མ་འོངས་པའི་ལོ་ལྔ་ནས་བཅུའི་ནང་རྒྱ་ནག་དམངས་གཙོར་འགྱུར་སྲིད་པ་རེད།

བཙན་བྱོལ་བོད་མིའི་སྤྱི་མཐུན་མཉམ་འབྲེལ་གྱི་འགན་འཛིན་བཀྲ་ཤིས་དབང་འདུས་ལགས་ཀྱིས་ཉེ་ལམ་ཁོང་བཀའ་ཤག་སྐབས་བཅོ་ལྔ་པའི་སྲིད་སྐྱོང་འོས་གཞིར་བཞེངས་ཀྱི་ཡོད་པའི་གསལ་བསྒྲགས་གནང་ཡོད་སྟབས། འདི་གའི་གསར་ཁང་ནས་ཁོང་ལ་སྲིད་སྐྱོང་འོས་མིར་བཞེངས་བའི་དགོས་དམིགས་དང་མ་འོངས་ལས་འཆར་སོགས་ཀྱི་སྐོར་ལ་བཅར་འདྲི་ཞུས།

དྲི་བ། ཐོག་མར་སྐུ་ཉིད་ཀྱིས་ ༢༠༡༦ ལོའི་སྲིད་སྐྱོང་འོས་མིར་དང་བླང་གིས་ལངས་དགོས་པའི་རྒྱུ་མཚན་གཙོ་བོ་ཁག་ཅིག་ངོ་སྤྲོད་ཅིག་གནང་རོགས།

ལན། སྲིད་སྐྱོང་གི་འོས་གཞིར་ལངས་དགོས་པའི་རྒྱུ་མཚན་གཙོ་བོ་ང་ཚོའི་བོད་པ་ཚོར་༧རྒྱལ་བ་རིན་པོ་ཆེས་ཐུན་མོང་མ་ཡིན་པའི་དམིགས་བསལ་གྱི་དམངས་གཙོ་ཞིག་གསོལ་རས་སུ་གནང་ཡོད་པ་རེད། ཡིན་ན་དེའང་༧སྐྱབས་མགོན་རིན་པོ་ཆེས་ ༢༠༡༠ ལོའི་བར་ལམ་སྟོན་མཛད་ནས་ཕེབས་པ་རེད། ༢༠༡༠ ལོར་བཀའ་བློན་ཁྲི་པ་དང་སྤྱི་འཐུས་འོས་བསྡུ་དེ་ཧ་ཅང་ཚ་ཚ་འུར་འུར་བྱུང་སྟེ། ལོ་གཅིག་ལྷག་རིང་བགྲོ་གླེང་གཏམ་བཤད་རིགས་ཧ་ཅང་ཡག་པོ་བྱུང་པ་རེད། དེར་བརྟེན། ༧གོང་ས་མཆོག་གིས་ད་ལྟ་ང་ཚོའི་དམངས་གཙོ་ཡང་དག་པ་ཞིག་འགྲོ་བཞིན་འདུག ང་གཉིད་སྐྱིད་པོ་ཁུག་གི་འདུག་གསུངས་པ་རེད། ཡིན་ནའང་ ༢༠༡༦ ལོའི་སྲིད་སྐྱོང་འོས་བསྡུ་བསླེབ་ལ་ཉེ་ནའང་སྤྱི་ཚོགས་འཇམ་ཐིང་ཐིང་རེད། དེ་བཞིན་བར་ལམ་ཞིག་ནས་སྤྱི་ཚོགས་ནང་སེམས་ཁུར་ཡོད་མཁན་ཁག་ཅིག་གིས་ང་རང་སྲིད་སྐྱོང་དུ་ལངས་དགོས་པའི་རེ་སྐུལ་བཏོན་པ་དང་། སོ་སོར་མཚོན་ནའང་ལོ་ངོ་ ༢༠ ལྷག་རིང་ལས་ཀ་བྱས་པའི་ཉམས་མྱོང་མང་པོ་ཞིག་ཡོད་སྟབས། ད་ལྟ་སྲིད་སྐྱོང་གི་འགན་འཁུར་བའི་དུས་ཚོད་བསླེབས་འདུག་བསམ་ནས་ལངས་པ་ཡིན།

དྲི་བ། སྐུ་ཉིད་སྲིད་སྐྱོང་དུ་ཐོབ་པ་ཡིན་ན་ད་ལྟའི་བློ་བཟང་སེང་གེ་ལས་ལྷག་གི་ནུས་པ་དང་འཇོན་ཐང་ཡོད་སྙམ་པའི་དོན་ཚན་ཁ་ཤས་གསུང་རོགས།

ལན། ཕྱོགས་གཅིག་ནས་ང་ལ་ལོ་ ༢༠ ཡི་ཉམས་མྱོང་ཡོད་པ་རེད། ཉམས་མྱོང་དེའང་ཕྱི་འབྲེལ་དང་ཕྱི་རྒྱལ་སྐུ་ཚབ་དོན་གཅོད་དུ་ལོ་ ༥ ལྷག་རིང་ལས་ཀ་བྱས་པ་དང་། རྒྱལ་སྤྱིའི་ཚོགས་འདུ་མང་པོ་ཞིག་ཏུ་མཉམ་ཞུགས་བྱས་ཤིང་། ཆབ་སྲིད་དང་འབྲེལ་བའི་ཐོག་ལ་གཏམ་བཤད་ཀྱི་གོ་སྐབས་མང་པོ་བྱུང་། ལྷག་པར་དུ་ཨུ་རུ་སུའི་ནང་རྒྱལ་སྤྱིའི་རྩོད་རྙོག་འདུམ་འགྲིག་གི་ཚོགས་འདུ་ཞིག་ཏུའང་གཏམ་བཤད་དང་གྲོས་བསྡུར་བྱེད་རྒྱུ་བྱུང་ཞིང་། གཞིས་ཆགས་ཁག་ཏུ་ས་གནས་མགོ་འཛིན་གྱི་ཕྱག་ལས་གནང་ཕྱོགས་ལའང་རྒྱུས་གང་འཚམ་ཡོད། དཔལ་འབྱོར་ཐོག་ལའང་བོད་མིའི་སྤྱི་མཐུན་མཉམ་འབྲེལ་གྱི་སྤྱི་ཁྱབ་འགན་འཛིན་བྱས་རིང་བྱས་རྗེས་གང་འཚམ་བཞག་ཡོད། ཉམས་མྱོང་དེ་དག་གཞི་ལ་བཞག་པའི་ཐོག་ནས་སྲིད་སྐྱོང་འོས་མིར་ལང་གི་ཡོད་སྟབས། ད་ལྟའི་སྲིད་སྐྱོང་བློ་བཟང་སེང་གེ་ལས་ལྷག་ཅིག་བྱ་ཐུབ་པའི་སྤོབས་པ་དང་གདེང་ཚོད་གཉིས་ཀ་ཡོད།  

དྲི་བ། སྐུ་ཉིད་ཀྱིས་བཀའ་ཤག་སྐབས་བཅུ་བཞི་པའི་རིང་ལས་དོན་འཐུས་ཤོར་དང་སྲིད་བྱུས་འཛིན་སྟངས་ནོར་འཁྲུལ་སོགས་གང་དག་མཐོང་གི་ཡོད།

ལན། ད་ལྟའི་བཀའ་ཤག་གིས་ཆབ་སྲིད་ཐོག་ནས་བོད་རྒྱ་གྲོས་མོལ་དེ་སླར་གསོ་གནང་ཐུབ་ཡོད་པ་མ་རེད། དེའི་ཐོག་ལ་ད་ལྟའི་ཆར་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་དང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སོགས་ཉུང་དུ་ཕྱིན་ཏེ། རྒྱལ་སྤྱིའི་ཐོག་གི་ནུས་ཤུགས་ཚད་དམའ་རུ་ཕྱིན་ཡོད་པ་རེད། དུས་ཚོད་ཆུད་ཟོས་སུ་མ་བཏང་བའི་ཐོག་ནས་ཉམས་པ་སླར་གསོ་བྱ་རྒྱུ་ཧ་ཅང་གལ་ཆེན་པོ་ཞིག་ཆགས་འདུག ཤེས་ཡོན་ཐོག་ལ་མཚོན་ན། བོད་ཀྱི་སྐད་ཡིག་གལ་ཆེན་པོ་ཞེ་དྲགས་རེད། ཡིན་ནའང་ད་ལྟ་རྒྱ་བལ་འབྲུག་གསུམ་ནང་དུ་བོད་པའི་སྐད་ཡིག་ཉམས་ཆགས་ཞེ་དྲགས་འགྲོ་བཞིན་ཡོད་པ་རེད། ཕྱི་རྒྱལ་ཁག་གི་བོད་རིགས་གཞོན་སྐྱེས་མང་པོ་ཞིག་གིས་བོད་ཡིག་འབྲི་ཀློག་ཕར་ཞོག བོད་སྐད་ཐོག་བཀའ་མོལ་གནང་རྒྱུར་ཡང་དཀའ་ངལ་འཕྲད་ཀྱི་ཡོད་པ་རེད། ཤེས་ཡོན་སྲིད་བྱུས་ལ་མཚོན་ན་ལག་བསྟར་ཚད་དང་ལྡན་པ་ཞིག་ཡོང་ཐུབ་ཀྱི་མེད་སྟབས། སྤྱི་འཐུས་ལྷན་ཚོགས་ཀྱིས་ཞིབ་འཇུག་ཚོགས་ཆུང་བཙུགས་ཡོད་པ་རེད། དེ་དག་ལ་བལྟས་ཡོང་ན། བར་ལམ་ཞིག་ནས་ཕྱོགས་མང་པོ་ཞིག་ལ་འཐུས་ཤོར་ཕྱིན་ཡོད་པ་མཐོང་གི་ཡོད།

གཞིས་ཆགས་སྲ་བརྟེན་ཐོག་ལ་ཡིན་ནའང་ད་ལྟའི་ཆར་ལས་གཞི་གང་ཡང་འགྲོ་ཐུབ་ཀྱི་ཡོད་པ་མ་རེད། མཉམ་འབྲེལ་གྱི་ངོས་ནས་ལས་གཞི་ཤུགས་ཆེན་པོ་ཞིག་འགྲོ་བཞིན་ཡོད་ཀྱང་། བོད་མིའི་སྒྲིག་འཛུགས་ཀྱི་ངོས་ནས་དམིགས་བསལ་ད་ལྟའི་ཆར་འདི་ཡིན་ལབ་ནས་འཛིན་རྒྱུ་ཅི་གང་ཡོད་པ་མ་རེད། ཆིག་སྒྲིལ་ཐོག་ཡིན་ན་ཚང་མས་མཁྱེན་གསལ་རེད། བར་ལམ་ཞིག་ནས་གཞོན་ནུ་ཁ་བྲལ་ཕྱིན་པ་དང་། ནེའུ་ཡོག་ཏུ་རྙོག་གྲ་བྱུང་པ། དོལ་རྒྱལ་བསྟེན་མཁན་ནང་བོད་པ་མང་དུ་འགྲོ་བཞིན་ཡོད་པ་སོགས་ཕྱོགས་མང་པོ་ཞིག་ནས་ད་ལྟའི་ཆར་འཐུས་ཤོར་མང་པོ་འགྲོ་བཞིན་འདུག

དྲི་བ། སྐུ་ཉིད་རྒྱ་གར་ནང་སྐྱེ་འཚར་བྱུང་བ་ཞིག་ཡིན་སྟབས། གལ་སྲིད་སྐུ་ཉིད་སྲིད་སྐྱོང་འཐོབ་པ་ཡིན་ན། བོད་ནང་དང་རྒྱ་ནག་གི་སྐོར་ལ་རྒྱུས་མངའ་འདང་མིན་གྱི་དཀའ་ངལ་འཕྲད་སྲིད་དམ།

