིད་ལས་ཁུངས་ཀྱིས་ཁྱབ་བསྒྲགས་བྱས་པའི་ཨ་རིའི་འགྲོ་བ་མིའི་ཐོབ་ཐང་ལོ་འཁོར་སྙན་ཐོའི་ནང་། ད་ལོའི་ཧོང་ཀོང་གི་འོས་བསྡུ་དེ་དྲང་བདེན་དང་རང་དབང་ཡོང་གི་མེད་པ་དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་དཀའ་རྙོག་གཙོ་བོ་ཞིག་ཡིན་པའི་ངོས་འཛིན་བྱས་ཡོད་སྐོར་བཀོད་འདུག

ཨ་རིའི་ཕྱི་སྲིད་ལྷན་ཁང་གི་སྙན་ཐོ་དེའི་ནང་། ༢༠༡༤ ལོར་ཧོང་ཀོང་གྲོང་ཁྱེར་ནང་འགྲོ་བ་མིའི་གཞི་རྩའི་ཐོབ་ཐང་ལག་བསྟར་བྱེད་ཕྱོགས་སྐོར་འདི་ལྟར་བཀོད་འདུག ཀོང་ཧོང་གྲོང་ཁྱེར་དུ་གསར་འགོད་རང་དབང་ལྟ་ཞོག ཐ་ན་གསར་འགོད་པའི་སྟེང་ལ་དྲག་སྤྱོད་ཀྱི་སྦྱོར་བ་བརྩམས་པ་དང་། མངའ་སྡེའི་གྲོས་ཚོགས་འཐུས་མིའི་ཐོབ་དབང་ལ་ཚོད་འཛིན་བྱས་པ་དེས། རང་དབང་དམངས་གཙོའི་ཚོགས་སྡེ་ཁག་ཡོངས་ལ་ཚད་མི་འདྲ་བའི་ཆབ་སྲིད་ཀྱི་གནོན་ཤུགས་སྤྲོད་ཀྱི་ཡོད་ལུགས་དང་། ལོ་སྔོན་མའི་ (ཆར་གདུགས་འོག་གི་གསར་བརྗེ་ལས་འགུལ)ཡོངས་ཁྱབ་འོས་བསྡུ་ལག་བསྟར་བྱེད་པའི་ཐད་ལའང་རྒྱ་ནག་གཞུང་གི་སྒྲིག་འཛུགས་ཀྱི་སྒྲོམ་གཞིའི་འོག་ཏུ་འཆར་ཅན་ལྟར་འགོག་རྐྱེན་བཟོས་ཏེ་སྤྱི་དམངས་ཀྱི་འོས་གཞིར་ཚོད་འཛིན་བྱེད་ཀྱི་ཡོད་པ་དང་། སྲིད་གཞུང་ལ་བཅོས་བསྒྱུར་ཐེབས་པར་དོགས་ཏེ་རེབ་དེའི་འོས་བསྡུ་དྲང་བདེན་དང་རང་དབང་ཡོང་འཇུག་གི་མེད་པ་དེས། ས་བསྡུའི་སྡེ་ཁག་གི་བྱེད་ལས་ལ་གཞན་ལས་ལྷག་པའི་དབང་ཤེད་སྤྲད་དེ་ཧོང་ཀོང་ཡུལ་མི་ཚོའི་ཁེ་དབང་ལ་དམ་དྲག་བྱས་ཡོད་སྐོར་གསལ་འདོན་བྱས་འདུག

ཨ་རིའི་འགྲོ་བ་མིའི་ཐོབ་ཐང་ལོ་འཁོར་སྙན་ཐོ་དེའི་ནང་མུ་མཐུད་བརྗོད་དོན། ཧོང་ཀོང་གྲོང་ཁྱེར་གྱི་སྔ་ཕྱིའི་འོས་བསྡུའི་སྐབས་སུ། སྤྱི་བདེ་ཉེན་རྟོག་པས་ཚད་ལས་འདས་པའི་དྲག་ཤུགས་ཀྱི་སྦྱོར་བ་བརྩམས་པ་དེས། ཡོངས་ཁྱབ་འགྲོ་བ་མིའི་ཐོབ་ཐང་གི་འདུ་འཛོམས་རང་དབང་ལ་རྡོག་རོལ་བཏང་བ་རེད། ཅེས་དང་། ཡང་གསར་འགོད་རང་དབང་གི་ཐད་ནས། ཕྱི་ལོ་ ༢༠༡༤ ལོར་མེན་པོ་ (Ming Pao) གསར་ཤོག་གི་རྩོམ་སྒྲིག་པ་ལོའུ་ཅིན་ཐོའུ་ (Kevin Lau Chun-to) ལ་སྐྱོན་བརྗོད་བྱས་པ་ལྟ་བུའི་ཚབས་ཆེའི་གནས་ཚུལ་མང་པོར་དཔྱད་ཞིབ་བྱས་ཏེ། ཧོང་ཀོང་གྲོང་ཁྱེར་དང་རྒྱ་ནག་སྐམ་ས་ཆེན་མོའི་སྤྱི་བདེ་ཉེན་རྟོག་པས་དོགས་ཡོད་མི་སྣ་མང་པོ་འཛིན་བཟུང་བྱེད་པ་ཙམ་ལས་ཁོ་ཚོའི་འཐབ་རྩོད་དང་དེའི་ཀུན་སློང་ལ་དཔྱོད་ཤེས་བྱེད་ཀྱི་མེད་པ་མ་ཟད། རྒྱ་ནག་གཞུང་ངོས་ནས་ཀྱང་ཕྱི་ལོ་ ༢༠༡༣ ལོར་གློག་བརྙན་འཁྲབ་སྟོན་པ་ལྕམ་ཁྲིན་ཕེན་ (Chen Ping) གྱིས་གཙོ་གཉེར་བྱས་པའི་ (Next Media) དང་ (Sun Affair) སོགས་ལ་ཞིབ་དཔྱོད་དང་སྐྱོན་བརྗོད་བྱས་པའི་གནས་ཚུལ་དེའི་སྐོར་གསལ་ཁ་གང་ཡང་བཏོན་ཡོད་པ་མ་རེད། ཅེས་སོགས་བཀོད་འདུག

