གཙང་ཞོལ་བདེ་གསལ།
རང་རང་སོ་སོའི་རིང་ལུགས་ལ་གཟི་བྱིན་བསྒྲུབས་པའི་ཤུགས་ཀྱིས་གཅིག་ཤོས་རིམ་གྱིས་བག་ལ་ཞ་བར་གྱུར་མོད། ཅེས་མཁས་གྲུབ་ཆེན་པོ་འཇམ་དབྱངས་མཁྱེན་བརྩེའི་དབང་པོས་སྤྱིར་སངས་རྒྱས་བསྟན་པ་དང་སྒོས་བོད་ཀྱི་ས་དགེ་བཀའ་རྙིང་དང་ཇོ་ཞལ་བོ་དོང་སོགས་ཆོས་བརྒྱུད་ཁག་གི་འཕེལ་འགྲིབ་ལ་དཔྱད་འཇོག་གིས་གསུངས་པ་ཞིག་ཡིན་ལ། ལུང་དེས་རིག་གཞུང་སྣ་མང་གི་སྐྱེ་རྒ་ན་འཆི་འམ་འཇིག་རྟེན་གྱི་ཆོས་ཉིད་ཀྱང་སྟོན་གྱི་ཡོད། དེའི་ཕྱིར་སྟོབས་སུ་ཆེ་དང་རྒྱུད་འཛིན་སུ་མང་གིས་ཆོས་བརྒྱུད་ཀྱི་མཚོན་པའི་རིག་གནས་སྣ་མང་གི་དར་རྒུད་དང་འགྲན་རྩོད་ཁ་འཐབ་ཀྱི་ཡོད། ནང་བསྟན་ཆོས་གཞུང་སྟེ། རིག་གཞུང་སྦམ་མཐོན་པོ་ཞིག་གི་ཚེ་སྲོག་ལ་བརྒྱུས་པའི་རང་རེའི་ཆོས་བརྒྱུད་ཁག་གི་རིང་ལུགས་སྣང་མེད་དུ་འཇོག་མ་ཐུབ་པ་དེ་ཕ་མའི་ཁ་ཕོར་གཙང་ཞེན་ཙམ་ལ་མི་སེམས་པར་གནས་ལུགས་ཤིག་དང་སྤྱི་སེམས་ཤིག་གིས་མ་བཏང་བ་ཡིན་ཞེས་སྤོབས་པ་མཐོ་དགོས།
དུས་ཚོད་གཉན་འཕྲང་ཅན་འདི་འདྲ་ཞིག་ལ་རང་སེམས་རང་གིས་དཔང་བསྟད་དེ། ༸གོང་ས་མཆོག་གིས། རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་པའི་བཀའ་སློབ་ཀྱི་དགོངས་དོན་གཞི་ལ་འཛིན་རྒྱུ་ནི་བོད་མི་སྤྱི་བོ་གནམ་བསྟན་ཡོངས་ལ་འཁྲི་བའི་ལས་འགན་རེད། གངས་ལྗོངས་རྒྱལ་བསྟན་ཡོངས་རྫོགས་ཀྱི་མངའ་བདག་༸རྒྱལ་བ་ཐམས་ཅད་མཁྱེན་པའི་རླབས་ཆེན་གྱི་དབུ་ཁྲིད་འོག་དམ་ཚིག་རྡོག་རྩ་གཅིག་སྒྲིལ་ངང་གནས་རྒྱུ་ནི་བསམ་ཤེས་ཀྱི་བོད་མི་ཤི་གསོན་ཡོངས་ཀྱི་རེ་བ་རེད། འོན་ཀྱང་། བསྟན་བཤིག་ལ་སྟ་རེ་མི་དགོས་པའི་དཔེ་དོན་ལྟར་སྤྱི་ཚོགས་ཀྱི་ཟུར་རེ་རེ་ནས་ཉམས་ཆག་ལ་འགྲོ་དང་འགྲོ་མུས་ཀྱིས་མིག་མཐོང་ལག་ཟིན་གྱི་ཆག་སྒོ་ཆེན་པོ་ཞིག་གིས་ང་ཚོའི་སྒོ་བརྡུངས་ཡོང་དུས་ད་ག་རེ་བྱེད་ཀྱི་ཡིན་ནམ་ཞེས་པའི་དྲི་བ་དེ་རེད། འཇམ་མགོན་བླ་མ་ཙོང་ཁ་པ་ཆེན་པོས། ཐབས་གང་ཞིག་གིས་འཕེལ་བར་འགྱུར་སྙམ་པའི།། རྣམ་པར་དཔྱོད་པས་ཉིན་མཚན་འདའ་བར་ཤོག །གསུངས་པ་བཞིན། བཙན་པོ་དཔོན་སློབ་ཚོས་སྐུ་དྲིན་གྱིས་འཛམ་གླིང་རིག་གནས་ཀྱི་བང་མཛོད་ནང་དུ་བོད་རིག་པའི་འོད་སྣང་དེའི་ལོ་རྒྱུས་ཀྱི་སྤོབས་པ་མ་ཉམས་པའི་ངང་ནས་ཐབས་གང་ཞིག་དང་སྒོ་གང་ཞིག་ནས་རྒྱུད་འཛིན་དར་སྤེལ་གྱི་ཕྱོགས་སུ་རྣམ་རིག་སྒྲིམ་དགོས་པའི་རེ་སྐུལ་ཞུ་བཞིན་ཡོད། དེ་བཞིན་བོད་མིའི་ལས་སྣང་དང་འགྲོགས་པའི་དཔལ་ལྡན་ཇོ་ནང་པའི་ཆོས་བརྒྱུད་དེ་ཡང་ཉམས་ཆག་གི་སྒོ་ཅི་མང་ཞིག་བརྒྱུད་མྱོང་ཡོད་པ་བཤད་ཅི་ལ་དགོས། ཆོས་བརྒྱུད་དེའི་ཡོངས་གྲགས་ཀྱི་གདན་རབས་དང་པོ་རྗེ་ཀུན་སྤངས་ཐུགས་རྗེ་བརྩོན་འགྲུས་དང་། ཀུན་མཁྱེན་དོལ་པོ་པ་ཤེས་རབ་རྒྱལ་མཚན་སློབ་བརྒྱུད་དང་བཅས་པས་བོད་བརྒྱུད་ནང་བསྟན་དང་བོད་ཀྱི་རིག་གནས་འཛིན་སྐྱོང་ལ་མཛད་པ་རླབས་པོ་ཆེ་བསྐྱངས་ཡོད་པ་མ་ཟད། ཇོ་ནང་མ་དགོན་དང་། ཆོས་ལུང་བྱང་རྩེ། རྟག་བརྟན་ཕུན་ཚོགས་ཆོས་གླིང་སོགས་དབུས་གཙང་ཁུལ་དུ་དགོན་གནས་གྲགས་ཅན་མང་པོ་གསར་འདེབས་མཛད་དེ་ཐུན་མོང་མ་ཡིན་པའི་མཐོང་པ་བརྒྱུད་པའི་ཕྱག་ལེན་དང་ངེས་དོན་སྙིང་པོའི་བསྟན་པའི་འོད་སྟོང་གིས་ཁྱབ་པར་མཛད།
བོད་རབ་བྱུང་བདུན་པའི་ཤིང་སྤྲུལ་སྤྱི་ལོ་༡༤༢༤ནས་དཔལ་ལྡན་ཇོ་ནང་གི་རང་རྐང་འཛིན་པའི་ཤར་འཛམ་ཐང་དགོན་ཆེན་སོགས་མདོ་ཁམས་ཕྱོགས་སུ་དར་ཁྱབ་ཕྱིན་ཏེ་ད་ལྟའི་བར་དུ་ཇོ་ནང་པའི་བསྟན་པ་བསྟན་འཛིན་གྱི་སྡེས་བོད་མིའི་སེམས་ངོས་སུ་གོ་གནས་ངེས་ཅན་ཞིག་ཟིན་ཡོད་པ་རེད། དེ་ལྟ་ན། ཆོས་བརྒྱུད་དེའི་བསྟན་འཛིན་སྐྱེས་ཆེན་དག་དང་། དགེ་འདུན་འདུས་མང་། ལྷ་འབངས་ཡོན་བདག་དང་བཅས་པའི་དད་སེམས་དང་ཐོབ་ཐང་ལ་བརྩི་བཀུར་ཞུ་དགོས་པ་ལས། ང་ཚོས་སྣང་མེད་དུ་འཇོག་རུང་པ་ཞིག་གཏན་ནས་མ་རེད།
༢༠༠༦ ལོར་དྷ་རམ་ས་ལ་ནོར་བུ་གླིང་གར་བཙན་བྱོལ་བོད་ཀྱི་ཆོས་བརྒྱུད་ཀྱི་ཚོགས་འདུ་ཐེངས་དགུ་པ་འཚོགས་པ་རེད། དེ་དུས་ཇོ་ནང་པར་བོད་ཀྱི་ཆོས་བརྒྱུད་སྤྱི་མཚུངས་ལྟར་གྱི་གྲོས་ཚོགས་སུ་འཐུས་མི་འགྲོ་དགོས་མིན་སོགས་ཀྱི་གསུང་གླེང་གནང་དུས། སྐབས་དེའི་ས་སྐྱའི་སྤྱི་འཐུས་སོགས་ཀྱིས་ཇོ་ནང་ས་སྐྱའི་ཆོས་བརྒྱུད་ཀྱི་ཁུངས་ཡིན་པས་ཇོ་ནང་ཚབ་མཚོན་འཐུས་མི་གྲོས་ཚོགས་སུ་ཡོང་ན་མི་འགྲིག་པའི་དགག་བྱ་བྱས་པ་རེད་ཟེར་བའི་གསར་འགྱུར་དེ་གོ་ཐོས་བྱུང་། དེ་ནས་ཡོངས་གྲགས་ཀྱིས་ཤུགས་ཆེ་རུ་བཏང་སྟེ་ས་སྐྱའི་སྤྱི་འཐུས་དང་ས་སྐྱའི་གནད་ཡོད་མི་སྣ་འགས་བོད་ཀྱི་ཆོས་བརྒྱུད་ཚོགས་འདུ་ཐེངས་དུ་མར་ལན་གཅིག་མ་ཡིན་པར་མུ་མཐུད་ནས་ཤུགས་བརྒྱབ་པ་རེད། རང་ཉིད་ཇོ་ནང་པར་དམིགས་བསལ་གྱིས་ཆོས་དམ་ཚིག་གི་འབྲེལ་བ་མེད་ན་ཡང་། བོད་ཀྱི་ཆོས་བརྒྱུད་ཁག་གི་ད་ལྟའི་གནས་བབ་དང་འདས་པའི་ལོ་རྒྱུས་ལ་དོ་སྣང་ཡོད་མཁན་ཞིག་ཡིན་པའི་ཆ་ནས། སྤྱིའི་ཆོས་བརྒྱུད་ཁག་གི་མཐུན་ལམ་དང་དད་པ་དམ་ཚིག་ལ་བསམ་སྟེ་དེའི་སྐོར་གྱི་རྩོམ་ཡིག་རེ་འབྲི་ཁུལ་བྱས་པ་ཡིན།