ལན། དེའི་ཐོག་ལ་དམིགས་བསལ་དཀའ་ངལ་ཡོད་པ་མ་རེད་བསམ་གྱི་འདུག ང་ལ་མཚོན་ན། སྔོན་ཆད་བོད་ནང་འགྲོ་མྱོང་ཡོད། ངས་ཕ་མ་གཉིས་འཁྲིད་དེ་བོད་ནང་སྐོར་སྐྱོད་བྱས་ཤིང་། བོད་ནང་གི་གནས་སྟངས་ཐོག་རྒྱུས་གང་འཚམ་ཡོད། ང་རང་གི་སྤུན་མཆེད་ཀྱང་བོད་ནང་ཡོད་པ་རེད།

དྲི་བ། ད་ལྟ་ང་ཚོའི་སྤྱི་ཚོགས་ནང་དབུ་མའི་ལམ་དང་རང་བཙན་ཞེས་ཆབ་སྲིད་ལངས་ཕྱོགས་གཉིས་ཡོད་པ་ལས། སྐུ་ཉིད་ཀྱིས་གང་ལ་རྒྱབ་སྐྱོར་གནང་གི་ཡོད་དམ།

ལན། ངས་ངོས་ནས་༧རྒྱལ་བ་རིན་པོ་ཆེས་སྐབས་དང་དུས་སུ་ལངས་ཕྱོགས་ག་རེ་བཟུང་བ་ཡིན་ན། དེ་ག་རང་གི་ཐོག་ཤར་སྐྱོད་བྱ་རྒྱུ་ཡིན། ད་ལྟའི་ཆར་༧རྒྱལ་བ་རིན་པོ་ཆེ་མཆོག་གིས་ཆབ་སྲིད་ལངས་ཕྱོགས་དེ་དབུ་མའི་ལམ་གསུང་གི་ཡོད་པ་རེད། ང་རང་ཡང་དེ་ག་རང་གི་ཐོག་ཤར་སྐྱོད་བྱེད་བཞིན་ཡོད། མ་འོངས་པར་རང་བཙན་གསུང་གི་ཡོད་ན་འདྲ། རང་སྲིད་རང་སྐྱོང་གསུང་གི་ཡོད་འདྲ། བདེན་པའི་ཨུ་ཚུག་གསུང་གི་ཡོད་ན་འདྲ། ང་དེའི་ཐོག་ལ་བསྐྱོད་རྒྱུར་དམ་བཅའ་བརྟན་པོ་ཡོད།

དྲི་བ། བཀའ་ཤག་སྐབས་བཅུ་གཉིས་བཅུ་གསུམ་སྐབས་ལ་བོད་མི་ཕྱི་རྒྱལ་དུ་བསྐྱོད་རྒྱུར་འདོད་པ་མེད་པའི་སྲིད་བྱུས་ཤིག་བཟུང་བ་རེད། གནད་དོན་དེའི་ཐོག་སྐུ་ཉིད་ཀྱིས་སྲིད་བྱུས་གང་འདྲ་ཞིག་འཛིན་འཆར་ཡོད་པ་དང་དེའི་རྒྱུ་མཚན་ཅི་ཡིན།

ལན། བོད་པ་ཕྱི་རྒྱལ་ལ་བསྐྱོད་རྒྱུར་བཀག་འགོག་བྱེད་དགོས་དོན་མི་འདུག་དྲན་ཡོད། བཀག་ཀྱང་འགོག་ཐུབ་པ་ཞིག་མ་རེད། ང་ལ་མཚོན་ན། བོད་མིའི་སྒྲིག་འཛུགས་ཀྱི་ངོས་ནས་ཆེད་དུ་ཕྱི་རྒྱལ་ལ་འགྲོ་བའི་ལམ་ཁ་འཚོལ་དགོས་པ་རེད་བསམ་གྱི་འདུག གང་ཡིན་ཞེ་ན། གཞུང་འབྲེལ་ཐོག་ནས་ལམ་ཁ་བཙལ་ན་ཁྲིམས་མཐུན་ཆགས་ཀྱི་ཡོད་པ་རེད། ད་ལྟའི་ཆར་བོད་པ་མང་པོ་ཞིག་ཁྲིམས་འགལ་ཐོག་ཕྱིན་ཏེ། སྤྱི་སྒེར་གཉིས་ཀར་དཀའ་ངལ་མང་པོ་ཞིག་འཕྲད་ཀྱི་ཡོད་པ་རེད། ཡིན་ནའང་སྐྱབས་བཅོལ་བོད་མིའི་སྤྱི་ཚོགས་ཟེར་བ་ཞིག་གནས་དགོས་ཀྱི་ཡོད་སྟབས། ཕྱི་རྒྱལ་ལ་ཕེབས་མཁན་ཚོར་ཕྱི་རྒྱལ་ནས་གཞིས་ཆགས་བཙུགས་ཏེ། སྐད་ཡིག་རིག་གཞུང་སྲུང་སྐྱོབ་བྱེད་ཐུབ་ལ་འབད་བརྩོན་བྱ་དགོས་ཀྱི་འདུག ཕྱི་རྒྱལ་དུ་བོད་ཀྱི་གྲོང་རྡལ་ཟེར་བ་དེ་འདྲ་བཙུགས་ཏེ། བོད་པ་གང་མང་མང་ས་ཆ་གཅིག་ལ་མཉམ་དུ་འདུག་ཐུབ་པ་དང་། ལོ་གཞོན་ཚོ་སློབ་གྲྭར་མཉམ་དུ་ཕྱིན་ཏེ་སྐད་ཡིག་སྲུང་སྐྱོབ་ཀྱི་ཐབས་ལམ་གསར་གཏོད་བྱ་རྒྱུ་དང་། རྒན་པ་ཚོར་དགོན་པ་འདྲ་བཙུགས་ཏེ་ཆོས་བྱེད་ས་སོགས་བཟོ་ཐུབ་པ་ཡིན་ན། ང་ཚོའི་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོ་བྱ་ཐུབ་ཀྱི་རེད་བསམ་གྱི་འདུག  

