བོད་ཀྱི་སྲིད་བྱུས་ཉམས་ཞིབ་ཁང་གིས་ཉམས་ཞིབ་དུས་དེབ་འདོན་ཐེངས་གཉིས་པ་འགྲེམ་སྤེལ་གནང་བའི་ཐོག་སྲིད་སྐྱོང་མཆོག་གིས་རྒྱ་ནག་སྐོར་ལ་ཉམས་ཞིབ་གནང་དགོས་པ་གལ་ཆེན་ཡིན་སྐོར་དང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་གྲོངས་རྐྱེན་སྐོར་སོགས་གསུངས་སོང་།
དེ་རིང་སྔ་དྲོའི་ཆུ་ཚོད་ ༡༡ སྟེང་གངས་སྐྱིད་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་སྒྲིག་འཛུགས་སྲིད་སྐྱོང་བློ་བཟང་སེང་གེ་མཆོག་གིས་བོད་ཀྱི་སྲིད་བྱུས་ཉམས་ཞིབ་ཁང་གིས་འདོན་སྤེལ་ཞུས་པའི་དུས་དེབ་འདོན་ཐེངས་གཉིས་པ་དང་བོད་ཡིག་ཐོག་གི་དུས་དེབ་ཐོག་མ་དེ་དབུ་འབྱེད་གནང་སོང་།
ཉམས་ཞིབ་དུས་དེབ་དེར་ཤོག་ངོས་ ༡༦༠ ཡོད་པའི་ནང་། ཨཱ་ཅཱརྱ་བློ་བཟང་ལགས་ཀྱིས་བྲིས་པའི་༼བོད་འབྲེལ་གནད་དོན་ཐད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འགོ་ཁྲིད་ཀྱི་དགོངས་པ་གླེང་བ།༽ ཞེས་པ་དང་། ཤར་ཙོང་བདེ་ལྡན་ལགས་ཀྱིས་བྲིས་པའི་ ༼རྒྱ་ནག་གཞུང་གིས་བོད་ཁུལ་དུ་གྲོང་ཁྱེར་འཛུགས་སྐྲུན་གྱི་དམིགས་ཡུལ༽ཞེས་པ། བསྟན་འཛིན་པདྨ་ལགས་ཀྱིས་བྲིས་པའི་༼བོད་ནང་གི་བོད་ཀྱི་སྐད་ཡིག་གི་གནས་སྟངས།༽། བྱམས་པ་བསྟན་འཛིན་ལགས་ཀྱིས་བྲིས་པའི་།༼གྲོས་མཐུན་དོན་ཚན་བཅུ་བདུན་གྱི་ཁྲིམས་ལུགས་གནས་བབས་ལ་དཔྱད་པ།༽། ཚེ་བསོད་ལགས་ཀྱིས་བྲིས་པའི་༼ལྟ་ཚུལ་ཕྱོགས་རེ་བ་ཙམ་གྱིས་མི་རིགས་ཧྲིལ་བོར་དགྲར་བལྟ་བ། མི་རིགས་ཀྱི་གནད་དོན་སུས་བཟོ་གི་ཡོད་པ་ཞོར་དུ་གླེང་བ།༽བཅས་རྩོམ་ཡིག་ ༥ ལས་གྲུབ་འདུག
