བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༧༠ སྟེང་གི་རྩོམ་སྒྲིག་པའི་གཏམ།
ངས་མེར་འཚིག་མེར་གཏུག་གིས་བོད་ཀྱི་གཞོན་ནུ་ལྷན་ཚོགས་ཡང་བསྐྱར་གླེང་དགོས་བྱུང་། འདས་པའི་ལོ་གཉིས་གོང་དུ་གཞོན་ནུའི་ཚོགས་ཆེན་བཅོ་ལྔ་པ་འཚོགས་ལ་ཉེ་སྐབས། ངས་ཁ་བྱང་ལ་ “གཞོན་ནུའི་ཧོལ་རྒྱུག” ཅེས་པའི་རྩོམ་ཡིག་ཅིག་སྤེལ་བ་ཡིན། ཚོགས་གཙོ་ཚེ་དབང་རིག་འཛིན་གྱིས་ཚོགས་ཆེན་དབུ་འཛུགས་གཏམ་བཤད་དང་སྦྲགས་ཏེ། ངའི་རྩོམ་ཡིག་དེར་ཁ་རྡུང་མང་པོ་བཏང་སོང་། ཡིན་ཡང་གཞོན་ནུའི་སྣེ་དང་ཟུར་མང་པོ་ཞིག་ནས་མ་འོངས་པའི་གསལ་འདེབས་གལ་ཆེན་ཞིག་ཡིན་པའི་བསྔགས་བརྗོད་ཞུ་མཁན་ཡང་མང་པོ་བྱུང་།
བོད་ཀྱི་དུས་བབ་འདི་བོད་སྤྱི་བའི་ལས་དོན་འཁུར་དུ་འཁྱེར་མཁན་གྱི་རང་དབང་གི་གསར་ཁང་ཞིག་ཡིན་ལ། བོད་ཀྱི་གཞོན་ནུ་ལྷན་ཚོགས་དེའང་བོད་པའི་རྩ་དོན་འཐབ་རྩོད་བྱེད་མཁན་སྒྲིག་འཛུགས་གལ་ཆེན་ཞིག་རེད། མཚོ་འགྲམ་ན་ཁ་གཏད་དུ་ལངས་པའི་བྲག་རྡོ་དང་རླབས་རྒྱུན་ལྟར། ཁ་ཕྱོཊ་ནོར་བའི་འཛིང་རགས་ཀྱི་བྲག་རྡོར་གཡོ་འགུལ་ཡོད་མེད་གང་ལྟར་ཡང་། འཇགས་མི་སྲིད་པ་རླབས་རྒྱུན་གྱི་ཆོས་ཉིད་བཞིན། བོད་ཀྱི་དུས་བབ་ཀྱིས་ཡང་བསྐྱར་མེར་འཚིག་མེར་གཏུག་གིས་གཞོན་ནུའི་ལས་དབང་མི་གླེང་ཐབས་མེད་བྱུང་།
དབུས་རྒྱུན་སྐབས་བཅུ་བཞི་པའི་མཇུག་ཙམ་ནས་བཟུང་། གཞོན་ནུ་ལྷན་ཚོགས་གླེང་རྙོག་དང་ཁ་རྡུང་གི་གཏིང་ཞབས་སུ་ལྷུང་། ད་ལྟ་དབུས་རྒྱུན་སྐབས་བཅོ་ལྔ་པའི་ལས་མཇུག་ཏུ་བསླེབ་ལ་ཉེ་ཡང་། ད་དུང་མགོ་ཡར་མགྱོགས་ཐུབ་ཀྱིན་མེད་པར་ཁ་ཆག་རྣ་རལ་མུ་མཐུད་དུ་ཡོང་གི་ཡོད། འདི་ད་ལྟའི་དབུས་རྒྱུན་ཚོའི་ནོར་འཛོལ་ཞིག་མིན་པར། དབུས་རྒྱུན་སྔ་མ་དག་གིས་བྱས་ཉེས་བསགས་ཡོང་བ་དང་། གཞོན་ནུའི་རྒྱབ་ཀྱི་རྒན་འཁོགས་དག་གིས་སྒྲུབ་པའི་གཏོ་སྒྲོམ་དེ། ད་རེབ་སྐབས་བཅོ་ལྔ་པའི་དབུས་རྒྱུན་ཚོའི་མགོ་ཐོག་ནས་འབར་གས་བཞིན་ཐོར་བ་རེད།
