ཉེ་ལམ་བོད་མིའི་སྒྲིག་འཛུགས་འོས་བསྡུ་ལྷན་ཁང་གིས་སྐབས་བཅུ་དྲུག་པའི་སྤྱི་འཐུས་དང་སྐབས་གཉིས་པའི་སྲིད་སྐྱོང་འོས་བསྡུའི་ལས་རིམ་སྐོར་ལ་སྒྲིག་གཞི་ཁག་ཅིག་གསལ་བསྒྲགས་གནང་བ་དང་བསྟུན་ཏེ། འདི་གའི་གསར་འགོད་པས་དབུས་འོས་བསྡུ་ལས་ཁང་གི་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་སུ་འོས་བསྡུའི་ལས་རིམ་ཐོག་གི་བྱེ་བྲག་གི་གནད་དོན་འགའི་ཐོག་དོགས་འདྲི་ཁག་ཅིག་ཞུས།
དྲི་བ། འོས་བསྡུའི་སྒྲིག་གཞིའི་ནང་སྲིད་སྐྱོང་གི་འོས་བསྡུའི་ཁྱབ་བསྒྲགས་ཆེད་ཧིན་སྒོར་འབུམ་ ༨ དང་། སྤྱི་འཐུས་འབུམ་ ༣ བཅས་ཀྱི་འགྲོ་སོང་ལས་གཏོང་ཆོག་གི་མེད་སྐོར་བཀོད་འདུག འགྲོ་སོང་ཇི་ལྟར་བཏང་བ་དང་ག་ཚོད་ཅིག་ཡོད་མེད་ཀྱི་གཞི་འཇོག་ས་གང་འདྲ་ཡོད་དམ།
ལན། ང་ཚོས་གཏན་འབེབས་བྱས་པའི་སྐབས་སུ་འགྲོ་སོང་གི་གཞི་འཛིན་ས་འདི་རེད་ཅེས་རྡོག་རྡོག་གང་ཡང་མེད་ཀྱང་། སྤྱིར་བཏང་སྲིད་སྐྱོང་གི་འོས་གཞི་བཞེངས་མཁན་ཞིག་བོད་པའི་གནས་ཡུལ་ཁག་ལ་ཕེབས་པ་དང་ཚོགས་འདུ་སྐོང་བ། ཡིག་ཆ་བཀྲམས་པ་སོགས་པ་ཚོད་དཔག་བྱས་ཏེ། འགྲོ་སོང་མཐོ་བོ་མ་ཡིན་པ། དམའ་བོའང་མ་ཡིན་པའི་འབྲིང་ཙམ་གྱི་སྟེང་ལ་གཏན་འབེབས་བྱས་པ་ཞིག་རེད་མ་གཏོགས།དམིགས་བསལ་འདི་དང་འདི་ཡིན་ཟེར་ནས་གསལ་ཁ་དོད་པོ་ཡོད་མ་རེད། འོས་གཞི་བྱེ་བྲག་པ་ཞིག་གིས་འོས་བསྡུའི་ཁྱབ་བསྒྲགས་བྱེད་པར་ཕར་འགྲོ་ཚུར་འགྲོ་བྱེད་སྐབས་གནམ་གྲུར་འགྲོ་དགོས་ཁེལ་བ་སོགས་འབྱུང་བཞིན་ཡོད་སྟབས། དེ་ཚོའི་རིགས་ལ་འགྲོ་སོང་ཕྲན་བུ་འགྲོ་གི་ཡོད་པ་རྒྱུ་མཚན་དུ་བྱས་ནས་སྲིད་སྐྱོང་གི་འོས་བསྡུའི་ཁྱབ་བསྒྲགས་ཆེད་ཧིན་སྒོར་འབུམ་བརྒྱད་དང་། སྤྱི་འཐུས་རེར་འབུམ་གསུམ་བཞག་པ་རེད། དེ་གཞིར་བཟུང་གིས་འོས་གཞི་བྱེ་བྲག་པ་སོ་སོ་ག་པར་ཕྱོགས་བསྐྱོད་ཕྱིན་པའི་རྩིས་ཁྲ་དང་བྱུང་འཛིན་དང་བཅས་པ་དབུས་འོས་བསྡུ་ལས་ཁང་ལ་འབུལ་དགོས་པ་རེད།
དྲི་བ། ད་ལྟ་ལས་ཀྱི་སྣེ་མོར་ཡོད་མཁན་ཚོ་སྲིད་སྐྱོང་དང་སྤྱི་འཐུས་ཀྱི་འོས་བསྡུའི་ནང་ལངས་ན། གཞུང་དོན་ཕྱོགས་བསྐྱོད་སྐབས་འོས་བསྡུའི་ཁྱབ་བསྒྲགས་དང་གཅིག་པ་ལྟ་བུ་ཆགས་ཏེ། འོས་མི་གཞན་དང་བསྡུར་ན་འགྲོ་སོང་སོགས་ཕྱོགས་གང་ཅིའི་ཐད་ནས་ཁེ་ཕན་ཆེ་བ་འཐོབ་ཀྱི་ཡོད་པ་མ་རེད་དམ།
ལན། དེ་འདྲ་རང་མ་རེད། དེ་འདྲའི་གནད་དོན་གྱི་ཐོག་ནས་ང་ཚོས་སྒྲིག་གཞི་དོན་ཚན་ ༢༤ པའི་ནང་གསེས་བརྒྱད་པ་དེ་དམིགས་སུ་བཀར་ནས་ད་ལྟའི་བོད་མིའི་སྒྲིག་འཛུགས་ནང་ལ་དཔལ་ལྡན་སྲིད་སྐྱོང་ཡིན་པ་ཡིན་ནའང་འདྲ། དེ་བཞིན་བཀའ་བློན་རྣམ་པ་དང་སྤྱི་འཐུས་རྣམ་པ་ཚོ་འོས་གཞིའི་ནང་བཞེངས་རྒྱུའི་ཐུགས་འདོད་ཡོད་མཁན་ཚོ་གཞུང་འབྲེལ་ངོ་བོའི་ཐོག་ནས་འོས་བསྡུའི་བགྲོ་གླེང་སོགས་སུ་བཅར་ཆོག་གི་མ་རེད་ཟེར་བ་དང་། དེ་མིན་དངུལ་དངོས་དང་ལས་བྱེད་ལ་སོགས་པ་བེད་སྤྱོད་གཏང་ན་འགྲིག་གི་མ་རེད་ཅེས་བཀོད་ཡོད་པ་རེད། དེ་བཞིན། གཞུང་འབྲེལ་ཕྱོགས་སྐྱོད་སྐབས། འོས་བསྡུ་དང་འབྲེལ་བའི་གཏམ་བཤད་རིགས་ཀྱང་གནང་ན་འགྲིག་གི་མ་རེད། ང་རང་གིས་ཚོད་དཔག་བྱས་ན། ལས་ཀྱི་སྣེ་མོར་ཡོད་མཁན་ཚོ་འོས་གཞིར་ལངས་མཁན་གཞན་དག་ལས་གོ་སྐབས་སོགས་གང་ཅིའི་ཐད་ནས་ཉུང་བ་དང་གྱོང་རེག་མཁན་དེ་ཆགས་ཀྱི་རེད་བསམ་གྱི་འདུག
དྲི་བ། ཉེ་ལམ་སྲིད་སྐྱོང་གི་འོས་མི་གསུམ་གྱིས་གསར་འགོད་གསལ་བསྒྲགས་གནང་ཡོད་པར་བརྟེན། ཁོང་རྣམ་པས་འོས་བསྡུའི་སྒྲིག་གཞིའི་ནང་གསལ་ལྟར་འོས་བསྡུ་ལས་ཁང་ལ་ཆོག་མཆན་དང་སྙན་སེང་ཞུས་ཡོད་དམ།
ལན། ངས་ཚོད་དཔག་བྱས་ན་ཁོ་ཚོས་ཏན་ཏན་སྙན་སེང་ཞུས་ཡོད་རེད་བསམ་གྱི་འདུག ང་ཚོས་ད་ལྟ་དམིགས་བསལ་འདིའི་སྐོར་ལ་སྙན་སེང་ཞུས་ཡོད་མེད་སྐད་ཆ་འདྲི་རྒྱུ་བྱུང་ཡོད་པ་མ་རེད། གལ་སྲིད་ཞུས་མེད་པ་ཡིན་ན་ང་ཚོའི་ལམ་སྟོན་སྒྲིག་གཞིའི་ནང་གསལ་བ་ལྟར། ཁོ་ཚོས་དྲིལ་བསྒྲགས་ལས་འགུལ་ག་རེ་སྤེལ་གྱི་ཡོད་ཀྱང་བཀག་སྡོམ་བྱེད་ཆོག་གི་ཡོད་པ་རེད།