སྲིད་བྱུས་ཉམས་ཞིབ་ཁང་གི་འགན་འཛིན་ལས་རོགས་བློ་བཟང་ལགས་ཀྱིས་དུས་དེབ་ཀྱི་ནང་དོན་ངོ་སྤྲོད་གནང་དོན། འདིའི་ནང་གི་དཔྱད་རྩོམ་དག་ནི་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཚོས་བྲིས་པ་ཞིག་ཡིན་པ་ལས་ཕྱི་ལོགས་ཀྱི་མི་སྣས་བྲིས་པའི་དཔྱད་རྩོམ་གཅིག་ཀྱང་མེད། དུས་དེབ་འདིའི་ནང་གི་དཔྱད་རྩོམ་གཙོ་བོ་བོད་འབྲེལ་གནད་དོན་ཐད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མགོ་ཁྲིད་ཀྱི་དགོངས་པ་གླེང་བ་ཞེས་པ་འདི་ཡིན་ཞིང་། འདིའི་ནང་དོན་གཙོ་བོ་ནི་མའོ་ཙེ་ཏུང་ནས་བཟུང་ཆིངས་ཡིག་དོན་ཚན་ ༡༧ བཞག་སྟེ། བོད་རྒྱ་ནག་གི་འོག་ཏུ་འགྱུར་རྗེས་ཀྱི་ཆིངས་ཡིག་དོན་ཚན་ ༡༧ གཙོས་པའི་མའོ་ཙེ་ཏུང་དང་ཏིང་ཞའོ་ཕིན། ཧུའུ་ཡའོ་པང་སོགས་ཀྱིས་ག་རེ་གསུངས་ཡོད་མེད་དང་། ཆིངས་ཡིག་དོན་ཚན་ ༡༧ ནང་ག་རེ་འཁོད་ཡོད་མེད་སོགས་ལ་ང་ཚོས་ཕྱིར་བལྟས་བསློགས་ནས་གཟིགས་ཚེ། དེའི་ནང་ལ་གནས་ཚུལ་མང་པོ་ཞིག་རྒྱ་ནག་གི་དཔོན་རིགས་ཚོས་གསུངས་བཞག་པ་མང་པོ་ཞིག་ལག་བསྟར་དང་དོ་སྣང་། བརྩི་སྲུང་བྱེད་ཀྱི་མེད་པ་དེར་ཉམས་ཞིབ་འདིའི་ཐོག་ནས་མཐོང་ཐུབ་ཀྱི་ཡོད།
དེ་བཞིན། རྒྱ་ནག་གཞུང་གིས་བོད་ཁུལ་དུ་གྲོང་ཁྱེར་འཛུགས་སྐྲུན་གྱི་དམིགས་ཡུལ་ཞེས་པ་འདི་རེད། དེ་སྔ་བོད་རང་སྐྱོང་ལྗོངས་ནང་ལ་ལྷ་ས་གྲོང་ཁྱེར་དང་ཁུལ་རིམ་པ་དྲུག་ཡོད་པ་བཅས་ཁྱོན་ས་ཁུལ་རིམ་པ་བདུན་ཡོད་ཁོངས་ནས། གྲོང་ཁྱེར་ལྷ་ས་གྲོང་ཁྱེར་མ་གཏོགས་གཞན་མེད་ཀྱང་། ད་ལྟ་ཁུལ་རིམ་པའི་གྲོང་ཁྱེར་གཞིས་རྩེ་དང་ཆབ་མདོ། ཉིང་ཁྲི་བཅས་གྲོང་ཁྱེར་ལ་བསྒྱུར་ཏེ་ད་ཆ་གྲོང་ཁྱེར་ ༤ བཟོས་ཡོད་པ་རེད། དེ་བྱིངས་ལྷོ་ཁ་དང་ནག་ཆུ། མངའ་རིས་བཅས་ཀྱི་རིམ་པས་གྲོང་ཁྱེར་ཅན་དུ་བསྒྱུར་རྒྱུ་ཡིན་སྐོར་གསལ་པོ་བྱས་ནས་གསུངས་ཡོད་སྟབས། དེ་ལྟར་བཟོ་དགོས་པའི་རྒྱུ་མཚན་གཙོ་བོ་གང་ལ་དམིགས་ཡོད་པ་སོགས་གསལ་བོར་བཀོད་ཡོད་པ་རེད། བོད་ནང་ལ་བོད་ཀྱི་སྐད་ཡིག་གནས་སྟངས་ག་རེ་ཆགས་ཡོད་པ་རེད། བོད་མི་རིགས་ས་ཁོངས་རང་སྐྱོང་ཡིན་ཟེར་ཏེ། ས་ཁོངས་རང་སྐྱོང་གི་བཅའ་ཁྲིམས་ནང་ལ་སྐད་ཡིག་སྲུང་སྐྱོབ་དང་འཛིན་སྐྱོང་སྤེལ་གསུམ་བྱེད་ཆོག་པ་བཀོད་ཡོད་ཀྱང་། བོད་ནང་དེ་ཚོ་ཡོད་མེད་དང་གནས་སྟངས་དེ་རང་ལ་གནས་ཡོད་མེད་ཐོག་ལ་དཔྱད་པ་བྱས་པ་ཞིག་ཆགས་ཡོད།