༢༠༠༧ལོར་ས་སྐྱའི་སྤྱི་འཐུས་ཚེ་རིང་པོ་ལགས་ཀྱིས་ཇོ་ནང་ས་སྐྱའི་ཁོངས་གཏོག་ཡིན་པའི་སྒྲུབ་བྱེད་ཀྱི་དེབ་(གསལ་བར་བཤད་ན་བདེ་བླག་ཏུ་གྲུབ་པའི་གཏམ་ཨེ་མ་ཧོ་ཞེས་བྱ་བ་བཞུགས་སོ།།)ཟེར་བ་ཞིག་འགྲེམ་སྤེལ་བྱས་བྱུང་། སྐབས་དེར་སྤྱི་ཚོགས་སུ་རྩོམ་དེབ་དེ་ས་སྐྱའི་མཁན་པོ་རྒྱ་མཚོ་ལགས་ཀྱིས་བརྩམས་གནང་པ་རེད། ཚེ་རིང་པོས་དེ་འདྲ་ཤེས་ཀྱི་མ་རེད་ཟེར་བའི་སྐད་ཆ་མང་པོ་ཡོང་གི་འདུག ས་སྐྱའི་སྤྱི་འཐུས་ཀྱིས་ཡོངས་སུ་གྲགས་པའི་གསུང་བཤད་དེ་དག་ཇོ་ནང་པ་ཚོར་གཏམ་གསར་པ་ཞིག་ཡིན་ཙ་ན། བཙན་བྱོལ་བོད་ཀྱི་ཚགས་པར་ཁག་ཏུ་དེའི་སྐོར་གྱི་གནས་ཚུལ་གསལ་བཤད་ཀྱི་ལན་འདེབས་ནང་མང་ཙམ་ཐོན་པ་རེད།དེ་ནས་ཚེ་རིང་པོས་(ཇོ་ནང་མུན་སེལ་ཉི་མ་)ཟེར་བ་ཞིག་བོད་ཀྱི་དུས་བབ་ཏུ་བཀོད་ཅིང་། ཇོ་ནང་ས་སྐྱའི་ཁོངས་ཡིན་པ་སྒྲུབ་ཁུལ་བྱས་འདུག དེ་རྗེས་ཡང་(དཔལ་ཇོ་ནང་པའི་ཆོས་འབྱུང་དང་གདན་རབས་བསྐལ་བཟང་སངས་རྒྱས་དགྱེས་པའི་མཆོད་སྤྲིན་ཞེས་བྱ་བ་ཞུགས་སོ།། དེབ་ཕྲེང་གཉིས་པ།)ཟེར་བ་ཞིག་འགྲེམ་སྤེལ་བྱས། ༢༠༠༨ལོར་ཇོ་ནང་ངོས་ནས་ལན་འདེབས་ཀྱི་རྩོམ་དེབ་(དཔལ་ལྡན་ས་ཇོའི་གྲུབ་མཐའ་གཅིག་འཛིན་གྱི་ལོག་རྟོག་རྙོག་མ་སེལ་བའི་ནོར་བུ་ཀེ་ཏ་ཀའི་འཕྲེང་བ་ཞེས་བྱ་བ་བཞུགས་སོ།།) ཇོ་ནང་ནང་བསྟན་རིག་གཞུང་སྲུང་སྤེལ་མཐུན་ཚོགས་ནས་དཔར་བསྐྲུན་འགྲེམ་སྤེལ་ཞུས་པ་རེད། རྩོམ་ཡིག་དེ་དག་བོད་ནས་བསྐུར་ཡོང་པ་རེད་འདུག སྤྱིར་བཏང་བོད་དུ་དར་བའི་ཆོས་བརྒྱུད་དེ་དག་ཕན་ཚུན་ཁོངས་གཏོགས་ཡིན་པའི་ས་མཚམས་ཞིག་འཇོག་དགོས་ཚེ། ཆོས་བརྒྱུད་དེ་དང་དེའི་ཁོངས་གཏོགས་ཡིན་དགོས་པ་ལ། ཆོས་བརྒྱུད་དེའི་ཐོག་མའི་དབུ་འཛིན་པ་དེ་ཚོ་དེ་དང་དེའི་སློབ་རྒྱུད་ཡིན་ཞིང་། དེའི་ཐུན་མིན་གྱི་ཟབ་ཆོས་དག་གི་རྒྱུད་འཛིན་བསྙོན་མེད་ཅིག་དགོས་ཀྱི་རེད། ད་དུང་མ་དགོན་བུ་དགོན་གྱི་འཛིན་སྐྱོང་ཕྱག་ལེན་བཅའ་ཡིག་ཀྱང་ཅི་ལ་མི་དགོས། དེ་འདྲ་གཅིག་ཀྱང་མེད་པར་ཧམ་པ་བཤད་ན་བསྟན་པ་བཤིག་རྒྱུ་ལས་ཅི་ཞིག་ཡོད།
ཀུན་སྤངས་ཐུགས་རྗེ་བརྩོན་འགྲུས་སོགས་ས་སྐྱར་ཕྱིན་ཏེ། དཔལ་ས་སྐྱའི་མཁས་གྲུབ་དམ་པ་ཚོར་ཆོས་དམ་ཚིག་གི་འབྲེལ་བ་ཡོད་པ་ཙམ་གྱིས་ཇོ་ནང་པ་ཟེར་བའི་ཆོས་བརྒྱུད་དེ་ས་སྐྱའི་ཁོངས་གཏོགས་ཡིན་མི་དགོས། རྗེ་ཀུན་སྤངས་པར་ཐོག་མར་ཇོ་མོ་ནག་རྒྱལ་དུ་རི་ཁྲོད་ཅིག་ཡོད་པ་དེ་ས་སྐྱའི་བླ་མ་སུ་ཞིག་གིས་བཀའ་བཏང་ནས་བཞེངས་པ་རེད། ཡང་ན་བླ་མ་ཀུན་སྤངས་པས་རི་ཁྲོད་ཅིག་བཞེངས