ད་ལྟ་གཞོན་ནུར་གདམ་ཁ་མང་པོ་ཞིག་ལྷག་མེད། གཞོན་ནུའི་ལངས་ཕྱོགས་རང་བཙན་ལ་འགྱུར་བ་གཏོང་རྒྱུ་ཡིན་དང་མིན། གལ་སྲིད་ཆབ་སྲིད་ལངས་ཕྱོགས་ལ་འགྱུར་བ་གཏོང་འདོད་མེད་ན། གཞོན་ནུའི་སྒྲིག་གཞིར་ལེགས་བཅོས་བྱས་ཏེ། བོད་པའི་སྤྱི་དོན་ལ་འགན་འཁྱེར་ཕྱོགས་དང་ལས་དོན་བྱེད་ཕྱོགས་ཐོག་ནས་ཤེས་ཡོན་དང་སྤྱི་ཚོགས་ཞབས་ཞུ་དང་པོ་དང་། ཆབ་སྲིད་ལངས་ཕྱོགས་གཉིས་པར་བཞག་སྟེ་གཞོན་ནུ་བསྐྱར་འཛུགས་བྱེད་ཐུབ་བམ་མི་ཐུབ། འདི་བོད་ཀྱི་གཞོན་ནུ་ལྷན་ཚོགས་ཀྱི་འཆི་དང་གསོན་གྱི་གདམ་ཁ་དང་། འགྱེད་དང་ལང་གི་དྲི་བ་མཐའ་མ་དེ་རེད།
གཞོན་ནུའི་སྒྲིག་གཞི་དོན་ཚན་དང་པོ་དང་བཞི་པར་ཐག་གཅོད་གཙང་མ་ཞིག་མ་བྱུང་བར། གཞོན་ནུར་ཆིག་བསྒྲིལ་དང་རྩ་དོན་ཐོག་ནུས་པ་འཐོན་པའི་ལས་དོན་ཞིག་བྱེད་ཐུབ་པ་ཁག་པོ་རེད། བོད་རང་བཙན་བརྩད་ན་༧གོང་ས་མཆོག་དང་བོད་མིའི་སྒྲིག་འཛུགས་ཀྱི་དགོངས་པར་འགལ་ཡོད་མེད་གང་ལྟར་ཡང་། བོད་མིའི་སྒྲིག་འཛུགས་ཀྱི་ཆབ་སྲིད་བཞེངས་ཕྱོགས་དང་། ༧གོང་ས་མཆོག་གིས་ཡུན་རིང་འབད་བརྩོན་གནང་བའི་དོན་བྱ་ཞིག་ལས་ལོགས་སུ་ཕྱིན་ན། དེ་ལ་བོད་མི་མང་གིས་དགའ་མོས་བྱེད་མི་སྲིད་ལ། མང་ཚོགས་ཀྱི་རྒྱབ་སྐྱོར་མེད་པའི་ལངས་ཕྱོགས་ཤིག་ལ་ཤི་འཐམ་བྱས་ཀྱང་གྲུབ་འབྲས་འཐོན་མི་སྲིད་དོ།།
རྩོམ་སྒྲིགས་པའི་གཞོན་ལྷན་གྱི་དབུས་སྐྱོང་རྣམ་པར་འདམས་ཀ་ལེགས་པོ་གཉིས་གནང་འདུག་པའི་དེ་ཤར་སྐྱོད་བྱས་ན་བོད་ཀྱི་གཞོན་ནུ་ལྷན་ཚོགས་ཤི་གསོན་ལས་ཐར་བའི་རེ་བ་དེ་རེད་འདུག།་ བསམ་བློ་ནན་པོ་བཏོང་རོགས།་