དྲི་བ། སྲིད་སྐྱོང་དང་སྤྱི་འཐུས་ཀྱི་འོས་མི་བྱེ་བྲག་པ་ཞིག་གིས་འོས་བསྡུའི་ཁྱབ་བསྒྲགས་ཀྱི་འགྲོ་སོང་རྩིས་ཁྲའི་ཐད་ནས། དང་བླངས་རྒྱབ་སྐྱོར་ཁྱབ་བསྒྲགས་བྱེད་མཁན་མང་པོ་ཞིག་ཡོང་གི་ཡོད་པ་རེད། དེ་བཞིན་འགྲོ་སོང་མེད་པའི་གསལ་བསྒྲགས་རིགས་བཅས་ཀྱི་ཐད་སྒྲིག་སྲོལ་གང་འདྲ་ཡོད་དམ།
ལན། དེ་ཚོའི་རིགས་ལ་ང་ཚོའི་ལམ་སྟོན་ནང་ཡོད་པ་དེ་འོས་གཞི་དོ་བདག་སོ་སོ་དང་དེའི་ཆོག་མཆན་ཡོད་པའི་རྒྱབ་སྐྱོར་བ་ཚོས་ལས་འགུལ་སྤེལ་བ་ཡིན་ན། དེའི་འགྲོ་སོང་དེ་ཚོ་འོས་གཞིའི་སྐྱེ་བོ་དེ་རང་གི་ཁོངས་ལ་བརྩི་དགོས་པ་ཞིག་ཆགས་ཡོད་ཀྱང་། དེ་མིན་ཆོག་མཆན་མེད་པར་མི་གཞན་གྱིས་གང་བྱུང་འགྲོ་སོང་བཏང་བ་སོགས་བྱས་ཚེ་འགྲིག་གི་ཡོད་པ་མ་རེད། ང་ཚོས་ཆོག་མཆན་མེད་པར་འགྲོ་སོང་བཏང་བའི་རིགས་བརྩད་ཆོད་པ་ཡིན་ན། གནས་སྟངས་ལ་དཔག་པའི་དོ་བདག་ཁོ་རང་ལ་ཉེས་ཆད་གཅོད་རྒྱུ་རེད། འགྲོ་སོང་མེད་པའི་གསལ་བསྒྲགས་རིགས་འདིའི་ནང་དུ་ཚུད་ཀྱི་མེད་ཀྱང་། འོས་མིའི་ཆོག་མཆན་མེད་པར་དེ་རིགས་བྱེད་ཆོག་གི་ཡོད་པ་མ་རེད།
དྲི་བ། སྲིད་སྐྱོང་གི་འོས་བསྡུའི་ཁྱབ་བསྒྲགས་སྐབས་སྲིད་སྐྱོང་གི་འོས་མི་བྱེ་བྲག་པ་ཞིག་གི་རྒྱབ་སྐྱོར་བས་འོས་མི་གཞན་གྱི་གྱང་སྦྱོར་པར་རིས་ཀྱི་གསལ་བསྒྲགས་བཀོག་པ་དང་ནག་གསུབ་གཏོང་བ་སོགས་བྱས་ཚེ། དེ་ལ་ཉེས་པ་དང་ཆད་པ་དེ་འདྲ་ཡོད་དམ།
ལན། མ་འོངས་པར་དེ་འདྲའི་གནས་ཚུལ་ལྷག་པ་ཡིན་ན། ས་གནས་འོས་བསྡུ་ལས་ཁུངས་བརྒྱུད་དབུས་ལ་སྙན་སེང་ཞུ་དགོས་པ་དང་། ས་གནས་ཀྱིས་དེ་རིགས་མ་ཡོང་བ་བྱེད་དགོས་པ་མ་ཟད། གལ་སྲིད་དེའི་རིགས་འབྱུང་ཚེ་བྱེད་གཏེ་ངོས་བཟུང་སྟེ། སྐབས་དེར་དབུས་འོས་བསྡུ་ལས་ཁང་ལ་སྙན་སེང་ཞུས་ན། ང་ཚོས་ཁོང་རྣམ་པ་ཚོས་མ་མཐུན་མ་འགྲིག་པ་བྱས་པ་དག་ལ་ཉེས་ཆད་གང་འགེལ་མིན་ཐག་གཅོད་བྱེད་ཀྱི་རེད།