གྲོས་མཐུན་དོན་ཚན་བཅུ་བདུན་དེ་ཁྲིམས་མཐུན་ཆགས་ཀྱི་ཡོད་མེད་ཁྲིམས་ཀྱི་རྩོད་གཞི་ཞིག་ཆགས་བསྡད་ཡོད་ཀྱང་། རྒྱ་གཞུང་གིས་དེ་ཁྲིམས་མཐུན་ཞིག་ལ་བརྩིས་ནས་བོད་དེ་རྒྱ་ཁོངས་ལ་བསྒྱུར་བ་རེད་ཟེར་དུས། ཆིངས་ཡིག་དེ་འཇོག་མཁན་ང་ཕོད་གཙོས་པའི་མཁས་པ་མང་པོ་ཞིག་གིས་བོད་དེ་དམིགས་བསལ་ཅན་ཞིག་ཡིན་པ་དེ། བོད་མ་གཏོགས་རྒྱ་ནག་འོག་ལ་ཡོད་པའི་རང་སྐྱོང་ལྗོངས་དང་ཞིང་ཆེན་གང་འདྲ་ཞིག་ཡིན་ཡང་གྲོས་མཐུན་འདི་འདྲ་བཞག་ཡོད་པ་གཅིག་ཀྱང་ཡོད་པ་མ་རེད། བོད་དེ་དམིགས་བསལ་ཞིག་ཡིན་པ་ཆིངས་ཡིག་དོན་ཚན་བཅུ་བདུན་གྱིས་སྟོན་གྱི་འདུག་ཟེར་བ་དང་། ཉེ་ལམ་རྒྱ་ནག་གི་མཁས་པ་ཞིག་གིས་ཆིངས་ཡིག་དོན་ཚན་བཅུ་བདུན་བཞག་ནས་བོད་དེ་མེས་རྒྱལ་ཁྱིམ་ཚང་ཆེན་མོའི་ནང་ལོག་པ་རེད་ཅེས་བཤད་ཡོད་པ་དེ། གལ་སྲིད་དེ་དུས་ཁྱིམ་ཚང་ཆེན་མོའི་ནང་ལོག་པ་ཡིན་ན་དེའི་སྔོན་དུ་བོད་རྒྱ་ནག་ལས་ལོགས་སུ་ཡིན་པ་ཞིག་སྟོན་གྱི་ཡོད་པ་རེད་གསུངས་ཡོད་སྟབས། དེ་ཚོའི་གནས་སྟངས་གང་ཡིན་དང་གྲོས་མཐུན་དོན་ཚན་བཅུ་བདུན་གྱི་ངོ་བོ་གང་ཡིན་གསལ་པོ་བྱས་ནས་བཀོད་ཡོད་པ་རེད།
མཐའ་མ་བོད་ནང་ལ་རྒྱ་གཞུང་གིས་ལག་བསྟར་བྱེད་བཞིན་པའི་ཁྲིམས་སྒྲིག་དང་སྲིད་བྱུས་དེ། བོད་མི་མང་གིས་འགུལ་ཙམ་བྱས་ན་ཁ་བྲལ་རིང་ལུགས་ཀྱི་ཉེས་འདོགས་བྱས་ཏེ། བོད་མི་ཚང་མར་ཉེས་འགེལ་དང་སྡུག་གཅོང་གཏོང་གི་ཡོད་པའི་དངོས་མཐོང་དང་མྱོང་ཚོར་གཞི་ལ་བཞག་པའི་དཔྱད་རྩོམ་གཅིག་བཅས་ཡོད། དཔྱད་རྩོམ་དག་གཞི་རྩ་དང་ཁུངས་ཡོད་པ་ཐོག་ནས་བྲིས་པའི་དཔྱད་རྩོམ་དག་ཆགས་ཡོད་པ་མ་ཟད། རྩོམ་འདི་ཚོའི་ནང་ཡོད་པའི་གནད་དོན་དག་ནི་རྩོམ་པ་པོ་རང་ངོས་ཀྱི་རྩོམ་རེད་མ་གཏོགས། དཔྱད་རྩོམ་ནང་གི་གནད་དོན་དག་བོད་མིའི་སྒྲིག་འཛུགས་དང་ཉམས་ཞིབ་ཁང་གི་དགོངས་པ་མིན་སྟབས། འདིའི་ཐོག་ལ་ཡང་བསྐྱར་དཔྱད་པ་དང་བགྲོ་གླེང་ཡོང་སྲིད་པ་རེད་ཞུ་རྒྱུ་ཡིན། ཞེས་བརྗོད་སོང་།
སྲིད་སྐྱོང་བློ་བཟང་སེང་གེ་མཆོག་གིས་གསུངས་བཤད་གནང་དོན། ཉམས་ཞིབ་པ་ཞིག་ཡིན་སྐབས་མཐའ་མ་དེར་རྩོམ་ཡིག་ཡིན་མིན་མིན་གཅིག་འབྲི་དགོས་པ་མ་ཟད་འདོན་སྤེལ་བྱེད་དགོས་པ་རེད། རྩོམ་དེ་དག་ང་ཚོ་བོད་པའི་སྤྱི་ཚོགས་ཀྱི་གསར་འགྱུར་བརྒྱུད་ལམ་གཅིག་པོ་ཙམ་མིན་པར། རྒྱ་གར་དང་རྒྱལ་སྤྱིའི་སྡིངས་ཆའི་ཐོག་རིམ་པ་བྱས་ཏེ་ཐོན་ཐུབ་དགོས་ཀྱི་ཡོད་སྟབས། ད་ལན་གྱི་དུས་དེབ་འདི་བོད་ཀྱི་སྲིད་བྱུས་ཉམས་ཞིབ་ཁང་གིས་འདོན་སྤེལ་ཞུས་པའི་དུས་དེབ་ཐེངས་གཉིས་པ་དེ་ཆགས་ཡོད། ཉམས་ཞིབ་ཀྱི་དེབ་དང་པོ་དེ་སྔར་ལོ་དབྱིན་ཡིག་ཐོག་སིམ་ལའི་ཆིངས་ཡིག་བཞག་སྟེ་ལོ་ ༡༠༠ འཁོར་བའི་དུས་དྲན་ལ་ཁེལ་ཡོད་སྟབས། ང་ཚོས་ལྡི་ལིར་ཚོགས་འདུ་ཆེན་པོ་ཞིག་ཚོགས་པ་མ་ཟད་མཁས་པ་མང་པོ་ཞིག་གདན་འདྲེན་ཞུས་ཡོད་པ་རེད། སྔོན་མ་རྒྱ་གར་དང་བོད་ཀྱི་ལོ་རྒྱུས་ཐོག་གི་འབྲེལ་བ་དང་ཆིངས་ཡིག་བཞག་པ་དག་རྒྱ་གར་རྒྱལ་ས་ལྡི་ལིར་འགྲེམས་སྤེལ་བྱེད་ཐུབ་ཡོད་སྟབས། རྒྱ་གར་ནང་གི་ཞིབ་འཇུག་ལྟེ་གནས་ཁང་མང་པོ་ཞིག་གི་འགན་འཛིན་དང་ཞིབ་འཇུག་པ་མང་པོར་དོ་སྣང་བྱུང་ཡོད་པ་རེད། སྐབས་དེ་ནས་བཟུང་རྒྱ་གར་མཁས་པས་བོད་དོན་སྒང་ལ་རྩོམ་དང་དེབ་གང་ལ་གང་འཚམ་ཞིག་འཐོན་ཡོང་གི་འདུག གྲངས་ཀ་མང་པོ་མིན་ཡང་སྔར་ལོའི་ལོ་ ༥༠ གོང་དང་ད་ལྟའི་ཐོན་ཡོང་སྟངས་ལ་བལྟས་ན། ད་ལྟ་རྒྱ་ནག་དང་རྒྱ་གར་བར་གྱི་འབྲེལ་ལམ་ལ་བོད་དེ་གནད་འགག་ཆེན་པོ་ཡིན་པ་མ་ཟད། ས་མཚམས་དང་འབྲེལ་བའི་ཐོག་ལ་གནད་འགག་ཆེན་པོ་ཞིག་ཡིན་པར་ངོས་འཛིན་པའི་ཐོག་ནས་ཉམས་ཞིབ་པ་ཚོས་དོ་སྣང་གསར་པ་ཞིག་ཡོང་གི་ཡོད་པ་གསལ་བོ་རེད། ཅེས་གསུངས་སོང་།
