ལྷོ་བྱང་ཀོ་རི་ཡའི་དམག་འཐབ།

དེ་རིང་ལྷོ་ཀོ་རི་ཡའི་བདེ་སྲུང་ལྷན་ཁང་གིས་བྱང་ཀོ་རི་ཡར་དྲག་ཤུགས་དཔྱད་ནས་འཁོན་ལན་བསློག་རྒྱུ་ཡིན་པ་ཕྱི་བསྒྲགས་བྱས་འདུག

དེ་རིང་ལྷོ་ཀོ་རི་ཡའི་བདེ་སྲུང་ལྷན་ཁང་གིས་བདུན་ཕྲག་སྔོན་མའི་ནང་བྱང་ཀོ་རི་ཡའི་དམག་མིས་ལྷོ་བྱང་ཀོ་རི་ཡའི་བར་གནས་ས་མཚམས་ཁུལ་དུ་ (Korean Demilitarized Zone) ས་འོག་འབར་རྫས་གས་གཏོར་བྱས་ཏེ། ལྷོ་ཀོ་རི་ཡའི་མཐའ་སྲུང་དམག་མི་ཁག་ཅིག་ལ་རྨས་སྐྱོན་བཟོས་ཡོད་པ་དེར། བྱང་ཀོ་རི་ཡར་སྐྱོན་བརྗོད་བྱས་ཡོད་པ་མ་ཟད་དྲག་ཤུགས་དཔྱད་ནས་འཁོན་ལན་བསློག་རྒྱུ་ཡིན་སྐོར་བསྒྲགས་འདུག

རོའུ་ཌར་དང་བྷི་བྷི་སི་གསར་ལམ་ཐོག་ལྷོ་ཀོ་རི་ཡ་བདེ་སྲུང་ལྷན་ཁང་གི་མགྲིན་ཚབ་པ་ཀེམ་མིན་སུག་ (Kim Min-Seok) གིས། བདུན་ཕྲག་སྔོན་མའི་རེས་གཟའ་མིག་དམར་ཉིན་བྱང་ཀོ་རི་ཡའི་དམག་དཔུང་གིས་ལྷོ་བྱང་ཀོ་རི་ཡའི་བར་གནས་ས་མཚམས་ཁུལ་དུ་ས་འོག་འབར་རྫས་གསུམ་གས་གཏོར་བྱས་ཏེ། མཐའ་སྲུང་དམག་མི་གཉིས་ཀྱི་ཡན་ལག་གཅོད་འབྲེག་བྱེད་དགོས་ཐུག་ཡོད་པ་མ་ཟད། མ་འོངས་པར་དེ་ལས་མང་བ་དྲག་ཤུགས་བྱ་སྤྱོད་སྤེལ་རྒྱུའི་གྲ་སྒྲིག་བྱེད་བཞིན་ཡོད་སྟབས། ད་ལྟ་ལྷོ་ཀོ་རི་ཡ་གཞུང་གིས་ས་མཚམས་ཁུལ་དུ་དམག་མི་འགྲེམས་འཇོག་བྱས་ཏེ་མཐའ་ཁུལ་བརྟན་སྲུང་བྱེད་བཞིན་ཡོད། ཅེས་དང་། ལྷོ་ཀོ་རི་ཡའི་དམག་སྤྱི་ཀུ་ཧུང་མཱོ་(Ku Hong-mo) ཡིས། ད་ཐེངས་བྱང་ཀོ་རི་ཡས་ལྷོ་ཀོ་རི་ཡར་འཁྲུག་རྐྱེན་སློང་གཞིའི་བྱ་འགུལ་སྤེལ་བ་འདི་ནི། དེ་སྔོན་རྒྱལ་ཁབ་གཉིས་བར་བཞག་པའི་དམག་མཚམས་འཇོག་རྒྱུ་དང་བཙན་འཛུལ་མི་བྱ་རྒྱུའི་གྲོས་མཐུན་དང་རྒྱབ་བརྒལ་ཆགས་ཡོད་སྟབས། ང་ཚོས་བྱང་ཀོ་རི་ཡར་དམག་དྲངས་ནས་འདས་གྲོངས་སུ་སོང་བའི་དམག་མི་ཚོའི་དགྲ་ཤ་ལེན་ཐུབ་པ་བྱ་རྒྱུ་ཡིན། ཞེས་བརྗོད་འདུག

