༄༅། ། འདི་ལོར་༸གོང་ས་མཆོག་གི་སྐུའི་འཁྲུངས་སྐར་ཉིན་རྡོར་གླིང་འཇམ་དབྱངས་བོད་ཀྱི་རིག་གཞུང་གཅེས་འཛིན་ཁང་གིས་བོད་མིའི་དབུ་ཁྲིད། འཛམ་གླིང་ཞི་བདེའི་དེད་དཔོན་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་སྐུའི་གྱ་སྟོན་སྲུང་བརྩི་ཞུ་བའི་ཆེད་དུ། མགོན་པོ་གང་ཉིད་ཀྱི་མཛད་འཕྲིན་གཙོ་བོར་གྱུར་པའི་རྒྱལ་བའི་བཀའ་དྲིན་ཞེས་པའི་སྙན་རྩོམ་འགྲན་སྡུར་ཞིག་གོ་སྒྲིག་ཞུས་པ་དང་། འགྲན་སྡུར་ཁྲོད་ཆ་ཤས་ལེན་མི་བོད་དང་། རྒྱ་གར་གྱིས་གཙོས་ཕྱི་རྒྱལ་ཡུལ་གྲུ་ཁག་ནས་ཁྱོན་བསྡོམས་ཤེས་ལྡན་གྱི་རྩོམ་པ་པོ་སུམ་ཅུ་སོ་དྲུག་གིས་རྩོམ་ཡིག་འབྱོར་ཞིང་། རྩོམ་ཡིག་ཁག་ལ་དཔྱད་འདེམས་པ་ཁག་གཉིས་སུ་བགོས་ནས་ཕྱོགས་བསྡོམས་ཀྱི་ཐ་མའི་གྲུབ་འབྲས་དེ་བཞིན་སྐུའི་འཁྲུངས་སྐར་དུས་ཆེན་ཉིན། རྡོར་གླིང་དབུས་གཞུང་བོད་ཀྱི་སློབ་གྲྭའི་ཚོགས་ཁང་ཆེན་མོའི་ནང་གསལ་བསྒྲགས་ཞུས་ཡོད་པ་དང་། ཐེངས་འདིའི་འགྲན་སྡུར་རྩོམ་ཡིག་སོ་དྲུག་ཁྲོད་ཀྱི་ཨང་དང་པོ་ནི་ཚེར་ནགས་རྡོ་རྗེ་རིན་ཆེན་ལགས་དང་། ཨང་གཉིས་པ་བཀྲ་བློ་ལགས། ཨང་གསུམ་པ་ཆོས་དགེ་གསེར་རྟ་ཐུབ་བསྟན་ཆོས་འཕེལ་ལགས་བཅས་ཡིན་པ་རེད། གསལ་བསྒྲགས་འདི་བརྒྱུད་ད་རེས་རྡོར་གླིང་འཇམ་དབྱངས་བོད་ཀྱི་རིག་གཞུང་གཅེས་འཛིན་ཁང་གི་རྩོམ་ཡིག་འགྲན་སྡུར་ནང་མཉམ་ཞུགས་གནང་མཁན་གྱི་རྩོམ་པ་པོ་གཞན་དག་དང་། རྩོམ་ཡིག་དཔྱད་འདེམས་པ་བྲག་ཡབ་སྐྱབས་མགོན་རིན་པོ་ཆེ་མཆོག་གིས་གཙོས་རྩོམ་ཡིག་དཔྱད་འདེམས་གནང་མཁན་གྱི་འབྲེལ་ཡོད་ཚང་མར་ཐུགས་རྗེ་ཆེ་རབ་ཏུ་ཆེ་ཆེ་ཞུ།
ཞེས་རྡོར་གླིང་འཇམ་དབྱངས་བོད་ཀྱི་རིག་གཞུང་གཅེས་འཛིན་ཁང་གིས་ཕྱི་ལོ་ ༢༠༡༥ ཟླ་ ༧ ཚེས་ ༢༠ ཉིན་ལ།