སྲིད་སྐྱོང་མཆོག་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྐོར་གསུངས་དོན། སྤྲུལ་སྐུ་བསྟན་འཛིན་བདེ་ལེགས་དང་འབྲེལ་བའི་ཐོག་ནས་བློ་ཕམ་པའི་གནས་ཚུལ་ལ་དགོངས་པ་རྫོགས་སྟངས་ཡིན་ཡང་དོགས་ཟོན་རང་ཆགས་ཡོད་པ་རེད། སྤྲུལ་སྐུ་བསྟན་འཛིན་བདེ་ལེགས་ཀྱི་ནང་མི་ཚོས། ཁོང་དགོངས་པ་རྫོགས་སྟངས་དེར་ཏན་ཏན་དོགས་པ་ཆེན་པོ་ཟ་དགོས་པ་ཞིག་འདུག་གསུངས་པ་ལྟར། བཀའ་ཤག་དང་བོད་མིའི་སྒྲིག་འཛུགས་ཐོག་ནས་སེམས་འཚབ་ཆེན་པོ་ཞེ་དྲགས་ཡོད། དམིགས་བསལ་གནས་ཚུལ་གོ་ཐོས་བྱུང་བ་ཞིག་ལ་རྒྱ་ནག་གཞུང་གིས་སྤྲུལ་སྐུ་བསྟན་འཛིན་བདེ་ལེགས་ཀྱི་སྲིང་མོ་དང་། ཁོ་རང་གི་སྤུན་མཆེད་ཅིག་ལ་ཁོང་གི་སྐུ་ཕུང་གི་རུས་ཐལ་གནང་བ་དེ། ལམ་བར་དུ་མེད་པར་ཆགས་པ་མ་ཟད་ཁོང་གི་སྐུ་མཆེད་གཉིས་འཛིན་བཟུང་བྱས་ཏེ། གར་སོང་ཆ་མེད་ཆགས་ཡོད་པའི་བློ་ཕམ་པའི་གནས་ཚུལ་གོ་རྒྱུ་འདུག རྒྱ་ནག་གཞུང་གིས་དེ་སྔ་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེར་གཞི་མེད་སྐྱོན་འཛུགས་བྱས་ཏེ། བཙོན་ཁང་ནང་བཅུག་ཡོད་པ་བོད་མིའི་སྒྲིག་འཛུགས་ནས་ངོས་འཛིན་ཞུ་གི་ཡོད་པ་མ་ཟད། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་པ་དང་ཨ་རི་དང་དབྱིན་ཡུལ་སོགས་ཀྱིས་ཀྱང་། ཁོ་རང་ལ་གཞི་མེད་སྐྱོན་འཛུགས་དང་བཙོན་འཇུག་འོག་དགོངས་པ་རྫོགས་པ་སོགས་ལ་བློ་ཕམ་པའི་གསར་འགོད་གསལ་བསྒྲགས་གནང་ཡོད་པ་མ་ཟད། ཨ་རིའི་གྲོས་ཚོགས་ནང་ལའང་བགྲོ་གླེང་བྱུང་བ་སོགས་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་ཁྱབ་ཆེན་པོ་སྤེལ་སོང་། ཡིན་ཡང་ད་ལྟ་བོད་ནང་ལ་ཁོ་རང་ལ་གཉེན་ཚན་འགྲོ་མཁན་དང་ལུང་པ་གཅིག་པ་བརྒྱ་ཕྲག་སྟོང་ཕྲག་གིས་ངོ་རྒོལ་བྱས་ཏེ། རྣམ་པ་འདྲ་མིན་ཞིག་འགྲོ་བསྡད་ཀྱི་འདུག