ཟླ་སྔོན་མའི་ཚེས་ ༢༦ ཉིན།  ཧོང་ཀོང་གཞུང་གིས་བསྒྲགས་གཏམ་ཞིག་སྤེལ་ཏེ། ཨ་རིའི་གཞུང་གིས་ཧོང་ཀོང་གི་ནང་སྲིད་ལ་ཐེ་གཏོགས་བྱེད་མི་དགོས་ཚུལ་བརྗོད་པའི་ནང་། རྒྱ་ནག་ཧོང་ཀོང་དམིགས་བསལ་སྲིད་འཛིན་ས་ཁུལ་གཞུང་གི་འོས་བསྡུའི་བསྒྱུར་བཅོས་ལས་འཆར་དེ་རྒྱལ་ཁབ་ཀྱི་རྩ་ཁྲིམས་དང་མཐུན་ནའང་། སྟབས་མ་ལེགས་པར་གྲོས་ཚོགས་ལྷན་ཁང་ནས་རྩ་ཁྲིམས་དེ་བརྒྱུད་སྤྲོད་མ་བྱས་པ་རེད། ཅེས་དང་། ཡང་ང་ཚོས་རྒྱལ་ཁབ་ཀྱི་རྩ་ཁྲིམས་དང་མཐུན་པའི་འཕོ་འགྱུར་དེ། རྒྱ་ནག་ཧོང་ཀོང་དམིགས་བསལ་སྲིད་འཛིན་ས་ཁུལ་གཞུང་ཐེ་བའི་མེས་རྒྱལ་ནང་ཁུལ་གྱི་དོན་དག་ཅིག་ཡིན་སྟབས། ཕྱིའི་རྒྱལ་ཁབ་ཁག་གིས་ཅི་ནས་ཀྱང་རྩ་འཛིན་དེ་ལ་བརྩི་བཀུར་བྱེད་དགོས་པ་ལས་གནད་དོན་གཞན་ལ་ཐེ་གཏོགས་མི་ཆོག་ཚུལ་བརྗོད་འདུག

གོང་སྨྲས་སྤྱི་བདེ་ཉེན་རྟོག་པས་དྲག་ཤུགས་སྤྱད་པའི་ཐད་བསྒྲགས་གཏམ་དེའི་ནང་། སྤྱི་དམངས་ཀྱི་ཁྲིམས་བཤིག་ལུགས་ལྡོག་གི་ངོ་རྒོལ་ཟིང་ཆ་ཞི་འཇགས་སུ་བཏང་བ་ཡིན་ལུགས་ནན་བཤད་བྱས་ཡོད་པ་མ་ཟད། ཧོང་ཀོང་གཞུང་གིས། གསར་འགོད་རང་དབང་དང་གཏམ་བརྗོད་རང་དབང་ནི་ཧོང་ཀོང་གྲོང་ཁྱེར་གྱི་རིན་ཐང་གི་སྲོག་ཤིང་ཡིན་སྟབས། དེའི་བདེ་འཇགས་འགན་སྲུང་ཐད་ལ་མུ་མཐུད་ཁག་ཐག་བྱེད་ཀྱི་ཡོད་ཚུལ་བརྗོད་འདུག