དེ་བཞིན། རྒྱ་བལ་འབྲུག་གསུམ་ནང་གི་གཞིས་ཆགས་ཁག་མུ་མཐུད་གནས་ཐུབ་ལ་འབད་བརྩོན་བྱ་དགོས་པ་དེའང་གལ་ཆེན་པོ་རེད། གཞིས་ཆགས་ཁག་ཏུ་དཔལ་འབྱོར་འདུ་འགོད་ལས་གཞི་ཤུགས་ཆེན་པོ་ཞིག་སྤེལ་དགོས་ཀྱི་འདུག ད་ལྟ་ཕྱི་རྒྱལ་དུ་འགྲོ་མཁན་མང་པོ་ཡོད་པ་དེའང་དཔལ་འབྱོར་གྱི་དཀའ་ངལ་ཞིག་གི་འོག་ནས་འགྲོ་བཞིན་ཡོད་པ་མརེད་མ་གཏོགས་དགའ་ཞིང་སྐྱིད་དྲགས་ནས་འགྲོ་ཡི་ཡོད་པ་མ་རེད། རྒྱ་བལ་འབྲུག་གསུམ་ནང་དུ་ཆབ་སྲིད་ཀྱི་དཀའ་ངལ་དང་། རང་དབང་མེད་པའི་དཀའ་ངལ་འཕྲད་པ་མ་རེད་ལ། རང་བྱུང་ཁམས་ཀྱི་གནོད་འཚེ་ཐེབས་པའང་མ་རེད། གཞིས་ཆགས་ནང་དཔལ་འབྱོར་གྱི་ཡོང་ཁུངས་མེད་སྟབས་ཕྱི་རྒྱལ་ཁག་ཏུ་མི་འགྲོ་རང་འགྲོ་ཆགས་ཀྱི་ཡོད་པ་རེད། དེ་དག་ལ་ཁྲིམས་མཐུན་ཐོག་ནས་འགྲོ་ཐུབ་པ་ཞིག་དང་། ཕར་ཕྱིན་ནའང་བོད་པ་ཚོ་མཉམ་དུ་གནས་ཐུབ་པ་ཞིག་བཟོ་རྒྱུ་གལ་ཆེན་པོ་རེད།

དྲི་བ། གལ་སྲིད་སྐུ་ཉིད་སྲིད་སྐྱོང་ཐོབ་པ་ཡིན་ན་ད་ལྟའི་བོད་མིའི་སྒྲིག་འཛུགས་ཀྱི་སྲིད་ཇུས་དང་སྒྲིག་གཞི་ལ་བསྒྱུར་བཅོས་གཏོང་དགོས་པ་གང་དག་མཐོང་གི་ཡོད།

ལན། འགྱུར་བ་གཏོང་དགོས་ས་དང་ལེགས་བཅོས་གཏོང་དགོས་ས་མང་པོ་འདུག དཔེར་ན། ས་ཁང་སྒྲིག་གཞི་བསྒྱུར་བཅོས་གཏོང་དགོས་ཀྱི་འདུག གང་ཡིན་ཞེ་ན། ད་ལྟ་ལག་བསྟར་བྱེད་ཐུབ་ཀྱི་ཡོད་པ་མ་རེད། དེ་བཞིན། སྲིད་ཇུས་གསར་པ་ཁག་ཅིག་གཏན་འབེབས་གནང་དགོས་ཀྱི་འདུག དཔེར་ན། མི་འབོར་འཕེར་རྒྱས་ཀྱི་སྲིད་ཇུས་དང་། ཕྱི་རྒྱལ་བོད་རིགས་གནས་སྡོད་ཀྱི་སྒྲིག་གཞི། སོ་ནམས་ཞིང་ལས་སྲིད་བྱུས་དེའང་བསྒྱུར་བཅོས་གཏོང་དགོས་ཀྱི་འདུག་དྲན་ཡོད། བོད་མིའི་སྒྲིག་འཛུགས་ཀྱི་ལས་བྱེད་ཚོར་འདས་པའི་ལོ་བཞི་ལྔ་ཞིག་ལ་ཕོགས་ཐོབ་བསྐྱར་ཞིབ་བྱས་ཡོད་པ་མ་རེད། གང་མགྱོགས་ཕོགས་ཐོབ་བསྐྱར་ཞིབ་བྱེད་དགོས་ཀྱི་འདུག གང་ཡིན་ཞེ་ན། བོད་མིའི་སྒྲིག་འཛུགས་འདི་གཞི་རྒྱ་ཆེན་པོ་རེད། ལྷག་པར་དུ་གཞུང་ཞིག་ལ་རྩི་བཞིན་ཡོད་པ་རེད། ལྷོད་ཡངས་ཕྱིན་ན་ལས་དོན་འཐུས་ཤོར་དང་ལས་བྱེད་ཚོའི་སེམས་ཤུགས་ཆག་གི་རེད་ལ་མི་མང་ཡང་གཞུང་ལ་བརྩེ་དུང་བརླག་འགྲོ་བ་རེད།  

དྲི་བ། སྐུ་ཉིད་ཀྱི་ལྟ་གྲུབ་བཞིའི་ནང་གི་ལས་ཤེས་ཡོན་སྐོར་ལ་འཆར་གཞི་གང་དག་ཡོད་པ་དང་། ད་ལྟའི་འགྲོ་སྟངས་ཐོག་འགྱུར་བ་གཏོང་དགོས་པ་ག་རེ་གཟིགས་ཀྱི་ཡོད།