དེ་ཚོ་ཚང་མར་བོད་མིའི་སྒྲིག་འཛུགས་ཐོག་ནས་སེམས་འཚབ་ཆེན་པོ་ཡོད་ཞུ་རྒྱུ་དང་། སྲིང་མོ་དང་ནང་མི་སོགས་སུ་འཛིན་བཟུང་བྱས་ཀྱང་། འཕྲལ་དུ་ཀློད་གྲོལ་གཏོང་དགོས་པ་མ་ཟད། སྲོལ་རྒྱུན་གྱི་འགྲོ་སྟངས་ལྟར་ཁོང་གི་སྐུ་ཕུང་གི་རུས་ཐལ་ངེས་པར་དུ་ནང་མིར་རྩིས་སྤྲོད་གནང་རྒྱུ་ཤིན་ཏུ་གལ་ཆེན་པོ་རེད་ཞུ་རྒྱུ་ཡིན། ཞེས་གསུངས་སོང་།
མཇུག་ཏུ་གསར་འགོད་པས་སྲིད་སྐྱོང་མཆོག་ལ་བོད་ཀྱི་སྲིད་བྱུས་ཉམས་ཞིབ་ཁང་གིས་ཉམས་ཞིབ་བྱས་པ་དག་བོད་མིའི་སྒྲིག་འཛུགས་ཀྱི་སྲིད་བྱུས་རང་གི་ཐོག་ལ་ཉམས་ཞིབ་བྱས་པ་འདྲ་པོ་ཞིག་ཚོར་གྱི་འདུག་པས། མ་འོངས་པའང་དེ་ལྟར་ཡོང་གི་རེད་དྲིས་པར་ཁོང་གིས། ཉམས་ཞིབ་པ་ཚོས་ཉམས་ཞིབ་གནང་ཡུལ་གྱི་བརྗོད་གཞི་དེ་སྒེར་གྱིས་བདམས་ནས་གནང་བ་ཞིག་རེད་མ་གཏོགས། བཀའ་ཤག་ནས་ལམ་སྟོན་གནང་མཁན་སུ་གང་བྱུང་ཡོད་པ་མ་རེད། ང་ཚོའི་རེ་བར་ཉམས་ཞིབ་གནང་ཡུལ་དེ་ཉམས་ཞིབ་པ་ཚོས་དོ་དབྱིངས་ཡོད་པའི་གནད་དོན་དེར་ཉམས་ཞིབ་གནང་དགོས་རེད་མ་གཏོགས། ཉམས་ཞིབ་པ་དོ་བདག་ལ་དོ་དབྱིངས་མེད་པ་ཡིན་ན། འདི་འདྲ་ཞིག་བྱོས་ཤོག་ལབ་ན་ཁྲལ་སྐུལ་བ་ནང་བཞིན་མ་གཏོགས་ཉམས་ཞིབ་ཀྱི་སྤུས་ཚད་ཡག་པོ་ཡོང་གི་མ་རེད། དེར་བརྟེན་ཉམས་ཞིབ་པའི་བརྗོད་གཞི་འདེམ་སྟངས་དེ་དོ་བདག་རང་ཉིད་ཀྱིས་འདེམ་དགོས་པ་མ་ཟད། ཉམས་ཞིབ་བྱས་པའི་གྲུབ་དོན་གྱི་གནས་ཚུལ་ག་རེ་ཡིན་པ་དག་མར་འགོད་དགོས་པ་རེད། ད་ལན་ཉམས་ཞིབ་པ་ཚོས་བྲིས་བའི་དཔྱད་རྩོམ་གྱི་འོག་ཏུ་ཁུངས་བསྐྱལ་གྱི་ཡིག་ཆ་གང་ཡིན་གྱི་ཞབས་མཆན་བཀོད་པ་མ་ཟད། དེའི་འགན་འཁྲི་འཁུར་དགོས་པ་རེད། ཡིན་ཡང་བསྡོམས་གང་འདྲ་རྒྱག་མིན་དེ་ཉམས་ཞིབ་པ་ཁོ་རང་གི་ཐོབ་ཐང་རེད། ཅེས་གསུངས་བྱུང་།