དྲི་བ། འོས་གཞིའི་སྐྱེ་བོ་དང་འོས་འཕེན་པ་ཞིག་ནས་འོས་ཤོག་འཕེན་དུ་འཇུག་པ་དང་། མི་འཇུག་པ་བཅས་ལ་ཐབས་ཤེས་རྒྱུད་སྐུལ་བྱས་རིགས་བྱུང་ཚེ་ཐག་གཅོད་ག་རེ་གནང་རྩིས་ཡོད།
ལན། ད་ལྟ་ང་ཚོས་ཉེས་ཆད་གཏན་འབེབས་བྱས་བཞག་པ་འདིའི་ནང་ལ་ཆ་ཚང་བ་དང་ཞིབ་ཕྲ་བཟོ་ཐུབ་རྒྱུ་དཀའ་ལས་ཁག་པོ་ཆགས་ཡོད་སྟབས། ང་ཚོས་མ་འོངས་པར་འོས་གཞི་དང་འོས་འཕེན་པས་འོས་བསྡུའི་སྒྲིག་གཞི་དང་འགལ་བའི་གནས་ཚུལ་རིགས་ཤེས་རྟོགས་འབྱུང་ཚེ། དེ་མ་ཐག་ཞིབ་འཇུག་བྱས་ནས་ཐག་གཅོད་བྱ་རྒྱུ་ཡིན། གལ་སྲིད་མ་འོངས་པར་འོས་གཞིའི་སྐྱེ་བོ་དང་འོས་འཕེན་པས་མི་གཞན་ལ་བརྒྱུད་སྐུལ་བྱས་ཏེ་འོས་ཤོག་འཕེན་འཇུག་པ་དང་མི་འཇུག་པ་སོགས་བྱས་ཚེ། དོ་བདག་འོས་འཕེན་པར་འོས་ཤོག་གང་ཡང་མེད་སྟབས་བརྩི་མེད་གཏོང་རྒྱུ་མེད་པར་བརྟེན། ལོ་བཅུའི་རིང་འོས་འཕེན་གྱི་ཐོབ་ཐང་འཕྲོག་རྒྱུ་དང་། འོས་གཞིའི་སྐྱེ་བོ་དེའི་འོས་ཤོག་ཆ་ཚང་རྩིས་མེད་གཏོང་རྒྱུ་ཡིན།
དྲི་བ། དབུས་འོས་བསྡུ་ལས་ཁང་ངོས་ནས་སྲིད་སྐྱོང་དང་སྤྱི་འཐུས་ཀྱི་འོས་མི་དང་ཁོ་ཚོའི་ཕྱོགས་གཏོགས་པས་འོས་བསྡུའི་ཁྱབ་བསྒྲགས་བྱེད་སྐབས། འོས་མི་གཞན་ལ་གཞི་མེད་སྐྱོན་འཛུགས་དང་ཆོལ་ཁ་ཆོས་ལུགས་ཀྱི་འཐེན་འཁྱེར། སྤྱི་ཚོགས་དབར་འཁྲུག་རྐྱེན་སློང་གཞིའི་བྱ་སྤྱོད་སྤེལ་མཁན་རིགས་བྱུང་ཡོད་མེད་གང་འདྲ་བྱས་ནས་རྟོག་ཞིབ་གནང་འཆར་ཡོད།
ལན། གལ་སྲིད་ས་ཆ་ཞིག་ལ་འོས་གཞི་བྱེ་བྲག་པ་ཁོ་རང་གིས་སྐད་ཆ་ཤོད་སྟངས་འདི་འདྲ་ཞིག་བཤད་པ་དང་ཚིག་བེད་སྤྱོད་བྱེད་སྐབས་ཐལ་ཆ་ཆེན་པོ་བྱུང་སྟེ། ཆོལ་ཁ་དང་ཆོས་བརྒྱུད། སྤྱི་ཚོགས་བཅས་ལ་བརྡབ་གསིག་བཏང་བ་མ་ཟད། དེའི་ཤུགས་རྐྱེན་དབང་གིས་ས་ཆ་གཞན་ཞིག་ལའང་གཅིག་མཚུངས་