ལན། ཤེས་ཡོན་ཐོག་ལ་ཤེས་ཡོན་སྲིད་བྱུས་ལག་བསྟར་ཐུབ་ཐབས་ལ་དངོས་ཤུགས་བརྒྱུད་གསུམ་ནས་འབད་བརྩོན་བྱེད་དགོས་པ་ཞིག་རེད། ཨང་དང་པོར་དགེ་རྒན་དང་ཤེས་ཡོན་སྲིད་བྱུས་ཐད་ཕྱག་ལས་གནང་མཁན་ཚོར་ཟབ་སྦྱོང་དང་སློབ་སྟོན་སོགས་ཀྱི་ལམ་ནས་ཤེས་ཡོན་སྲིད་བྱུས་ཐོག་ངེས་པ་རྙེད་པ་དང་། ཡིད་ཆེས་ཡོང་བ་ཞིག་བྱ་རྒྱུ་ཧ་ཅང་གལ་ཆེན་པོ་རེད། དེ་བཞིན། གཞི་རིམ་སློབ་གྲྭ་ཁག་ལ་ད་ལྟའི་ཆར་དགེ་རྒན་གྱིས་འདང་གི་མེད་པའི་དཀའ་ངལ་ཞིག་འདུག སློབ་གྲྭ་ཁག་ཅིག་ནང་སྔོན་མ་ཆོས་དགེ་དང་བོད་དགེ་ཞེས་རིགས་གསུམ་ཙམ་ཡོད་ཀྱང་། ད་ལྟ་དགེ་རྒན་གཅིག་མ་གཏོགས་མེད་པའི་གནས་སྟངས་འདུག་ལ། སློབ་གྲྭ་ལ་ལར་ཚན་རིག་དགེ་རྒན་མེད་པ་དང་། ཁ་ཤས་ལ་ཨང་རྩིས་དགེ་རྒན་མེད་པ་དེ་འདྲ་འདུག ང་རང་གི་བསམ་པར། བོད་སྐད་སྐད་ཡིག་སྲུང་སྐྱོབ་ཆེད་སློབ་གྲྭ་དམིགས་བསལ་འཛུགས་དགོས་པ་རེད་བསམ་གྱི་འདུག གཞི་རིམ་སློབ་གྲྭའི་ལག་འཁྱེར་ཡོད་མེད་ལ་མ་ལྟོས་པར་སྐད་ཡིག་རང་གི་ཐོག་ལ་ལོ་དགུ་དང་བཅུར་སྦྱོང་ས་ཡོད་པ། བོད་ཡིག་རང་གི་ཐོག་ནས་སློབ་གྲྭ་ཐོན་ན་འགྲོ་སའི་ལྟེ་གནས་དེ་འདྲ་འཛུགས་དགོས་ཀྱི་འདུག རྒྱལ་སྤྱིའི་ཐོག་འབུམ་རམས་པའི་བར་འགྲོ་ས་ཡོད་པ་བཞིན་བོད་ཡིག་ཐོག་ཏུའང་དེ་འདྲ་དགོས་ཀྱི་འདུག

དྲི་བ། གལ་སྲིད་སྐུ་ཉིད་སྲིད་སྐྱོང་ཐོབ་པ་ཡིན་ན་འཛིན་སྐྱོང་གཙོ་བོར་འཛིན་རྒྱུ་ཡིན་ནམ། བོད་པའི་རྩ་དོན་འཐབ་རྩོད་སོགས་ཀྱི་ཆབ་སྲིད་ལས་དོན་གཙོ་བོར་འཛིན་རྒྱུ་ཡིན།

ལན། ང་ཚོ་ཆབ་སྲིད་སྐྱབས་བཅོལ་བ་རེད། བོད་དོན་བདེན་མཐའ་གསལ་ཐབས་ཀྱི་ཆབ་སྲིད་དེ་གལ་ཆེ་ཤོས་ཆགས་ཡོད། བོད་དོན་བདེན་མཐའ་གསལ་ཐབས་དེའང་འཚེ་བ་མེད་པ་དང་གྲོས་མོལ་གྱི་ལམ་ནས་གསལ་ཐབས་བྱེད་དགོས་པ་རེད། བོད་རྒྱ་གྲོས་མོལ་བྱེད་པར་བོད་མིའི་སྒྲིག་འཛུགས་དེ་ཕྱོགས་གཅིག་ཆགས་ཡོད་སྟབས། སྒྲིག་འཛུགས་སྲ་བརྟན་དགོས་པ་གལ་ཆེན་པོ་རེད། བོད་མིའི་སྒྲིག་འཛུགས་སྲ་བརྟན་ཡོང་བ་ལ་གཞིས་ཆགས་སྲ་བརྟན་དགོས་པ་རེད། བོད་དོན་འཐབ་རྩོད་རྒྱུན་གནས་ཡོང་ཐབས་སུ་གཞོན་སྐྱེས་ཚོར་ཤེས་ཡོན་དང་མི་དམངས་ལ་དཔལ་འབྱོར་དགོས་པ་རེད། གལ་ཆེ་ཤོས་ང་ཚོའི་དོན་དག་ཐུག་ས་དེ་ག་བ་རེད་ཅེ་ན། བོད་དོན་བདེན་མཐའ་གསལ་ཐབས་དེ་གཞིས་ལུས་བོད་མིའི་ཆེད་དུ་རེད། གཞིས་ལུས་བོད་མིའི་ཆེད་དུ་ང་ཚོས་བོད་དོན་བདེན་མཐའ་གསལ་ཐབས་ལ་འབད་བརྩོན་བྱེད་དགོས་པ་རེད། དེར་འཕྲལ་ཕུགས་རྒྱང་གསུམ་གྱི་ཐོག་ནས་འཆར་གཞི་སྒྲིག་དགོས། འཕྲལ་དུ་བྱེད་དགོས་པ་དེ་གྲོས་མོལ་སླར་གསོ་ལ་ཐབས་ཤེས་བྱེད་དགོས་པ་དང་། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ཁག་སླར་གསོ་བྱས་ཏེ་རྒྱལ་སྤྱིའི་ཐོག་ནས་རྒྱ་ནག་ལ་གནོན་ཤུགས་སྤྲོད་ཐབས་དང་། ཕྱོགས་གཞན་ཞིག་ནས་རྒྱ་མིའི་དཔོན་རིགས་ཚོར་ཐད་ཀར་འབྲེལ་བ་བྱས་ཏེ་བོད་རྒྱ་གྲོས་མོལ་ཡོང་ཐུབ་བྱེད་རྒྱུ་དེ་གལ་ཆེ་ཤོས་ཆགས་འདུག

དྲི་བ། ད་ལྟ་བཙན་བྱོལ་བོད་མིའི་སྒྲིག་འཛུགས་ཀྱི་ངོས་ནས་བོད་ལ་རང་སྐྱོང་རྩོད་ལེན་བྱེད་བཞིན་པའི་སྐབས་འདིར། སྐུ་ཉིད་རང་ལ་ད་ལྟའི་རྒྱ་ནག་གི་ཆབ་སྲིད་གནས་སྟངས་དང་སྲིད་ཇུས་ཀྱི་དམིགས་འདུན་སྐོར་ལ་རྒྱུས་མངའ་གང་འདྲ་ཡོད།