་ཏེ་ས་སྐྱར་ཕུལ་ནས་མ་དགོན་བུ་དགོན་གྱི་འབྲེལ་བའི་བཅའ་ཡིག་བཀའ་ཐམ་ས་སྐྱ་པ་སུ་ཞིག་གིས་གནང་པ་རེད། དེ་ཚོའི་གྲས་ཀྱི་དཔང་རྟགས་ཁུངས་སྐྱེལ་གྱི་ཡིག་ཆ་རེ་ཡོད་ན་ད་ལྟ་འཛིན་སྐྱོང་གི་ཁོངས་སུ་བསྡུ་བྱེད་ལ་མེད་དུ་མི་རུང་པའི་ལོ་རྒྱུས་ཀྱི་ཁུངས་ལུང་ཞིག་ཏུ་འགྲོ་བ་ལས། ཇོ་ནང་གི་གདན་རབས་འཛིན་པ་མང་པོ་ཞིག་ས་སྐྱར་ཆོས་འབྲེལ་མཆོད་ཡོན་གྱི་བཀའ་དྲིན་ཆེ་ཚུལ་དང་། རྗེ་བཙུན་ཏཱ་ར་ནཱ་ཐས་ས་སྐྱར་ཕོ་རུས་ཡོད་གསུངས་པ་ཙམ་གྱིས་ས་སྐྱའི་ཁོངས་ཡིན་པའི་སྒྲུབ་བྱེད་ལ་གཏན་ནས་འགྲོ་ཡི་མ་རེད། མི་སྐྱ་ང་འདྲ་ལྟ་བུ་ལའང་བོད་ཀྱི་ཆོས་བརྒྱུད་ཁག་ལ་ཕོ་རུས་ལ་རྒྱ་སེམས་གཏིང་ནས་ཡོད།
༡༩༩༧ལོ་ནས་སྐྱབས་མགོན་ཁལ་ཁ་རྗེ་བཙུན་དམ་པ་མཆོག་གིས་ཇོ་ནང་པར་ཆོས་བརྒྱུད་སྤྱི་མཚུངས་ཀྱི་ཐོབ་ཐང་བསྩལ་གནང་ཡོང་པའི་སྙན་ཞུ་ཐོག་མ་སྐུ་སྒེར་ཡིག་ཚང་ལ་ཕུལ་བ་དང་། ༡༩༩༩ལོར་སིམ་ལ་ཇོ་ནང་མ་དགོན་དང་ཁལ་ཁ་རྗེ་བཙུན་རིན་པོ་ཆེས་བཀའ་ཤག་ལ་སྙན་ཞུ་ཕུལ། དེའི་རྗེས་བོད་གཞིས་བྱེས་ཀྱི་ཇོ་ནང་པའི་དགོན་སྡེ་མང་པོས་ཆོས་དོན་ལས་ཁུངས་དང་གྲོས་ཚོགས་སུ་སྙན་ཞུ་རབས་དང་རིམ་པ་མང་པོ་ཕུལ་ཏེ་ད་བར་དུ་ཡོང་པ་རེད། གང་ལྟར། ཇོ་ནང་པ་ཆོས་བརྒྱུད་སྤྱི་མཚུངས་ཀྱི་ལམ་ལུགས་ཐོག་བསྐྱོད་པ་ལ་འགོག་རྐྱེན་མང་ཙམ་སྤྲད་ཡོང་དུས། ༸རྒྱལ་བ་པཎ་ཆེན་གྱིས་ཇོ་ནང་པར་དགོངས་པ་བཞེས་ཕྱོགས་དང་ཇོ་ནང་དགོན་ཐོ་བསྡུ་རུབ་ཀྱིས་ཆོས་དོན་དང་གྲོས་ཚོགས་སུ་ཕུལ་བ་དང་གཞིས་བྱེས་ཇོ་ནང་བླ་གྲྭ་ལྷན་རྒྱས་ཀྱི་མངོན་འདོད་རེ་བ་ཆུད་ཟོས་སུ་མི་འགྲོ་བའི་ཆེད་དུ། ས་དགེ་བཀའ་རྙིང་གཡུང་དྲུང་བོན་དང་བཅས་པའི་བོད་ཀྱི་བླ་ཆེན་དབུ་འཛིན་རྣམ་པའི་དྲུང་དུ་བཅར་ཏེ་ཐུགས་ཁུར་རྒྱབ་སྐྱོར་ཡོང་པའི་ཞུ་གསོལ་བཏབ་པར། ས་སྐྱ་གོང་མ་རིན་པོ་ཆེ་མཆོག་གིས་ཕྱག་ཡིག་དང་བཀའ་སློབ་ཕེབས་པ་ཁག་གཤམ་གསལ།
དང་པོ།
ཕུན་ཚོགས་ལུགས་བརྒྱའི་དཔལ་ལྡན་བོད་མི་དམངས་སྤྱི་འཐུས་ལྷན་རྒྱས་པའི་དྲུང་དུ། ཆེད་འབུལ།
…ཇོ་ནང་གྲུབ་མཐའ་འདི་བཞིན་སྔོན་བྱུང་རྣམ་ཐར་ལོ་རྒྱུས་ཁག་ནང་རྟེན་གཞི་ས་སྐྱ་པ་ལས་གྱེས་པ་གསལ་པོ་ཡོད་རུང་། ཆོས་བརྒྱུད་སྤྱི་མཚུངས་ཀྱི་ཐོབ་ཐང་གནང་ཕྱོགས་སྐོར་སྔོན་བྱུང་ལོ་རྒྱུས་ལ་དཔྱད་ཞིབ་དང་། ད་ལྟའི་དངོས་ཡོད་གནས་ཚུལ་ལ་དགོངས་བཞེས་ཀྱིས་དེ་གའི་ལྷན་ཚོགས་ནས་ཐག་གཅོད་མཛད་གནང་ཡོད་པ་ཞུ་རྒྱུ་བཅས་དགོངས་འཇགས་ཞུ། ར་ཛ་པུར་ནས། ས་སྐྱ་ཁྲི་འཛིན་པས། ༢༠༠༥ཟླ་༡༠ཚེས་༥དགེ་བར་ཕུལ།།
