དེ་རིང་རྒྱ་གར་གྱི་སྲིད་བློན་མུ་དྷེ་མཆོག་དང་པཱ་ཀི་སི་ཐན་གྱི་སྲིད་བློན་ཤཱ་རི་ཧྥེ་རྣམ་གཉིས་མཇལ་འཕྲད་གནང་སྟེ་འཇིགས་སྐུལ་དྲག་སྤྱོད་པར་རྒོལ་རྡུང་གཏོང་བ་སོགས་དོན་ཚན་ ༥ ཡི་ཐོག་གྲོས་མཐུན་བྱུང་ཡོད་འདུག
ཧིན་རྡུའི་དུས་བབ་ཐོག་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༨ དང་ ༩ ཉིན་ཨུ་རུ་སུའི་གྲོང་ཁྱེར་ཨུ་ཧྥ་ (Ufa)ནང་ཚོགས་པའི་སྟོབས་ལྡན་རྒྱལ་ཁབ་ལྔ་(BRICS)སྟེ་བྷི་ར་ཛིལ་དང་ཨུ་རུ་སུ། རྒྱ་གར། རྒྱ་ནག ལྷོ་ཨ་ཧྥེ་རི་ཁ་བཅས་ཀྱི་དབུ་ཁྲིད་ལྷན་ཚོགས་ཀྱི་སྐབས་དང་བསྟུན་ཏེ། དེ་རིང་ཕྱི་ཚེས་ ༡༠ ཉིན་གྱི་སྔ་དྲོར་རྒྱ་གར་གྱི་སྲིད་བློན་ནཱ་རེན་ཌཱ་མུ་དྷེ་མཆོག་དང་། པཱ་ཀི་སི་ཐན་གྱི་སྲིད་བློན་ཤཱ་རི་ཧྥུ་(Nawaz Sharif)རྣམ་གཉིས་མཇལ་འཕྲད་གནང་སྟེ། རྒྱ་གར་གྱི་རྒྱལ་ས་ལྡི་ལིར་རྒྱལ་ཁབ་གཉིས་ཀྱི་བདེ་འཇགས་གྲོས་མོལ་ཚོགས་འདུ་སྐོང་ཚོགས་གནང་རྒྱུ་དང་། འཇིགས་སྐུལ་དྲག་སྤྱོད་པར་རྒོལ་རྡུང་དང་རྒྱལ་ཁབ་གཉིས་ཀྱི་འབྲེལ་བ་གོང་འཕེལ་གཏོང་ཐབས་སྐོར་གྱི་དོན་ཚན་ ༥ ལ་གྲོས་མཐུན་བྱུང་ཡོད་འདུག
རྒྱ་གར་ཕྱི་འབྲེལ་བློན་ཆེན་ཇི་ཤིན་ཁཱར་( Subrahmanyan Jaishankar)ལགས་ཀྱིས། སྲིད་བློན་རྣམ་གཉིས་མཇལ་འཕྲད་སྐབས། རྒྱ་གར་དང་པཱ་ཀི་སི་ཐན་བར་རྩོད་རྙོག་ཆེན་པོ་ཞིག་ཏུ་གྱུར་བའི་ཕྱི་ལོ་ ༢༠༠༨ ལོའི་མུམ་བྷེ་དྲག་སྤྱོད་དོན་རྐྱེན་གང་མགྱོགས་ཐག་གཅོད་བྱེད་པར་མོས་མཐུན་བྱུང་སྐོར་བརྗོད་ཡོད་པ་མ་ཟད། པཱ་ཀི་སི་ཐན་གྱི་སྲིད་བློན་མཆོག་གིས་མུ་དྷེ་མཆོག་པཱ་ཀི་སི་ཐན་ནང་ཕེབས་པར་མགྲོན་འབོད་ཞུས་པ་ཞལ་བཞེས་གནང་ཡོད་པ་ལྟར། ཕྱི་ལོ་ ༢༠༡༦ ལོར་པཱ་ཀི་སི་ཐན་གྱི་རྒྱལ་ས་ཨི་སི་ལམ་བྷ་ཌ་(Islamabad)་ནང་འཚོགས་འཆར་ཡོད་པའི་ལྷོ་ཨེ་ཤ་ཡའི་ཁུལ་གྱི་མཉམ་འབྲེལ་ལྷན་ཚོགས་ཐོག