ལན། རྒྱ་ནག་གི་ཆབ་སྲིད་ཐོག་ལ་ཕྱི་མིག་ཅིག་བལྟས་པ་ཡིན་ན། ད་ལྟ་ཞི་ཅིན་ཕིན་གྱི་སྐབས་ལ་རྒྱ་ནག་དམངས་གཙོ་ཅན་དུ་འགྱུར་བའི་རེ་བ་ཆེ་ཤོས་ཡོད་པ་རེད། བོད་དོན་བདེན་མཐའ་གསལ་བའི་རེ་བ་ཆེ་ཤོས་དེའང་ད་ལྟ་འདུག་དྲན་གྱི་ཡོད། གང་ཡིན་ཟེར་ན། མའོ་ཙེ་ཏུང་ཕར་བཞག་ནས་ཏིན་ཞའོ་ཕིན་གྱི་སྐབས་སུ་ང་ཚོར་འབྲེལ་བ་ཤུགས་ཆེན་པོ་ཞིག་བྱུང་ཡོད་པ་རེད། ཏིན་ཞའོ་ཕིན་གྱི་སྐབས་དང་ད་ལྟའི་ཞི་ཅིན་ཕིན་གཉིས་འདྲ་བོ་རེད། གཅིག་བྱས་ན་ལོ་ཁ་ཤས་ནང་ལ་ཞི་ཅིན་ཕིན་ཏིན་ཞའོ་ཕིན་ལས་ལྷག་གི་དབང་ཤུགས་ཆེ་བ་ཆགས་སྲིད་པ་རེད། དེར་བརྟེན། ཁོ་ལ་ཐག་གཅོད་བྱ་འདོད་ཡོད་ན་བྱེད་པའི་དབང་ཆ་ཡོད་པ་རེད། དཔེར་ན། ཅང་ཙེ་མིན་དང་ཧུའུ་ཅིན་ཐའོ་གཉིས་སྐབས། ཁོ་གཉིས་ལ་དབང་ཆ་གང་ཡང་ཡོད་པ་མ་རེད། བོད་དོན་དཀའ་ངལ་གསལ་དགོས་བསམ་པ་དང་རྒྱ་ནག་དམངས་གཙོར་བསྒྱུར་དགོས་བསམ་ནའང་དབང་ཆ་ཡོད་པ་མ་རེད། སྐབས་དེར་གཞུང་འབྲེལ་བཀའ་ཤག་ཅིག་ཡོད་པ་དེར་དབྱིན་སྐད་ནང་Politburo (ཆབ་སྲིད་ལྷན་ཁང་) ཟེར་གྱི་ཡོད་པ་རེད། སྲིད་འཛིན་སྔ་ཕྱི་དེ་གཉིས་མིང་ཙམ་རེད་མ་གཏོགས་ཐག་གཅོད་ཚང་མ་ཆབ་སྲིད་ལྷན་ཁང་གིས་བྱེད་དགོས་ཀྱི་ཡོད་པ་རེད། ད་ལྟའི་སྐབས་ལ་ཆབ་སྲིད་ལྷན་ཁང་ཞི་ཅིན་ཕིན་ཁོ་རང་གི་ལག་པར་ཡོད་པ་རེད། ལྷག་པར་ཏུ་རྒྱ་ནག་དམར་ཤོག་ཚོགས་པ་གནས་ཐུབ་པ་དེ་རྒྱ་ནག་ནང་ལྐོག་ཟ་རུལ་སུངས་ཤུགས་ཆེན་པོ་ཡོད་སྟབས། མི་མང་གི་ལས་འགུལ་རྩིས་མེད་བཏང་སྟེ་གཅིག་གིས་གཅིག་འགེབ་ཀྱི་ཡོད་པ་རེད། ད་ལྟའི་ཆར་ལྐོག་རྔན་རུལ་སུངས་དེ་གང་འཚམ་མར་ཆག་པའི་སྐབས་ལ་གཞན་པ་ཞིག་འབུར་དུ་འཐོན་ཡོང་གི་ཡོད་པ་རེད། རྒྱ་ནག་གི་ལྒང་བུའི་ནང་དུ་དབུགས་རྒྱག་བཞིན་འདུག སྔ་ཕྱི་མ་གཏོགས་རྒྱ་ནག་གི་དབུགས་ལྒང་བརྡོལ་ནས་དམངས་གཙོའི་ནང་བསྒྱུར་དགོས་པ་རེད་མ་གཏོགས་དམར་ཤོག་ནང་འདུག་ཐབས་ཡོད་པ་མ་རེད།

སྤྱིར་བཏང་ད་ལྟ་སྲིད་འཛིན་ཞི་ཅིན་ཕིན་གྱིས་སྲིད་ཇུས་དམ་དུ་གཏོང་གི་ཡོད་ཀྱང་། ཁོའི་དབང་ཤུགས་ཀྱང་ཆེ་རུ་འགྲོ་བཞིན་ཡོད་པ་རེད། དབང་ཆ་ཡོངས་རྫོགས་ཁོ་རང་གི་ལག་པར་བསླེབ་པའི་ཉི་མོར་ཁོས་རྒྱ་ནག་མི་མང་ལ་དམངས་གཙོ་སྤྲོད་དགོས་པ་རེད་མ་གཏོགས་འགྲོ་ས་གང་ཡང་ཡོད་པ་མ་རེད། ཁོས་དམངས་གཙོ་མ་སྤྲད་པར་ནམ་ཞིག་རྒྱ་ནག་དམངས་གཙོ་ཆགས་པ་ཡིན་ན། ཁོ་ནག་པོ་ཆགས་འགྲོ་བ་རེད། གནད་དོན་དེ་ཁོའི་སེམས་ནང་ཧ་ཅང་གསལ་བོ་ཡོད་པ་རེད། རྒྱ་ནག་ལ་དམངས་གཙོ་སྤྲོད་མཁན་དེ་ཁོ་རང་ཆགས་པ་ཡིན་ན། ཁོ་རང་རྒྱ་ནག་གི་དམངས་གཙོའི་ཡབ་ཆེན་(The Father of Chinese Democracy) ཆགས་ཀྱི་ཡོད་པ་རེད། རྒྱ་ནག་ལ་དམངས་གཙོ་སྤྲད་པའི་ཉིན་མོར་བོད་དོན་དཀའ་ངལ་དེའང་རང་བཞིན་གྱིས་སེལ་འགྲོ་བ་རེད།