གཉིས་པ། ༢༠༠༧ ལོའི་ཕྱི་ཟླ་ ༡༢ ཚེས་ ༢༠ ཉིན།
…ལོ་རྒྱུས་དང་ཆོས་འབྱུང་སོགས་ལ་ཁུངས་གཏུགས་ཏེ། རྡ་རམ་ས་ལ་ནས་བཙན་བྱོལ་བོད་གཞུང་གིས་ཐག་བཅད་དགོས་པ་ཞིག་རེད་ལ། དེ་ལྟར་ཐག་བཅད་པ་ཡིན་ན། ང་ཚོ་ས་སྐྱ་སྤྱི་བའི་ངོས་ནས་དགག་བྱ་རྩ་བ་ནས་བྱེད་ཀྱི་མེད།
གསུམ་པ། ༢༠༠༩ཟླ་ཕྱི་༣ཚེས་༡༡ཉིན།
…སྤྱིར་ང་ཚོས་སྔོན་གྱི་ལོ་རྒྱུས་ཙམ་ཞུས་པ་ལས་ད་སྐབས་ཁྱེད་ཇོ་ནང་པར་ཆོས་བརྒྱུད་ཀྱི་ཐོབ་ཐང་ལ་དགག་བྱ་རྩ་བ་ཉིད་ནས་བྱེད་ཀྱིན་མེད།
བཞི་པ། ༢༠༡༥ཕྱི་ཟླ་༣ཚེས་༡༣ཉིན། ང་ཚོ་ས་སྐྱ་དང་ཇོ་ནང་གཉིས་ཐུན་མོང་མ་ཡིན་པའི་འབྲེལ་བ་ཡོད་པ་དེ་ཇོ་ནང་རང་གི་ཡིག་ཆའི་ནང་ཡོད་པ་དེ་ག་རེད། འོན་ཀྱང་ལྟ་གྲུབ་ཀྱིས་མཚོན་པའི་ཆོས་བརྒྱུད་རང་རྐང་ཚུགས་པ་ཞིག་ཡོད་པ་གསལ་བོ་རེད། སོང་ཙང་། ངོས་ཀྱིས་ཚོགས་ཆེན་སྟེང་ནས་(བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་ཆོས་ཚོགས་ཐེངས་བཅུ་གཅིག་པ། ཕྱི་ལོ་ ༢༠༡༡ ཟླ་ ༩ ཚེས་ ༢༢ ནས་ ༢༤ བར་)གསལ་བོ་བཤད་རྒྱུ་བྱུང་ལ། ཁྱེད་རང་ཚོར་ཡི་གེ་ཡང་ཕུལ་ཡོད། ཆོས་རིག་ལས་ཁུངས་དང་། ཆོས་བརྒྱུད་གཞན་ཁག་གིས་ཐག་གཅོད་ག་རེ་གནང་ན་ང་དེ་ག་རང་ཡིན། རྒྱབ་སྐྱོར་ཡོད། ཅེས་གསུངས་ཡོད།
དེ་ལྟར་སྔ་ཕྱིར་སིམ་ལ་ཇོ་ནང་མ་དགོན་གྱི་མཁན་པོ་མཁན་ཟུར་དང་བལ་ཡུལ་ཇོ་ནང་དགོན་པའི་འཐུས་ཚབ། འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་བཅས་ལ་གནང་པའི་ས་སྐྱ་གོང་མ་རིན་པོ་ཆེའི་བཀའ་སློབ་ཕྱག་རིས་དེ་དག་ལ་ང་རང་ཚོས་གུང་བསྒྲིག་ནས་དགོངས་པ་ལེན་ཤེས་ཀྱི་མེད་ལ། གྲོས་ཚོགས་སུ་ཕེབས་པའི་ས་སྐྱའི་སྤྱི་འཐུས་རྣམ་པ་གཉིས་དང་ས་སྐྱའི་གནད་ཡོད་མི་སྣ་མང་པོ་ཞིག་གིས་མངོན་གསལ་དོད་པོས་ཇོ་ནང་ལ་དཀའ་ངལ་སྤྲད་ཡོང་པ་མཐོང་དུས་ས་སྐྱ་སྤྱིའི་ལངས་ཕྱོགས་དང་གོང་མ་ཁྲི་རིན་པོ་ཆེའི་དགོངས་པ་དང་མཐུན་གྱི་ཡོད་མེད་བཤད་ཚོད་ཐིག་པ་ཞིག་མ་རེད། གང་ལྟར། ཆོས་རིག་ལས་ཁུངས་ཀྱི་བཀོད་སྒྲིག་འོག་༢༠༡༡ཕྱི་ཟླ་༩ཚེས་༢༢ནས་༢༤བར་འཚོགས་པའི་ཐེངས་བཅུ་གཅིག་པའི་བོད་ཀྱི་ཆོས་བརྒྱུད་ཀྱི་ཚོགས་མགོན་དུ་༸གོང་ས་སྐྱབས་མགོན་ཆེན་པོ་མཆོག་ཕེབས་ཏེ་བཀའ་གནང་དོན། ཇོ་ནང་ཆོས་བརྒྱུད་ཀྱི་ཁོང་ཚོས་དེ་རིང་ཐག་གཅོད་དགོས་ཀྱི་ཡོད་ཅེས་པའི་ངོས་ལ་སྙན་ཞུའི་ཡི་གེ་ཞིག་བཏང་འདུག