དོ་ཕོག་དངོས་སུ་ཕྱིན་ཡོད་ན། འོས་བསྡུ་ལས་ཁང་གི་སྒྲིག་གཞིའི་ནང་གསལ་ལྟར་ཉེས་ཆད་འགེལ་རྒྱུ་ཡིན། གལ་སྲིད་འཁོན་འབྲས་ར་མ་འཕྲོད་པའམ་མ་བྱུང་བ་ཡིན་ན། འོས་བསྡུའི་སྐབས་གནས་ཚུལ་ཙག་ཙིག་ལྷག་པ་དེ་ཚོར་རྟོག་ཞིབ་བྱེད་ཀྱི་ཡོད་པ་མ་རེད། གང་ཡིན་ཟེར་ན། ང་ཚོའི་སྤྱི་ཚོགས་འདི་མིས་བཟོས་པ་ཞིག་ཡིན་སྟབས། སྐབས་རེར་འོས་བསྡུའི་སྐབས་ཚིག་མཐོ་དམན་དང་གནས་ཚུལ་ཆུང་ཙག་རིགས་ལྷག་སྲིད་པ་ཞིག་རེད།
དྲི་བ། སྲིད་སྐྱོང་དང་སྤྱི་འཐུས་ཀྱི་སྔོན་འགྲོའི་འོས་བསྡུ་དེ་ཕྱི་ཟླ་ ༡༠ ཚེས་ ༡༨ ཉིན་གནང་གཏན་ཁེལ་ཡོད་སྟབས། སྐབས་དེར་བོད་མི་མང་ཆེ་བ་བལ་གོས་ཚོང་སར་ཡོད་པར་བརྟེན། འོས་བསྡུ་ལས་ཁང་གིས་འཆར་གཞི་གསར་པ་དེ་འདྲ་ག་རེ་ལག་བསྟར་བྱ་རྩིས་ཡོད།
ལན། དེའི་ཐོག་ལ་མང་ཚོགས་ཀྱིས་དགོངས་འཆར་ཞེ་དྲགས་ཡོད་པ་རེད། ད་ལྟ་ང་ཚོས་འབད་བརྩོན་བྱ་རྒྱུ་དེ་ག་རེ་རེད་ཟེར་ན། ཟླ་འདིའི་ཚེས་ ༡༥ དང་ ༡༦ གང་རུང་ཞིག་ལ་ལུ་དྷེ་ཡཱ་ཎཱར་བལ་གོས་ཚོང་མཁན་གྱི་བོད་པའི་ཁྲོམ་ས་ཁག་གི་མགོ་ཁྲིད་ཚོ་འཛོམས་ནས་ཚོགས་འདུ་ཞིག་བསྐོང་གི་ཡོད་སྟབས། ང་ཚོས་འོས་བསྡུ་ལས་ཁང་གི་དྲུང་འཕར་དང་ཕྱག་རོགས་བཏང་སྟེ། ས་གནས་སོ་སོའི་འོས་བསྡུའི་འགན་འཛིན་ལས་རོགས་ཤིག་བསྐོ་བཞག་བྱས་ཏེ་འོས་ལྡུག་ཐུབ་པའི་མཐུན་རྐྱེན་སྦྱོར་རྒྱུའི་འབད་བརྩོན་བྱེད་ཀྱི་ཡོད། ཁོང་རྣམ་པས་ང་ཚོས་འབད་བརྩོན་ཞུས་པ་ལྟར་ངོས་ལེན་གནང་བ་ཡིན་ན། བལ་གོས་ཚོང་མཁན་ཆེ་ཁག་ལ་འོས་ཤོག་འཕེན་ཐུབ་པའི་མཐུན་རྐྱེན་ཆ་ཚང་སྦྱོར་ཐུབ་པ་བྱ་རྒྱུ་ཡིན།
དྲི་བ། གཞུང་འབྲེལ་ངོས་ལེན་ཡོད་པའི་ཚོགས་པ་ཁག་ཕུད་པའི་སྤྱི་སྒེར་གྱིས་སྲིད་སྐྱོང་དང་སྤྱི་འཐུས་འོས་གཞིའི་སྐྱེ་བོ་དེར་ཡིག་ཐོག་ཆོག་མཆན་མ་ཞུས་པར། འོས་གཞིའི་སྐྱེ་བོ་དེའི་རྒྱབ་སྐྱོར་ཡིན་ཁུལ་བྱས་ནས་འོས་གཞི་བྱེ་བྲག་པར་གནོད་སྐྱེལ་ཆེད་ས་གནས་ཁག་ཏུ་རྒྱབ་གཉེར་གསལ་བསྒྲགས་དང་འགྲོ་སོང་གཏང་ཚེ། འོས་མིར་ཉེས་པ་གང་འདྲ་བྱས་ནས་གཏོང་གི་ཡིན།