པེ་ཅིན་གཞུང་གིས་ཨ་རིའི་འགྲོ་བ་མིའི་ཐོབ་ཐང་སྙན་ཐོའི་ནང་རྒྱ་ནག་ལ་སྐྱོན་བརྗོད་བྱས་ཡོད་པ་དེར་རྒོལ་ལན་སློག་ཡོད་པ་མ་ཟད། ཉིན་དེར་རྒྱ་ནག་རྒྱལ་སྲིད་སྤྱི་ཁྱབ་ཁང་གིས་ཀྱང་གསལ་བསྒྲགས་ཤིག་སྤེལ་ཏེ། དེང་གི་ཨ་རི་གཞུང་གི་དྲག་པོའི་ཟིང་འཁྲུག་དང་སྤྱི་བདེ་ཉེན་རྟོག་པའི་གདུག་རྩུབ། རིགས་རྒྱུད་རིང་ལུགས་དང་དངུལ་དངོས་ཀྱི་ཆབ་སྲིད་བཅས་ལ་ཐེར་འདོན་དང་། དེ་བཞིན། ཝ་ཞིན་ཊོན་སྲིད་གཞུང་གིས་རྒྱལ་ཁབ་གཞན་གྱི་དབུ་ཁྲིད་དང་མི་མང་ལ་གསང་བའི་སྒོ་ནས་མྱུལ་ཞིབ་བྱེད་ཀྱི་ཡོད་སྐོར་སོགས་ཀྱི་བསྐྱོན་འཛུགས་བྱས་ཡོད་པ་མ་ཟད། ད་དུང་རྒྱ་ནག་གཞུང་འབྲེལ་ཞིན་ཧྭ་གསར་ལམ་བརྒྱུད་ནས། ཨ་རིའི་འགྲོ་བ་མིའི་ཐོབ་ཐང་ལོ་འཁོར་སྙན་ཐོ་དེ་ལ་དགག་ལེན་ཞིག་ཀྱང་འགྲེམ་བསྒྲགས་བྱས་ཡོད་འདུག

ཨ་རིའི་གཞུང་གིས་ཁྱབ་བསྒྲགས་བྱས་པའི་རྒྱ་ནག་གི་འགྲོ་བ་མིའི་ཐོབ་ཐང་སྐོར་གྱི་སྙན་ཐོ་དེའི་འོག་ཏུ་གསར་འགོད་པའི་དཔྱད་གཏམ་སྤེལ་བའི་ནང་། འདས་པའི་ལོ་ངོ་འདི་དག་རིང་འཛམ་གླིང་གི་དཔལ་འབྱོར་འཕེལ་རྒྱས་ཅན་གྱི་རྒྱལ་ཁབ་ཨ་རྒྱ་གཉིས་བར། རྒྱལ་སྤྱིའི་འགྲོ་བ་མིའི་ཐོབ་ཐང་གི་དཀའ་རྙོག་དང་དེའི་རྩོད་གླེང་ཐད་ནས་ཕན་ཚུན་ལ་དངངས་འཚབ་ཆེན་པོ་སློང་གི་ཡོད་ཅིང་། དམིགས་བསལ་གྱིས་ ༡༩༨༩ ལོར་པེ་ཅིན་གཞུང་གིས་གནམ་བདེ་སྒོ་མོ་ཆེའི་ཐང་ཆེན་དུ་དམངས་གཙོའི་ལས་འགུལ་བ་ཚོར་དྲག་གནོན་བྱས་པའི་རྗེས་སུ། ཨ་རིའི་གཞུང་གིས་རྒྱ་ནག་གིས་རྒྱལ་སྤྱིའི་འགྲོ་བ་མིའི་ཐོབ་ཐང་ལ་རྡོག་རོལ་བཏང་བའི་སྐྱོན་འཛུགས་ཡང་ཡང་བྱེད་ཀྱི་ཡོད་པ་དང་། རྒྱ་ནག་དམར་ཤོག་ཚོགས་པའི་ཆེས་མཐོའི་དཔོན་རིགས་ཚོས་སྤྱི་དམངས་ཡོངས་ལ་རང་དབང་དམངས་གཙོ་དང་གཞི་རྩའི་འགྲོ་བའི་ཐོབ་ཐོང་སྤྲོད་ངེས་ཡིན་པའི་ཁས་ལེན་མང་པོ་བྱས་ཡོད་རེད། ཡིན་ནའང་། འདས་པའི་ལོ་ངོ་གཉིས་རིང་གི་སྲིད་འཛིན་ཞི་ཅེན་ཕེན་གྱི་སྲིད་དབང་ལམ་ལུགས་འོག རང་དབང་དམངས་གཙོ་རྩོད་ལེན་པ་དང་དམར་ཤོག་ཚོགས་པ་ནང་ཁུལ་གྱི་ཕྱོགས་འགལ་བ་ཚོར་ལྐོག་ཟ་རུལ་སུངས་དང་ངོ་ལོག་ཟིང་འཁྲུག་སོགས་ཀྱི་ཉེས་འཛུགས་བྱས་ཏེ། ཁོ་ཚོར་ཡ་ང་བའི་དྲག་གནོན་ཞིབ་བཤེར་དང་འཛིན་བཟུང་བཙོན་འཇུག་མུ་མཐུད་བྱེད་ཀྱིན་ཡོད་པ་སོགས་བཀོད་འདུག