རྩ་བའི་ཇོ་ནང་ངོས་ཀྱིས་ནམ་རྒྱུན་བཀའ་ཆོས་སྐབས་ཤོད་ཀྱི་ཡོད། དུས་ཀྱི་འཁོར་ལོའི་སྦྱོར་དྲུག་གི་ཉམས་ལེན་ལ་ཐུག་ན། ཇོ་ནང་གིས་ད་ལྟའི་བར་བསྟན་པ་བཟུང་ནས་བསྡད་པའི་བཀའ་དྲིན་རྗེས་སུ་དྲན་དགོས་པ་རེད། …ངོས་ཀྱི་འདི་བྱེད་འདི་མ་བྱེད་ཤོད་རྒྱུ་གང་ཡང་མེད་ཀྱང་། ཁྱེད་རང་ཚོས་དབྱིན་སྐད་ནང་བརྗོད་ན་(Seriously)དོན་གལ་ཆེན་པོ་བྱས་ཏེ་དགོངས་པ་བཞེས་རྒྱུའི་གནད་འགག་ཅིག་འདུག ཅེས་༸གོང་ས་སྐྱབས་མགོན་ཆེན་པོ་མཆོག་གིས་བཀའ་སློབ་སྤྱི་ཕེབས་གནང་སྟེ། སྐབས་དེའི་བླ་ཆེན་རྣམ་པ་དང་སྤྱི་མོས་ཀྱི་ཐག་གཅོད་ལ་དགོངས་པ་ཆེ་བཞེས་གནང་པ་དང་། ཐེངས་བཅུ་གཅིག་པའི་ཆོས་ཚོགས་སྟེང་ཆོས་དོན་ལས་ཁུངས་ནས་ཁྱེར་ཡོང་པའི་གྲོས་གཞི་དོན་ཚན་བརྒྱད་པ་ལ། གྲོས་ཆོད་ཀྱིས་གཏན་ལ་ཕབ་པའི་འབྲུ་དོན། རྒྱལ་བ་ཇོ་ནང་པ་ནི། ལྟ་གྲུབ་དང་ཆོས་བརྒྱུད་ཀྱི་ཆ་ནས་རང་རྐང་ཚུགས་པ་ཞིག་ཡིན་པར་ཆོས་ཚོགས་འདི་ཐོག་ནས་ངོས་འཛིན་བྱུང་བར་བརྟེན། ཞིབ་འཇུག་ཚོགས་ཆུང་དགོས་གལ་མ་མཆིས། འོན་ཀྱང་ཇོ་ནང་པར་ཆོས་བརྒྱུད་སྤྱི་འཐུས་ཀྱི་ཐོབ་ཐང་གནང་མིན་ནི་ཁྲིམས་བཟོ་ལྷན་ཚོགས་ཀྱི་འགན་དབང་ཡིན་པ་ལས་ཆོས་ཚོགས་འདིར་འབྲེལ་བ་མེད་པའི་ངོས་འཛིན་བྱུང་། ཞེས་དཔལ་ས་སྐྱ་གོང་མ་རིན་པོ་ཆེའི་མཚོན་པའི་ཆོས་བརྒྱུད་ཁག་གི་བླ་ཆེན་རྣམ་པ་དང་། ཆོས་དོན་བཀའ་བློན། ཆོས་བརྒྱུད་ཁག་གི་སྤྱི་འཐུས་བཅས་ཀྱིས་སྐབས་དེའི་གྲོས་ཆོད་ཁག་ལ་མང་མོས་ཀྱིས་ཐུགས་གཏན་ཁེལ་ཏེ་མཚན་རྟགས་བསྐྱོན་པ་རེད།
༸གོང་ས་མཆོག་གི་བཀའ་སློབ་གནང་དོན་དང་ཆོས་དོན་ལས་ཁུངས། ཆོས་བརྒྱུད་ཁག་སྤྱི་ནས་ཇོ་ནང་པར་སྤྱི་འཐུས་སོགས་ཆོས་བརྒྱུད་སྤྱི་མཚུངས་ཀྱི་ཐོབ་ཐང་སྤྲད་པ་ལ་དགག་བྱ་མེད་པར་ཐག་ཆོད་པ་རེད། ས་ཇོ་གཉིས་མ་དགོན་དང་བུ་དགོན་གྱིས་འབྲེལ་བའི་འཛིན་སྐྱོང་བཅའ་ཡིག་ནི་མེད་ལ། ཇོ་ནང་པ་ལྟ་གྲུབ་དང་ཆོས་བརྒྱུད་ཀྱི་ཆ་ནས་རང་རྐང་ཚུགས་པ་ཞིག་ཡིན་པར་སྤྱི་མོས་ཀྱིས་ཁས་ལེན་ཐག་གཅོད་གནང་པ་ཡིན་ན། ཁོངས་གཏོགས་ཟེར་བའི་སྐད་ཆ་དེ་བཤད་ས་མེད་པར་གྱུར་བ་རེད། ས་དགེ་བཀའ་རྙིང་གི་ཐ་སྙད་དེ་ཡང་ལྟ་གྲུབ་དང་ཆོས་བརྒྱུད་སོགས་ཀྱི་ཆ་ནས་རང་རྐང་ཚུགས་པ་རེ་ཡིན་པས་ངོས་འཛིན་དེ་ལྟར་བྱུང་པ་རེད། ཉི་མ་དེ་ནས་བཟུང་ཇོ་ནང་པ་ཚོས་བློ་སེམས་གཅིག་གིས་ཁྲིམས་བཟོ་ལྷན་ཚོགས་སམ་གྲོས་ཚོགས་སུ་བློ་ལེང་གིས་བཀལ་བ་རེད།