མདོར་བསྡུས་ན། ངས་རྒྱུ་མཚན་གསུམ་གྱི་ཐོག་ནས་ཞི་ཅིན་ཕིན་གྱིས་རྒྱ་ནག་ལ་དམངས་གཙོ་སྤྲོད་རྒྱུ་རེད་ཟེར་གྱི་ཡོད། གཅིག ཁོ་ལ་སྤྲོད་རྒྱུའི་དབང་ཚད་དེ་ཡོད་པ་རེད། གཉིས། ཞི་ཅིན་ཕིན་གྱི་ཨ་ཕ་དེ་དམངས་གཙོ་དོན་གཉེར་བ་ཟེར་ན་འདྲ། གང་ལྟར་འགྱུར་བ་དགོས་ཀྱི་འདུག་ཟེར་མཁན་ཞིག་རེད། གསུམ། ཁོས་དམངས་གཙོ་མ་སྤྲད་རང་སྤྲད་རེད། ཁོས་མ་སྤྲད་ནའང་རྒྱ་ནག་དམངས་གཙོར་འགྱུར་ངེས་རེད། ནམ་ཞིག་རྒྱ་ནག་རང་བཞིན་གྱིས་དམངས་གཙོ་ཆགས་པ་ཡིན་ན་ཁོ་རང་ནག་ཉེས་ཅན་ཆགས་ཀྱི་ཡོད་པ་རེད། མ་འོངས་པའི་ལོ་ལྔ་ནས་བཅུའི་ནང་རྒྱ་ནག་ལ་འགྱུར་བ་ཤུགས་ཆེན་པོ་ཞིག་ཕྱིན་ཏེ་རྒྱ་ནག་དམངས་གཙོ་ཅན་དུ་འགྱུར་སྲིད་པ་རེད།   

དྲིབ། སྐུ་ཉིད་ཀྱིས་ཉེ་ལམ་དྷ་རམ་ས་ལ་ནས་གཏམ་བཤད་གནང་སྐབས། བོད་རྒྱ་གྲོས་མོལ་སྐོར་ལ་འཆར་གཞི་གང་ཡོད་གསལ་བོ་ཞིག་གསུངས་མ་སོང་། དེའི་སྐོར་གྱི་འཆར་གཞི་དང་ཐབས་ལམ་གང་འདྲ་བརྒྱུད་རྒྱུ་ཡིན་ནམ།

ལན། ཁག་ཅིག་ངས་གོང་ནས་བཤད་པ་བཞིན་བོད་རྒྱལ་གྲོས་མོལ་ཡོང་ཐབས་ལ་རྒྱལ་སྤྱིའི་གནོན་ཤུགས་དགོས་ཀྱི་ཡོད་པ་རེད། གསར་འགྱུར་བརྒྱུད་ལམ་ལ་ཕྱི་གསལ་ནང་གསལ་བྱེད་མི་རུང་བའི་གནས་ཚུལ་ཁག་ཅིག་ཡོང་གི་རེད། དེ་བཞིན། བཀའ་ཤག་སྐབས་བཅུ་གཉིས་དང་བཅུ་གསུམ་སྐབས་མཁས་དབང་ཟམ་གདོང་རིན་པོ་ཆེ་མཆོག་གིས་ཐབས་ལམ་གང་འདྲ་གནང་འདུག སྔོན་མ་གང་འདྲ་བྱས་འདུག་དེ་ཚོ་བསླར་གསོ་བྱས་ཏེ། དེའི་ཐོག་ལ་རིག་པ་གསར་པ་བཏང་སྟེ་འཆར་གཞི་གསར་པ་བསྒྲིག་རྒྱུ་གལ་ཆེན་པོ་རེད་བསམ་གྱི་འདུག

དྲི་བ། སྐུ་ཉིད་ཀྱིས་ལོ་མང་པོར་བོད་མིའི་སྒྲིག་འཛུགས་ལ་ཞབས་ཞུ་ཞུས་མྱོང་ཡོད་ན་ཡང་རྗེས་སུ་དགོངས་ཞུས་དགོས་པའི་རྒྱུ་མཚན་ག་རེ་ཡིན་ནམ།