སྲིད་བློན་མུ་དྷེ་མཆོག་མཉམ་ཞུགས་གནང་རྒྱུ་ཡིན་སྐོར་བརྗོད་འདུག་ལ། དེ་ནི་མུ་དྷེ་མཆོག་གིས་སྲིད་བློན་ལས་འཁུར་ཞུས་ནས་པཱ་ཀི་སི་ཐན་ནང་གཟིགས་སྐོར་དུ་ཕེབས་པ་ཐོག་མ་དེ་ཆགས་ཀྱི་ཡོད་འདུག
དེ་བཞིན་པཱ་ཀི་སི་ཐན་གྱི་ཕྱི་འབྲེལ་དྲུང་ཆེ་ཆཱ་ཌ་རི་(Aizaz Ahmad Chaudhary)ལགས་ཀྱིས། སྲིད་བློན་རྣམ་གཉིས་ཀྱིས་རྒྱལ་ཁབ་གཉིས་ལ་ཞི་བདེ་སྲུང་སྐྱོབ་དང་མངའ་ཁོངས་འཕེལ་རྒྱས་གཏོང་བའི་ཐུན་མོང་གི་འགན་འཁྲི་ཡོད་པ་ལྟར། ཕྱོགས་གཉིས་ཀྱི་དབུ་ཁྲིད་ནས་འཇིགས་སྐུལ་རིང་ལུགས་པར་རྣམ་པ་འདྲ་མིན་གྱི་ཐོག་ནས་སྐྱོན་བརྗོད་བྱེད་པར་མོས་མཐུན་བྱུང་ཡོད་སྐོར་བརྗོད་འདུག
རྒྱ་གར་གྱི་ཕྱི་འབྲེལ་དྲུང་ཆེ་ཨེ་སི་ཆཱ་ཌ་རི་ (S Chaudhary)ལགས་ཀྱིས་བརྗོད་པ་ལྟར་ན། ཐེངས་འདིའི་མཇལ་འཕྲད་སྐབས་གྲོས་ཆོད་དོན་ཚན་ ༥ བཞག་ཡོད་པའི་དང་པོ་ནི། རྒྱ་གར་གྱི་རྒྱལ་ས་ལྡི་ལི་རུ་རྒྱལ་ཁབ་གཉིས་ཀྱི་གསང་བའི་ལས་ཁུངས་མཉམ་འབྲེལ་གྱི་ཐོག་ནས་འཇིགས་སྐུལ་རྒོལ་རྡུང་དང་འབྲེལ་བའི་གནད་དོན་ཐོག་ཚོགས་འདུ་ཞིག་འཚོགས་རྒྱུ། གཉིས་པ། གང་མགྱོགས་རྒྱ་གར་དང་པཱ་ཀི་སི་ཐན་གྱི་མཐའ་སྲུང་དམག་སྤྱི་རྣམ་གཉིས་ཐུག་འཕྲད་བྱས་རྗེས། རྒྱལ་ཁབ་གཉིས་ཀྱི་དམག་དོན་བཀོད་འདོམས་བསྟི་གནས་ཁང་བར་ཚོགས་འདུ་ཞིག་བསྐོང་རྒྱུ། གསུམ་པ། ཕྱོགས་གཉིས་ཀྱིས་བཀག་ཉར་བྱས་པའི་ཉ་བ་ཚོ་ཉིན་གྲངས་ ༡༥ ནང་ཀློད་གྲོལ་དང་ཉ་གྲུ་ཕྱིར་སྤྲོད་རྒྱུ། བཞི་པ། གནས་མཇལ་བ་ཚོར་མཐུན་སྦྱོར་བསྐྲུན་རྒྱུ། ལྔ་པ། མུམ་བྷེ་ཡི་དྲག་སྤྱོད་དོན་རྐྱེན་ལ་སྐད་སྒྲའི་དཔེ་མཚོན་མཁོ་སྤྲོད་དང་མཉམ་དུ་ཁྲིམས་བཤེར་བྱ་རྒྱུ་བཅས་ལ་གྲོས་མཐུན་བྱུང་ཡོད་འདུག
གསར་འགོད་པ། པདྨ་མཚོ།