ད་ལོ་༢༠༡༥ཕྱི་ཟླ་༣པའི་གྲོས་ཚོགས་ཚོགས་དུས་དགུ་པ་ལ་སླེབས་དུས་ད་དུང་སྔོན་མ་ནང་ལྟར་དཔལ་ས་སྐྱའི་སྤྱི་འཐུས་ཀྱིས་དགག་བྱ་ཤུགས་ཆེན་བྱས་པ་དང་། གང་ལྟར་༣/༢༦ཉིན་གྲོས་ཚོགས་ནང་རྒྱབ་སྐྱོར་མ་ཐོབ་པར་ཕམ་སོང་པ་རེད། ང་རང་ཚོ་བོད་ཆོས་ལྡན་གྱི་སྤྱི་ཚོགས་ཤིག་ཡིན་པ་དང་། མི་མང་སྤྱི་བྱིངས་ཀྱི་དད་སེམས་དང་ཐོབ་ཐང་ལ་འབྲེལ་བ་ཤུགས་ཆེན་ཡོད་པའི་དོན་དག་འདི་འདྲར་ཕོག་ཐུག་ཤོར་སོང་བའི་ཆ་ནས། སྐབས་དེར་ཇོ་ནང་པའི་སེར་སྐྱ་ཕོ་མོ་དབྱེར་མ་མཆིས་པར་ཧ་ཅང་བློ་ཕམ་ཡིད་ཆད་ཀྱིས་གཏམ་བཤད་དང་རྩོམ་ཡིག་གི་གྲངས་ཀ་འབོར་ཆེན་སྤེལ་ཡོང་སྟངས་ལ་བལྟས་དུས། བོད་གཞིས་བྱེས་གཉིས་སུ་གྱེས་པའི་དུས་གཉན་པོ་འདིར་རེ་བ་དང་ཡིད་ཆེས་བཅངས་པའི་སྤུན་ཟླ་ཚོའི་སེམས་ཁམས་ལ་བདག་སྐྱོང་མ་ཐུབ་པར་དགྲ་དགའ་གཉེན་སྡུག་གི་ལས་སུ་གྱུར་ན་ཅི་བྱའམ་སྙམ་པའི་ང་ཚོར་སེམས་ཁྲལ་ཆེན་པོ་ཡོང་གི་འདུག
ཇོ་ནང་གི་དོན་དག་དེ་ཁ་ཡར་བསྒྱུར་མར་བསྒྱུར་གྱིས་ཆབ་སྲིད་པའི་རྩེད་ཆས་སུ་གྱུར་སོང་པ་དེ་བློས་མི་བཟོད་པ་ཞིག་རེད། འདིར་འཛོམས་ཀྱི་ཇོ་ནང་པ་ཚོ་བོད་མིའི་དང་བླང་དཔྱ་ཁྲལ་འབུལ་མཁན་ཞིག་ཡིན་པའི་ཆ་ནས། བཙན་བྱོལ་བོད་མིའི་ཁྲིམས་མཐུན་གྱི་དམངས་གཙོའི་ཁེ་དབང་ལོངས་སུ་སྤྱད་དེ་གྲོས་ཚོགས་སྒོ་འགྲམ་ལ་རྣམ་འགྱུར་ཞིག་བསྟན་ནས་བསྡད་པ་ལ། འགྲེལ་བཤད་གཞན་པ་བརྒྱབ་སྟེ་ཁ་ཕྱོགས་ལོག་ལམ་ལ་འཁྲིད་ཨེ་ཐུབ་བལྟ་མཁན་གྱི་ཚོགས་སྡེ་དང་མི་སྒེར་མང་ཙམ་ཡོད་ཚོད་རེད། ཇོ་ནང་པས་ང་ཚོར་བཏོན་པའི་རེ་འབྲས་ལ་སྨྱུ་གུ་ཐོགས་སུ་མ་བཅུག་པར། བོད་ཀྱི་ཆོས་བརྒྱུད་ཅིག་གི་བསྟན་པ་འཛིན་སྐྱོང་སྤེལ་གསུམ་དང་འབྲེལ་བ་ཏན་ཏན་ཡོད་པའི་དོན་དག་ཅིག་ལ་ཚོད་འཛིན་མགོ་གནོན་བྱས་ན་བོད་མི་མང་གི་ཡིད་ངོར་འཚམ་པ་ཞིག་གཏན་ནས་མིན། འཐུས་མི་རྣམ་པ་ཚོས་བོད་སྤྱིའི་འཕྲལ་ཕུགས་ལ་ཐུགས་འགན་བཞེས་ཏེ། ང་རང་ཚོའི་ནང་ཁུལ་གྱིས་སེལ་ཐུབ་པའི་དཀའ་ངལ་དེ་དག་ཕ་རོལ་དགྲ་བོའི་མཐོང་སར་གོ་སྐབས་དམ་འཛིན་བྱས་ཏེ་སྤྱི་ཚོགས་སམ་མི་མང་གིས་ཡིད་ཆེས་ངོས་ཟིན་ཐོབ་པའི་མིག་ལྟོས་བཟང་པོ་འཇོག་དགོས་པ་ལས། ནང་ཁུལ་ལ་འབུར་འཇོམས་གཏོང་རྐྱང་བྱས་ཏེ་སྒེར་དོན་སྤྱི་ལ་ཁྱེར་བའི་ངོ་གདོང་སྐྱོ་ཐག་ཆོད་རེ་བསྟན་ཡོང་ན་མི་མང་འཐུས་མི་ཞིག་གི་འགན་འཁྲིའི་དམ་ཚིག་མ་སྲུང་བ་རེད། ས་ཇོ་གཉིས་བོད་ཀྱི་ཆོས་བརྒྱུད་བྱེ་བྲག་པ་རེ་རེ་ཡིན་པ་གང་ཞིག་ལ། ཆོས་འབྲེལ་དང་ཐུགས་མཐུན་མཉེས་གཤིན་གྱི་དམ་ཚིག་ལ་ཉམས་ཆག་བཏང་པ་འདི་ཅི་འདྲའི་ཕངས་སེམས་སྐྱེ་དགོས་པ་ཞིག་རེད།