ནེའུ་ཡོག་དུས་བབ་ཀྱིས་དེ་སྔོན་ལྷོ་ཀོ་རི་ཡ་གཞུང་གིས་ཨ་རིར་རམ་འདེགས་བྱས་ཏེ་རྒྱལ་ས་སོལ་ནང་བྱང་ཀོ་རི་ཡའི་འགྲོ་བ་མིའི་ཐོབ་ཐང་རྟོག་ཞིབ་བྱ་ཆེད་ལས་ཁུངས་ཤིག་གསར་འཛུགས་བྱས་ཡོད་སྟབས། བྱང་ཀོ་རི་ཡའི་གཞུང་གིས་བཀག་བསྐྱིལ་འོག་ཡོད་པའི་ལྷོ་ཀོ་རི་ཡའི་མི་སེར་ཀློད་གྲོལ་བཏང་མེད་པ་མ་ཟད། བདུན་ཕྲག་རྗེས་མའི་ནང་ལྷོ་ཀོ་རི་ཡའི་ནང་ཨ་རི་དང་ལྷོ་ཀོ་རི་ཡ་བར་མཉམ་ལས་དམག་སྦྱོང་བྱ་རྒྱུ་ཡིན་པར། བྱང་ཀོ་རི་ཡས་དེ་ནི་བྱང་ཀོ་རི་ཡར་བཙན་འཛུལ་བྱ་རྒྱུའི་བསྐྱར་སྦྱོང་དམག་སྦྱོང་ཞིག་ཡིན་ཚུལ་སྐྱོན་འཛུགས་བྱས་ཡོད། ༢༠༡༠ ལོར་བྱང་ཀོ་རི་ཡས་ཆུ་འོག་འབར་མདེལ་བཞག་ནས་ལྷོ་ཀོ་རི་ཡའི་བྱིངས་གྲུ་ཞིག་གཏོར་ཏེ་དམག་མི་ ༤༦ བསད་ཡོད་པ་མ་ཟད། ད་ཐེངས་ས་མཚམས་ཁུལ་དུ་ས་འོག་འབར་རྫས་བཞག་ནས་ལྷོ་ཀོ་རི་ཡའི་དམག་མི་གཉིས་ལ་རྨས་སྐྱོན་ཚབས་ཆེན་བཏང་ཡོད་སྟབས། ལྷོ་ཀོ་རི་ཡ་གཞུང་གིས་བྱང་ཀོ་རི་ཡར་འཁོན་ལན་བསློག་སྲིད་པ་ཞིག་ཡིན་ཡང་། ད་ལྟ་བྱང་ཀོ་རི་ཡས་ལྷོ་ཀོ་རི་ཡའི་རྒྱལ་ས་སོལ་ལ་ཉོབ་ཐུབ་པའི་སྒྱོགས་མདེལ་འཕེན་ཆོག་ཆོག་བྱས་ནས་བསྡད་ཡོད་སྟབས། ལྷོ་ཀོ་རི་ཡས་བྱང་ཀོ་རི་ཡར་དཔལ་འབྱོར་གྱི་ཉེས་ཆད་འགེལ་སྲིད་པ་ལས་དྲག་འཐབ་ བྱས་ནས་འཁོན་ལན་བསློག་རྒྱུ་ཁག་པོ་ཆགས་ཡོད། བདུན་ཕྲག་འདིའི་རེས་གཟའ་སྤེན་པ་ཉིན་ཁྱིམ་མཚེས་རྒྱལ་ཁབ་གཉིས་ཀྱིས་ཉི་ཧོང་གི་ བཙན་འཛུལ་ལས་བཅིངས་གྲོལ་ཐོབ་སྟེ། ལོ་ངོ་ ༧༠ འཁོར་བའི་དུས་སྟོན་སྲུང་བརྩི་ཞུ་བཞིན་ཡོད་སྟབས། རྒྱལ་ཁབ་གཉིས་བར་འབྲེལ་ལམ་བསྐྱར་གསོ་ཐུབ་རྒྱུའི་གོ་སྐབས་ལེགས་པོ་ཞིག་ཆགས་ ཡོད་ཀྱང་། ད་ལྟ་ལྷོ་ཀོ་རི་ཡས་ཨ་རི་དང་མཉམ་ལས་དམག་སྦྱོང་བྱ་རྒྱུ་མཚམས་འཇོག་མ་བྱས་པ་མ་ཟད། བྱང་ཀོ་རི་ཡས་ངོས་ནས་ཀྱང་ས་མཚམས་ཁུལ་དུ་བསྟུད་མར་ས་འོག་འབར་རྫས་གས་གཏོར་དང་། ཤུགས་ཚད་འབྲིང་བའི་སྒྱོགས་མདེལ་འདྲ་མིན་ཚོད་ལྟ་བྱས་ནས་ལྷོ་ཀོ་རི་ཡར་འཇིགས་སྣང་སྐུལ་བཞིན་ཡོད་སྟབས། མ་འོངས་པར་རྒྱལ་ཁབ་གཉིས་བར་འབྲེལ་ལམ་འཕེལ་རྒྱས་འགྲོ་རྒྱུ་ཁག་པོ་ཆགས་ཡོད་ཅེས་བཀོད་འདུག

རྒྱ་གར་ཧིན་རྡུ་དུས་བབ་ཐོག་ལྷོ་ཀོ་རི་ཡར་ཡོད་པའི་ཨ་རིའི་དམག་དོན་བཀོད་དོམ་ཁང་གིས། ད་ཐེངས་བྱང་ཀོ་རི་ཡས་ས་མཚམས་ཁུལ་དུ་ས་འོག་འབར་རྫས་གས་གཏོར་བྱས་ཏེ། ལྷོ་ཀོ་རི་ཡའི་དམག་མིར་རྨས་སྐྱོན་བཏང་ཡོད་སྟབས། རྒྱལ་སྤྱིའི་རྒྱལ་ཁབ་ཁག་གིས་བྱང་ཀོ་རི་ཡར་ཆད་པ་གཅོད་དགོས་ཞེས་དང་། ལྷོ་ཀོ་རི་ཡའི་གཙུག་ལག་སློབ་ཆེན་གྱི་དགེ་རྒན་ཆེན་མོ་བ་ཡཱང་མཱོ་ཇན་གྱིས། ད་ཐེངས་བྱང་ཀོ་རི་ཡས་ཁྱིམ་མཚེས་རྒྱལ་ཁབ་གཉིས་ཀྱི་བར་གནས་ས་མཚམས་ཁུལ་དུ་དམག་འཐབ་སློང་གཞིའི་བྱ་སྤྱོད་བརྩམས་ཡོད་སྟབས། ལྷོ་ཀོ་རི་ཡས་བྱང་ཀོ་རི་ཡར་དཔལ་འབྱོར་གྱི་ཉེས་ཆད་འགེལ་རྒྱུ་ལས་གདམ་ག་གཞན་ གང་ཡང་ཡོད་པ་མ་རེད་ཅེས་བརྗོད་འདུག

གསར་འགོད་པ། དོན་གྲུབ།