ལན། སྤྱིར་བཏང་ངས་བོད་མིའི་སྒྲིག་འཛུགས་ནང་ལས་ཀ་བྱས་པ་རེད། ཡིན་ནའང་ངས་བོད་པའི་སྤྱི་ཚོགས་ནང་ལས་ཀ་བྱེད་རྒྱུ་དེ་གལ་ཆེན་པོར་མཐོང་གི་ཡོད། མཉམ་འབྲེལ་དེ་དཔེ་མི་སྲིད་པའི་ཆེན་པོ་རེད། ཁ་ཤས་ཀྱིས་བོད་མིའི་སྒྲིག་འཛུགས་ཀྱི་ལག་པ་གཡས་པ་དེ་མཉམ་འབྲེལ་རེད་ཟེར་གྱི་ཡོད་པ་རེད། གཞིས་ཆགས་ཆེ་ཁག་བཅོ་ལྔའི་འགན་དེ་ངས་འཁུར་བསྡད་ཡོད། བོད་མིའི་སྒྲིག་འཛུགས་ནང་ང་ཟུང་དྲུང་གནས་རིམ་ཐོག་ལ་དྲུང་ཆེ་མ་ཆགས་བར་ལས་འགན་དེ་ཙམ་ཡོད་པ་མ་རེད། དྲུང་ཆེ་ཆགས་ནའང་ལྷན་ཁང་གཅིག་མ་གཏོགས་ཡོད་པ་མ་རེད། ལྷན་ཁང་གཅིག་དེ་སྤྱི་ཚོགས་ཀྱི་བྱེད་སྒོ་གཅིག་གི་ཐོག་ལ་མ་གཏོགས་འབྲེལ་བ་ཆགས་ཀྱི་ཡོད་པ་མ་རེད། མཉམ་འབྲེལ་དེ་གཞི་རྒྱ་ཆེན་པོ་ཞེ་དྲགས་རེད། གཞིས་ཆགས་ ༡༥ ཡི་ནང་ལ་དཔལ་འབྱོར་དང་ཤེས་ཡོན། སློབ་གསོ། འཕྲོད་བསྟེན། རིག་གཞུང་གཅེས་འཛིན་སོགས་ཕྱོགས་ཚང་མར་འགན་འཁུར་དགོས་པའི་མཐུན་རྐྱེན་ཡོད་པ་རེད། དེར་བརྟེན། ངས་མཉམ་འབྲེལ་དེ་ལྷན་ཁང་གཅིག་ལས་རྒྱ་ཆེ་བར་མཐོང་གི་ཡོད། ད་ལྟའི་ཆར་མཉམ་འབྲེལ་གྱིས་བོད་མིའི་སྒྲིག་འཛུགས་ཀྱི་ལས་ཀ་ཕྱེད་ཀ་ཞིག་བྱེད་བཞིན་ཡོད་པ་རེད་བསམ་གྱི་ཡོད། མཉམ་འབྲེལ་ཟེར་བ་འདི་ལ་༧གོང་ས་མཆོག་དང་མཁས་དབང་ཟམ་གདོང་རིན་པོ་ཆེ་སོགས་ཀྱིས་ཧ་ཅང་གལ་ཆེན་པོར་གཟིགས་ཀྱི་ཡོད་པ་རེད། མ་འོངས་པར་རྒྱ་གར་གྱི་ཆབ་སྲིད་ལ་འགྱུར་བ་ཕྱིན་ཏེ། བོད་མིའི་སྒྲིག་འཛུགས་འདི་གནས་དང་མི་གནས་ཀྱི་གནས་སྟངས་ཆགས་ཀྱང་། མཉམ་འབྲེལ་འདི་དག་དེབ་སྐྱེལ་ཡོད་པའི་ཚོགས་པ་ཡིན་སྟབས་དཀའ་ངལ་ཡོད་པ་མ་རེད། དེར་བརྟེན་ང་ཚོ་རྒྱ་གར་ནང་གི་སྐྱབས་བཅོལ་བོད་མི་ཚོར་མཉམ་འབྲེལ་གྱིས་འགན་འཁུར་བའི་དུས་ཤིག་བསླེབ་མི་སྲིད་པ་མ་རེད། ང་ཚོ་དེབ་སྐྱེལ་ཡོད་པའི་ཚོགས་པ་ཞིག་ཡིན་སྟབས། སུ་གང་གིས་ཀྱང་མེད་པ་བཟོ་ཐབས་ཡོད་པ་མ་རེད། དེར་བརྟེན། ངས་གཞུང་ཞབས་ལས་དགོངས་པ་ཞུས་ཏེ། མཉམ་འབྲེལ་ནང་ལས་ཀ་བྱས་པ་དང་། འདས་པའི་ལོ་བཞི་ལྷག་རིང་དཀའ་ལས་བརྒྱབ་ནས་ལས་དོན་མང་པོ་བརྩམས་ཏེ་གྲུབ་འབྲས་ཆེན་པོ་ཐོན་ཡོད།

 དྲི་བ། སྐུ་ཉིད་ཀྱིས་ཉེ་ལམ་དྷ་རམ་ས་ལར་གཏམ་བཤད་གནང་སྐབས། གཞིས་ཆགས་ཁག་ཏུ་སྨན་ཁང་ཡོད་ན་སྨན་པ་མེད་པ་དང་། སྨན་པ་ཡོད་ན་སྨན་མེད་པ། སྨན་ཡོད་པ་དེའང་རྫུན་མ་ཡིན་སྐོར་གསུངས་པར། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གསལ་བསྒྲགས་ཤིག་སྤེལ་ཡོད་པ་དེ་གཟིགས་སོང་ངམ།

ལན། འཕྲོད་བསྟེན་ལས་ཁུངས་ཀྱི་ལན་འདེབས་དེ་ངས་ལབ་པ་དེ་ག་རང་གཅིག་པ་གཅིག་རྐྱང་གསུངས་འདུག ག་རེ་གསུངས་འདུག་ཟེར་ན། ང་ཚོར་ཨམ་ཆི་ ༡༦ ཡོད་གསུངས་པ་རེད། སྨན་ཞབས་པ་ ༡༠༠ ཙམ་ཞིག་ཡོད་གསུངས་པ་རེད། ང་ཚོར་གཞིས་ཆགས་ལྔ་བཅུ་ང་གྲངས་ཤིག་ཡོད་པ་དེར་སྨན་ཁང་ཆེ་ཆུང་བདུན་ཅུ་བརྒྱད་ཅུ་ཞིག་ཡོད་པ་རེད། གཞིས་ཆགས་ཚང་མའི་ནང་སྨན་ཁང་ཡོད་པ་རེད། གཞིས་ཆགས་ཁག་ཁ་ཤས་ནང་སྨན་ཁང་བཞི་ལྔ་ཡོད་པ་རེད། དཔེར་ན། ལ་དྭགས་ལྟ་བུར་མཚོན་ན། སྨན་ཁང་ཨ་མ་ཞིག་ཡོད་པ་རེད། དེར་སྨན་ཁང་ཆུང་བ་གསུམ་ཙམ་འདུག ངས་གཞིས་ཆགས་ཚང་མ་ཞུས་མེད། དཔེ་མཚོན་ཙམ་ཞུས་ན། ལ་དྭགས་དང་མེའོ་སོགས་སུ་ད་ལྟ་ཨམ་ཆི་ཡོད་པ་མ་རེད། ཁ་ཐོར་དེ་ཚོའི་ནང་ལ་སྨན་ཁང་མང་པོ་ཡོད་པ་རེད། དེར་བརྟེན། ཨམ་ཆི་ ༡༦ ཡོད་གསུངས་པ་དེ་ག་རེ་ཆགས་སོང་།

གསར་འགོད་པ། འཇིགས་མེད་རྒྱ་མཚོ།