དུས་སྐབས་འདི་འདྲ་ཞིག་ལ་ཆབ་སྲིད་པའི་བྲན་གཡོག་ཏུ་གྱུར་ཏེ་བསྟན་སེལ་སྡེ་འཁྲུག་བསླངས་པ་འདི་ཧ་ཅང་ཐབས་སྐྱོ་པོ་རེད། ཆོས་བརྒྱུད་སྤྱི་འཐུས་རེའི་མིང་ཁུར་ཡང་། ཆོས་བརྒྱུད་ནང་ཁུལ་གྱི་འབྲེལ་བའི་དམ་ཚིག་ལ་བསམ་བློ་སྤུ་རྩེ་ཙམ་ཡང་མི་གཏོང་པར་སོ་སོའི་འགན་འཁྲི་སྣང་མེད་དུ་གཡུགས་པ་དངོས་གནས་ཡ་མཚན་རེད། སྤྱི་འཐུས་རྣམ་པ་ཚོས་ཇོ་ནང་པའི་དོན་དངོས་ཀྱི་དཀའ་ཁག་དང་གནས་ལུགས་གཞི་ལ་བཞག་སྟེ་ཐུགས་བསམ་ཆེ་བཞེས་གནང་རྒྱུ་ནི་དངོས་གནས་གནད་འགག་ཅིག་མི་འདུག་གམ། ཇོ་ནང་པ་ཚོར་ཡང་ད་རེས་གྲོས་ཚོགས་སུ་རྒྱལ་ཁ་མ་ཐོབ་པ་དེ་ཙམ་གྱིས་གཞུང་སྒེར་གཉིས་ཆ་ལ་མཚན་སྨོད་ཞུ་བ་དང་མཆོང་ཆོག་ཆོག་གི་བསམ་བློ་ཁུར་ན་ཉེན་ཁ་འཕྲད་ཀྱི་རེད། རང་སྣང་གང་དྲན་གྱིས་རླུང་ཁར་མི་གཡེང་བར་ཚུགས་ཟིན་པ་དང་གཞུང་དྲང་པོ་གནང་རྒྱུ་གལ་ཆེན་རེད། སྔ་ཕྱི་མ་གཏོགས་ཇོ་ནང་པའི་དོན་དག་འདི་མུར་ལྷག་འགྲོ་ས་གཏན་ནས་མེད་པར་གནས་ལུགས་དང་སྤྱི་ཚོགས་ཀྱིས་རྒྱལ་ཁ་སྤྲད་ཡོང་གི་རེད། བདེན་པ་ཉིད་རྣམ་པར་རྒྱལ་གྱུར་ཅིག །
བདེ་གསལ་ལགས། ༸གོང་ས་ལྔ་བའི་སྐབས་ཇོ་ནང་པ་གཙང་ནས་མདོ་སྨད་དུ་རྒྱང་འབུད་བཏང་དོན་དང་། ཆོས་ཚོགས་ཐེངས་ ༡༡ པའི་སྐབས་༸གོང་ས་མཆོག་གིས། “ཁོང་ཚོས་ངོས་ལ་ཡི་གེ་འདི་བྲིས་པ་རེད། ངོས་ཀྱིས་འདིར་བཤད་ཡོད་དོ་ཞེས་བརྗོད་ནས་འགྲོ་གི་ཡིན། ཤེས་སོང་ངམ། ངོས་ཀྱིས་བརྗོད་མི་འདུག་ཟེར་ན་ཆོ་མེད། ངོས་ཀྱི་ཞྭ་མོ་ཕུད་པ་ཡིན། ག་རེ་བྱེད་མིན་ཁྱེད་རང་ཚོས་ཐག་གཅོད་རྒྱུ་རེད།” ཅེས་གསུངས་པའི་སྐོར་གཉིས་ལ་དྲང་བདེན་གྱི་འགྲེལ་བཤད་རེ་དགོས་རྒྱུ་གལ་ཆེ་སྙམ། ད་དུང་ཆོས་ཚོགས་ཐེངས་ ༡༢ པའི་སྐབས་ཆོས་བརྒྱུད་ཆེན་པོ་བཞི་དང་གཡུང་དྲུང་བོན། ཞེས་པ་ལས། ཇོ་ནང་ཞེས་པ་བཅུག་མི་དགོས་པ་མང་མོས་ཐག་གཅོད་བྱས་ཡོད་སྐད་འདུག་པས་ངན་ཁག་རྣམས་ཆོས་ལུགས་སྤྱི་འཐུས་རང་ལ་བཀལ་ན་མི་འགྲིག་པར་སྙམ།
གསལ་བཤད་དགོས་པ་ཞིག་ལ།
(གསལ་བར་བཤད་ན་བདེ་བླག་ཏུ་གྲུབ་པའི་གཏམ་ཨེ་མ་ཧོ་ཞེས་བྱ་བ་
བཞུགས་སོ།། ས་སྐྱ་སྤྱི་འཐུས་ག་ཟི་དགེ་བཤེས་ཚེ་རིང་པོ་ནས་འགྲེམས་སྤེལ་
ཞུས།།) ཟེར་བ་དང་། གཞན་པ་དེ།
(དཔལ་ཇོ་ནང་པའི་ཆོས་འབྱུང་དང་གདན་རབས་བསྐལ་བཟང་སངས་རྒྱས་དགྱེས་པའི་མཆོད་སྤྲིན་ཞེས་བྱ་བ་ཞུགས་སོ།། དེེབ་ཕྲེང་གཉིས་པ། དཔལ་ས་
སྐྱ་སྤྱི་འཐུས་ག་ཟི་དགེ་བཤེས་ཚེ་རིང་པོས་བརྩམས།།)ཞེས་བྲིས་འདུག གང་ལྟར་དེབ་ཕྲེང་དང་པོ་དེ་འགྲེམས་སྤེལ་ཞུས་ཟེར་བ་ཙམ་ལས་གསལ་ཆ་མི་འདུག དོན་དངོས་སུ་མཁན་པོ་རྒྱ་མཚོ་ལགས་ཀྱིས་བྲིས་པ་ཡིན་ནམ་མིན།