ལན། འོས་མིར་ཉེས་པ་གང་ཡང་ཕོག་གི་མ་རེད། གང་ཡིན་ཟེར་ན། ད་ལྟ་ང་ཚོས་ཁོ་རང་གིས་ཆོག་མཆན་སུ་ལ་སྤྲད་ཡོད་མེད་ཀྱི་གནས་ཚུལ་ཆ་ཚང་ཞིག་མཁོ་སྒྲུབ་བྱེད་ཐུབ་ཀྱི་མེད་པ་མ་ཟད། ཕྱོགས་གཞན་ཞིག་ནས་ང་ཚོ་ཚང་མ་ལས་བསྐོས་བྱས་ནས་འོས་བསྡུའི་ལམ་སྟོན་བྱེད་བར་ཕྱོགས་བསྐྱོད་བྱེད་དགོས་སྟབས། ང་ཚོས་འོས་གཞིར་བཞེངས་མཁན་ཁོང་རྣམ་པར་ཁྱེད་རང་ཚོས་མི་སུར་ཆོག་མཆན་སྤྲད་ཡོད་མེད་བཀའ་འདྲི་ཞུ་དགོས་པ་ཞིག་ཆགས་ཡོད། ཁོང་རྣམ་པས་ང་ཚོར་ཁོ་ཚོར་བཀའ་འདྲི་ཞུས་ནས་ཆོག་མཆན་སྤྲད་པའི་མི་སྒེར་གྱི་ཐོ་གཞུང་སྤྲད་པ་དག་མིན་པ་ཚོས་ཁོ་ཚོའི་ཆོག་མཆན་མེད་པར་དེ་འདྲས་བྱས་པ་ཡིན་ན། ང་ཚོའི་ལམ་སྟོན་ནང་འཁོད་པ་ལྟར་གྱི་འགལ་འཛོལ་བྱེད་མཁན་གྱི་དོ་བདག་ཁོ་རང་ལ་ཉེས་པ་ཕོག་རྒྱུ་ལས་འོས་གཞིའི་སྐྱེ་བོར་ཉེས་པ་གང་ཡང་ཕོག་གི་མ་རེད།
དྲི་བ། འོས་ལྡུག་སྐབས་འོས་འཕེན་པར་དངོས་ཤུགས་བརྒྱུད་གསུམ་ནས་སྐུལ་སློང་ཤོག་རྫར་རིགས་འགྲེམས་སྤེལ་བྱེད་མཁན་བྱུང་ཡོད་མེད་སུས་རྟོག་ཞིབ་བྱེད་ཀྱི་རེད།
ལན། ང་ཚོའི་ལམ་སྟོན་ནང་ལ་འོས་ལྡུག་སྐབས་ཤོག་རྫར་རིགས་འགྲེམས་སྤེལ་བྱེད་མི་ཆོག་ཅེས་བཀོད་ཡོད་སྟབས། དེར་ས་གནས་འོས་བསྡུའི་ཚོགས་མི་རྣམ་པ་ཚོས་ཐུགས་སྣང་གནང་དགོས་པ་མ་ཟད། འོས་ལྡུག་སའི་ཁོར་ཡུག་ཁག་ནང་གནས་ཚུལ་དེ་རིགས་གཅིག་ཀྱང་མ་ལྷག་པ་བྱེད་རོགས་ཞེས་འབོད་སྐུལ་ཞུ་རྒྱུ་ཙམ་ལས་ང་ཚོར་བྱ་ཐབས་གང་ཡང་ཡོད་པ་མ་རེད། གལ་སྲིད་འོས་གཞིའི་སྐྱེ་བོ་དེས་གནས་ཚུལ་དེ་རིགས་བྱས་ཡོད་པ་ར་འཕྲོད་བྱུང་ཚེ། ས་ཁུལ་དེའི་འོས་ཤོག་ཆ་ཚང་རྩིས་མེད་གཏོང་རྒྱུ་དང་། དོ་བདག་སྒེར་གྱིས་བྱས་ན་ལོ་ལྔ་རིང་གཞུང་འབྲེལ་འོས་བསྡུའི་ཐོབ་ཐང་འཕྲོག་རྒྱུ་ཆགས་ཡོད།
དྲི་བ། འོས་བསྡུའི་སྒྲིག་གཞིའི་ནང་འོས་གཞི་སུ་ཐད་ནས་འོས་བསྡུའི་ལས་དོན་སྐོར་ཞེས་འཁོད་འདུག་པ་འདིར་མི་འདྲ་བས་གོ་བ་འདྲ་མི་འདྲ་ལེན་གྱི་འདུག་པས་འགྲེལ་བཤད་ཅིག་གནང་རོགས།
ལན། འོས་བསྡུའི་སྒྲིག་གཞིའི་ནང་འོས་གཞི་སུ་ཐད་ནས་འོས་བསྡུའི་ལས་དོན་སྐོར་ཞེས་བཀོད་དུས། འདིས་ག་རེ་ལབ་ཀྱི་ཡོད་རེད་ཟེར་ན། ང་ཚོས་འོས་བསྡུའི་ལས་དོན་ཆ་ཚང་ཡིན་པར་འགྲེལ་བཤད་ཞུ་གི་ཡོད་པ་མ་རེད། ང་ཚོས་འོས་བསྡུའི་ལས་དོན་ཞེས་པ་འདི་དབུས་དང་ས་གནས་ཀྱི་འོས་བསྡུའི་ལས་དོན་བྱེད་ཕྱོགས་སྐོར་ལ་དྲང་བདེན་མིན་པའི་གསལ་བསྒྲགས་དང་ཡིག་ཆ་འགྲེམས་སྤེལ་བྱས་པ་འདི་རྗོད་ཀྱི་ཡོད་པ་ར་འཕྲོད་དགོས་ཀྱི་ཡོད་པ་རེད། གང་ཡིན་ཟེར་ན། བཙན་བྱོལ་སྤྱི་ཚོགས་ཀྱི་འོས་བསྡུའི་བཀོད་སྡོམ་བྱེད་མཁན་དེ་དབུས་འོས་བསྡུ་ལས་ཁང་དང་ས་གནས་འོས་བསྡུ་ལས་ཁང་ཆགས་ཡོད་སྟབས། འདིས་དྲང་བདེན་མ་བྱུང་བའི་སྐྱོན་གནད་དེ་འདྲ་ཆགས་ན། སྤྱི་ཡོངས་ལ་དོ་ཕོག་ཆེན་པོ་ཞིག་འགྲོ་བཞིན་ཡོད་པའི་རྒྱུ་མཚན་ལ་བརྟེན་ནས། གལ་སྲིད་འོས་གཞིའི་སྐྱེ་བོ་དེས་དབུས་ས་གཉིས་ཀྱི་འོས་བསྡུའི་ལས་དོན་སྐོར་ལ་དྲང་བདེན་མིན་པའི་གནས་ཚུལ་བྱས་པ་ར་འཕྲོད་ན། ཁོ་རང་གི་འོས་ཤོག་རྩིས་མེད་གཏོང་གི་ཡིན་ལབ་ཀྱི་ཡོད་པ་རེད། ད་ལྟ་མི་མང་པོ་ཞིག་གིས་འདིར་འཁྲུག་སྣང་བྱུང་ནས་འོས་གཞིའི་སྐྱེ་བོ་དེའི་འོས་ཤོག་རྩིས་མེད་གཏོང་གི་རེད་ཟེར་བ་སོགས་ཀྱི་འགྲེལ་ལོག་རྒྱག་མཁན་དེ་འདྲ་ཡོང་གི་ཡོད་སྟབས། ད་རེས་གོ་སྐབས་འདི་བརྒྱུད་ནས་དུས་བབ་ནང་ལ་འགྲེལ་བཤད་ཅིག་རྒྱག་ཐུབ་ན་ཡག་པོ་ཡོང་ས་རེད་བསམ་ནས་ཞུས་པ་ཡིན། ང་ཚོས་དེ་ཚོའི་ཐོག་ལ་འགན་འཛིན་ལས་འཕར་གཉིས་སྐོར་བསྐྱོད་ནས་ཚུར་འཁོར་རྗེས།གསར་འགོད་ལྷན་ཚོགས་ཤིག་བསྐོང་ནས་འགྲེལ་བཤད་གསལ་པོ་རྒྱག་རྒྱུ་ཡིན།
གསར་འགོད་པ། དོན་གྲུབ།
